1 Byambo 5 - Libuka Lya Kuyela

Bazukulya Lubena

¹ Aba banengi bazukulya Lubena ou wengile mweli ku bana babalume ba Yakobo ou watumbiwile Ishalela. Ndaba Lubena walalile na umo ha bakaza tatiyendi wakwinginina wayawile wushwana wendi, pe wapanikiwile ku bana ba Yoshefwa.

² Hinge noho mushobo wa Yunda wengile wakushuma shikuma, kuya kwatweshele kufuma ntwamina wa mishobo nimwayo ya Yoshefwa.

³ Lubena, mweli wa Yakobo ou watumbiwile Ishalela, wabelekele bana banaa babalume, bengile ba Hanoki na palu na Heziloni na Kalimi.

⁴ Bazukulya Yowele aba, Shemaya na Ngongi na Shimeyi

⁵ na Mika na Leiya na Mbaalu

⁶ na Mbeyela. Mwene wamunene waku Ashiliya lizina lyendi Tingilati Pilesha, wakwatile Mbeela mukakutwaminina mushobo wa Lubena pe wamutwalile ku wuntapwa.

⁷ Muhoko wa mazina aba lupashi bakakutwaminina mavumo a mushobo wa Lubena bengile ba Yeyiwelu na Zakaliya

⁸ na Mbela mwana Azazi wa mulume, muzukulya Shema wa mulume wa ku livumo lya Yowele. Elye livumo lyekalile mu Aloya mu nginza yaku mushamuko kukuma naku Nembo na Mbaalu Meyoni.

⁹ Bekalile na zingombe zazingi mu litunga lya ngiliyande pe kami bazikile mu litunga kukuma naku libelelengwa liya lyakakuma naku nzila yaku mushinzi wa Yufuleti ku mushamuko.

¹⁰ Ha shikati sha mwene Shaulu, mushobo wa Lubena walwishile Bahangali pe babazihile mu nzita na kuzika mu litunga lyabo ku mbalila yaku mushamuko wa Ngiliyande.

Bazukulya Ngandi

¹¹ Mushobo wa Ngandi wekalilenga ku ncelele ya litunga lya Lubena mu litunga lya Mbashani, kukakuma naku Shaleka ku mushamuko.

¹² Yowele wengile mukulwane ku livumo lyalinene. Pe Shafwamu wengile mukulwane wa livumo lya wubili. Yanayi na Shafwati bengile bakulwane mu mavumo amina mu Mbashani.

¹³ Bawushinda wabo mu mavumo awa mutanu na abili, bengile ba Mayikulu na Meshulama na Shemba na Yolayi na Yakani na Ziya na Emba.

¹⁴ Bengile bazukulya Ambihayile mwana Huli, bankakazabo ku mwaka batutikile kuli Ambihayile mwana Huli. Huli wengile mwana Yalowa, Yalowa wengile mwana Ngiliyande, Ngiliyande wengile mwana Mayikulu, Mayikulu wengile mwana Yeshishayi, Yeshishayi wengile mwana Yando, Yando wengile mwana Mbuzi.

¹⁵ Ahi mwana Ambindiyelu muzukulya Nguni, niye wengile mukulwane wa mavumo awa.

¹⁶ Niho bazikile mu matunga a Mbashani na Ngiliyande muyo mu minzi na mabuyishilo nimwawo amu Shaloni.

¹⁷ Ebye byambo byatikitiwile mu matena a Mwene Yotamu wamu Yunda na Mwene Yelombowami wamu Ishalela.

Bakanzita ba mishobo yaku mushamuko

¹⁸ Ku mushobo wa Lubena na Ngandi naku mushobo wa Manashe waku Mushamuko kwekalile bakanzita 44,760. Balongeshiwile kulwisha makebo na zimpoko za mikwale na bipando bya mikunzi.

¹⁹ Bayile ku nzita mu kulwisha mushobo wa Bahangali ba ku Yetula na Nafwishi na Nondambu.

²⁰ Bakulupilile muli Nyambi na kulombela kukwendi ngayi abayavwe. Pe Nyambi wakumbwile malombelo wabo, niho abapanikile ngovu za kukona Bahangali na bakanzita ba baminabo.

²¹ Bapukwile makamela a bamalamo babo 50,000 na bambelele 250,000 na bambongolo 2,000 na bantapwa 100,000.

²² Bazihile bamalamo babengi ndaba nzita yengile ya shifungo sha Nyambi. Bakazikile mu litunga liyo kutwala naku shikati sha kuya mu wuntapwa.

Bantu ba mushobo wa Manashe

²³ Bantu ba Manashe ba ku mushamuko bazikilenga mu litunga lya Mbashani kukakuma naku Mbaalu Helimoni naku Sheniya naku Lipili Lya Helimoni ku ncelele pe bantu bavulile shikuma.

²⁴ Aba nibo bengile bakulwane ku mavumo wabo, ba Efwila na Ishi na Eliyela na Aziliyela na Yelemiya na Hondabiya na Yahindiyelu. Nimwabo bengile bakanzita ba kutakalala, bakakutwaminina ba kulimukiwa ku mavumo wawo.

Mishobo yaku Mushamuko yikutwaliwa mu wuntapwa

²⁵ Ngoboni bantu bengile bakubula kwoloka kuli Nyambi wa bankakazabo pe bamukanine na kulemesha banyambi ba mishobo iya atandile Nyambi mu litunga.

²⁶ Nohobene Nyambi wengishile mwene wamunene wamu litunga lya Ashiliya lizina lyendi Pula, kami walimukiwile ngayi Tingilati Pilesha, mu kulwisha litunga lyabo. Wapukwile mishobo ya Lubena na Ngandi na Manashe waku mushobo na kubatwala ku Hala naku Hamba naku Hala naku mushinzi wa Ngozani, oku bashili na lelo.