1 Byambo 29 - Libuka Lya Kuyela

Zintupu za ha kuzika Litala lya Nyambi ya Ngula

¹ Mwene Ndavita watongwezele shikungulukilo nimwasho ngayi, “Mwanami Sholomoni unengi muntu ou anahata Nyambi, ngoboni ushili kanuke kami shilolo enzilile. Mulimo ukutendiwa unengi wawunene shikuma ndaba ou kaliha unengi musheke wa bantu, ngoboni linengi Litala lya Nyambi ya Ngula.

² Nakabakana shikuma ha ku wahisha byuma bya ku tendesha Litala lya Nyambi, bya ngolinde na shiliva na lubemba na byondo na maleenge na mamanya a mishobo nimwayo amawahe shikuma a kulelema na mamanya akutangisha aku bumba bifwekesha na wingi wa mamanya a kubyazima akushuma.

³ Ha byuma ebye nimwabyo nawahisha napanikile shiliva na ngolinde yaku wuheti wami amimwine, ndaba nahakile Litala lya Nyambi.

⁴ Napaniki wulemu wa ngolinde ya ku shama yaku Ofwila ya kupitakana matani 100 na wulemu wa shiliva ya ku shama kwakwipi na matani 240 ya kulambwililisha limota lya Litala lya Nyambi.

⁵ Kami napanikile byuma nimwabyo ebye batendeshelenga bantu bawutungu. Hayabo yani kami washenge uli na mutima wakulifungula ngayi apane ntupu nahiya kuli Nyambi ya Ngula?”

⁶ Niho bakulwane ba mavumo na babilolo ba mishobo ya Ishalela na bakulwane banzita na bakakwendesha wuheti wa wene batupwile byuma ebye

⁷ bya mulimo waha Litala lya Nyambi. Bapanine wulemu wa ngolinde wakupitakana matani 170 na wulemu wa shiliva wakupitakana matani 340 na wulemu wa lubemba kwakwipi na matani 620 na wulemu wa byondo wakupitakana matani 3,400.

⁸ Pe baya bekalile na mamanya amawahe shikuma a kulelema bawayakile mu Mfuma ya Litala lya Nyambi, eye endeshelenga Yehiyelu wa livumo lya Ngeshona wa Kalevi.

⁹ Niho bantu bawahililile ha ku mona bakakutwaminina babo bapaninenga na shifungo sha mutima kuli Nyambi ya Ngula. Mwene Ndavita kami wawahililile shikuma.

Ndavita ukuyemeza Nyambi

¹⁰ Mwene Ndavita wayemezele Nyambi ya Ngula kwakuyo bene kumbili ya likunge nimwalyo ngayi, “Obe Nyambi ya Ngula, Obe Nyambi wa nkaka yetu Ishalela, mwanga uyemeziwenga mwaya myaka.

¹¹ Obe wamunene na ngovu na wuwahe na maleema na mukakukoma. Byuma nimwabyo bili muyilu na byuma nimwabyo bili hanci binengi byobe, kami uli mwene na kalela wakupitakana nimwabo.

¹² Wuheti na maleema byafuma kukwobe, ukulela byuma nimwabyo. Nyala na ngovu bili mu liboko lyobe, ukutwesha kunenehesha muntu na kumushumisha.

¹³ Haya, Obe Nyambi yetu, tukukambilila na kuyemeza, wuwahe wa lizina lyobe.

¹⁴ “Ngoboni bantu bami na nami mwa shikuma kutwesha kukupana shuma shimo tufwako, ndaba byuma nimwabyo byafumanga kukwobe, kami tunabweshe byuma ebye binengi byobe.

¹⁵ Obe Nyambi ya Ngula ukulimuka ngayi wumi wetu ukupita ngonehe bayeni na banyambangizi, ngonehe batendele bankakazetu. Matena etu akulifweka ngo kwenda kwa mimvulu, kami kutwesha kupanza ku lufu tufwako.

¹⁶ Obe Nyambi ya Ngula Nyambi yetu, tunalete wuheti ou nimwawo hamo mukutenda Litala lya kulemeeka lizina lyobe lya shizila, kami wuheti nimwawo wafuma kukwobe, kami niwo wenga wobe.

¹⁷ Nikulimuka ngayi wezekanga mutima wa muntu na muntu, kami wawahililanga na bantu ba kupwisha. Napana ebye nimwabyo kukwobe mu kupwisha namu kulunga na mutima wakufunga. Kami namono eshe bantu bobe, aba banakungulukili kuno, banalete ntupu kukwobe na ku wahilila.

¹⁸ Obe Nyambi ya Ngula Nyambi ya bankakazetu ba Abulahama na Ishaki na Ishalela, lama eshe shikonzi sha bantu bobe na kushishumisha mu mitima ya bantu bobe mwaya myaka. Kami balamenga, benge bakulunga kukwobe shikati nimwasho.

¹⁹ Panika mwanami Sholomoni mutima nimwawo wakushinga kwombatala ndayano zobe na kufundiziza kwobe na mazu obe na byuma nimwabyo biya walayile na kutenda Litala lyobe, elye nawahishili byuma ebye.”

²⁰ Niho Ndavita atongwezele bantu ngayi, “Yemezenu Nyambi ya Ngula, Nyambi yenu.” Pe shikungulukilo nimwasho sha yemezele Nyambi ya Ngula, Nyambi ya bankakazabo. Kami balambilenga na ku shintama hanci na kupana lileema kuli Nyambi ya Ngula na kuli mwene kami.

²¹ Oho kwashile, bazihile babimuna kwinga nkombela kuli Nyambi ya Ngula. Kufungila ku nkombela iya bakombelelele zinkombela za kuhokesha, bankunzi 1,000 na babikungwe bya bambelele 1,000 na bana ba bambelele 1,000 hamo na zinkombela zabo za waine. Kami bakombelelenga zinkombela zazingi zaha Baishalela.

²² Nohobene mutena uyo bekalile na ku wahilila shikuma aha balilenga ku meho a Nyambi ya Ngula. Pe, ha shikati sha wubili babokeleleho kukuwa lukuwa hali Sholomoni ngayi niye tuhu mwene. Bamuwabishile mazi kwinga kalela wabo, mu lizina lya Nyambi ya Ngula na Zandoki kwinga mukankombela.

²³ Nohobene Sholomoni washwanine tatiyendi Ndavita ha litanda elye emikile Nyambi ya Ngula. Wengile mwene wakutwesha byuma, pe mikoka nimwayo ya Ishalela ya mwombatalile.

²⁴ Babilolo na bakanzita nimwabo, hinge bana ba Ndavita babalume bamina, nimwabo kami bakulupishile kwinga bakulunga kuli Sholomoni ngayi niye tuhu mwene.

²⁵ Nyambi ya Ngula wayuvwishile litunga nimwalyo lya Ishalela bowa wakutina Sholomoni, kami wamwingishile wamuleemu shikuma kupitakana bamyene nimwabo baya balelele Ishalela.

Eshe alelelenga Ndavita

²⁶ Ndavita mwana Njeshe walelele mu Ishalela nimwamo.

²⁷ Walelele mu Ishalela myaka 40, walelele myaka 7 mu Hembuloni na myaka 33 mu Yelushalema.

²⁸ Wafwile mu wukulukazi shikuma, hinga aheta na kuwana maleema, kami mwanendi Sholomoni wamushwanine kwinga mwene.

²⁹ Byambo bya Mwene Ndavita, ku balika ku kutatika kukuma ku mamaninino, byatikitiwa mu byambo bya miluwe ba Nyambi bahatu, ba Shamwele na Natani na Ngandi.

³⁰ Ebye byambo bikututongweza eshe alelelenga, Mwene Ndavita na ngovu ekalile nazo na byuma nimwabyo biya byaholokele kukwendi naku Ishalela naku wene wa mikoka yabazinguluka.