1 Byambo 28 - Libuka Lya Kuyela

Kufundiziza kwa Ndavita ha Litala lya Nyambi

¹ Mwene Ndavita watongwezele babilolo bamu Ishalela nimwabo kukungulukila mu Yelushalema. Nohobene babilolo ba mishobo nimwayo na babilolo aba bendeshelenga wuheti na bimuna biya byengilenga bya mwene na bana bendi, hamo na babilolo ba ku musheke na bakulwane ba bakanzita na babalemu nimwabo bakungulukilile mu Yelushalema.

² Mwene Ndavita wemanine kumbili yabo pe wambile ngayi, “Bawushinda wami, nyuvwililenu. Nashingile kutendela Likwati lya Kulimama litala lya ku shuma kwinga malyatilo a mawulu a Nyambi ya Ngula, Nyambi yetu. Naliwahishililenga kuzilika Litala lya Nyambi mu kumulemeeka.

³ Ngoboni Nyambi wankanishile kutenda Litala lya kulemeeka Lizina lyendi, ndaba nili mukanzita, kami nayitile mukeza wawingi.

⁴ Nyambi ya Ngula, Nyambi wa Ishalela, wahatile ami na bazukulyami kulela Ishalela mwaya myaka. Wahatile mushobo wa Yunda kwinga bakakutwaminina, kami kuli Yunda wahatileko ba lupashi lwa tate. Ku ba lupashi baya nimwabo shamuwahilishile kuncimba kunyinga mwene mu Ishalela nimwamo.

⁵ Wampana bana babengi, kami kukwabo nimwabo wahatileho Sholomoni kulela Ishalela mu wene wa Nyambi ya Ngula.

⁶ “Nyambi ya Ngula wambile kukwami ngayi, ‘Mwanobe Sholomoni niye ukatenda Litala lyami na binzanza byami, ndaba namuhata kwinga mwanami, kami Ami nikenga tatiyendi.

⁷ Nikashumisha wene wendi mwaya myaka, ndi ukuzamina kwombatala shiwahe mazu wami nimwawo na ndayano zami nimwazo ngonehe akutenda wuluno.’

⁸ “Pe haya, enu bantu bami nili na kumi laya ku meho a Nyambi yetu na ku meho a shikungulukilo sha Baishalela nimwabo, enu bantu ba Nyambi ya Ngula, ngayi mwombatale shiwahe byuma nimwabyo biya anatulaya Nyambi ya Ngula, Nyambi yetu. Nohobene kami ngayi mwanga muzamine kukona litunga lino lyaliwahe, nohobene kami ngayi mwanga mukalishiyile ku bancwana ba ku mikoka ya kumbili mwaya myaka.”

⁹ Kami wambile nehe kuli Sholomoni ngayi, “Obe mwanami Sholomoni, nikukulaya ngayi ulilongeshe kulimuka Nyambi ya batatiyobe na kumutendela na mutima umo na kushinga kwa ngana zobe. Nyambi ukulimuka bihanganiko byetu nimwabyo na likwilu lya mitima yetu. Ndi ukuya kukwendi pe ukakutambula. Ngoboni ndi ukutengulukila kwashenge, pe ukakufutamina mwaya myaka.

¹⁰ Uku fwanina kulimuka ngayi Nyambi ya Ngula unakuhata ngayi umutendele Litala lyendi lya kuzila. Haya shuma mutima mwanga ulitende.”

¹¹ Ndavita wapanine Sholomoni bifunda ha kuzika mitumbwe ya Litala lya Nyambi nimwalyo myanya ya kwinginina na bishete na tumpenci nimwato twa hayilu na mwanya wa kuyela na mwanya wa Kuyela Shikuma omu balyambwililishilenga ku wubi.

¹² Wamupanine kami bifunda nimwabyo ekalilenga nabyo mu mutima bya binzanza bya Litala lya Nyambi ya Ngula na tumpenci twazingulukako na bishete bya byuma bya mu Litala lya Nyambi nabya zintupu za kufunguliwila kuli Nyambi ya Ngula.

¹³ Ndavita kami wamufundizizile mwakwendeshela bakankombela na Balevi ha kutenda milimo yabo, mukutenda mulimo wa Litala lya Nyambi nimwalyo na kulama byuma bya mu Litala lya Nyambi nimwabyo.

¹⁴ Wamufundizizile sha kutendesha shiliva na ngolinde ngayi ou wulemu wukakuma hati ou wafwanina kutendeshiwa byuma bya Litala lya Nyambi.

¹⁵ Wamufundizizile kami wulemu wa ngolinde ou wafwanina kutendeshiwa lumuni na lumuni naku lyeyeko na lyeyeko lya lumuni, na meyeko a shiliva kuya na milimo wabyo,

¹⁶ nawa zitebulu za shiliva, kami nawa zitebulu za ngolinde, eze zayakiwilenga mipumpa ya mankende apanikiwilenga kuli Nyambi.

¹⁷ Wamufundizizile kami sha kutendesha ngolinde ya ku shama ngayi wulemu wa ngolinde wukukuma hati wafwanina kutendeshiwa ha kufula zinkombola za mincomo na zindonga za kukunama na zintesho na shiliva na ngolinde ukakuma hati wafwanina kutendeshiwa ha kufula zindonga zazinene.

¹⁸ Kami wulemu wa ngolinde ya ku shama wukakuma hati wafwanina kutendeshiwa kaala aha bakahokeshelanga incence, nawa kutendesha shifwekesha sha shikocikala sha makelumbi a mbando aya akatandubwila mbando zawo ha Likwati lya Kulimama kwa Nyambi ya Ngula.

¹⁹ Niho Mwene Ndavita ambile ngayi, “Ebye nimwabyo byekalilenga mu biyongola byatikitiwile liboko lya Nyambi ya Ngula hinga lyekala hahami, ebye nibyo ampanine ngayi nibitende.”

²⁰ Ndavita wambile kuli mwanendi Sholomoni ngayi, “Winge wakukanca na ku shuma. Balika mulimo kami hinga witabila shuma shimo ngayi shikukanishe. Nyambi ya Ngula, Nyambi Ou nikutendela milimo, uli hamo nanobe. Kukakushiya wufwako, ngoboni ukekala hamo nanobe hantu unamanishi mulimo ou ukutendiwa ha litala lyendi.

²¹ Bakankombela na Balevi banapanikiwi milimo ya kutenda mu Litala lya Nyambi. Bakamilimo ya wutungu wa byuma nimwabyo bali na mitima ya ku kuyavwa, kami bantu nimwabo na bakakutwaminina babo bali ku maboko wobe.”