1 Byambo 27 - Libuka Lya Kuyela

Kwendesha bya nzita na kwendesha litunga

¹ Owe niwo muhoko wa mazina a bakulwane ba mapashi a Ishalela na bakakutwaminina mavumo na babilolo babo bendeshelenga mulimo wa wene. Ku ngonda na ngonda ha mwaka, likunge lya kulitapulula lya bantu 24,000 bekalilenga ha mulimo na kwendeshiwa ku mukulwane wa mulimo ha ngonda iyo.

² Bamina bengile bakulwane ba bakanzita ha ngonda na ngonda. Ngonda wakutatika, Yasho Mbeyami mwana Zambindiyelu wengile mukulwane wa likunge lya bakulwane ba bakanzita 24,000.

³ Niye wengile wamu litanga lya livumo lya Pelizi wa mushobo wa Yunda.

⁴ Ngonda wawubili, Ndondayi muzukulya Ahohi wengile mukulwane wa likunge lya bantu 24,000. Mikiloti wengile mukulwane wawubili kukwendi.

⁵ Ngonda wawuhatu, Mbenaya mwana mukankombela Yehoyanda wengile mukulwane wa likunge lya bantu 24,000.

⁶ Mbenaya wengile mukakutwaminina wampupo wa baya bantu Makumi Ahatu. Mwanendi Amizambandi wamushwanine kwinga mukulwane wa likunge elye.

⁷ Ngonda wawunaa, Ashaheli yayiyendi Yowambu, wengile mukulwane wa likunge lya bantu 24,000. Mwanendi Zembandiya wamushwanine.

⁸ Ngonda wa mutanu, Shamuhuti muzukulya Izahale, wengile mukulwane wa likunge lya bantu 24,000.

⁹ Ngonda wa mutanu na umo, Yila mwana Yikesha wa mulume waku Tekoya wengile mukulwane wa likunge lya bantu 24,000.

¹⁰ Ngonda wa mutanu na zibili, Helezi wa Kaefulemu waku Peloni wengile mukulwane wa likunge lya bantu 24,000.

¹¹ Ngonda wa mutanu na zihatu, Shibekayi waku litunga lya Husha, wengile mukulwane wa likunge lya bantu 24,000. Niye wengile wa litanga lyamu livumo lya Zela wa mushobo wa Yunda.

¹² Ngonda wa mutanu na zinaa, Ambiyeza waku Anatoti ku litanga lya mushobo wa Mbenjamani wengile mukulwane wa likunge lya bantu 24,000.

¹³ Ngonda wawulikumi, Mahalayi waku Netofwa, ou wengile wa litanga lyamu livumo lya Zelayi, wengile mukulwane wa likunge lya bantu 24,000.

¹⁴ Ngonda wawulikumi na yimo, Mbenaya waku Pilotoni ku litunga lya mushobo wa Efulemu, wengile mukulwane wa likunge lya bantu 24,000.

¹⁵ Ngonda wawulikumi na zibili, Helundayi waku Netofwa, ou wengile muzukulya Otiniyele, wengile mukulwane wa likunge lya bantu 24,000.

¹⁶ Owe niwo muhoko wa mazina a bakakwendesha mishobo ya Ishalela. Mukakwendesha mushobo wa Lubena wengile Eliyeza mwana Zikali. Mukakwendesha mushobo wa Shimiyoni wengile Shefwatiya mwana Maaka.

¹⁷ Mukakwendesha mushobo wa Levi wengile Hashambiya mwana Kemuwele. Mukakwendesha mushobo wa Aloni wengile Zandoki.

¹⁸ Mukakwendesha mushobo wa Yunda wengile Elihu, umo ha bayayizendi Mwene Ndavita. Mukakwendesha mushobo wa Ishaka wengile Omili mwana Mayikulu.

¹⁹ Mukakwendesha mushobo wa Zembuloni wengile Ishimaya mwana Ombandiya. Mukakwendesha mushobo wa Nafwitali wengile Yelimoti mwana Aziliyela.

²⁰ Mukakwendesha mushobo wa Efulemu wengile Hoshiya mwana Azaziya. Mukakwendesha mushobo wa Manashe waku Mponci wengile Yowele mwana Pendaya.

²¹ Mukakwendesha mushobo wa Manashe waku Ngiliyande wengile Indo mwana Zakaliya. Mukakwendesha mushobo wa Mbenjamani wengile Yaashiyelu mwana Ambina.

²² Mukakwendesha mushobo wa Ndani wengile Azalelu mwana Yelohama aba bengile bakulwane ba mishobo ya Ishalela.

²³ Mwene Ndavita kaliha walabile bantu aba babulile kukuma ku myaka makumi abili, ndaba ya shikulupisho sha Nyambi ya Ngula sha kuhanyisha bantu ba Ishalela ngonehe nyenye za kuyilu.

²⁴ Yowambu mwana Zeluya, watatikile kulaba bantu ngoboni wabulile kumanisha. Nyambi washushwile Ishalela ndaba ya kulaba okwe. Nohobene kulaba kwa mamaninino kaliha kwatikitiwile mu mabuka a Mwene Ndavita.

Bakakwendesha wuheti wa wene

²⁵ Owe niwo muhoko wa mazina a baya bendeshelenga bya wuheti wa wene. Azimaveti mwana Andiyelu wengile mukakwendesha bishete bya wene. Yonatana mwana Uziya wengile mukakwendesha bishete bya mu zinkena namu minzi namu tumpenci namu zimbalila nimwazo zamu litunga.

²⁶ Ezili mwana Kalembu wengile mukakwendesha bakakulima na milimo nimwayo yamu mafuba.

²⁷ Shimeyi mwana Lama wengile mukakwendesha mafuba a mikabo ya shinyanca. Zambindi mwana Shefwana wengile mukakwendesha matala akutendela waine.

²⁸ Mbaalu Hanani waku Ngendela wengile mukakwendesha mafuba a mitondo ya olive na mukuyu mu binkanda bya ku mponci. Yowashi wengile mukakwendesha litala lya mazi a olive.

²⁹ Shilitayi wengile mukakwendesha matanga a bimuna mu mbuwa ya Shaloni. Shafwati mwana Andilayi wengile mukakwendesha matanga a zingombe mu mikulo.

³⁰ Ombila wa Kaishimaele, wengile mukakwendesha bakamela. Yendiya waku Melonoti wengile mukakwendesha bambongolo.

³¹ Yazizi wa Kahangali, wengile mukakwendesha matanga a bambelele na bampongo. Nimwabo aba bengile bakulwane ba ku wuheti wa mwene Ndavita.

³² Yonatana kanyantu ka Ndavita, wengile muntu wawutungu mu kubela kami wakulilongesha shikuma. Yonatana na Yehiyelu mwana Hakimoni bengile bakulwane ba ku mona bya ku longesha kwa bana ba mwene.

³³ Ahitofwele wengile mukakubela wa mwene, Hushayi wa kaakite wengile muhoni wa mwene.

³⁴ Yehoyanda mwana Mbenaya washwanine Ahitofwele na Ambiyatale bengile bakakubela. Yowambu wengile mukulwane wa banzinta ba wene.