1 Byambo 22 - Libuka Lya Kuyela

¹ Nohobene Ndavita wambile ngayi, “Aha niho hakazikiwila Litala lya Nyambi ya Ngula. Aha kami niho hakazikiwila kaala bakakombelelanga bantu ba Ishalela zinkombela za kuhokesha.”

Kuliwahisha ha kuzika Litala lya Nyambi

² Mwene Ndavita watongwezele mapukwenda nimwabo, aba bazikilenga mu litunga lya Ishalela, kukungulukila hamo, pe wabayakile ku mulimo. Bamina kukwabo bawahishilenga mamanya akuzikisha Litala lya Nyambi.

³ Pe wamupaninenga mishiinzi yayinene ya byondo bya kufula zindonga na bikwatisho bya bihala bya ku mapangati a bitondo na lubemba lwalwingi lwa kubula kutwesha kulabiwa.

⁴ Waliyuvwashanine na bantu ba ku Tile naku shindoni kumuletelanga mishiinzi yayingi ya bishimi bya shinda kuli Ndavita.

⁵ Ndavita wahanganikile ngayi, “Litala lya Nyambi liya akatenda mwanami Sholomoni liku fwanina kwinga lyaliwahe shikuma na kukomokesha na mpupo mu kaye nimwako. Ngoboni Sholomoni nengi ndumbana kami shilolo enzilile, pe niku fwanina kumuwahishilako.” Nohobene Ndavita wawahishile mishiinzi yayinene ya byuma bya kuzikisha oho shilolo afwe.

⁶ Wehanine mwanendi Sholomoni na kumulaya ngayi atende Litala lya Nyambi ya Ngula, Nyambi wa Ishalela.

⁷ Ndavita wambile ngayi, Mwanami nashingi kuzikila lizina lya Nyambi ya Ngula, Nyambi yami litala.

⁸ Ngoboni Nyambi ya Ngula wantongwezele ngayi nazihile bantu babengi kami nalwile zinzita zazingi. Pe haya ndaba nayiti mukeza wawingi, kaliha wetabilile ngayi nimuzikile litala kulemeeka lizina lyendi.

⁹ Hinge shingi noho wetabilile na shikulupisho oho ambile ngayi, “Ukekala na mwana wa mulume ou ukalela mu ku mwena, ndaba nikumupanika ku mwena ku bamalamo bendi nimwabo. Lizina lyendi niye Sholomoni, ndaba ha shikati sha kulela kwendi nikapanika Ishalela ku mwena na kwikala shiwahe.

¹⁰ Niye ukanzikila litala kulemeeka lizina lyami. Ukenga mwanami, kami nikenga tatiyendi. Nikashumisha wene wendi mu Ishalela mwaya myaka.”

¹¹ Haya obe mwanami, mwanga Nyambi ya Ngula, Nyambi yobe, ekale hamo nanobe, kami mwanga alame shikulupisho shendi akutwesheshe kumuzikila litala.

¹² Nyambi ya Ngula, Nyambi yobe, akupanike kukeya na ngana ngayi mwanga utweshe kwombatala Nyambi ya Ngula oho ukulela Ishalela.

¹³ Ndi ukwombatala ndayano za Nyambi ya Ngula eze apanine kuli Moshesha hali Ishalela, ukenga wakutwesha. Winge wakushuma na kukanca, kami hinga witabila shuma shimo kukutinisha.

¹⁴ Ku mulimo wakuzika Litala lya Nyambi nakungulu kupitakana 3,400 ya wulemu wa ngolinde kami kupitakana 34,000 ya wulemu wa shiliva wakutendesha. Kubula kuyakako lubemba na byondo. Obyo bya kubula kutwesha kulabiwa. Kami nili na bitondo na mamanya ebye na kuwahishili, ngoboni ukafwanina kuwaninaho byabingi shikuma ha nobyo.

¹⁵ Uli na bantu bakamilimo yakupabola mamanya, kami ku bali bakakubaza mamanya na bambazi hamo na bantu bawutungu mu byuma nimwabyo.

¹⁶ Uli na ba kulimuka kutendesha ngolinde na shiliva na lubemba na byondo. Haya balika milimo. Mwanga Nyambi ya Ngula ekale hamo nanobe.

¹⁷ Ndavita watongwezele bakakutwaminina Ishalela nimwabo kuyavwa Sholomoni.

¹⁸ Wambile ngayi, “Nyambi ya Ngula, Nyambi yenu, unekalanga hamo nanenu na kumipana ku mwena ha zimbalila nimwazo. Wanyitabilishile ngayi nikome bantu nimwabo bekalilenga mu litunga lya Nyambi ya Ngula.

¹⁹ Haya tendelenu Nyambi ya Ngula, Nyambi yenu na mitima yenu nimwayo na moyo. Katukenu mubalike kuzika Litala lya Nyambi, Nohobene ngayi mwanga mutweshe kuyakamo Likwati lya Kulimama kwa Nyambi ya Ngula. Pe bingwalingwali nimwabyo byamina bya shizila biyakiwe mu Litala elye likazikiwila lizina lya Nyambi ya Ngula.”