1 Byambo 21 - Libuka Lya Kuyela

Ndavita ukulaba bantu

¹ Shatana washingile kuleta makalikiza ha bantu ba Ishalela. Pe wengishile Ndavita ngayi alabe bantu.

² Ndavita watongwezele Yowambu na bakakutwaminina bamina ngayi, “Yenunga mupite mu Ishalela, ku balika ku Mbelishemba ku kuma naku Ndani na kulaba bantu. Nikushinga kulimuka ngayi bali banga.”

³ Yowambu wakumbwile ngayi, “Mwanga Nyambi ya Ngula avulishe bantu ba Ishalela ngayi bavule mu myanda yayingi shikuma kupitakana eshe bali wuluno. Obe mwene ya ngoma, nimwabo banengi bandungo zobe. Shumangani ukushingila kutendela shuma sha nehe na kuwanisha mukoka nimwawo mulandu?”

⁴ Ngoboni mwene wengishile Yowambu kwombatala ndayano. Yowambu wayile na kupita mu litunga nimwalyo lya Ishalela, pe niho abokele ku Yelushalema kami.

⁵ Washimikile kuli Mwene Ndavita aha banakumu bantu ba kutwesha kuya ku mulimo wa nzita bengile 1,100,000 mu Ishalela na 470,000 mu Yunda.

⁶ Ngoboni Yowambu wabulile kulama mazu a mwene ndaba engile amabi kukwendi. Nohobene kaliha walabile mishobo ya Levi na Mbenjamani.

⁷ Nyambi wabulile ku wahilila naneshe shatendiwile, pe washushwile Ishalela.

⁸ Ndavita wambile kuli Nyambi ngayi, “Nabipishi shikuma ha kutenda nehe. Obe hekulu nyatile natende bya ku yeba.”

⁹ Niho Nyambi ya Ngula ambile kuli Ngandi muluwe wa Ndavita ngayi,

¹⁰ “Yanga ukatongweze Ndavita ngayi, nili na kumupana kulihatila ha tushushwilo tuhatu. Hataho shuma shimo pe nikashitenda kukwobe.”

¹¹ Ngandi wayile kuli Ndavita wamutongwezele ebye ambile Nyambi ya Ngula. Pe wepwile ngayi, “Kati ukahataho shiti?

¹² Myaka yihatu ya kapande ndi? Hinge ndi zingonda zihatu za kutandiwa ku makunge a nzita ya bamalamo bobe? Hinge ndi matena ahatu awa Nyambi ya Ngula akakulwisha na mukwale wendi, kami ukatuma wulweli wakuliyambwisha ha litunga na lingeloyi lyendi likaleta lufu mu Ishalela nimwamwo. Haya nika kumbula bishini kuli ou nantumu?”

¹³ Ndavita wakumbwile kuli Ngandi ngayi, “Nili mu wukalu. Ngoboni kushinga ku shushuliwa ku bantu nifwako. Leha Nyambi ya Ngula ancushule ndaba niye wenga wa nceshe.”

¹⁴ Nohobene Nyambi ya Ngula watumine wulweli wakuliyambwisha ha bantu ba Ishalela, pe bantu bengile 70,000 bafwile.

¹⁵ Niho Nyambi ya Ngula atumine lingeloyi mu kulobesha Yelushalema, ngoboni niho alibelulwile pe wambile kuli lingeloyi ngayi, “Lehasho! Hipelee.” Lingeloyi lyemanine kwakwipi na likotwelo lya Alauna, wa Kayembushi.

¹⁶ Ndavita wamonene lingeloyi hinga emana mukati ka mbimbayilu hinga akwata mukwale wendi mu liboko lyendi ngayi anongeshenga bene Yelushalema. Niho Ndavita na bakakutwaminina bantu aba bavwalile bicancolo, bashinkamine hanci nimwabo na kulamba.

¹⁷ Ndavita walombelele ngayi, “Obe Nyambi, ami nili na mulandu. Nili muntu ou walayile ngayi kulabiwe bantu. Aba bantu banengi ngonehe bambelele, banatende bishini? Obe Nyambi ya Ngula Nyambi yami, ncushule naba lupashi lwami na ku shiyaho bantu bobe.”

¹⁸ Lingeloyi lya Nyambi ya Ngula lyatongwezele Ngandi ku layelela Ndavita kuya mu kuzikila kaala Nyambi ya Ngula ku mwanya wa likotwelo lya Alauna wa Kayembushi.

¹⁹ Nohobene Ndavita wombatalile lizu lya Nyambi ya Ngula pe wayile ngonehe amutongwezele Ngandi.

²⁰ Olinani na bana bendi banaa bapulilenga loto kuyo ku likotwelo. Oho bamonene lingeloyi, bana bendi betukile na kuholama.

²¹ Oho Alauna amonene tuhu Mwene Ndavita uli na kwiza, washiyile mwanya wa likotwelo, pe wafunkamine hanci na kulamba.

²² Ndavita wambile kukwendi ngayi, “Ndandishe mwanya wa likotwelo lyobe, ngayi mwanga nitweshe kuzikilaho kaala ka Nyambi ya Ngula, ngayi tumanishe wulweli wakuliyambwisha. Nikakupanika ndando nimwayo ukatoya.”

²³ Alauna wambile ngayi, “Shimba, obe mwene ya Ngoma, utende nimwasho osho ukushinga kutenda. Mapulu kami ano akuhokesha kwinga nkombela ha kaala, na maleenge ha kupulila enge nkuni na loto lwa kupanika kwinga ntupu. Nikubipana nimwabyo kukwobe.”

²⁴ Ngoboni Mwene Ndavita wakumbwile ngayi, “Byo, nikabilanda. Nika kupana ndando nimwayo ukatoya. Kukapanika shuma shobe kwinga nkombela ya kuli Nyambi ya Ngula, shiya sha kubula kupita ndando yami nifwako.”

²⁵ Ndavita wapanine Olinani myanda mutanu na umo ya ngolinde ya muwayawaya.

²⁶ Wazikilile kaala Nyambi ya Ngula kuyo, na kukombelela zinkombela za kuhokesha na zinkombela za kulilumikila. Walombelele, pe Nyambi ya Ngula wamukumbwile na kutuma mundilo kuyilu na kuhokesha nkombela ha kaala.

²⁷ Nyambi ya Ngula watongwezele lingeloyi kukoweza mukwale wendi, pe lingeloyi wombatalile.

²⁸ Ndavita wamonene eshe ngayi Nyambi ya Ngula unakumbulu lilombelo lyendi, kami wakombelele nkombela yaha kaala ku mwanya waku likotwelo lya Olinani wa Kayembushi.

²⁹ Ha shikati shiya ntanda ya mwene na kaala bahokeshelelenga zinkombela byekalile ku mwanya wakulemeshela ku Ngimbiyoni. Moshesha wabitendele ku myaka ya kunyima.

³⁰ Ngoboni Ndavita kaliha watweshele kuyako mukwipula Nyambi ndaba watinine mukwale wa lingeloyi lya Nyambi ya Ngula.