1 Byambo 20 - Libuka Lya Kuyela

Ndavita ukukwata Laba

¹ Shikati sha mvumbi, ha shikati bamyene bayilenga ku nzita, Yowambu watwaminine bakanzita pe wakatukilile mutakwe litunga lya Amoni. Hinge noho Mwene Ndavita washalile mu Yelushalema. Yowambu wazingulukile lukena lwa Lamba pe wawunongeshele.

² Ndavita washimbile munana wa ngolinde wekalile ku mutwe wa mwene yabo. Munana owe wulemu wawo wengile makilongilamu 35. Mukati kawo mwekalile limanya lya ndando yayinene, elye ashimbile Ndavita pe waliyakile mu munana wendi. Washimbile kami mushiinzi wa wunene wa lipuku lya mu munzi.

³ Washimbile bantu bamu munzi pe wabayakile ku mulimo wa mashaha na kufula makahu na tuzembe. Ndavita watendele noho shuma shimo ku bantu nimwabo bamu minzi yamina yamu Amoni. Niho niye na bantu bendi babokele ku Yelushalema.

Zinzita za kulwisha malengwalengwa a Bafwilishitina

⁴ Ebye oho byapitile kami kwekalile nzita na Bafwilishitina ba ku Ngeza. Eshe shengile oho Shibekayi waku Husha azihile lilengwalengwa watumbiwile ngayi Shafwi, pe Bafwilishitina bakomiwile.

⁵ Kwekalile kami nzita yamina na Bafwilishitina, pe Elihanani mwana Yeya wazihile Lahimi, yayiyendi Ngoliyati waku Ngati. Lahimi wekalile na mulinga wawunene, luntondo lwawo lwengile ngonehe mukambo wakupohelela wutonge.

⁶ Niho kami kwekalile nzita yamina ku Ngati, oku kwekalile lilengwalengwa ou wahakilenga shikuma kulwa. Wekalile na minwe mutanu na umo ku liboko na liboko pe kami manyenca mutanu na limo ku liwulu na liwulu, nimwayo hamo makumi abili na yinaa. Niye wafumine ku mushobo wa malengwalengwa.

⁷ Wahandwile Baishalela, pe Yonatana, mwana Shimeyi yaya Ndavita, wamuzihile.

⁸ Aba bengile bazukulya malengwalengwa ba ku Ngati, pe Ndavita wabazihile na bantu bendi.