1 Byambo 2 - Libuka Lya Kuyela

Bazukulya Yunda

¹ Yakoba ou watumbiwile ngayi Ishalela wabelekele bana babalume likumi na babili. Bengile Lubena na Shimiyoni na Levi na Yunda na Ishaka na Zembuloni

² na Ndani na Yoshefwa na Mbenjamani na Nafwitali na Ngandi na Asha.

³ Yunda wabelekele bana babalume mutanu. Kuli mukazendi Mbatishuwa wamu Kenaani, wabelekele bana babalume bahatu, bengile Ela na Onani na Shila. Mwanendi Ela wa mweli wengile wakuluwa shikuma niho Nyambi ya Ngula amuzihile.

⁴ Kuli mukokwendi Tamale Yunda wabelekeleleko bana babalume babili, ba Pelizi na Zela.

⁵ Pelizi wabelekele bana babalume babili, ba Heziloni na Hamula,

⁶ Yayiyendi Zela wabelekele bana babalume mutanu, ba Zimili na Etani na Hemani na Kalikolu na Ndala.

⁷ Akani mwana Kalimi wa mulume waletele makando ha bantu ba Ishalela ha kushimba ku lipuku liya lyafunguliwilile kuli Nyambi.

⁸ Etani wabelekele mwana wa mulume umo, Azaliya.

Likota lya ba lupashi ba mwene Ndavita

⁹ Heziloni wabelekele bana babalume bahatu, bengile ba Yelahamela na Lama na Kalembu.

¹⁰ Muhoko wa ba lupashi ku balika kuli Lama na kukuma kuli Njeshe wengile nehe, Lama wabelekele Aminandabe, Aminandabe wabelekele Nahishoni. Nahishoni wengile ntwamina wampupo waku mushobo wa Yunda.

¹¹ Nahishoni wabelekele Shalimoni, Shalimoni wabelekele Mbowazi,

¹² Mbowazi wabelekele Ombendi, Ombendi wabelekele Njeshe.

¹³ Njeshe wabelekele bana babalume mutanu na babili. Kukonka ngonehe eshe balilundaminine ku myaka yabo, bengile ba Eliyambi na Ambinandambu na Shimeya

¹⁴ na Netanele na Landayi

¹⁵ na Ozemu na Ndavita.

¹⁶ Kami wabelekele bana ba bambuyama babili, bengile ba Zeluya na Ambingelu. Mwana Njeshe wa mbuyama Zeluya wabelekele bana babalume bahatu, bengile ba Ambishayi na Yowambu na Ashaheli.

¹⁷ Mwanendi wamina wa mbuyama Ambingelu washimbiwile kuli Yeta muzukulya Ishimaele, pe babelekele mwana wa mulume, watumbiwile ngayi Amasha.

Bazukulya Hezeloni

¹⁸ Kalembu mwana Heziloni wa mulume wayekele Azumba, pe wabelekele mwanendi wa mbuyama ou watumbiwile ngayi Yeliyota. Wabelekele kami bana babalume bahatu, bengile ba Yesha na Shobabu na Alindoni.

¹⁹ Oho Azumba wafwakale, Kalembu wayekele Efulata pe babelekele mwana wa mulume watumbiwile ngayi Hula.

²⁰ Mwana Hula wa mulume wengile Uli na muzukulyendi wa mulume wengile Mbezalela.

²¹ Oho Heziloni ekalile na myaka makumi mutanu na limo, wayekele mwana Makiya, mpanza Ngiliyande. Babelekele mwana wa mulume watumbiwile ngayi Shenguba,

²² kami Shenguba wekalile na mwana wa mulume watumbiwile ngayi Yayila. Yayila walelele minzi makumi abili na yihatu mu litunga lya Ngiliyande.

²³ Ngoboni wene wa Ngeshula na wene wa Alamu bakomene minzi makumi mutanu na limo, kufungilako na minzi ya Yayila na Kenati na minzi ya hahepi. Bantu nimwabo aba bazikilenga kuyo bengile bazukulya Makiya, tata Ngiliyande.

²⁴ Oho afwile Heziloni, mwanendi wa mulume Kalembu wayekele Efulata, mfwile wa tatiyendi. Babelekele mwana wa mulume watumbiwile ngayi Ashihuli, ou wabelekele Tekoya.

Bazukulya Yelahamela

²⁵ Yelahamela mweli wa Heziloni wa mulume wabelekele bana babalume mutanu, wa mweli wengile Lamu kami bamina bengile ba Mbuna na Oleni na Ozemu na Ahiya.

²⁶ Yelahamela wekalile na mukazendi wamina watumbiwile ngayi Atalahi kami babelekele mwana umo wa mulume Onama.

²⁷ Lamu wabelekele bana babalume bahatu, bengile Mayazi na Yamini na Akali.

²⁸ Onama wabelekele bana babalume babili, bengile ba Shamayi na Yanda. Pe Shamayi kami wabelekele bana babalume babili, bengile Nandabi na Ambishuwa.

²⁹ Ambishuwa wayekele Mukazendi watumbiwile ngayi Ambihayile kami babelekele bana babalume babili, bengile ba Ahibani na Molindi.

³⁰ Nandabi wabelekele bana babalume babili, bengile ba Shelandi na Apayima, ngoboni Shelandi wafwile nahiya wakubula bana.

³¹ Apayima wengile tata Ishi, Ishi wengile tata Sheshani, Sheshani wengile tata Ahilayi.

³² Yanda, yayiyendi Shamayi wabelekele bana babalume babili, bengile ba Yeta na Yonatana. Ngoboni Yeta wafwile nahiya wakubula bana.

³³ Yonatana wekalile na bana babalume babili, bengile ba Peleti na Zaza. Nimwabo aba bengile bazukulya Yelahamela.

³⁴ Sheshani kaliha wekalile na bana babalume ndele tuhu ba bambuyama. Wekalile na mukamulimo wa Kaengepita watumbiwile ngayi Yaliha.

³⁵ Niho ayekiwishile mwanendi wa mbuyama kuli Yaliha. Babelekele mwana wa mulume watumbiwile ngayi Atayi.

³⁶ Ou niwo muhoko wa ba lupashi ku balika kuli Atayi kukuma kuli Elishama bengile nehe, Atayi wabelekele Natani, Natani wabelekele Zabandi.

³⁷ Zabandi wabelekele Efwilale, Efwilale wabelekele Ombendi.

³⁸ Ombendi wabelekele Yehu, Yehu wabelekele Azaliya.

³⁹ Azaliya wabelekele Helezi, Helezi wabelekele Elisa.

⁴⁰ Elisa wabelekele Shishimayi, Shishimayi wabelekele Shalumu,

⁴¹ Shalumu wabelekele Yekamiya, Yekamiya wabelekele Elishama.

Bazukulya Kalembu

⁴² Kalembu yayiyendi Yelahamela, wabelekele mwanendi wa mulume wa mweli, watumbiwile ngayi Mesha. Mesha wengile tata Zifu, Zifu wengile tata Maleshiya, Maleshiya wengile tata Hembuloni.

⁴³ Hembuloni wekalile na bana babalume banaa, bengile ba Kola na Tapuwa na Lekema na Shema.

⁴⁴ Shema wengile tata Lahama na nkaka ya Yolikama. Lekema yayiyendi Shema wengile tata Shamayi.

⁴⁵ Shamayi wengile tata Mawoni, Mawoni wengile tata Mbeti Zula.

⁴⁶ Kalembu wekalile na mukazendi wakwinginina watumbiwile ngayi Efwa. Pe wabelekeleleko bana babalume bamina bahatu, bengile ba Halani na Moza na Ngazezi. Halani kami wabelekele mwanendi wa mulume watumbiwile ngayi Ngazezi.

⁴⁷ Muntu watumbiwile ngayi Yahindayi wabelekele bana babalume mutanu na umo, bengile ba Lengemu na Yotamu na Ngeshani na Peleti na Efwa na Shayafwi.

⁴⁸ Kalembu wekalile na mukazendi wakwinginina wamina watumbiwile ngayi Maaka, ou wamubelekelele kami bana babalume babili, bengile ba Shebela na Tilihana.

⁴⁹ Ha kukumininako, wekalile na bana babalume babili, bengile Shayafwi ou wengile tata Mandimana na Sheva ou wengile tata Makimbena na Ngimbiya. Kalembu wabelekele kami mwana wa mbuyama Akisha.

⁵⁰ Bano kami banengi bazukulya Kalembu. Mwana Kalembu wa mulume wa mweli wakuli mukazendi Efulata, wengile Hula. Mwana Hula wa mulume Shobala wengile Kiliyati Yeyalima.

⁵¹ Mwana Hula wawubili Shalima wengile tata Mbetelehema. Mwana Hula wawuhatu Halefwa wengile tata Mbeti Nganda.

⁵² Shobala tata Kiliyati Yeyalima wengile nkaka ya bantu ba Haloye na Shitika sha naba bazika ku Menuhoti.

⁵³ Awa niwo mavumo amina ekalilenga mu munzi wa Kiliyati Yeyalima, bengile Bayatile na Baputi na Bashumata na Bamishilayite. Bantu ba ku Zola na Eshitawolu batutikile ku mavumo awa.

⁵⁴ Bazukulya Shalima nibo bantu ba Mbetelehema, bantu ba ku Netofwa na bantu ba ku Atiloti Mbeti Yowambi na shitika sha bantu ba ku Manahati bafumine ku Zola.

⁵⁵ Mavumo amina awa engile a bakakutikita bekalilenga mu munzi wa Yambezi bengile Batilata na Bashimeya na Bashukata. Nibo bengile Bakeneta aba bafumine kuli Hamati, tata ba lupashi lwa Lekabe.