1 Byambo 19 - Libuka Lya Kuyela

Ndavita ukukoma Baamoni na Baashiliya

¹ Oho kwapitile tuhu shikati shashishe, mwene Nahashi waku Amoni wafwile pe mwanendi Hanuni wengile mwene.

² Mwene Ndavita wambile ngayi, “Niku fwanina ku monesha wuhoni wa kwoloka kuli Hanuni, ngonehe tatiyendi Nahashi atendele kukwami.” Niho Ndavita atumine bantumwana kuya ku malila wendi. Oho bakumine mu Amoni pe bayile kuli mwene Hanuni.

³ Ngoboni bakakutwaminina ba Baamoni bambile kuli mwene ngayi, “Kati ukuhanganika ngayi shinengi maleema a tatiyobe aha Ndavita anatumu aba bantu kukwobe ku malila ndi? Mwa shikuma kaliha noho. Unabatumu kuno kwinga bakakuhokela litunga, ngayi mwanga alikome.”

⁴ Mwene Hanuni wakwatile bantumwana ba Ndavita, pe wapambwile milevu yabo na kuketola bivwalo byabo kukumishila ku nceto ya zinkanda na kubatanda.

⁵ Bekalile na lisheni shikuma ha ku boka ku munzi. Oho Ndavita ayuvwile eshe shatendiwile, watumine lizu kukwabo ngayi bekale mu Yeliko kami hinga baboka hantu milevu yabo yinamene kami.

⁶ Oho Baamoni balimukile ngayi banashonkomono Ndavita kwinga kamalamo wabo, pe bayumbile wulemu wa makilongilamu 34,000 a shiliva ya kuya mu kuloba makoloyi na bakakuwendesha ba ku Meshopotamiya waku Shinkanda naku Maaka na Zomba mu litunga lya Shiliya.

⁷ Balobele makoloyi 32,000 hamo na mwene waku Maaka na bakanzita bendi, pe batulilile kwakwipi na Mendeba. Baamoni kami bafumine ku zinkena zabo baliwahishilile kulwa.

⁸ Oho Ndavita ayuvwile eshe shatendiwile watumine Yowambu na bakanzita nimwabo kuya mu kubalwisha.

⁹ Baamoni bayile na kuwuluta na ku kwalama ku menginino aku Laba, lukena lwabo lwalunene, kami bamyene aba bezile mu kuyavwa bakwalamine mu zimbuwa.

¹⁰ Yowambu oho amonene ngayi bamalamo ba kumulwisha kumbili na kunyima, niho ahatile bakanzita bangovu ba Ishalela na kubakwalika mu myanya kuli penza na Baashiliya.

¹¹ Wayakile bakanzita bendi nimwabo bashalileho mu ngovu za yayiyendi Ambishayi, ou wabakwalikile mu myanya ya kuli penza na Baamoni.

¹² Yowambu wambile kukwendi ngayi, “Ndi uku mona ngayi Baashiliya bali na kunkoma, yeka unyavwe, pe ndi Baamoni bali naku ku koma, pe nikeza naku kuyavwa.

¹³ Shuma na kukanca. Tuyenu, tulwile bantu betu na ngovu na zinkena za Nyambi yetu. Pe mwanga shifungo sha Nyambi ya Ngula shitendiwe.”

¹⁴ Yowambu na bantu bendi balulumanine na kubalwisha, pe Baashiliya batinine.

¹⁵ Baamoni oho bamonene Baashiliya bali na kutina, nibo kami batinine kuli Ambishayi pe bakwangile kwingina mu lukena. Niho Yowambu abokele ku Yelushalema.

¹⁶ Ngoboni Baashiliya oho balimukile ngayi banakomiwi ku Baishalela, pe balobele mihoko ya bakanzita kufuma mu zinkena za Baashiliya ku mbalila ya mushamuko wa mushinzi wa Yufuleta. Pe wabayakile mu ngovu za Shofwaki, mukulwane wa bakanzita ba Handandeza waku Zomba.

¹⁷ Ndavita oho ayuvwile eshe wakungwile mihoko ya bakanzita ba Baishalela, bazabukile mushinzi wa Yondana na kubakwalika mu myanya kuli penza na Baashiliya, niho nzita ya balikile.

¹⁸ Pe Baishalela batandile bakanzita ya Baashiliya. Ndavita na bakanzita bendi bazihile 7,000 a bakakwendesha makoloyi a Baashiliya na 40,000 bakanzita bakakwenda hanci. Niho kami bazihile Shofwaki mukulwane wa bakanzita wa Baashiliya.

¹⁹ Oho bamyene aba bekalile mu nceto ya Handandeza balimukile ngayi banakomiwi ku Baishalela, baliyuvwashanine na kuleta ku mwena na Ndavita pe bengile bantu bendi. Baashiliya hinga batangile kami kuyavwa Baamoni.