1 Byambo 17 - Libuka Lya Kuyela

Lizu lya Natani kuli Ndavita

¹ Mwene Ndavita oho wekalishakale mu musheke wendi. Mutena umo wehanine muluwe wa Nyambi Natani pe wamutongwezele ngayi, “Mona. Ami nili na kwikala mu litala linatendiwi na bishimi bya mutondo wa shinda, ngoboni Likwati lya Kulimama linatentekiwi mu ntanda.”

² Natani wakumbwile Ndavita ngayi, “Tenda eshe shili mu mutima wobe, ndaba Nyambi uli hamo na nobe.”

³ Ngoboni wushiku uyo lizu lya Nyambi lyezile kuli Natani ngayi,

⁴ “Yanga na kutongweza mukamulimo wami Ndavita ngayi, ‘Kaliha obe ukantendela litala mwa kwikala ndi?

⁵ Ku balika ku shikati shiya nalamwinine bantu ba Ishalela mu Engepita kuleta ni shikati shino, hinga natanga kwikala mu litala, ngoboni nekalanga mu zintanda na kutuntozoka kufuma ku mwanya wamina na kuya ku mwanya wamina.

⁶ Omu twapitile na kwenda na bantu ba Ishalela nimwabo hinga natanga kunyepa hinge umo wa bakakutwaminina baya nemikile ngayi, “Shumangani mwabula kunzikila litala na mutondo wa shinda.”

⁷ “Nohobene tongweza mukamulimo wami Ndavita, eshe nisho akwamba Nyambi wa Makunge ngayi, ‘Nakufumishile mu mabuyishilo muya wabuyishilenga bambelele na kukwinga kalela wa bantu bami ba ishalela.

⁸ Nekalilenga nobe oku nimwako wayilenga, pe nakomene bamalamo bobe nimwabo aha wayilenga na kulikaka. Nika kutumbalalisha ngonehe bakakutwaminina babanene ba hano hanci.

⁹ Nahatili mwanya bantu bami ba Ishalela na kubazikishamo, oku bakekalenga kwakubula muntu wakubayandisha kami.

¹⁰ Hinga benginina muno mu litunga bonzelanga kubalwisha ku bantu bababi, ngoboni eshe kukamoneka kami shifwako. Nakulupishi kukoma bamalamo bobe na kuzika litala lyobe, pe wene wobe kukamana wufwako.

¹¹ Oho wakafwa ukafundiwa kwa fundiwa bankakazobe. Nikashwanisha umo ha bana bobe kwinga mwene, pe nikalama wene wendi na ku wushumisha.

¹² Niye muntu ou ukanzikila litala, pe nikamona ngayi kulela kwendi kukekala mwaya myaka.

¹³ Nikenga tatiyendi kami niye ukenga mwanami. Ngoboni kukamuyuvwila shishemo sha mwaya myaka nifwako ngonehe shiya natendele kuli Shaulu. Ou nafumishile ngayi obe mwanga winge mwene.

¹⁴ Nikamuyaka ku wukulwane wa bantu bami naku wene wami mwaya myaka. Litanda lya wene wendi kukamana lifwako.”

¹⁵ Natani watongwezele Ndavita biya nimwabyo Nyambi ya Ngula aholwele kukwendi.

Lilombelo lya Ndavita lya kukambilila

¹⁶ Niho Mwene Ndavita enginine mu ntanda ya ku meho a Nyambi ya Ngula. Wekalile hanci na kulombela ngayi, “Obe Nyambi ya Ngula, kati ami yani kami ba lupashi lwami bayani kukwobe, ngayi untendele ebye nimwabyo?

¹⁷ Ngoboni haya Obe ushili kutenda byabingi, unakulupishi bazukulyami ku myaka ya kumbili, pe kami Obe Nyambi ya Ngula, Obe wenga Nyambi, unankatulu kwinga muntu wamunene.

¹⁸ Nikutwesha kwamba bishini kukwobe. Obe undimuka shiwahe, kami uli na kundemeeka ami muka mulimo wobe.

¹⁹ Obe Nyambi ya Ngula, shengile sha mutima wobe kami shengile shifungo shobe ha kutenda nehe kukwami na kuntongweza wunene wami wakumbili.

²⁰ “Obe Nyambi ya Ngula, kowa wakufweka, kami kowa nyambi wamina, Obe tuhu Nyambi tunaliyuvwili na matu wetu.

²¹ Kowa litunga lyamina hano hanci lya kufweka ngonehe Ishalela, aba walamwinine ku wulungo na kubenga bantu bobe. Byuma byabinene na bya kukomokesha watendele kukwabo byatwalile mpupo ya lizina lyobe hano hanci nimwaho. Walamwinine bantu bobe ku Engepita kami watandile mikoka yamina oho bantu bobe bayilenga na kulikaka.

²² Unengishi bantu ba Ishalela kwinga bantu bobe mwaya myaka, pe Obe Nyambi ya Ngula wengakale Nyambi yabo.

²³ “Pe haya Obe Nyambi ya Ngula, Obe uli Nyambi, shumisha ku shikati nimwasho shikulupisho shobe watendele na nami na bazukulyami, kami tenda ebye watoyele ngayi ukabitenda.

²⁴ Mpupo ya lizina lyobe yikenga yayinene, kami bantu bakambanga shikati nimwasho ngayi, ‘Nyambi wa Makunge niye Nyambi wa Ishalela.’ Lehela litala lya mukamulimo wobe Ndavita litangame.

²⁵ Nili na kukanca kulombela lilombelo lino kukwobe, Obe Nyambi yami, ndaba unahololo ebye nimwabyo kukwami mukamulimo wobe. Kami unantongweze ngayi ukatenda bazukulyami kwinga bamyene.

²⁶ Obe, Nyambi ya Ngula, Nyambi uya walamanga bikulupisho byobe bikati nimwabyo, pe unatende eshe shikulupisho shashiwahe kukwami.

²⁷ Nikunyepa ngayi mwanga shikuwahililishe kufuywela bazukulyami, ngayi mwanga bazamine kwikala mu nceshe zobe. Obe Nyambi ya Ngula, ubafuywele, kami mfuywezi zobe zikekala hahabo mwaya myaka.”