1 Byambo 16 - Libuka Lya Kuyela

¹ Baletele Likwati lya Kulimama ku ntanda eye aliwahishilile Ndavita na kuliyaka mukati. Niho bakombelele zinkombela za kuhokesha na zinkombela za kulilumikila ku meho a Nyambi.

² Oho Ndavita amanishile kutupula zinkombela wafuywelele bantu mu lizina lya Nyambi ya Ngula.

³ Pe wabatapishilile byakulya nimwabo. Wapanine balume nimwabo na bambuyama nimwabo mu Ishalela mupumpa wa linkende na shituntula sha nyama ya kuyoha na nkuyu za kuyanika.

⁴ Ndavita wemikile balevi bamo kutwaminina kukulemesha Nyambi ya Ngula, Nyambi wa Ishalela, kumbili ya Likwati lya Kulimama na kwimbila na kumuyemeza.

⁵ Ashafwi wemikiwile kwinga mukakutwaminina mukakumuyavwa wengile Zakaliya. Ba Yeyiwelu na Shemilamoti na Yehiyelu na Matitiya na Eliyambi na Mbenaya na Ombendi Endoma na Yeyiwelu bengile bakakumbeta kambuli kakanene. Ashafwi wengile mukakuvumisha kakanene kakashe.

⁶ Pe bakankombela babili, ba Mbenaya na Yahaziyelu, bengile bakakushiba zimpandula shikati nimwasho kumbili ya Likwati lya Kulimama lya Nyambi.

Lwimbo Lwa kuyemeza Nyambi ya Ngula

⁷ Niwo kami wengile mutena wakutatika uya Ndavita apanine ngovu Ashafwi na baminendi Balevi kwimbila kwa kuyemeza Nyambi ya Ngula.

⁸ Kambililenu kuli Nyambi ya Ngula, yemezenu lizina lyendi, tongwezenu bantu nimwabo ebye anatende.

⁹ Yimbilenu nyimbo za kuyemeza Nyambi ya Ngula, shimikilenu ha byuma bya kukomokesha ebye anatende.

¹⁰ Wahililenu mu lizina lyendi lya ku yela, mitima ya nobo bakulemesha Nyambi ya Ngula yitangale.

¹¹ Shingashingenu Nyambi ya Ngula na ngovu zendi, shingenu lupala lwendi shikati nimwasho,

¹² Anukenu bikomokesho ebye atendele Nyambi, na bilimukisho byendi nanebye aketwile ha kuyata.

¹³ Enu bazukulya Ishalela mukamulimo wa Nyambi, na bana ba Yakobo babalume aba ahatile.

¹⁴ Nyambi ya Ngula niye Nyambi yetu, kuyata kwendi kuli hano hanci nimwaho.

¹⁵ Wanukanga kulimama kwendi mwaya myaka, kulimama oku alimamine ngayi kwikale ku mikoka ya likulukazi.

¹⁶ Kulimama kuya alimamine na Abulahama, shikulupisho akulupishile Ishaki,

¹⁷ Kulimama oku ashumishile kuli Yakobo kwinga ndayano, na ku bantu ba Ishalela kwinga kulimama kwa mwaya myaka.

¹⁸ Wambile ngayi, “Nikamipana litunga lya Kenaani, nilyo likenga likona lyenu.”

¹⁹ Bantu ba Nyambi bengile babashe, bengile bayeni mu litunga lya Kenaani.

²⁰ Bayambangililenga kufuma ku litunga limo na kuya ku litunga lyamina, kufuma ku wene umo na kuya ku wamina.

²¹ Ngoboni Nyambi kaliha wetabilishile muntu ngayi abayandishe, wabakalihilile bamyene,

²² na kwamba ngayi, “Hinga mukwata ba kuwabishiwa bami, hinga mulemeka bamiluwe bami.”

²³ Yimbilenu kuli Nyambi ya Ngula enu bantu ba hano hanci nimwaho. Shimikilenu ha mutena ha mutena ncango za ziwahe ngayi u na tupulwishi.

²⁴ Bilikenu wuwahe wendi ku matunga, na milimo yendi yayinene ku bantu nimwabo.

²⁵ Nyambi ya Ngula wamunene. Nafwanini ku yemeziwa shikuma, uku fwanina kulemeekiwa shikuma kupitakana ba nyambi nimwabo.

²⁶ Ba nyambi nimwabo ba matunga amina banengi tuhu tunankishi, ngoboni Nyambi ya Ngula niye walengele mayilu.

²⁷ Wuwahe na maleema bya mu zinguluka, ngovu na ku wahilila byekala mu Litala lyendi.

²⁸ Yemezenu Nyambi ya Ngula enu bantu nimwenu hano hanci, yemezenu wuwahe na ngovu zendi.

²⁹ Yemezenu Nyambi ya Ngula, wuwahe wa lizina lyendi. Letenu zintupu, pe mwize mwingine mu Litala lyendi. Lambenu ku meho a Nyambi ya Ngula, ku wuwahe wendi na ku yela nimwako.

³⁰ Hano hanci nimwaho kankenu kumbili yendi. Kaye kanashumu mu mwanya wako, pe kowa ukutwesha kukahenyesha.

³¹ Bya muyilu bitangale, bya hano hanci biwahilile! Tongwezenu matunga ngayi Nyambi ya Ngula wenga mukakulela.

³² Nobe liwate nkwancana, na byuma nimwabyo bya kulengiwa uli nabyo! Mafuba atangalale na nimwabyo byekalamo.

³³ Niho mitondo ya mu lishaka yiwulumwine na ku wahilila, ku meho a Nyambi ya Ngula, oho akeza mu kuyata kaye.

³⁴ Kambililenu kuli Nyambi ya Ngula ndaba wenga wamuwahe, shishemo shendi sha mwaya myaka.

³⁵ Ambenu kukwendi ngayi, “Obe Nyambi Mupulwishi wetu, tupulwishe na kutufumisha mukati ka matunga. Tukungule hamo. Utupulwishe hakati ka matunga, ngayi mwanga tukambilile ku lizina lyobe lya kuyela, na kuyemeza wuwahe wobe.”

³⁶ Yemezenu Nyambi ya Ngula, Nyambi wa Ishalela, haya muyemezenu kufuma kushikale kuya mwaya myaka. Niho bantu nimwabo bambile ngayi, “Ameni.” Pe bayemezele Nyambi ya Ngula.

Kulemesha ku Yelushalema naku Ngimbiyoni

³⁷ Mwene Ndavita wayakile Ashafwi na baminendi Balevi ha wukulwane wakwendesha kulemesha kuya kwatendiwilenga ku mwanya oku kwakongiwile Likwati lya Kulimama. Bekalile na kutenda milimo yabo kuya ha mutena ha mutena.

³⁸ Ombendi Endoma mwana Yendutani hamo na balume 68 bamu livumo lyendi bekalile na ku bayavwa. Hosha na Ombendi Endoma bengile bakulwane ba kulama ku mapangati.

³⁹ Mukankombela Zandoki na baminendi bakankombela bengile bakulwane ku ntanda ya Nyambi ya Ngula ku mwanya wakulemeshela mu Ngimbiyoni.

⁴⁰ Ku lumenemene na lumenemene naku mazolo na mazolo bekalilenga na kuhokesha nkombela ya nzimba ha kaala ngonehe munzila eye yatikitiwile mu ndayano apanikile Nyambi ya Ngula ku Ishalela.

⁴¹ Bekalilenga nabo bengile ba Hemani na Yendutani na bamina aba bahatiwile shiwahe ku kwimbila mu kuyemeza Nyambi ya Ngula ndaba ya shishemo shendi sha mwaya myaka.

⁴² Ba Hemani na Yendutani kami bengile bakulwane ba zimpandula na mikwashi na byuma byamina ebye bambetelenga oho bembililenga nyimbo za kuyemeza. Balume bamu livumo lya Yendutani bengile bakulwane bakakulama ku lipangati.

⁴³ Niho muntu na muntu wayile ku munzi, kami Ndavita wayile ku munzi mu kufuywela ba lupashi lwendi.