1 Byambo 15 - Libuka Lya Kuyela

Kuli wahishila ku leta Likwati lya Kulimama ku Yelushalema

¹ Ndavita walitendeshelele matala mu Lukena. Wawahishile ntanda ya kuyaka Likwati lya Kulimama lya Nyambi.

² Niho ambile ngayi, “Balevi tuhu nibo bakashimba Likwati lya Kulimama, ndaba nibo ahatile Nyambi ya Ngula kulishimbanga na kumutendelanga milimo mwaya myaka.”

³ Ndavita wehanine bantu nimwabo ba Ishalela mu Yelushalema ngayi mwanga balete Likwati lya Kulimama ku myanya oku aliwahishilile.

⁴ Niho kami ehanine bazukulya Aloni na Balevi.

⁵ Bamu livumo lya Kohati ba mushobo wa Levi kwezile Uliyele, wengile mukulwane wa bantu 120 bamu livumo lyendi.

⁶ Bamu livumo lya Melali kwezile Ashaya, mukulwane wa bantu 200.

⁷ Bamu livumo lya Ngeshoma kwezile Yowele, mukulwane wa bantu 130.

⁸ Bamu livumo lya Elizafwani kwezile Shemaya, mukulwane wa bantu 200.

⁹ Bamu livumo lya Hembuloni kwezile Eliyela, mukulwane wa bantu 80.

¹⁰ Kami bamu livumo lya Uziyelu kwezile Aminandabe, mukulwane wa bantu 112.

¹¹ Ndavita wehanine bakankombela ba Zandoki na Ambiyatale, hamo na Balevi mutanu na umo, ba Uliyele na Ashaya na Yowele na Shemaya na Eliyela na Aminandabe.

¹² Watongwezele balevi ngayi, “Enu muli bakakutwaminina bamu mavumo a Balevi, liyeleshenu enu bamwine na baminenu Balevi ngayi mwanga mutweshe kuleta Likwati lya Kulimama kwa Nyambi ya Ngula, Nyambi wa Ishalela, ku mwanya oku naliwahishili.

¹³ Ndaba kaliha mwekalileko ha kuya na kuli leta ha shikati sha kutatika, Nyambi ya Ngula, Nyambi yetu watushushwile, kaliha twamunyepele mwaku fwanina kutendela elye Likwati.”

¹⁴ Nehi bakankombela na Balevi baliyeleshele nibo bamwine kuleta Likwati lya Kulimama kwa Nyambi ya Ngula, Nyambi wa Ishalela.

¹⁵ Balevi bashimbile Likwati ha mibanda ha bifuzi byabo, ngonehe shiya alayile Nyambi ya Ngula muli Moshesha ngayi nisho shikatendiwa.

¹⁶ Ndavita walayile bakakutwaminina ba Balevi ngayi bahate Balevi bamina ku kwimbila nyimbo na kumbeta ku wahilila ha tumbuli na mikwashi.

¹⁷ Ku mavumo a bakakwimbila bahatile bantu bamo mu kumbeta mikwashi ya lubemba. Bengile ba Hemani mwana Yowele na kawushinda wendi Ashafwi mwana Mbelekiya na Etani mwana Kushaya wamu livumo lya Melali.

¹⁸ Balevi bahatiwile mu kumbeta tumbuli twa kuvuma mu kubayavwa bengile ba Zakaliya na Yaziyelu na Shemilamoti na Yehiyelu na Uni na Eliyambi na Mbenaya na Mayasheya. Bakakumbeta tumbuli twa kuvuma maleenda bahatile Balevi aba, ba Matitiya na Elifwelehu na Mikineya na Azaziya na Ombendi Endome na Yeyiwelu. Bengile bakakulama Litala lya Nyambi.

¹⁹ Bakakwimbila aba bahatiwile kwinga bakakumbeta bengile Hemani na Ashafwi na Etani.

²⁰ Balevi bahatiwile bengile aba Zakaliya na Aziyelu na Shemilamoti na Yehiyelu na Uni na Eliyambi na Mayasheya na Mbenaya. Aba nibo bambetelenga kambuli kakanene kakuvuma shikuma.

²¹ Ba Matitiya na Elifwelehu na Mikineya na Azaziya na Ombendi Endomu na Yeyiwelu, bambetelenga kambuli kakashe kalizu lya kutendoka.

²² Kenaniya wahatiwile kwinga mukulwane wa bakakuwela wa Balevi ndaba ya wulongo wendi mukwimbila.

²³ Ba Mbelekiya na Elikana bahatiwile kwinga bakakulama Likwati lya Kulimama.

²⁴ Bakankombela ba Shembaniya na Yoshafwati na Natanele na Amashayi na Zakaliya na Mbenaya na Eliyeza bahatiwile kwinga bakakushiba zimpandula kumbili ya Likwati lya Kulimama. Ombendi Endoma na Yehiya nibo kami bengile bakakulama Likwati lya Kulimama.

Kuleta Likwati lya Kulimama ku Yelushalema

²⁵ Mwene Ndavita na bakakutwaminina bamu Ishalela, hamo na bakulwane banzita bayile ku litala lya Ombendi Endoma mu kushimba Likwati lya Kulimama. Pe bapingile shimbo shashinene.

²⁶ Ndaba Nyambi wayavwile balevi niho bakombelelele bikungwe mutanu na babili na bambelele mutanu na babili, aba bashimbile Likwati lya Kulimama.

²⁷ Ndavita na bakakuwela na Kenaniya muka batwaminina hamo na balevi aba bashimbilenga Likwati lya Kulimama bavwalilenga bikobelo byatungiwile na likwiza lyaliwahe shikuma lya kulelema. Ndavita kami wavwalilenga kakobelo kakepi kashizila katungiwile ha likwiza lyaliwahe lya kulelema.

²⁸ Nohobene Baishalela nimwabo bashindikizile Likwati lya Kulimama kukalikumisha ku Yelushalema na kuwulumwina tunkelenkele na kutendoka kwa Zimpandula na tunamutolilo na mikwashi na mushumina wa kambuli.

²⁹ Oho Likwati lya Kulimama lya kumine mu lukena, Mikale mwana Shaulu mukaza Ndavita, watilaminine mu limpananga pe wamonene Mwene Ndavita heza na ku shinda na kukilozoka na ku wahilila, pe wamuhandwile mu mutima wendi.