1 Byambo 14 - Libuka Lya Kuyela

Milimo ya Ndavita mu Yelushalema

¹ Mwene Hilamu waku Tile watumine bantumwana kuli Ndavita. Wapanikile Ndavita bishimi bya bitondo bya Shinda na bakakumangula mamanya na baka kuku shoka ku zika musheke.

² Ndavita walimukile ngayi Nyambi ya Ngula wamwikalikakale kwinga mwene wamu Ishalela, kami watangamishilenga wene wendi ndaba ya bantu bendi ba Ishalela.

³ Ndavita wayekeleleho bambuyama bamina mu Yelushalema, kami bana bendi babalume naba babambuyama bavulile.

⁴ Awa niwo mazina a bana ba Ndavita aba bahemuwilile mu Yelushalema. Bengile ba Shamuwa na Shobabu na Natani na Sholomoni,

⁵ na Imbaha na Elishuwa na Elifweleti

⁶ na Nongahi na Nefwengi na Yafwiya

⁷ na Elishama na Mbeliyanda na Elifweleti.

Ndavita ukukoma Bafwilishitina

⁸ Bafwilishitina oho bayuvwile ngayi Ndavita bamwingakale mwene wa litunga nimwalyo lya Ishalela, niho bakanzita babo bayile na kumushinga shinga ngayi bamukwate. Ngoboni Ndavita wayuvwileko, pe wayile na ku baketawiza.

⁹ Bafwilishitina bakumine ku Mukulo wa Lefwayima pe batatikile kupukula.

¹⁰ Ndavita wepwile Nyambi ngayi, “Kati niye na ku lwisha Bafwilishitina ndi? Kati ukabampana ndi?” Nyambi ya Ngula wakumbwile ngayi, “Ee, yanga ukalwe nika ku panabo.”

¹¹ Nohobene Ndavita wabalwishilile ku Mbaalu Pelazimu pe wabakomene. Wambile ngayi, “Nyambi unantwesheshe kulititimika ha bakanzita ba bamalamo ngonehe lya kupulanga libazi.” Nohobene mwanya watumbiwile ngayi Mbaalu Pelazima.

¹² Bafwilishitina oho batinine, bashiyile tunankishi twabo, pe Ndavita walayile ngayi bihokeshiwe.

¹³ Bafwilishitina babokele wanguwangu ku mukulo pe batatikile kupukula kami.

¹⁴ Ndavita wepwizizile kuli Nyambi, pe wamu kumbwile ngayi, “Hinga ubalwisha kuno, ngoboni yanga lishetenu ku zinguluka ngayi ubalwishe, pe waliwahishile kubalwishila kuliyahikiza hahepi na mitondo ya mbalashama.”

¹⁵ Oho mukayuvwa mishindo ya kwenda mu mitwe ya mitondo ya mbalashama, pe lwenu ndaba nikenda ku mbili yenu mu kukoma bakanzita ba Bafwilishitina.

¹⁶ Ndavita watendele eshe alayelele Nyambi pe watandile Bafwilishitina kubafumisha ku Ngimbiyoni, kubatanda kuka bakumisha naku Ngeza.

¹⁷ Mpupo ya Ndavita yakwayanine nimwako, kami Nyambi ya Ngula wayuvwishile matunga nimwawo bowa wakumutina.