1 Byambo 13 - Libuka Lya Kuyela

Likwati lya Kulimama likufumishiwa mu munzi wa Kiliati Yeyalima

¹ Mwene Ndavita walyambashanine na babilolo nimwabo ba bakulwane ku bipani bya bantu ba likulukazi naku bipani bya bantu ba mwanda umo.

² Niho abilikile na kutongweza bantu ba Ishalela aba ba kungulukilileko ngayi, “Ndi munetabili, kami ndi shikwinga shifungo sha Nyambi ya Ngula, Nyambi yetu, tokonoko tutume bantumwana ku wingi wa baminetu mu litunga naku Balevi, mu minzi yabo bakabatongweze ngayi beze ba kunguluke hamo nanetu.

³ Niho tukaya na kuleta Likwati lya Kulimama lya Nyambi, elye twakendele oho Shaulu engilenga mwene.”

⁴ Bantu bawahililile ha biyongola ebye, betabilile kutenda noho.

⁵ Nohobene Ndavita wakungwile bantu ba Ishalela bamu litunga nimwalyo, kubalikila ku mabukubuku ku nginza ya litunga lya Engepita kukakuma naku nzila ya ncinencine ya Hamati ku ncelele. Bakungulukile ngayi mwanga balete Likwati lya Kulimama lya Nyambi kulifumisha ku munzi wa Kiliyati Yeyalima.

⁶ Ndavita na Baishalela nimwabo bayile ku munzi wa Mbaalaha niwo munzi wa Kiliyati Yeyalima mu litunga lya Yunda. Bayile mu kuleta Likwati lya Kulimama kwa Nyambi, elye lili na lizina lya Nyambi ya Ngula, uya napayama mukati ka makelumbi.

⁷ Bakatutwishile Likwati lya Kulimama lya Nyambi ku litala lya Ambinandambu na kuliyaka mu shikocikala shashipya. Uza na Ahiyo balaminenga shikocikala.

⁸ Ndavita na bantu nimwabo ba Ishalela bashindilenga na ngovu zabo nimwazo mu kulemeeka Nyambi. Bembililenga na kumbeta tuhanzi na tumbuli na pala na mashokomba na zimpandula.

⁹ Oho bakumine ku likotwelo lya Kindoni, mapulu alituntwile, pe Uza wolwele liboko wakwatile ku Likwati lya Kulimama.

¹⁰ Nyambi ya Ngula wapilaminine Uza shikati shiya bene, pe wamuzihile ndaba ya kukwata Likwati lya Kulimama. Wafwililile kuyo ku meho a Nyambi.

¹¹ Ndavita wapilamine ndaba Nyambi ya Ngula washushwile Uza na wukali. Kufuma haya mwanya uyo watumbiwile ngayi Pelezi Uza.

¹² Ndavita wekalile na bowa wakutina Nyambi. Niho alyambashanine ngayi, “Nikutwesha nahiti kushimba Likwati lya Kulimama?”

¹³ Nohobene Ndavita wabulile kushimba Likwati na kuya nalyo ku Yelushalema ngoboni walishiyile ku litala lya Ombendi Endoma, waku munzi wa Ngati.

¹⁴ Likwati lyekalile kuyo zingonda zihatu. Nyambi ya Ngula watandalishile ba lupashi lwa Ombendi Endoma na byuma byendi nimwabyo.