1 Byambo 12 - Libuka Lya Kuyela

Bakakulwa Baku mushobo wa Mbenjamani ba kulifungila na Ndavita

¹ Oho Ndavita ekalilenga ku Zikilangi kuya etukilile ha kutina Shaulu mwana Kishi, bakanzita babengi benzilila bezile kukwendi mu kumuyavwa mu nzita.

² Bengile ba mushobo wa Mbenjamani ou wengile mushobo wa mwene Shaulu. Batweshelenga kupuha mivwi na mamanya mu shilangwa na liboko lya shilyo hinge lya shimoho.

³ Babendeshelenga bengile ba Ahiyaza na Yowashi, bana ba Shemaya babalume ba ku Ngimbiya. Bakanzita bengile ba Yeziyelu na Peleti, bana ba Azimaveti babalume na Mbelaka na Yehu baka Anatoti

⁴ na Ishimaya waku Ngimbiyoni, mukanzita wampupo kami wenga umo kubakakutwaminina Bakanzita makumi ahatu na Yelemiya na Yahaziyelu na Yohanani na Yozambandi ba ku Ngendela

⁵ na Eluzayi na Yelimoti na Mbeyaliya na Shemaliya na Shefwatiya ba ku Halifwa

⁶ na Elikana na Ishiya na Azalelu na Yoweza na Yasho Mbeyami ba ku livumo lya Kola

⁷ na Yowela na Zembandiya, bana ba Yelohama babalume ba ku Ngendoli.

⁸ Mazina awa niwo a bakanzita ba mpupo benzilila kulwa ba ku mushobo wa Ngandi, aba baliwanikile na makunge a Ndavita oho ekalilenga mu shipata shamu libelelengwa. Bengile ba wunongi ku makebo na milinga, bamonekelenga wukali ngo babimbwi na bakakwituka ngonehe lupala waha mapili.

⁹ Babakwatile ngo ku wukulwane wa bipona byabo ngonehe, ba Eza na Ombandiya na Eliyambi

¹⁰ na Mishimana na Yelemiya

¹¹ na Atayi na Eliyela

¹² na Yohanani na Eluzabandi

¹³ na Yelemiya na Makimbanayi.

¹⁴ Bantu bamo ba naba bantu ba ku mushobo wa Ngandi bengile babilolo ba kushuma batweshelanga na kulwisha likulukazi limo kami bamina bengile babilolo ba kupopa baya batweshelenga na kulwisha bantu mwanda.

¹⁵ Ku mwaka umo mu ngonda ya kutatika oho mushinzi wa Yondana ayitile naku bibumbo bazabukile mushinzi, pe bapanzanishile bantu aba bekalilenga mu mikulo nimwayo yaku mushamuko naku mponci ya mushinzi.

Bakakukonka Ndavita ba ku mishobo ya Mbenjamani na Yunda

¹⁶ Shikati shimo likunge lya bantu ba ku mishobo ya Mbenjamani na Yunda bayile ku shipata oku ekalilenga Ndavita.

¹⁷ Ndavita wayile na kubashimbawila pe wambile ngayi, “Ndi mukwiza munzila ya wuhoni mu kunyavwa, pe shinawaha munezi. Yekenu tulifungile. Ngoboni ndi mukushinga kumbebela ku bamalamo bami, hinge noho kumi lemeka nifwako. Nyambi ya bankakazetu ukalimukasho, pe ukamishushula.”

¹⁸ Moyo wa Nyambi wezile hali Amashayi, ou wengile mukakutwaminina Bakanzita makumi ahatu, pe wabilikile ngayi “Obe Ndavita mwana Njeshe, etu tunengi bobe. Tangama hamo nanobe,” Nyambi unemana hamo nanobe. Ndavita wabatambwile na kubenga babilolo mu nzita yendi.

Bakakukonka Ndavita ba ku mushobo wa Manashe

¹⁹ Bakanzita bamo ba ku mushobo wa Manashe balifungilile na likunge lya Ndavita oho ayilenga hamo na Bafwilishitina na kulwisha Mwene Shaulu. Hinge shingi noho Ndavita kaliha wayavwile Bafwilishitina ndaba babilolo babo bamubweshele ku Zikilangi. Batulela ba Bafwilishitina batinine ngayi kampe Ndavita ukaliyavwisha shikati eshe kulyambwilila na Shaulu, hekulyendi na kubabeba.

²⁰ Aba nibo bakanzita bafumine ku litunga lya Manashe, aba balifungilile na Ndavita oho abokelenga ku Zikilangi. Bengile ba Andina na Yozambandi na Yendiyelu na Mayikulu na Yozambandi na Elihu na Ziletayi. Mu litunga lya Manashe nimwabo bengile bakulwane bakakwendesha likulukazi lya bantu.

²¹ Batendelelenga milimo Ndavita kwinga babilolo ha makunge a bakanzita bendi ndaba nimwabo bengile bakanzita ba kushuma. Kukumininako bengile babilolo mu nzita ya Baishalela.

²² Bantu babapya bezilenga ha mutena ha mutena na kulifungila na bakanzita ba Ndavita, pe likunge lyanenehele shawanguwangu kwinga ngo nzita ya Nyambi.

Muhoko wa bakanzita ba Ndavita

²³ Kuyo ku Hembuloni ekalilenga Ndavita, bakanzita babengi ba kufunda shiwahe balifungilile na likunge lyendi mu kuyavwa ngayi bamushwanishe ha wene mu mwanya wa Shaulu, ngonehe amukulupishile Nyambi ya Ngula.

²⁴ Ku mushobo wa Yunda bakanzita bengile 6,800 balume bakakupakata shiwahe makebo na milinga.

²⁵ Ku mushobo wa Shimiyoni bakanzita ba kufunda shiwahe bengile 7,100.

²⁶ Ku mushobo wa Levi bengile bantu 4,600.

²⁷ Bakakukonka ntwamina Yehoyanda, bazukulya Aloni bengile 3,700.

²⁸ Zandoki, ou wengile ndumbana wakutwesha kulwa, wezile na bawushinda wendi 22, bengile bakulwane banzita.

²⁹ Ku mushobo wa Mbenjamani ou wengile mushobo wa Shaulu bengile bantu 3,000. Ha kutatika wingi wa bantu ba Mbenjamani bengilenga bakulunga kuli Shaulu.

³⁰ Ku mushobo wa Efulemu kwekalile bantu ba mpupo bamu mavumo wabo, bengile 20,800.

³¹ Ku mushobo wa Manashe waku mushamuko kwahatiwile bantu 18,000 bakuya na ku shwanisha Ndavita ha wene.

³² Ku mushobo wa Ishaka bakakutwaminina bengile 200 hamo na bantu bendeshelenga. Nibo balimukile ebye bashingilenga kutenda bantu ba Ishalela na shikati shashiwahe kutendabyo.

³³ Ku mushobo wa Zembuloni bengile balume 50,000 ba kutwesha kuya ku nzita. Bengile bakulunga na kutwesha kulwa, ba kufunda kulwisha mishobo nimwayo ya bilwisho.

³⁴ Ku mushobo wa Nafwitali bakakutwaminina bengile 1,000 hamo na balume ba kupakata makebo na milinga 37,000.

³⁵ Ku mushobo wa Ndani bengile bakanzita ba kufunda 28,600.

³⁶ Ku mushobo wa Asha bengile balume 40,000 baliwahishila shilumweza kulwa ngunga.

³⁷ Ku mushamuko wa Yondana, oku kwekalilenga mishobo ya Lubena na Ngandi na shitika sha mushobo wa Manashe, balume ba kulilongesha kulwisha mishobo nimwayo ya bilwisho bengile 120,000.

³⁸ Aba bakanzita nimwabo balishakashakile bya ha nzita, kami bayile ku Hembuloni bemikile ku shwanisha Ndavita kwinga mwene wa wene wa Ishalela nimwawo. Kami wingi wa bantu ba Ishalela balifungilile mu shihanganiko shimo.

³⁹ Bekalile hamo na Ndavita matena ahatu, bayambwanine na byakulya biya babawahishilile baminabo bandambo na ku wahilila.

⁴⁰ Bantu bafumine kwakutali ku mishobo yaku ncelele ya Ishaka na Zembuloni na Nafwitali. Baletele byakulya bya ku shimbilila, hamo na muhunga na nkuyu na mikabo ya shinyanca ya kuyanika na waine na mazi a olive bya ku shimbilila ha bambongolo na bakamela na bambishi na bankunzi. Baletele kami zingombe na bambelele bya kuziha ngayi balye. Nimwasho eshe shengile kutontolola ku wahilila kwayuvwanikile mu litunga nimwamo lya Ishalela.