1 Byambo 11 - Libuka Lya Kuyela

Ndavita ukwinga mwene wamu Ishalela na Yunda

¹ Bantu ba Ishalela nimwabo bezile kuli Ndavita ku Hembuloni pe bambile kukwendi ngayi, “Mona, tunengi lutu lumo na mukeza umo.

² Ku mwaka hinge oho Shaulu engilenga mwene yetu, obe watwamininenga bantu ba Ishalela ku nzita. Nyambi ya Ngula, Nyambi yobe, wakulupishile ngayi ukatwaminina bantu bendi na kwinga kalela wabo.”

³ Nohobene bakakutwaminina nimwabo ba Ishalela bezile kuli Mwene Ndavita ku Hembuloni. Walimamine nabo ku meho a Nyambi ya Ngula, bamuwabishile kwinga mwene wa Ishalela ngonehe aba kulupishile Nyambi ya Ngula muli Shamwele.

⁴ Mwene Ndavita na Baishalela nimwabo bayile na kulwisha lukena lwa Yelushalema. Nilwo lwalimukiwile ngayi Yembushi ha shikati shiyo na Bayembushi bamwine litunga hinga bekalamo.

⁵ Bayembushi batongwezele Ndavita ngayi hinga mwaka akatanga kwingina mukati ka lukena, ngoboni Ndavita wapukwile shipata shabo sha Ziyoni, pe lwalimukiwile kwinga Lukena lwa Ndavita.

⁶ Ndavita wambile ngayi, “Muntu wakutatika kuziha Kayembushi ukenga mukulwane wa bakanzita.” Yowambu mwana Zeluya mpanza Ndavita, wakatwile bakanzita kuya mu kulwa, pe wengile mukulwane wa bakanzita.

⁷ Ndaba Ndavita wekalilemo niho ashitumbile ngayi, Lukena lwa Ndavita.

⁸ Watendulwile lukena kubalikila ku mwanya waku mushamuko wa shinkanda oku babuwilile, pe Yowambu watendulwile wunene wa lukena nimwalwo.

⁹ Ndavita wakulile na ku shuma shikuma, ndaba Nyambi wa Makunge wekalilenga nendi hamo.

Bakanzita ba Ndavita ba mpupo

¹⁰ Owe niwo muhoko wa mazina a bakanzita ba Ndavita ba mpupo, baya bamuyavwile kwinga mwene hamo na wingi wa bantu ba Ishalela, ngonehe a kulupishile Nyambi ya Ngula, pe balamine wene wendi na ngovu.

¹¹ Yasho Mbeyami wengile wakutatika wamu livumo lya Hakimoni. Niye wengile mukakutwaminina waku baya Bantu bahatu walwishilenga na mulinga wendi balume 300 pe wabazihile nimwabo mu nzita yimo.

¹² Wakulundamina hakati ka baya bantu bahatu wengile Eliza mwana Ndondo wa ku livumo lya Ahohi.

¹³ Wemanine na Ndavita ku lwisha Bafwilishitina ku nzita ya Pashi Ndamina. Wekalile mu mfuba ya luku oho Baishalela batatikile kutina,

¹⁴ ngoboni Eliyazala na bantu bendi balikwatishile na kwimana mukati ka mfuba, pe balwile na Bafwilishitina. Nyambi ya Ngula wamupanine kukoma kwakunene shikuma.

¹⁵ Mutena umo bahatu ba hakati ka bakanzita bangovu ba makumi ahatu bayile ku limanya oku ekalilenga Ndavita hahepi na linzolongoma lya Andulama, muhoko wa bakanzita ba Bafwilishitina batulilile mu Mukulo wa Lefwayima.

¹⁶ Ha shikati shiyo Ndavita wekalile mu shipata, pe bakanzita ba Bafwilishitina bekalile mu Mbetelehema.

¹⁷ Ndavita walishozele ku munzi pe wambile ngayi, “Tawee! Shinga taha na muntu wakundetelako mema akunwa aku lishima lya hahepi na lipangati lya ku Mbetelehema.”

¹⁸ Bakanzita bahatu ba mpupo bengile nkanzi kuliyoha na kupita mu munkungwa wa Bafwilishitina, kuya na ku tekula mema ku lishima kwakwipi na lipangati lya Mbetelehema na kuwaleta kuli Ndavita. Ngoboni kaliha wa wanwine. Wa wayitilile hanci kwinga ngonehe nkombela kuli Nyambi ya Ngula.

¹⁹ Wambile ngayi, “Nyambi akane kutwesha kuwanwa nifwako. Nisho shikwinga ngo nikunwa mukeza wa naba bantu banayaka wumi wabo mu malamo.” Nohobene wakanine kuwanwa. Eshe shengile shimo ha biheka bya bakanzita ba mpupo.

²⁰ Ambishayi mukonzo wa Yowambu wengile mukakutwaminina wa baya Bakanzita ba mpupo Makumi Ahatu. Walwile na bantu 300 na mulinga wendi na ku baziha. Pe wekalile na mpupo ngonehe aba bamina “Bahatu.”

²¹ Ambishayi wayile mpupo shikuma ha Bakanzita Makumi Ahatu, pe wengile mukakubatwaminina, ngoboni kaliha wengile wampupo ngonehe baya Bantu Bahatu.

²² Mbenaya mwana Yehoyanda waku Kambizelu, wengile kanzita wampupo. Watendele byuma bya kukanca byabingi, kufungilako ha kuziha bakanzita babanene babili ba Bamowambi. Kami wakunkulukilile mu liteke na kuziha shimbwi ha mutena awile makelengo.

²³ Niho kami azihile mulume wawutambi wa Kaengepita, wutali wendi wengile mamita abili, wakamatilile mulinga wa wunene mu liboko lyendi. Mbenaya wamulwishile na muwana, wahukwile mulinga mu liboko lya Kaengepita, pe wamuzihishileko.

²⁴ Obyo nibyo byuma bya kukanca atendele Mbenaya mwana Yehoyanda, umo wa bamina “Makumi Ahatu.”

²⁵ Wekalile na mpupo shikuma hakati ka Bakanzita Makumi Ahatu, ngoboni kaliha ngonehe baya Bahatu. Ndavita wamuyakile ku bakulwane bakakumulama.

²⁶ Bakanzita bamina ba kutakalala bengile ba Ashaheli mukonzo wa Yowambu na Elihanani mwana Ndondo waku Mbetelehema

²⁷ na Shamoti waku Halondi na Helezi waku Peloni

²⁸ na Yila mwana Yikesha waku Tekoya na Ambiyeza waku Anatoti

²⁹ na Shibekayi waku Husha na Ilayi waku Ahohi

³⁰ na Mahalayi waku Netofwa na Helendi mwana Mbaana waku Netofwa

³¹ na Itayi mwana Limbayi waku Ngimbiya mu litunga lya Mbenjamani na Mbenaya waku Pilotoni

³² na Hulayi waku mikulo ya kwakwipi na Ngashi na Ambiyale waku Alimba

³³ na Azimabeti waku Mbahulima na Eliyahimba waku Shalimboni

³⁴ na Hashemu waku Ngizini na Yonatana mwana Shange wa mulume waku Hala

³⁵ na Ahiyama mwana Shakala wa mulume waku Hala na Elifwalu mwana Ule wa mulume

³⁶ na Hefwa waku Mekela na Ahiya waku Peloni,

³⁷ na Hezilo waku Kamela na Nalayi mwana Ezibayi

³⁸ na Yowele yayiyendi Natani na Mimbiha mwana Hangili

³⁹ na Zeleki wa Kaamoni na Nahalayi waku Mbeloti washimbilenga bilwisho bya Yowambu mwana Zeluya

⁴⁰ na Yila na Ngalembi waku Yatile

⁴¹ na Uliya wa Kahita na Zabandi mwana Ahilayi

⁴² na Andina mwana Shiza niye wengile wakulimukiwa waku mushobo wa Lubena kami wekalile na likunge lyendi lya makumi ahatu lya bakanzita

⁴³ na Hananu mwana Maaka wa mulume na Yoshafwati waku Mitani

⁴⁴ na Uziya waku Ashitela na Shama na Yeyiwelu bana ba Hotami babalume ba ku Alole

⁴⁵ na Yendiyelu na Yoha bana ba Shimili babalume ba ku Tili

⁴⁶ na Eliyela waku Mahaba na Yelibayi na Yoshabiya bana ba Elinaamu babalume na Itima waku Mowambi

⁴⁷ na Eliyela na Ombendi na Yaashiyelu ba ku Zoba.