1 Byambo 1 - Libuka Lya Kuyela

Mukoka wa Andama

¹ Andama wengile tata Sheta, Sheta wengile tata Enoshi, Enoshi wengile tata Kenani,

² Kenani wengile tata Mahalalelu, Mahalalelu wengile tata Yalendi.

³ Yalendi wengile tata Enoki, Enoki wengile tata Metushela, Metushela wengila tata Lameki,

⁴ Lameki wengile tata Nowa. Nowa wabelekele bana babalume, bahatu ba Shemu na Hamu na Yafweti.

⁵ Bana ba Yafweti bengile Ngomela na Mangongi na Mendiya na Yabani na Tumbalu na Mesheki na Tilashi. Aba bengile bankaka za bantu aba batumbile matunga mazina wabo.

⁶ Bana ba Ngomela bengile Ashikenazi na Lifwati na Tongama.

⁷ Bana ba Yabani bengile ba Elishahi na Tashishi na Kitimu na Londanimu.

⁸ Bana ba Hamu bengile Kushi na Engepita na Limbiya na Kenaani. Aba bengile bankaka za bantu batumbile matunga mazina wabo.

⁹ Bazukulya Kushi bengile Shebe na Habila na Shambita na Lama na Shambitika. Bazukulya Lama bengile Shemba na Ndendani.

¹⁰ Kushi wa belekele Nimulondi ou wengile muntu wakutatika hano hanci mu ka kulwa wa ngovu.

¹¹ Bana ba Engepita bengile bantu ba ku Lundimu na Anamimi na Lehambimi na Nafutuhima

¹² Patuluzi na Kashiluhimu na bantu ba Kafwitola, niko kwa fumine Bafwilishitina.

¹³ Bana ba Kenaani babalume bengile Shindoni wa mweli na Heti. Aba bengile bankaka za bantu aba batumbile matunga mazina wabo.

¹⁴ Kenaani wengile kami nkaka ya Bayembushi na Baamoli na Bangilingashi,

¹⁵ na Bahivi na Baakite na Bashina

¹⁶ na Alibanditi na Bazamaliya na Bahamati.

¹⁷ Bana ba Shemu bengile Elamu na Ashula na Alipakishandi na Lundi na Alamu. Bana ba Alamu bengile ba Uzi na Hula na Ngeta na Mashi. Aba bengile bankaka za bantu aba batumbile matunga mazina wabo.

¹⁸ Alipakishandi wengile tata Shela, Shela wengile tata Emba.

¹⁹ Emba wabelekele bana babili umo watumbiwile ngayi Pelengi, ndaba ha shikati shendi bantu ba hanci balitapatapile. Wamina watumbiwile ngayi Yokitani.

²⁰ Yokitani wabelekele Alimondandi na Shelefi na Hazalamabeta na Yela,

²¹ na Handolamu na Uzalu na Ndikila,

²² na Embalu na Ambimayele na Shemba

²³ na Ofwila na Habila na Yombambu. Nimwabo aba bengile bana ba Yokitani.

²⁴ Muhoko wa bihemunwino bya ba lupashi ku balika kuli Shemu kukuma kuli Abulama byengile nehe, Shemu wabelekele Alipakishandi, Alipakishandi wabelekele Shila,

²⁵ Shila wabelekele Emba, Emba wabekele Pelengi, Pelengi wabelekele Leu,

²⁶ Leu wabelekele Shelungi, Shelungi wabelekele Nahole, Nahole wabekele Tela.

²⁷ Tela wabelekele Abulama, kami watoyiwile ngayi Abulahama.

Bazukulya Ishimaele

²⁸ Abulahama wabelekele bana babalume babili, bengile Ishaki na Ishimaele.

²⁹ Bana ba Ishimaele babalume bengile bakulwane ba mishobo likumi na yibili. Nibo bengile Nebayoti mwana Ishimaele wa mulume wa mweli na Kenda na Andimbelu na Mimbushama,

³⁰ na Mishima na Nduma na Masha na Handandi na Tema,

³¹ na Yetula na Nafwishi na Kendema.

³² Abulahama wekalile na mukazendi wakwinginina watumbiwile ngayi Ketula, ou wamubelekelele bana babalume mutanu na umo. Mazina wabo bengile ba Zimilani na Yokishani na Mendani na Mindiyani na Ishimbaki na Shuwa. Yokishani wabelekele bana babalume babili, bengile ba Shemba na Ndendani.

³³ Mindiyani wabelekele bana babalume mutanu. Bengile Efwa na Efwila na Hanoki na Ambinda na Elinda. Aba nimwabo bengile bazukulya Ketula.

Bazukulya Ishau

³⁴ Mwana Abulahama wa mulume Ishaki wabelekele bana babalume babili, Ishau na Yakoba ou watumbiwile ngayi Ishalela.

³⁵ Bana ba Ishau babalume bengile Elifwazi na Leule na Yeushi na Yalamu na Kola.

³⁶ Mishobo ya Temani na Omala na Zefwo na Ngatama na Kenazi na Timina na Amaleki, nkaka yabo wengile Elifwazi.

³⁷ Kami mishobo ya Nahati na Zela na Shama na Miza, nkaka yabo wengile Leule.

Bantu bamu litunga lya Endoma

³⁸ Bazukulya Sheya aba bazikilenga mu litunga lya Endoma bengile ba Lotana na Shobala na Zibeyoni na Anahi na Ndishoni na Eza na Ndishani.

³⁹ Lotana wengile nkaka ya mavumo a Baholi na Homami. Lotana wekalile na mpanzendi ou watumbiwile ngayi Timina.

⁴⁰ Shobala wengile nkaka ya mavumo aba Alivani na Manahati na Embalu na Shefwi na Onama. Zibeyoni wabelekele bana babalume babili Aiya na Anahi.

⁴¹ Anahi wabelekele Ndishoni, kami Ndishoni wengile nkaka ya mavumo a Hemundani na Eshimbani na Itilani na Kelani.

⁴² Eza wengile nkaka ya mavumo a Mbilihani na Zaavani na Yaakani. Ndishani wengile nkaka ya mavumo a Uzi na Alani.

Bamyene bamu Endoma

⁴³ Aba nibo bamyene balelele litunga lya Endoma ha shikati kwa bulilenga bamyene mu Ishalela, ba shwaninenga umo kufwa, wamina pe aku hingaho. Mbela mwana Mbeyola wa mulume lukena lwendi lwa tumbiwile Ndinihamba.

⁴⁴ Oho Mbela afwile, pe Yombambu mwana Zela wa mulume waku Mbozila wa mu shwanine.

⁴⁵ Oho Yombambu afwile, pe Hushami waku litunga lya Temani wamushwanine.

⁴⁶ Oho Hushami afwile, pe Handandi mwana Mbendandi wa mulume, ou wakomene Bamindiyani mu litunga lya Mowambi wamushwanine. Lukena lwendi lwatumbiwile ngayi Aviti.

⁴⁷ Handandi wafwile, pe Shamila waku Mesheleka wamushwanine.

⁴⁸ Oho Shamila afwile, Shaulu waku Lehomboti ku shibumbo sha mushinzi wa Yufuleti wamushwanine.

⁴⁹ Oho Shaulu afwile, Mbaalu Hanani mwana Akimbo wa mulume wamushwanine.

⁵⁰ Oho Mbaalu Hanani mwana Akimbo afwile, Handa wamushwanine. Lukena lwendi lwatumbiwile Pau. Lizina lya mukazendi Mahatambela mwana Matelandi, muzukulya Mezahaba wa mbuyama.

⁵¹ Handandi kami wafwile. Bantu ba ku Endoma kami balitapatapile mu mishobo eye, Timina na Aliva na Yeteti,

⁵² na Oholimbama na Ela na Pinoni

⁵³ na Kenazi na Temani na Mimbiza,

⁵⁴ na Mangindiyele na Ilama. Aba bengile bamyene ba ku Endoma.