1 Bamyene 9 - Libuka Lya Kuyela

Nyambi ukuliholola kami kuli Sholomoni

¹ Oho Sholomoni amanishile kuzika Litala lya Nyambi na musheke wa mwene na byuma nimwabyo ebye kami ashingile kutenda,

² Nyambi ya Ngula waliholwele kukwendi kami, ngonehe aliholwele kukwendi mu Ngimbiyoni.

³ Nyambi ya Ngula wambile kukwendi ngayi, “Nayuvwu lilombelo lyobe. Haya nakufungula Litala elye unaziki kwinga mwanya ou bakandemeshelanga, omu mukekalanga lizina lyami mwaya myaka. Nikalilama na kulikoweza na mutima wami na kupenza meho wami, hahalyo shikati nimwasho.

⁴ Pe haya, ndi wukantendelanga milimo na kupwisha na mutima wumo ngonehe eshe atendelenga milimo tatiyobe Ndavita, pe kami ndi ukwombatala mazu wami na kutenda byuma nimwabyo biya na kulaya,

⁵ nikalama shikulupisho na kulupishile kuli tatiyobe Ndavita oho namutongwezele ngayi bazukulyobe nibo bakalelanga Ishalela shikati nimwasho.

⁶ Ngoboni ndi obe hinge bazukulyobe mukalehasho kunkonka, ndi mukabula kwombatala mazu wami na ndayano eze namipana na kulemesha banyambi bashenge,

⁷ nikafumisha bantu bami Baishalela mu litunga lino na bapanikile pe kami nikashiya lino litala lyami elye nafungwile ngayi bakandemeshelengamo. Bantu kuti na kuti bakahendola Baishalela na kubakenda.

⁸ Hinge ngayi elye Litala lyaliwahe shikuma, ngoboni likanyemuka kufutuka lipembe, pe bantu nimwabo bakapita kwakwipi bakakomoka shikuma. Bakepula ngayi, ‘Kati shumangani Nyambi ya Ngula atendela nehe ku litunga elye naku lino Litala?’

⁹ Bantu bakakumbula ngayi, ‘Ndaba bantu ba Ishalela bafutaminine Nyambi ya Ngula, Nyambi yabo, Ou wafumishile bankakazabo mu Engepita, bakakatilile banyambi bashenge pe babalemeshele, nisho shuma shiya Nyambi ya Ngula analetele ano makando hahabo.’”

Kuliyuvwashana kwa Sholomoni na Hilamu

¹⁰ Mwene Sholomoni washimbile myaka makumi abili ha kuzika Litala lya Nyambi na musheke wendi.

¹¹ Ha kutatika mwene Hilamu waku Tile wamupanikile bitondo bya shinda na bya mipaini nimwabyo na ngolinde ngonehe ashingile ha uno mulimo. Oho wamanine mwene Sholomoni wapanikile Hilamu minzi makumi abili mu litunga lya Ngalileya.

¹² Hilamu wayile mu kuyimona, pe kaliha wayishingile.

¹³ Pe wambile kuli Sholomoni ngayi, “Haya eye niyo minzi ngani unampaniki, obe kawushinda wami.” Ndaba ya shuma eshe mbalila eye yishili kutumbiwa ngayi Kambulu.

¹⁴ Ha kutatika Hilamu watuminine mwene Sholomoni ngolinde wakupitakana makulukazi anaa, wulemu wengile makilo 4,000.

Omo awanininenga Sholomoni mwamina

¹⁵ Mwene Sholomoni waliyavwishile bantu ba shipalo kutenda mulimo wa likungubule wakuzika Litala lya Nyambi na musheke wendi na kubuwa kembi kumbalila ya ku mushamuko wa Yelushalema na kutenda kembi ka lukena. Waliyavwishilebyo kami mu kutendulula minzi ya Hazola na Mengindo na Ngeza.

¹⁶ Ha kutatika mwene wa Engepita walwishile lukena lwa Ngeza pe walupukwile. Wazihile bakenaani bazikilengamo, pe wahokeshele lukena. Niho alupanine kuli mwanendi wa mbuyama kwinga ncuungu ya maluwo endi oho amuyekele Sholomoni.

¹⁷ Sholomoni watendulwile lukena lwa Ngeza, kami Mbeti Holoni waku mukulo

¹⁸ na Mbaalati na Tamale mu libelelengwa lya Yunda na kuliyavwisha bantu bendi ba shipalo.

¹⁹ Eye minzi niko atentekelelenga byuma byendi mwene Sholomoni, minzi ya bambishi bendi na makoloyi a nzita. Watendele byuma byamina ashingile kutenda mu Yelushalema namu Lembanoni namu zimbalila zashenge mu wene wendi.

²⁰ Ku milimo yendi nimwayo Sholomoni waliyavwishile bazukulya bantu ba ku Kenaani aba bantu ba Ishalela babulile kuziha oho bakonene litunga lyabo. Aba bengile Baamoli na Bahita na Bapelizi na Bahivi na Bayembushi,

²¹ aba bazukulyabo bashili kwinga bandungo kukuma na ku shikati shino.

²² Sholomoni kaliha wahetele bandungo ba Baishalela, nibo wabayakile tuhu kwinga bakanzita na babilolo na bakulwane banzita na bakulwane ba ku makoloyi na bakakukandama ha bambishi.

²³ Kwekalile babilolo ba bakulwane 550 bamonenenga bantu aba batendelenga milimo nimwayo ya Sholomoni ya kuzika.

²⁴ Sholomoni wafumishile mukazendi, mwana mwene waku Engepita, mu Lukena lwa Ndavita kumuleta ku musheke kuya amutendelele. Niho abuwile kembi kumbalila yaku mushamuko wa lukena.

²⁵ Sholomoni wakombelelenga nkombela ya kuhokesha na nkombela ya kulilumikila ha kaala aka azikilile Nyambi ya Ngula kahatu mwaka na mwaka. Wahokeshele Incence kuli Nyambi ya Ngula. Eshe nisho amanishile kuzika Litala lya Nyambi.

²⁶ Mwene Sholomoni kami wabazishile mato amanene amengi ku Eziyoni Ngemba, kwakwipi na Elati, ha shibumbo sha liwate ku likobo lya Akamba, mu litunga lya Endoma.

²⁷ Mwene Hilamu watumine bantu benzilila kuvuwa mato mu kuvuwa hamo na bantu ba Sholomoni.

²⁸ Bayile na mato ku litunga lya Ofwila, kami baletelenga kuli Sholomoni ngolinde wakukuma ku makilo 14,000.