1 Bamyene 8 - Libuka Lya Kuyela

Likwati lya Kulimama likutwaliwa ku Litala lya Nyambi ya Ngula

¹ Niho Sholomoni ehanine bakulwane ba mishobo na mavumo a Ishalela ngayi nimwabo beze kukwendi mu Yelushalema ngayi mwanga bakalete Likwati lya Kulimama kwa Nyambi ya Ngula mu Ziyoni Lukena lwa Ndavita na kuliyaka mu Litala lya Nyambi ya Ngula.

² Bantu nimwabo ba Ishalela bezile hamo ku shimbo sha minkungwa shamu ngonda ya Etami, ngonda ya mutanu na zibili.

³ Oho bakulwane nimwabo bakungulukile, bakankombela bakatwile Likwati lya Kulimama,

⁴ na kulitwala ku Ntanda ya shikungulukilo.

⁵ Mwene Sholomoni na bantu nimwabo ba Ishalela bakungulukile kumbili ya Likwati lya Kulimama, pe bakombelelele zingombe na bambelele babengi shikuma bakubula kutwesha kulabiwa.

⁶ Niho bakankombela bashimbile Likwati lya Kulimama na kuliyaka mukati ka Mwanya wa Kuyela Shikuma wamu Litala lya Nyambi ya Ngula, mu nceto ya makelumbi a mbando.

⁷ Mbando zawo, za kutandubuka zafwikile ha Likwati lya Kulimama hamo na mibanda yalyo ya ku kulikila.

⁸ Mibanda eye yengile yayitali shikuma ngayi yatweshele ku moneka ku zinkumo zayo hakwimana mu Mwanya wa Kuyela shikuma, ngoboni kutwesha ku moneka ku mbalila yashenge yifwako. Kuleta na kulelo mibanda eye niko yishili.

⁹ Kaliha mwekalile shuma mu Likwati lya Kulimama ndele tuhu matapa abili awa ayakilemo Moshesha kuyo ku Lipili lya Shinayi, oku alimaminine Nyambi ya Ngula na bantu ba Ishalela aha bezilenga kufuma ku Engepita.

¹⁰ Oho Bakankombela bafuminenga ku Litala lya Nyambi ya Ngula, likumbi lyenzalilemo.

¹¹ Kaliha batweshele kuboka mukutenda milimo yabo ndaba kubyazima kwa wuwahe waku meho a Nyambi ya Ngula kwenzalile mu Litala lya Nyambi ya Ngula.

¹² Niho Sholomoni alombelele ngayi, “Obe Nyambi ya Ngula, obe wayakile mutena muyilu, ngoboni Obe bene unahata kwikala mu makumbi akushipa.

¹³ Haya nakuzikilakale Litala lya wuwahe wobe, mwanya wobe mwakwikala mwaya myaka.”

Sholomoni ukwamba ku bantu

¹⁴ Mwene Sholomoni watengulukile na kubapenza Baishalela nimwabo hinga bemana, pe wabanyepelele mfuywezi za Nyambi.

¹⁵ Niho ambile ngayi, “Yemezenu Nyambi ya Ngula, Nyambi wa Ishalela! Unalama shikulupisho eshe a kulupishile tate Ndavita oho ambile ngayi,

¹⁶ ‘Ku balika ku shikati shiya nafumishile bantu bami mu Engepita, kaliha nahatile lukena luti hinge luti mu litunga nimwalyo lya Ishalela omu mukazikiwile ngayi mwanga nikayakemo lizina lyami oku nikalemeshiwilanga. Ngoboni nahatile obe Ndavita, kwinga kalela wa bantu bami.’

¹⁷ Tate Ndavita wafungile kuzika litala lya lizina lya Nyambi ya Ngula, Nyambi wa Ishalela lya kumulemeshela.

¹⁸ Ngoboni Nyambi ya Ngula, wambile kuli Tate Ndavita ngayi, ‘Unatende shiwahe ha kushinga kuzikila litala ku lizina lyami,

¹⁹ ngoboni hinga mwaka wukatanga kulitenda. Mwanobe wa mulume niye ukazika litala lya lizina lyami.’

²⁰ Pe haya Nyambi ya Ngula unalama shikulupisho eshe a kulupishile nashwanakale Tate Ndavita kwinga mwene wa Ishalela. Naziki litala lya lizina lya Nyambi ya Ngula, Nyambi wa Ishalela lya kumulemeshela.

²¹ Kami mu Litala lya Nyambi nawahishi mwanya wa Likwati lya Kulimama omu muli matapa a mamanya a Kulimama oku alimamine Nyambi ya Ngula na bankakazetu oho abafumishile mu Engepita.”

Lilombelo lya Sholomoni

²² Niho Sholomoni emanine kumbili ya kaala ku meho a bantu nimwabo, pe wakatwile maboko wendi,

²³ walombelele ngayi, “Obe Nyambi ya Ngula, Nyambi wa Ishalela, kowa nyambi waku kufweka muyilu hinge hano hanci! Walamanga kulimama kwobe na bantu bobe na kubamonesha nceshe zobe za mwaya myaka, oho ba kukwombatala na mitima yabo nimwayo.

²⁴ Unalama shikulupisho eshe wakulupishile kuli Tate Ndavita, pe lizu nimwalyo lelo linatendiwi.

²⁵ Haya Obe Nyambi ya Ngula, Nyambi wa Ishalela, lama bikulupisho biya wakulupishile mukamulimo wobe, Tate Ndavita oho wamutongwezele ngayi, ‘Nikayaka shikati nimwasho ku umo ha bazukulyendi ukashwananga kwinga mwene wakulela Ishalela, ndi bakwombatala shiwahewahe mazu obe ngonehe atendele tate.’

²⁶ Nohobene haya, Obe Nyambi ya Ngula, Nyambi wa Ishalela, yitabila byuma biya nimwabyo wakulupishile kuli muka mulimo wobe tate Ndavita, kwinga bya kupwisha.

²⁷ “Ngoboni kati, Obe Nyambi, mwa shikuma ukutwesha kwikala hano hanci ndi? Shikwanga wunene wa liyilu nimwalyo kulinganamo wufwako, pe Litala lino natende likaneneha nahiti ngayi ukalinganemo?

²⁸ Hinge noho, Obe Nyambi ya Ngula, Nyambi yami, yuvwa lilombelo lyami. Ami nenga mukamulimo wobe, pe umpane ebye nanyepe lelo kukwobe.

²⁹ Lama elye litala lyobe wushiku na mwaana. Mwanya ou unahata wakukulemeshelanga, omu wambile ngayi ukayaka lizina lyobe. Nohobene nyuvwe oho nikupenza ku litala lyobe na kulombela.

³⁰ Yuvwa malombelo wami na malombelo a bantu bobe Ishalela oho ba kupenza ku mwanya uno na kulombela. Tuyuvwe na kutuyatila omwo mu munzi wobe wa muyilu.

³¹ “Oho muntu akuyatishiwa ngayi unabipishili wamina, pe ukuletiwa ku kaala kobe muno mu Litala lyobe mu kulibeza kwa kuliyawila,

³² Obe Nyambi ya Ngula, yuvwako omwo muyilu na kuyata bakamilimo bobe. Shushula muntu wa mulandu ngonehe shinamufwanini na ku shambisha muntu ou wakubula mulandu.

³³ “Oho bantu bobe ba Ishalela banakomiwi ku bamalamo babo ndaba banakubipishili, pe oho ba kutengulukila kukwobe na kwiza ku litala lino na kulombela kukwobe na kulilimbwilisha ngayi bayatiwile,

³⁴ bayuvwe omwo muyilu wekala. Yatila wubi wa bantu bobe pe ubabweshe ku litunga elye wapanikile bankakazabo.

³⁵ “Oho ukukanisha mvula kuloka ndaba bantu bobe banakubipishili pe haya oho ba kutenguluka na kupenza ku Litala lyobe na kulombela na kulilimbwilisha,

³⁶ bayuvwe omwo muyilu wekala. Yatila wubi wa mwene na wa bantu ba Ishalela, pe balongeshe sha kutenda ebye binawaha. Obe Nyambi ya Ngula, tuma mvula ha litunga lyobe, elye wapanikile ku bantu bobe kwinga likona lya kubula kumana.

³⁷ “Oho kukekala kapande mu litunga, hinge wulweli waku mbuto, hinge mpepo ya nkuli na lyeya, hinge matanga a mikumbi, hinge ndi bantu bobe bakabalwisha ku bamalamo babo, hinge ndi kuli malweli akuliyambwisha, hinge wulweli wakubula kutwesha kupangiwa, hinge kukola tuhu hakatikabo, yuvwa kulomba kwabo.

³⁸ Ndi bamo ba bantu bobe Ishalela ba kulibela mu mitima, hiba kutandubwila maboko wabo na kulombela ku shangula ku Litala lino,

³⁹ yuvwa kulomba kwabo. Bayuvwe omwo mumunzi wobe muyilu, pe bayatile na kubayavwa. Obe tuhu ninkayobe walimuka bihanganiko bya mitima ya bantu. Tenda ku muntu na muntu ngonehe shinamufwanini,

⁴⁰ nohobene ngayi bantu bobe mwanga ba kutine shikati nimwasho bakazika mu litunga elye wapanine ku bankakazetu.

⁴¹ “Oho lipukwenda waku litunga lya kwakutali,

⁴² akayuvwa mpupo ya lizina lyobe, pe hakwiza mu kulemesha na kulombela ku litala lino,

⁴³ yuvwa lilombelo lyendi. Yuvwa kukwendi omwo mu munzi wobe muyilu, pe tenda ebye akukunyepa ngayi umutendele, nohobene ngayi mikoka ya hano hanci nimwayo mwanga yilimuke lizina lyobe na kukutina, ngonehe ba kutenda bantu bobe Ishalela. Niho bakalimuke ngayi lino Litala lyobe naziki, nilyo oku wukalemeshiwilanga omu mwekala Lizina lyobe.

⁴⁴ “Oho ukalaya bantu bobe kuya ku nzita na kulwisha bamalamo babo ba kulombela kukwobe, hinge ndi balikuti, pe hiba kushangula naku penza ku lukena luno olu wahatile na lino litala lyobe, elye nazikili lizina lyobe,

⁴⁵ pe yuvwa malombelo wabo. Ubayuvwe omwo muyilu, pe ubapane kukoma bamalamo babo.

⁴⁶ “Oho bantu bobe banakubipishili, ndaba kowa muntu wabula Kubipisha, pe ha kubapilamina ukwitabilisha bamalamo babo kubakoma na kubatwala na kwinga bantapwa ku litunga lyamina, hinge liya litunga lyekalile kwakutali.

⁴⁷ Yuvwa malombelo a bantu bobe. Ndi shinga muyo mu litunga ba kutenguluka na kulombela kukwobe na kulitabila ha wubi wabo na kuluwa kwabo ngayi banabipishi, bayuvwe, Obe Nyambi ya Ngula malombelo wabo.

⁴⁸ Ndi shinga mu litunga liyo ba kutenguluka na kupwisha na kulunga, pe ba kulombela kukwobe, oho hinga bapenza ku litala lino elye wapanine bankakazetu naku lukena luno wahatile, kami naku litala lino nazikili lizina lyobe,

⁴⁹ pe yuvwa malombelo wabo. Bayuvwe omwo mu munzi wobe wekala muyilu, bayavwe mu wukalu wabo.

⁵⁰ Yatila wubi wabo nimwawo naha nkani zabo za kukufutulukila, pe wingishe bamalamo babo kubekalika na nceshe.

⁵¹ Banengi bantu bobe, aba wafumishile mu Engepita, mu iya ngaanze ya kubanga.

⁵² “Obe Nyambi Mpandashilanga mwanga uyamizize bantu bobe Ishalela na mwene yabo shikati nimwasho, kami yuvwa lilombelo lyabo shikati nimwasho eshe bakwihana kukwobe kushinga kuyavwiwa.

⁵³ Obe walihatililebo mukati ka mikoka nimwayo kwinga bantu bobe, ngonehe shiya wabatongwezele muli mukamulimo wobe Moshesha, oho Obe Nyambi ya Ngula wafumishile bankakazetu mu Engepita.”

Lilombelo lya kukumininako

⁵⁴ Oho Sholomoni amanishile kulombela kuli Nyambi ya Ngula, wakatukile na kwimana kumbili ya kaala. Washinkamine na kulombela hinga olola maboko kuyilu.

⁵⁵ Wanyepelele shikungulukilo nimwasho sha Ishalela bakungulukile kuyo mfuywezi za Nyambi na lizu lya ku boboka. Wambile ngayi,

⁵⁶ “Yemezenu Nyambi ya Ngula, ou unapaniki bantu bendi mwanya wakukatalila mu ku mwena, ngonehe a kulupishile. Unalama bikulupisho nimwabyo. Kowa lizu limo linawili hanci ku biya a kulupishile muli mukamulimo wendi Moshesha.

⁵⁷ Mwanga Nyambi ya Ngula, Nyambi yetu, ekale hamo nanetu, ngonehe ekalile na bankakazetu, mwanga abule kutushiya hinge kutufutamina,

⁵⁸ mwanga atengulule mitima yetu, mwanga twende mu zintambo zendi na kwombatala mazu wendi na kulama ndayano eze apanine bankakazetu.

⁵⁹ Mwanga Nyambi ya Ngula, Nyambi yetu, anukenga lino lilombelo na kulambilila oku natende kukwendi shikati nimwasho. Mwanga enge wa nceshe ku bantu ba Ishalela na mwene yabo naku nebye bakushinga bya mutena ha mutena.

⁶⁰ Nohobene haya ngayi mikoka nimwayo ya hano hanci yilimuke ngayi Nyambi ya Ngula ninkayendi niye Nyambi, kowa washenge.

⁶¹ Mwanga enu bantu bendi, mwinge bakulunga kuli Nyambi ya Ngula Nyambi yetu, mwombatale mazu wendi nimwawo na ndayano zendi nimwazo, ngonehe munombatala lelo.”

Kufunguliwa kwa Litala lya Nyambi

⁶² Niho mwene Sholomoni na Ishalela nimwabo bakombelelele zinkombela kuli Nyambi ya Ngula.

⁶³ Wakombelelele zinkombela bankunzi 22,000 kami bambelele 120,000 kwinga zinkombela za kulilumikila. Mwene Sholomoni na Baishalela nimwabo bafungwile Litala lya Nyambi.

⁶⁴ Ha mutena uya watendele uya mwanya kwinga kaala ka kukombelela hakati ka shipango sha kumbili ya Litala lya Nyambi, pe wakombeleleleko zinkombela za bimuna bya kuhokesha bya nzimba na zintupu za mpeka na mazi a bimuna a nkombela ya kulilumikila. Watendele nehe, ndaba kaala ka lubemba mu shipango sha ku Litala lya Nyambi shengile shashishe ku zinkombela nimwazo eze.

⁶⁵ Niho Sholomoni na bantu nimwabo ba Ishalela bapingile shimbo sha Minkungwa ha matena mutanu na abili. Kuyo ku Litala lya Nyambi ya Ngula, kwakungulukilile bantu babengi shikuma bafumine ku ncelele ku nzila ya ncinencine ya Hamati naku mabukubuku ku nginza ya Engepita.

⁶⁶ Ha mutena wa mutanu na ahatu, Sholomoni wabweshele bantu ku minzi yabo. Nimwabo bayile kukwabo, pe bayemezele mwene na ku wahilila ha mfuywezi nimwazo ziya Nyambi ya Ngula apanine mukamulimo wendi Ndavita na bantu bendi Baishalela.