1 Bamyene 7 - Libuka Lya Kuyela

¹ Sholomoni kami walizikilile musheke wendi niyemwine, pe niwo wamanishile myaka likumi na yihatu.

Musheke wa Sholomoni

² Wazikile litala lyatumbiwile Musheke wa Lishaka lya Lembanoni. Lyengile mamita 44 mu wutali na mamita 22 muwipi na mamita 13.5 mu mwimo. Lyekalile na bifunda bihatu na zimpangwa za mitondo ya shinda likumi na mutanu mu shifunda na shifunda, bangungikileho mikambo ya mitondo ya shinda.

³ Maleenge atendiwile ha mitondo ya Shinda afwikile litala, akumine ku tumpenci twa kukongela otwe twekalile ha zimpangwa ha mitondo ya Shinda.

⁴ Hambali na mbali ya bishimi bibili hekalile mihoko yihatu ya mampananga.

⁵ Bipana na mampananga byekalile na bikwiliti bya kwezekela hamo mu wutali namu wipi na mihoko yihatu ya mampananga mu limota na limota byaliyahikizile.

⁶ Watendele shipango sha zimpangwa shengile mamita 22 mu wutali namu wipi mamita 13.5. Shekalile na mazezelo akufwika, ashuminine ku zimpangwa.

⁷ Kampenci ka litanda kami katumbiwile ngayi Kashanji omu ayatililenga Sholomoni byambo, kekalile na maleenge a mitondo ya shinda kubalika hanci kukuma naku mashoko.

⁸ Litala lyendi lya kulala niyemwine Sholomoni lyekalile mu shipango shamina kunyima ya Kashanji, niwo atendiwile ngonehe matala amina, pe kami watendele Litala lya mushobo wumo na lya mukazendi mwana Fwalo waku Engepita.

⁹ Eye mitumbwe nimwayo, ku shimbilila na shipango shashinene, byatendiwile na mamanya awa bawahishilenga ha shitapo kubalika ku mimbi na kutwala naku mashoko. Awa mamanya bawapabwele naku wafwanikiza kulimukila shilumweza mukati kawo na ha munkanda kwa ku shendulula na shaha.

¹⁰ Mimbi yatendiwile na mamanya amanene awa bawahishilenga ku shitapo. Amo engile mamita 3.5, mu wutali kami amina engile a mamita 4.5 mu wutali.

¹¹ Hayilu ya uya mwimbi hekalile mamanya amina na mitondo ya Shinda.

¹² Shipango sha ku musheke na shipango sha mukati sha ku Litala lya Nyambi naku mazezelo aku menginino a Litala lya Nyambi byekalile na mamota awa ayaliwile kamo na mikambo ya mitondo ya Shinda na kuyaliwa kahatu na mamanya akubaza kuya na kutowanisha.

Mulimo wa Hulami

¹³ Mwene Sholomoni wehanine mulume, lizina lyendi Hilamu, muntu wa wutungu na wulongo mu mulimo wa lubemba, ou wekalilenga mu lukena lwa Tile.

¹⁴ Tatiyendi ou wafwilengaho wafumine ku Tile, pe wengile kami muntu wa wutungu na wulongo mu mulimo wa lubemba. Manda Hulami wengile waku mushobo wa Nafwitali. Hulami wengile muntu wangana, kami wenzilile mu wulongo. Wetabilile ku kwihaniwa kwa mwene Sholomoni kwinga mukulwane wa mulimo nimwawo wa lubemba.

Zimpangwa zibili za Lubemba

¹⁵ Hulami wayungwilile zimpangwa zibili za lubemba, mpangwa na mpangwa wutali wayo yengile mamita 8.1 na mamita 5.3 nzinguluke, pe baziyakile kumbili ya Litala lya Nyambi.

¹⁶ Wayungwilile kami mitwe yibili ya lubemba, wumo na wumo wengile mamita 2.2 mu wutali, yakukambika hayilu ya zimpangwa.

¹⁷ Ku mutwe wa mpangwa na mpangwa batangileko na lyozi lya nketwana mutanu na zibili za ku shinta,

¹⁸ na mizila yibili ya manzenze a lubemba.

¹⁹ Mitwe yatendiwile ngonehe maluba a makandu, wutali wao wengile mamita 1.8.

²⁰ Ayakiwile hayilu ya mizila ya zingulukile zimpangwa eye yekalile hayilu ya lyozi lya ku showanisha na nketwana. Kwekalile manzenze myanda yibili, mu mizila yibili, kuzingwilisha mutwe na mutwe.

²¹ Hulami wazikile eze zimpangwa zibili za lubemba kumbili ya menginino a Litala lya Nyambi, yimo yaku mbalila yaku mabukubuku yatumbiwile ngayi Yakini, pe yamina yaku mbalila yaku ncelele yatumbiwile ngayi Mbowazi.

²² Mitwe ya lubemba yekalile ha zimpangwa yengile ngo makandu. Niho mulimo wa zimpangwa wamanine.

²³ Hulami watendele lizawo lya lubemba lyanzinguluke. Kukunama kwalyo kwengile mamita 2.2, ha nkumo na nkumo ya mivumbo yalyo lyengile mamita 4.3, munzinguluke lyengile mamita 13.5.

²⁴ Kuzingwilisha ku nkumo ya mivumbo nimwayo ya lizawo ya kutepukila hanza kwekalile mizila yibili ya bitubo bya lubemba, ebye byatendiwile hamo na lizawo nimwalyo.

²⁵ Lizawo lyatakamaninenga ha myongo ya bankunzi ba lubemba likumi na babili baya balipenzeshele myongo, bahatu bapenzele kumbalila ya ncelele, bahatu kumbalila ya mponci na bahatu kumbalila ya mabukubuku na bamina kumbalila ya ku mushamuko.

²⁶ Wuliti wazimbalila za lizawo wengile ngonehe wunene wa shikandi sha liboko lya muntu. Muvumbo walyo walifwekele ngo muvumbo wa nkomoki, ya kukontamina ha munkanda kulifweka ngonehe mabizi a maluba. Tanki yayinene yenzalilenga mema a malita 40,000.

Bikocikala bya Lubemba

²⁷ Hulami watendele bikocikala likumi ha lubemba, kashikochikala na kashikochikala kengile mamita 1.8 mu wutali namu wipi, kami kengile mamita 1.3 mu mwimo.

²⁸ Byatendiwile na maleenge akwezekela hamo, awa ayakiwile mu bikwiliti,

²⁹ na bifwekesha bya babimbwi na bankunzi na makelumbi a mbando ha maleenge. Kami ha bikwiliti, hayilu na ku nceto ya babimbwi na bankunzi, kwekalile shifwekesha sha bishinte byabiwahe.

³⁰ Shikocikala na Shikocikala shekalile na mibalo yinaa ya lubemba. Ku zinkomi zinaa kwekalile mimo ya lubemba ya lulonga lwalunene lwa kukunama, mimo yayengiwile na shifwekesha sha bishinte byabiwahe.

³¹ Ku mutwe wa Shikocikala kwekalile shuma sha nzinguluke ngonehe mubalo ha kuyaka lizawo. Shashonkomanine hayilu ya Shikocikala mashentimita 45, kami shenginine mukati ka Shikocikala mashentimita 18. Shamanguliwile kuzingwilisha ku kanwa kasho na mashwanisho.

³² Mibalo yengile mashentimita 66 mu mwimo, ekalile mu nceto ya maleenge na mikambo yengile shuma shimo na Shikocikala.

³³ Mibalo yalyo yalifwekele ngo ya Shikocikala. Mikambo yawo na mibalo na mashipoko na mahapu nimwawo engile a lubemba.

³⁴ Kwekalile bya kwimanina binaa ku zinkomi za ku nceto ya Shikocikala na Shikocikala, eye mimo yatendiwile kumo na Shikocikala kwinga shuma shimo.

³⁵ Kwekalile mufumo wengile mashentimita 22 wazingulukile hayilu ya Shikocikala na Shikocikala, bya kwimanina byasho na maleenge engile shuma shimo na Shikocikala.

³⁶ Bya kwimanina na maleenge bya manguliwile na makelumbi a mbando na babimbwi na mitondo ya minkomona. Nimwako kwawaniwile mwanya wakubiyakila na bifwekesha bya bishinte kuzingwilishako nimwako.

³⁷ Eshe nisho byatendiwile bikocikala, nimwabyo byengile bya kulifweka, bya kwezekela hamo na shifwekesha shimo.

³⁸ Hulami kami watendele zindonga za kukunama likumi, lumo ku Shikocikala na Shikocikala. Lizawo na Lizawo lyengile mamita 1.8, mwekalile mema a malita 800.

³⁹ Wayakile Shikocikala mutanu kumbalila yaku mabukubuku ya Litala lya Nyambi na byamina mutanu kumbalila yaku ncelele. Lizawo waliyakile ku nkomi ya kulwa mushamuko wa mabukubuku.

Wingi wa byuma bya mu Litala lya Nyambi

⁴⁰ Hilamu kami wabumbile zinyungu na bishongwezo na zindonga za kukunama. Wamanishile mulimo wendi nimwawo kuli mwene Sholomoni waha Litala lya Nyambi.

⁴¹ Byuma atendele byengile ebye, zimpangwa zibili na mitwe yibili ya kufweka ngo zindonga na hayilu ya zimpangwa na shifwekesha sha nketwana za kushinta za kuzingwilisha ku mitwe ya zimpangwa,

⁴² na manzenze myanda yinaa ya lubemba mu mizila yibili, kuzingwilisha mutwe na mutwe wa zimpangwa zibili,

⁴³ na bikocikala likumi na zindonga za kukunama zazinene likumi,

⁴⁴ na lizawo na bankunzi likumi na babili ba ku kwatisha lizawo,

⁴⁵ na zinyungu na bishongwezo na zindonga za kukunama. Byuma nimwabyo ebye Hilamu atendelele mwene Sholomoni, bya ku Litala lya Nyambi ya Ngula. Byengile bya kulambiwa lubemba.

⁴⁶ Ebye nimwabyo mwene wabitendeshelele mu ncaka ya mukati ka Shukota na Zaletani mu mukulo wa Yondana.

⁴⁷ Sholomoni kaliha wafwanikizile ebye byuma bya lubemba ndaba byengile byabingi shikuma ngayi wulemu wabyo wabulile kulimukiwa.

⁴⁸ Sholomoni kami watendeshelele byuma bya mu Litala lya Nyambi bya ngolinde. Kaala na Lyeyeko lya mimuni na tebulu ya mankende akutupula kuli Nyambi,

⁴⁹ na meyeko likumi a zimuni ziya zemanine kumbili ya Mwanya wa Kuyela Shikuma, mutanu kumbalila yaku mabukubuku na mutanu kumbalila yaku ncelele na maluba na zimuni na zimanya,

⁵⁰ na zinkomoki na bya kuzimisha zimuni na zindonga za kukunama na tulonga twa mitondo ya kutwa yakuhokesha ya Incence na binzoyo bya kukalila mashanga a mundilo na matuto aku bihala bya ku Mwanya wa Kuyela Shikuma na bihala byaha munkanda wa Litala lya Nyambi. Byuma ebye nimwabyo byatendiwile na ngolinde.

⁵¹ Oho mwene Sholomoni amanishile milimo yaha Litala lya Nyambi, wayakile byuma nimwabyo bya shiliva na ngolinde na byamina mu tumpenci twa kukongela, biya afungwilile tatiyendi Ndavita kuli Nyambi ya Ngula.