1 Bamyene 6 - Libuka Lya Kuyela

Sholomoni ukuzika Litala lya Nyambi

¹ Myaka 480 yapitile kufuma haya Baishalela bafumine ku Engepita. Ha mwaka wawunaa wakulela kwa Sholomoni mu Ishalela, mu ngonda ya wubili, ngonda ya Ziva, bakamilimo ba mwene Sholomoni batatikile mulimo waku Litala lya Nyambi.

² Mukati alyo lyengile mamita 27 mu wutali na mamita 9 muwipi, kami mamita 13.5 mu mwimo.

³ Mazezelo aku menginino engile mamita 9 mu wutali kwezekela hamo namu wipi wa litala nilyo line namu wipi lyengile mamita 4.5 kumbili ya Litala.

⁴ Mamota a Litala lya Nyambi ekalile na mampananga. Ha munkanda wa mampananga engile akushinana shikuma kupitakana mukati.

⁵ Ku mamota aha munkanda ha zimbali nimwazo zibili na kunyima ya Litala lya Nyambi, kwatendiwile tumpenci twa kulilundika otu twalishampikile tuhatu kuzimbalila zihatu za Litala lya Nyambi ya Ngula. Kampenci na kampenci kengile mamita 2.2 mu mwimo.

⁶ Kampenci na kampenci ka mu litala lya ku nceto kengile mamita 2.2 muwipi. Mu litala lya hakati, kampenci na kampenci kengile mamita 2.7 muwipi. Mu litala lya kuyilu, kampenci na kampenci kengile mamita 3.1 muwipi. Mamota a Litala lya Nyambi, engile akushepa kupitakana hanci ngayi tumpenci twikale shiwahe ha limota ngayi mikambo hinga ingina mu limota.

⁷ Mamanya awa batendeshelenga Litala lya Nyambi awahishiwilenga ku shitapo sha mamanya, ngayi kaliha kwekalile miyoyo ya bikoma na tuzembe, hinge bitendesho bya byondo aha batendelenga Litala lya Nyambi.

⁸ Menginino aku litala lya ku nceto ekalile ku mabukubuku a Litala lya Nyambi ya Ngula na makandamino akukuma ku litala lya kulishampika lya wubili na lya wuhatu.

⁹ Nohobene Sholomoni wamanishile kuzika Litala lya Nyambi ya Ngula. Watendele shiluli sha maleenge a bitondo bya Shinda.

¹⁰ Matala akulishampika kahatu, litala na litala lyengile mamita 2.2 mu mwimo, atendiwilile ha munkanda wa mamota a Litala lya Nyambi ya Ngula, bawanungilile na mikambo ya bitondo bya shinda.

¹¹ Nyambi ya Ngula wambile kuli Sholomoni ngayi,

¹² “Ndi ukwombatala mazu wami nimwawo na kulama ndayano zami nimwazo na kwenda mu zintambo zami nika kutendela ebye na kulupishile tatiyobe Ndavita.

¹³ Nikazika hakati ka bantu bami ba Ishalela muno mu litala uli na kunzikila, kami kuka bashiya nifwako.”

¹⁴ Nohobene Sholomoni wamanishile kuzika Litala lya Nyambi.

Kuhongozola Litala lya Nyambi ya Ngula mukati

¹⁵ Mamota a mukati ka Litala lya Nyambi ya Ngula afwikiwile na maleenge a mutondo wa shinda, kufuma hanci kukuma kuyilu yalyo na hanci kami hatendiwile na maleenge a mupaini.

¹⁶ Kampenci ka mukati ka litala, kakutumbiwa ngayi, “Mwanya wa Kuyela Shikuma, kazikiwile kunyima mukati ka Litala lya Nyambi ya Ngula. Kengile mamita 9 mu wutali.” Pe lyatapuliwile na maleenge a mitondo ya shinda kufuma hanci kukuma ku kuyilu yalyo.

¹⁷ Kampenci ka kumbili ya kampenci ka Mwanya wa Kuyela Shikuma kengile ka mamita 18 mu wutali.

¹⁸ Maleenge a mutondo wa shinda ba wamanguwile bifwekesha bya bitubo na maluba. Mukati nimwamo mwafwikiwile na maleenge a mutondo wa shinda ngayi mamanya aha mamota mwanga abule ku moneka.

¹⁹ Kunyima mukati ka Litala lya Nyambi ya Ngula kwazikiwile kampenci kengile Mwanya wa Kuyela Shikuma, oku kukayakiwa Likwati lya Kulimama kwa Nyambi ya Ngula.

²⁰ Kampenci aka ka mukati kengile mamita 9 mu wutali na muwipi na mwimo, nimwamo mwafwikiwile na ngolinde ya kushamisha. Sholomoni watendele kaala ka maleenge a mutondo wa shinda.

²¹ Litala lya Nyambi ya Ngula lyafwikiwile mukati na ngolinde. Nketwana za ngolinde zayakiwile kukiyika ha menginino amu Mwanya wa Kuyela Shikuma, omu kami mwafwikiwile ngolinde.

²² Mukati ka Litala lya Nyambi ya Ngula nimwamo mwafwikiwile na ngolinde, hamo na kaala ka mukati ka Mwanya wa Kuyela Shikuma.

²³ Makelumbi abili a mbando abaziwile ha mutondo wa olive awa ayakiwile mu Mwanya wa Kuyela Shikuma, mwimo wa limo na limo wengile mamita 4.4.

²⁴ Lubando lumo lwa Likelumbi wutali walyo wengile mamita 2.2, lubando lumina mamita 2.2. Kuvungulula mbando eze zibili, kufuma ku mabalikilo wayo kukuma oku yamanina yamina yengile mamita 4.5.

²⁵ Likelumbi lya wubili lyekalile na mbando mamita 4.5. Makelumbi awa abili engile amimo yimo na shifwekesha shimo.

²⁶ Likelumbi na Likelumbi lyengile mamita 4.5 mu mwimo.

²⁷ Ayakiwile mu lupati namu lupati mukati ka Mwanya wa Kuyela Shikuma nohobene ngayi mbando zawo za kutandubuka mwanga ziliwanine hamo hakati ka kampenci, kami mbando zamina zibili za kwatile ku mamota.

²⁸ Makelumbi abili a mbando afwikiwile na ngolinde.

²⁹ Mamota aku kampenci kakanene naku kampenci ka mukati, nimwawo ba wamangwile na shifwekesha sha makelumbi a mbando na mitondo ya munkomona na maluba.

³⁰ Hinge hanci hafwikiwile na ngolinde.

³¹ Bihala bibili bya kulamika bya kubaza ha mitondo ya olive byayakiwile ku menginino aku Mwanya wa Kuyela Shikuma mukati ka Litala lya Nyambi ya Ngula. Hayilu ya shikwiliti shabyo shifwekesha shengile ngo shipando sha mukunzi.

³² Bihala bya ku mangula na bifwekesha bya makelumbi a mbando na mitondo ya minkomona na maluba. Bihala na makelumbi a mbando na mitondo ya minkomona na maluba byafwikiwile na ngolinde.

³³ Shikwiliti sha ku menginino aku kampenci kakanene mu Litala shengile shakwezekela hamo mu wutali namu wipi, shabaziwile ha mutondo wa olive.

³⁴ Kwekalile bihala bibili bya kulilamika byabaziwile ha mutondo wa mupaini.

³⁵ Ba bimangwile na shifwekesha sha makelumbi a mbando na mitondo ya munkomona na maluba, ebye byafwikiwile shiwahe na ngolinde.

³⁶ Shinzanza sha mukati shatendiwile kumbili ya Litala lya Nyambi ya Ngula, shatendiwile na mamanya akumangula na mikambo ya mitondo ya shinda na kuyaliwa kahatu na kuya na kutowanisha.

³⁷ Mwimbi wa Litala lya Nyambi ya Ngula wayaliwile mu ngonda ya wubili, mu ngonda ya Ziva, mu mwaka wawunaa wakulela kwa Sholomoni.

³⁸ Mu ngonda wa mutanu na zihatu, ngonda wa Mbuli, mu mwaka wawulikumi na umo wakulela kwa Sholomoni, Litala lya Nyambi lyamanine nimwalyo, kami ngonehe lyafundiliwile. Lyamanishile myaka mutanu na yibili ha kulizika.