1 Bamyene 5 - Libuka Lya Kuyela

Sholomoni ukuliwahishila kuzika Litala lya Nyambi

¹ Mwene Hilamu waku Tile wengilenga muhoni wa Ndavita shikati nimwasho, pe oho ayuvwile ngayi Sholomoni washwanakale tatiyendi Ndavita kwinga mwene, watumine babilolo kukwendi.

² Sholomoni wabweshele lizu kuli Hilamu ngayi,

³ “Ukulimuka ngayi tate Ndavita kaliha watweshele kuzika Litala lya Nyambi, ndaba ya zinzita eze balwishilenga bamalamo ba mu matunga nimwawo abazinguluka. Kaliha batweshele kuzika litala lya kulemeshela Nyambi ya Ngula, Nyambi yabo, hantu noho Nyambi ya Ngula abapanikile kukoma ha bamalamo babo nimwabo.

⁴ Ngoboni haya Nyambi ya Ngula, Nyambi yami, unampaniki ku mwena ha zinginza zami nimwazo. Bamalamo nifwabo, kami kowa malamo akundwisha.

⁵ Nyambi ya Ngula wakulupishile tate, Ndavita ngayi, ‘Mwanobe wamulume, ou nikayaka kwinga mwene ha litanda lyobe, ukanzikila litala’. Haya nili na kufunga kuzika liya litala lya kulemeshela Nyambi ya Ngula, Nyambi yami.

⁶ Nohobene, tuma bantu bobe ku Lembanoni bakantemeneko bitondo bya shinda. Bantu bami bakatenda hamo nabo, pe nikabapanika bantu bobe ebye nimwabyo ukatoya. Ngonehe ukulimuka ngayi kowa ku bantu bami ou walimuka sha kutema bitondo shiwahe ngonehe bantu bobe.”

⁷ Hilamu wawahililile shikuma bene oho atambwile lizu lya Sholomoni pe wambile ngayi, “Lelo yemezenu Nyambi ya Ngula ha kupana Ndavita mwana wamulume wakukeya nehe, kwinga mwene wa mukoka ou wawunene!”

⁸ Niho Hilamu atuminine Sholomoni lizu lyamina ngayi, “Natambulu lizu lyobe pe naliwahishakale kutenda ebye wa nyepa. Nikakuwanina bitondo bya shinda na bitondo bya mipaini.

⁹ Bantu bami bakatuta myombelelo ku Lembanoni na kutwala ku liwate na kuyimangila hamo kuyitimbokeshela ku shibumbo sha mwanya oku unahata. Kuyo bantu bami bakayimangulula, pe bantu bobe bakayikoweza. Kuyumba haneye myombelelo, nikushinga tuhu ngayi ukapanike bantu bami byakulya.”

¹⁰ Hilamu watumininenga Sholomoni myombelelo nimwayo ya bitondo bya shinda nabya mipaini biya ashingile.

¹¹ Sholomoni wapanikile Hilamu makilo ngilamu a loto 20,000, ngayi shinge sha kulya sha bantu bendi na malita a mazi akuyengula shiwahe a olive 20,000. Wabitwalilenga kuli Hilamu ha mwaka na mwaka.

¹² Nyambi ya Ngula walamine shikulupisho shendi na kupanika Sholomoni ngana. Kwekalile ku mwena mukati kabo ba Hilamu na Sholomoni, pe kwekalile kuliyuvwashana hamo.

¹³ Mwene Sholomoni wakandamikile bantu 30,000 kwinga bakakutenda mulimo wawulemu mu Ishalela nimwamo,

¹⁴ pe wayakile Andonilama kwinga mukulwane wabo. Wabatapwilile mu makunge ahatu a bantu 10,000, pe likunge na likunge lyamanishilenga ngonda yimo mu Lembanoni na zingonda zibili za kwikala ku munzi.

¹⁵ Sholomoni kami wekalilenga na bantu 80,000 mu litunga lya binkanda ba kupabola mamanya, hamo na bantu bakakuwuluta 70,000.

¹⁶ Pe wemikile bantu bakakwendesha milimo 3,600 kwinga bakakutwaminina mulimo wabo.

¹⁷ Ha kulaya kwa mwene Sholomoni bamangwilenga mamanya amawahe amanene a mwimbi wa Litala lya Nyambi.

¹⁸ Bakamilimo ba Sholomoni na Hilamu na bantu ba Bangemba bawahishilenga mamanya na bitondo bya kutendesha Litala lya Nyambi.