1 Bamyene 4 - Libuka Lya Kuyela

Babilolo ba Sholomoni

¹ Mwene Sholomoni wengile mwene wa litunga nimwalyo lya Ishalela.

² Aba nibo bengile babilolo bendi babakulwane. Mukankombela wengile Azaliya mwana Zandoki wa mulume.

³ Bakakutikita bamu shinzanza bengile Eliholefwa na Ahiya, bana ba Shisha babalume. Mukulwane wa mukakulama bya likota lya wene wengile Yehoshafwati mwana Ahilundi.

⁴ Mukulwane wa nzita wengile Mbenaya mwana Yehoyanda. Bakankombela bengile Zandoki na Ambiyatale.

⁵ Mukulwane wa batulela bamu zimbalila za biketu bya litunga wengile Azaliya mwana Natani. Nkongo waku wene wengile mukankombela Zambundi mwana Natani.

⁶ Mukulwane wa bakamilimo bamu musheke wengile Ahisha, mukulwane wa milimo ya likungubule wengile Andonilama mwana Ambinda.

⁷ Sholomoni wemikile balume likumi na babili kwinga batulela bamu zimbalila za Ishalela. Aba ba kungwishilenga byakulya mu zimbalila zabo bya kulelesha mwene na ba ku musheke nimwabo. Muntu na muntu wekalilenga na ngovu za kuwanina mwene byakulya bya ha ngonda yimo mu mwaka.

⁸ Mazina ano anengi mazina a babilolo na zimbalila omu bekalilenga na ngovu za kwendesha. Mwana Huli wekalile na ngovu ku litunga lya binkanda lya Efulemu.

⁹ Mwana Ndekali wekalile na ngovu ku zinkena za Makazi na Shalambima na Mbeti Shemeshi na Eloni na Mbeti Hanani.

¹⁰ Mwana Heshendi wekalile na ngovu ku zinkena za Alumboti na Shoko na litunga nimwalyo lya Hefwa.

¹¹ Mwana Ambinandambu, wekalile na ngovu mu litunga nimwalyo lya Ndoli. Niye wayekele mwana Sholomoni Tafwati.

¹² Mbaana mwana Ahilundi wekalile na ngovu ku zinkena za Tanaki na Mengindo, kami na litunga nimwalyo lya hahepi na Mbeti Sheyini, hahepi na munzi wa Zaletani, ku mabukubuku a munzi wa Yezilelu, kukakuma naku munzi wa Abele Mehola, kami naku munzi wa Yokimiyamu.

¹³ Mwana Ngemba wekalile na ngovu ku munzi wa Lamoti mu litunga lya Ngiliyande. Wekalile kami na ngovu ha tuminzi twamu Ngiliyande twengile twa bakalivumo lya Yayila mwana Manashe. Wekalile kami na ngovu mu litunga lya Alangobu mu Mbashani, nimwayo yengile minzi makumi mutanu na limo, yekalile na twimbi na mikambo ya lubemba ha mapangati.

¹⁴ Ahinandambe mwana Indo wekalile na ngovu kumbalila ya Mahanayima.

¹⁵ Ahimayazi wekalile na ngovu mu litunga lya Nafwitali, niye wayekele Mbashemati, umo waha bana ba Sholomoni.

¹⁶ Mbaana mwana Hushayi wekalile na ngovu mu litunga lya Asha na munzi wa Mbiyaloti.

¹⁷ Yehoshafwati mwana Paluya wekalile na ngovu mu litunga lya Ishaka.

¹⁸ Shimeyi mwana Ela wekalile na ngovu mu litunga lya Mbenjamani.

¹⁹ Ngemba mwana Uli wekalile na ngovu mu litunga lya Ngiliyande, elye lyaleliwilenga kuli mwene Shihoni wa Baamoli na mwene Ongi wamu Mbashani. Kubula kuyakako aba likumi na babili, kwekalile kalela umo tuhu ha litunga lya Yunda nimwalyo.

Kutumpuka kwa kulela kwa Sholomoni

²⁰ Bantu ba Yunda na Ishalela bengile babengi ngonehe lihekelela lya ha shibumbo sha liwate, balile na kunwa, pe bekalile na ku wahilila.

²¹ Wene wa Sholomoni wawanikile mikoka nimwayo, kubalika ku mishinzi wa Yufuleti kukakuma naku Fwilishitiya, kukakuma naku nginza ya Engepita. Bayumbilenga mutelo kukwendi, kami bengilenga bantu bendi mu kuyoya kwendi nimwako.

²² Byakulya atambwilenga Sholomoni ha mutena ha mutena byengile tukote twatushe twa muhunga wa loto wakulembuka 450 na tukote twatunene 900 twa muhunga,

²³ na bantatula likumi ba kubuyisha shiwahe na mwila na zingombe makumi abili za kubuyisha shiwahe na bambelele mwanda umo, kubula kuyakako bineke na babihunu na bangulumuko na tuyoni twa kulela.

²⁴ Sholomoni walele litunga nimwalyo ku mponci ya mushinzi wa Yufuleti, kubalika ku Tifwisha ku Yufuleti, kukakuma naku Ngaza ku mponci. Bamyene nimwabo ba ku mponci ya Yufuleti bawililile kukwendi, pe wekalile mu ku mwena na matunga nimwawo a hahepi.

²⁵ Shikati nimwasho ayoyele Sholomoni, bantu ba litunga lya Yunda nimwalyo na Ishalela bekalile mu ku mwena kubalika ku litunga lya Ndani kukakuma naku Mbelishemba. Balupashi nimwabo bekalile na mikolobozi yabo ya mikabo ya shinyanca hamo na mitondo yabo ya mikuyu.

²⁶ Sholomoni wekalile na milaka 40,000 ya bambishi ba ku makoloyi, kami na bakakukandama ha bambishi banzita 12,000.

²⁷ Batulela bendi likumi na babili, muntu na muntu watwalilenga mu ngonda yapanikiwile kukwendi, bapaninenga byakulya ebye ashingilenga mwene Sholomoni na nimwabo aba balilenga ku musheke, batwalilenga byuma nimwabyo byashingiwilenga.

²⁸ Kalela na kalela watwalilenga kami shitapilo shendi sha luku na mwila oku washingiwilenga, wa bambishi ba ku makoloyi na bambishi bakakwituka shikuma.

²⁹ Nyambi wapanikile ngana Sholomoni zazingi shikuma na kanangatima na kalimukisho kakanene shikuma kakubula kutwesha kufwanikiziwa.

³⁰ Nohobene Sholomoni wengile wakukeya shikuma kupitakana balume ba kukeya ba ku matunga aku mushamuko, hinge balume ba kukeya ba ku Engepita.

³¹ Wengile wakukeya shikuma kupitakana bantu nimwabo, kami wengile wakukeya kupitakana Etani wa Kaezilahiti na bana ba Mahole bahatu babalume ba Hemani na Kalikolu na Ndalinda. Sholomoni wayile mpupo mu matunga nimwawo a hahepi.

³² Wahongele zinguli 3,000 na nyimbo za kupitakana 1,005.

³³ Watontwelelenga byaha mitondo naha mbuto, kubalika ku mitondo ya shinda yaku Lembanoni na kutwala ku hishopu biya bya kumena ha twimbi. Watontwelelenga ha batuyamana na tuyoni na bya kulikoka hanci na zinci.

³⁴ Bamyene nimwabo ba hanci bayuvwile ngana zendi, pe batumine bantu mu kuyuvwilila kukwendi.