1 Bamyene 3 - Libuka Lya Kuyela

Sholomoni ukulombela ha ngana

¹ Sholomoni watendele shikonzi sha kuliyekela na Fwalo mwene wamu Engepita ha kuyeka mwanendi. Wamutwalile mukwikala mu Lukena lwa Ndavita hantu noho amanishile kuzika musheke wendi na Litala lya Nyambi ya Ngula na kembi kakuzingwilisha Yelushalema.

² Kaliha kwatendiwile Litala lya Nyambi ya Ngula, pe haya bantu bekalile tuhu na kukombelela zinkombela ku myanya ya kuzila ya kulemeshela.

³ Sholomoni wahakile Nyambi ya Ngula, kami wakonkele ndayano za tatiyendi Ndavita, ngoboni kami Sholomoni wazihilenga bimuna na kubakombelela ku myanya ya kuzila ya kulemeshela.

⁴ Shikati shimo wayile ku Ngimbiyoni mu kukombelela nkombela, ndaba ngayi nikwo kwekalilenga kaala ka mpupo. Nikwo akombelelele zinkombela 1,000 za kuhokesha.

⁵ Wushiku wamina mu Ngimbiyoni Nyambi ya Ngula waliholwele kuli Sholomoni mu mulo na kumwipula ngayi, “Bishini ukushinga kukwami ngayi nikupanikesho?”

⁶ Sholomoni wakumbwile ngayi, “Wamoneshelenga shishemo shobe hali mukamulimo wobe tate Ndavita, ndaba wengile wamuwahe na kulunga, kami wa kupwisha mu kulilumikila kwendi na nobe. Kami unazamini kumu monesha shishemo shobe sha mwaya myaka ha kumupana mwana wa mulume ou uli na kulela mu mwanya wobe lelo.

⁷ Obe Nyambi ya Ngula, Nyambi yami, unanyintabilishi ku shwana tate kwinga mwene, hinge ndi nili kanuke shikuma kami kulimuka sha kulela nifwako.

⁸ Ami wuno nili hakati ka bantu aba wahata kwinga bantu bobe, bantu aba banengi babengi shikuma bakubula kutwesheka kulabiwa.

⁹ Nohobene mpeko ngana za kulela nazo bantu bobe na kulimuka kutapulula wuwahe na wubi. Ndaba nikatwesha nahiti kulela bantu bobe babengi nehe?”

¹⁰ Shawahilishile Nyambi ya Ngula, aha Sholomoni anyepele eshe,

¹¹ Nyambi wambile kukwendi ngayi, “Ndaba unanyepe ngana za kulela na kulunga, kubula kulinyepela bya kuyoya wumi wakwihala shikuma obe mwine, hinge ha wuheti, hinge ha lufu lwa bamalamo bobe,

¹² nikatenda ebye unanyepe. Nikakupanika ngana zazinene na kanangatima kakupitakana aka kabulile kwikala ku muntu wamina, hinge aka kakabula kukekalako ku muntu wamina kami.

¹³ Nikakupana kami ebye wabula kunyepa, ukekala na wuheti na maleema mu kuyoya kwobe nimwamo kupitakana bamyene bamina.

¹⁴ Kami ndi ukunyombatala na kulama mazu wami na ndayano zami ngonehe atendele tatiyobe Ndavita, nika kupana wumi wakwihala.”

¹⁵ Oho Sholomoni apindukile ha tulo, pe walimukile ngayi Nyambi unambanga kukwendi mumulo. Niho ayile ku Yelushalema, pe wemanine kumbili ya Likwati lya Kulimama kwa Nyambi ya Ngula na kupanika zinkombela za kuhokesha na zinkombela za kulilumikila kuli Nyambi ya Ngula. Niho atendelele babilolo bendi nimwabo mayambwayambwa.

Sholomoni ukuyata shambo shashikalu

¹⁶ Mutena umo bambuyama balwiholwiho babili balitwalile nibo bamwine kumbili ya mwene Sholomoni.

¹⁷ Umo kukwabo wambile ngayi, “Hekulu, owe mbuyama na nami twekala mu litala limo, pe nabeleka mbututu wa mulume oho niye hinga ekala kuyo.

¹⁸ Kwapitile tuhu matena abili oho mwanami wahemuwakale naye kami niho abeleka. Twekalamo tuhu tuli babili, kowa washenge wekalamo.

¹⁹ Pe kukuma ku wushiku wandumukila ha mbututu wendi na mapuza na kumushoba.

²⁰ Pe wapinduka mukati ka wushiku na kushimba mwanami kumufumisha kukwami oho nili mu tulo na kumutwala ku wulili wendi, niho ayaka mwana wakufwa ku wulili wami.

²¹ Oho kwasha lumenemene napinduka ngayi niyamwishe mbututu wami namona ngayi wakufwa. Aha namupenzeshesha shiwahe pe namona ngayi kaliha mbututu wami.”

²² Ngoboni mbuyama wamina wambile ngayi, “Byo! Ou mbututu wamumi niyewamiko, pe ou wakufwa niye wobe!” Mbuyama wakutatika wakumbwileko ngayi, “Byo! Mbututu wakufwa niye wobeko, ou wamumi niye wami!” Pe balikananganishile kumbili ya mwene.

²³ Niho mwene Sholomoni ambile ngayi, “Nimwenu muli na kwamba ngayi uya mbututu wamumi nengi wami kami ngayi uya wakufwa unengi wobe.”

²⁴ Niho mwene wambile ngayi, letenu mpoko ya mukwale. Oho bayiletele,

²⁵ wambile ngayi, “Mutapenu hakati mbututu wamumi ngayi mupane shiketu ku mbuyama na mbuyama.”

²⁶ Mandiyendi wakumubeleka wekalile na nceshe hali mwanendi, wambile kuli mwene ngayi, “Hekulu, obe mwene ya ngoma. Hinga uziha mbututu! Mupanikeye!” Ngoboni mbuyama wamina wambile ngayi, “Hinga umupana ku umo hakatiketu, mutape tuhu kabili.”

²⁷ Niho Sholomoni ambile ngayi, “Hinga uziha mbututu! Mupanike kuli mbuyama wakutatika, niyebene mandiyendi wakumubeleka.”

²⁸ Oho bantu ba Ishalela bayuvwile nyatilo ya Sholomoni, nimwabo bamupanine maleema amanene shikuma, ndaba balimukile ngayi Nyambi unamupaniki ngana za kuketula byambo shiwahe.