1 Bamyene 22 - Libuka Lya Kuyela

Muluwe Mikaya ukubela Ahambu

¹ Kwekalile ku mwena mukati ka Ishalela na Shiliya ha myaka yibili,

² ngoboni mu mwaka wawuhatu mwene Yehoshafwati wamu Yunda wayile mu ku mona mwene Ahambu wamu Ishalela.

³ Ahambu wepwile babilolo bendi ngayi, “Shumangani shiya tunabulili kutendaho shuma na kubwesha lukena lwa Lamoti mu Ngiliyande kuluyanga kuli mwene wamu Shiliya, ndaba nilwo luli kuno kukwetu?”

⁴ Ahambu wepwile Yehoshafwati ngayi, “Kati tukaya nimwetu na kulwisha lukena lwa Lamoti Ngiliyande ndi?” Yehoshafwati wakumbwile mwene wa Ishalela ngayi, “Ku mona tuhu ndi waliwahishilakale pe ami na bakanzita bami tukalifungila na nobe na bambishi na bakakukandamaho.

⁵ Ngoboni ha kutatika twipwizize taha kuli Nyambi ya Ngula ha shuma eshe.”

⁶ Nohobene Ahambu mwene wa Ishalela wehanine bamiluwe bakushinga kulingana 400, kami wabepwile ngayi, “Kati nikutwesha kuya na kulwisha lukena lwa Lamoti Ngiliyande hinge ndi byo?” Bakumbwile ngayi, “Kalulwishe. Nyambi ya Ngula ukakupana kukoma.”

⁷ Ngoboni Yehoshafwati wepwile ngayi, “Kati kuno kowa muluwe wa Nyambi ya Ngula oku tukutwesha kutwipwiziza ndi?”

⁸ Mwene Ahambu wakumbwile ngayi, “Ku nashala kami umo, Mikaya mwana Imula. Ngoboni namuzimba ndaba ku lubulula byuma byabiwahe kukwami ufwako, wandubwililanga tuhu byuma byabibi shikati nimwasho.” Ngoboni Yehoshafwati wakumbwile ngayi, “Kaliha wafwanina kwamba noho!”

⁹ Nohobene mwene Ahambu wehanina shilolo wamu shinzanza, kami wamutongwezele ngayi aye shawanguwangu akalete Mikaya mwana Imula.

¹⁰ Mwene Ahambu wa Ishalela na mwene Yehoshafwati waku Yunda, bavwalile mu bivwalo byabo bya wene kami bekalile ha matanda wabo, hahepi na mwanya waku likotwelo ha munkanda wa lipangati lya ku Shamaliya. Kami bamiluwe nimwabo balubwililenga kumbili yabo.

¹¹ Umo hakati ka bamiluwe, Zendekiya mwana Kenana, wafulile mashengo a shondo pe wambile kuli Ahambu ngayi, “Eshe nisho anamba Nyambi ya Ngula ngayi, ‘Nanawa mashengo niwo ukalwisha nawo Baashiliya hantu unabalobeshe nimwabo.’”

¹² Bamiluwe bamina nimwabo bambile shuma shimo ngayi, “Yenunga mukalwishe lukena lwa Lamoti Ngiliyande pe mukalutampwisha. Nyambi ya Ngula ukamipana ngovu za kukoma.”

¹³ Ha shikati oshobene, shilolo uya wayile mu kuleta Mikaya, wakamutongwezele ngayi, “Bamiluwe bamina nimwabo banalubululu bya kukoma kwa mwene, pe nobe kami shikawaha kutenda shuma shimo.”

¹⁴ Ngoboni Mikaya wakumbwile ngayi, “Nikulibeza na Nyambi ya Ngula wakuyoya, nikamba tuhu ebye akantongweza Nyambi ya Ngula.”

¹⁵ Oho aholokele ku meho a mwene Ahambu, mwene wamwipwile ngayi, “Mikaya, kati mwene Yehoshafwati na nami tuye mu kulwisha lukena lwa Lamoti Ngiliyande, hinge ndi hinga tuya?” Mikaya wakumbwile ngayi, “Yenunga mukalulwishe, pe mukalutwesha. Nyambi ya Ngula ukamipana ngovu za kukoma.”

¹⁶ Ngoboni Ahambu wakumbwile ngayi, “Kati kaliha na kutongwezanga bikati byabingi ngayi oho ukwamba kukwami mu lizina lya Nyambi ya Ngula, wambenga tuhu kupwisha ndi?”

¹⁷ Mikaya wakumbwile ngayi, “Nikutwesha ku mona bakanzita ba Ishalela banapanzanini ha mapili ngonehe bambelele bakubula mulishani. Kami Nyambi ya Ngula wambile ngayi, ‘Aha bantu banabulu mukakubatwaminina, balehenu bayenga ku munzi na ku mwena.’ ”

¹⁸ Ahambu mwene wa Ishalela wambile kuli Yehoshafwati ngayi, “Nka nakutongwezele ngayi hinga atanga kulubulula byuma byabiwahe kukwami? Wonzelanga tuhu kulubulula byuma byabibi.”

¹⁹ Mikaya wazaminine na kwamba ngayi, “Haya yuvwililenu kunebye anamba Nyambi ya Ngula! Namonene Nyambi ya Ngula hinga ekala ha litanda lyendi muyilu na mangeloyi bendi nimwabo hinga bemana ku nkumo yendi.

²⁰ Nyambi ya Ngula wepwile ngayi, ‘Kati yani ukwongeza Ahambu ngayi mwanga aye bakamuzihile ku Lamoti Ngiliyande mu nzita?’ Mangeloyi bamo bambile shuma shimo, pe kami bamina bambile shuma shashenge,

²¹ hantu noho moyo umo wapitile kumbili na kuhenyena kuli Nyambi ya Ngula, pe wambile ngayi, ‘Nikaya na kumwongeza.’

²² Nyambi ya Ngula wepwile ngayi, ‘Kati ukamwongeza nahiti?’ Moyo wakumbwile ngayi, ‘Nikaya na kwingisha bamiluwe ba Ahambu nimwabo ku shimika bya mahalo.’ Nyambi ya Ngula wambile ngayi, ‘Yanga ukamwongeze. Ukatwesha.’”

²³ Mikaya wamanishile na kwamba ngayi, “Eshe nisho shinatendiwi. Nyambi ya Ngula unengishi aba bamiluwe bobe ku shimika bya mahalo kukwobe. Ngoboni niye Nyambi ya Ngula unaketulu ngayi ukamona makando!”

²⁴ Niho muluwe Zendekiya mwana Kenana akatukile, kami wakamine Mikaya mbanda ku lupala, pe wepwile ngayi, “Kati moyo wa Nyambi ya Ngula wafuma mwaka ngani mumwami na kwamba mumwobe?”

²⁵ Mikaya wakumbwile ngayi, “Ukamoneshesha oho ukengina mu kampenci kamo mu kuholama.”

²⁶ Niho Ahambu mwene wa Ishalela alayile wumo ha babilolo bendi ngayi, “Kwata Mikaya pe umutwale kuli Amoni, kalela wamu lukena na kuli mwana mwene Yowashi.

²⁷ Kabatongweze ngayi bakamuyumbile mu tolongo, pe bakamuleleshe mankende na mema hantu na kaboko shiwahe.”

²⁸ Mikaya wambile ngayi, “Ndi ukaboka shiwahe, pe Nyambi ya Ngula kwambila mumwami ufwako!” Nimwenu, “Yuvwililenu kunebye ninamba!”

Lufu lwa mwene Ahambu

²⁹ Niho mwene Ahambu wamu Ishalela na mwene Yehoshafwati wamu Yunda bayile mu kulwisha lukena lwa Lamoti lwamu Ngiliyande.

³⁰ Ahambu wambile kuli Yehoshafwati ngayi, “Nikalifutula aha tukaya mu nzita, ngoboni obe ukaye hinga wavwala bivwalo byobe bya wene.” Nohobene mwene wa Ishalela wayile mu nzita hinga alifutula.

³¹ Mwene wamu Shiliya walayile bakulwane bendi ba makoloyi 32 ngayi hinga balwisha muntu tuhu washenge ndele tuhu mwene wamu Ishalela.

³² Nohobene oho bamonene mwene Yehoshafwati, nimwabo bahanganikile ngayi mwene wa Ishalela, pe bafutukile na kumulwisha. Ngoboni oho Yehoshafwati akalokele,

³³ balimukile ngayi kaliha wengile mwene wa Ishalela, kami balehele kumulwisha.

³⁴ Sha kubula kulimuka, kanzita wa Kaashiliya wapuhile muvwi ou washompokelele Ahambu mwene wa Ishalela halinungila bivwalo byendi bya nzita. Mwene wakalukilile kuli mukakwendesha koloyi yendi ngayi, “Nalemanakale! Bokamo, umfumishe mu nzita.”

³⁵ Oho nzita yatakalalile shikuma, mwene Ahambu washalile hinga atuntumana mu koloyi yendi, ku shangula ku Baashiliya. Mukeza wavwilenga ha shitombo shendi, wazubumukililenga hanci, kami wafwikile litako lya koloyi, pe ku mazolo wafwile.

³⁶ Hahepi na kulela kwa mutena lizu lyapitile mu mihoko ya Baishalela ngayi, “Bantu nimwabo baboke ku minzi yabo!”

³⁷ Nohobene mwene Ahambu wafwile. Lutu lwendi lwatwaliwile ku Shamaliya na kulufunda kuyo.

³⁸ Koloyi yendi yayoweshiwile mu liziba lya ku Shamaliya, oku balashilenga mukeza wendi batuwa, bambuyama balwiholwiho baliyoweshelengamo nibo bamwine, ngonehe ambile Nyambi ya Ngula ngayi shikamoneka.

³⁹ Byuma nimwabyo biya atendele mwene Ahambu, kuyakaho na wuwahe wa musheke wendi wayengiwile na mayewe a banzovu, kami na zinkena nimwazo azikile, byatikitiwile mu Libuka lya likota lya bamyene bamu Ishalela.

⁴⁰ Ahambu wafwile, pe mwanendi wa mulume Ahaziya wamushwanine kwinga mwene.

Mwene Yehoshafwati wamu Yunda

⁴¹ Mu mwaka wa wunaa wakulela kwa mwene Ahambu wamu Ishalela, Yehoshafwati mwana Asha wengile mwene wamu Yunda,

⁴² oho Yehoshafwati uli na myaka 35, walelele Yelushalema myaka 25. Mandiyendi wengile Azumba mwana Shiluhi.

⁴³ Wengile ngo tatiyendi Asha ou ashwanine. Watendele byabiwahe ku meho a Nyambi ya Ngula, ngoboni myanya ya kuzila ya kulemeshela banyambi bowa yabulile ku shiwuliwa. Niho bantu bazaminine kukombelela zinkombela na kuhokeshelaho mitondo ya kutwa ya livumba lyaliwahe.

⁴⁴ Yehoshafwati kami waliyuvwashaninenga na mwene wamu Ishalela.

⁴⁵ Byuma nimwabyo biya atendele Yehoshafwati bya kukanca kwendi nimwako na zinzita zendi byatikitiwile mu Libuka lya likota lya bamyene bamu Yunda.

⁴⁶ Wafumishilemo balume na bambuyama nimwabo balwiholwiho batendelenga tuloombe ku myanya ya kuzila yakulemeshela banyambi bowa, aba bashalile ku matena a tatiyendi Asha, wabatandile mu litunga.

⁴⁷ Litunga lya Endoma lyabulile mwene, lyaleliwilenga tuhu ku mulume ou emikile mwene wamu Yunda.

⁴⁸ Mwene Yehoshafwati wabazishile mato amanene aku Tashishi ngayi akaletenga ngolinde mu litunga lya Ofwila, ngoboni kaliha ayile ndaba atabokelele ku Eziyoni Ngemba, pe kaliha avuwiwile.

⁴⁹ Niho mwene Ahaziya wamu Ishalela mwana Ahambu ahanganikile kutuma bantu mu kuvuwa hamo na bantu ba Yehoshafwati, ngoboni Yehoshafwati wakanine obyo byambiwile.

⁵⁰ Yehoshafwati wafwile niho afundiwile mu bizino bya bamyene mu Lukena lwa Ndavita, mwanendi Yeholamu wamushwanine kwinga mwene.

Mwene Ahaziya wamu Ishalela

⁵¹ Mu mwaka wa 17 wakulela kwa mwene Yehoshafwati wamu Yunda, Ahaziya mwana Ahambu wengile mwene wamu Ishalela, kami walelele mu Shamaliya myaka yibili.

⁵² Wabipishilile Nyambi ya Ngula na kukonka zinzila zazibi za tatiyendi Ahambu na mandiyendi Yezembelo na bya mwene Yelombowami mwana Nembati, ou watwamininine Ishalela mu wubi.

⁵³ Walemeshelenga na kutendela milimo Mbaalu na kwinga ngo tatiyendi ou ashwanine, pe washonkomwene wukali wa Nyambi ya Ngula, Nyambi wa Ishalela.