1 Bamyene 21 - Libuka Lya Kuyela

Mfuba ya Namboti ya mikabo ya shinyanca

¹ Hahepi na musheke wa mwene Ahambu waku Shamaliya mu Yezilelu kwekalile mfuba ya mikabo ya shinyanca. Eye yengile ya mulume lizina lyendi Namboti.

² Mutena wamina Ahambu wambile kuli Namboti ngayi, “Leha nishimbe mfuba yobe ya mikabo ya shinyanca, ndaba yili kwakwipi na musheke wami, nikushinga yinge mfuba ya mashiha. Nikakuhingishilamo mfuba yayiwahe ya mikabo ya shinyanca, hinge ndi ukushinga, nikayilande na ndando yayiwahe.”

³ Namboti wakumbwile Ahambu ngayi, “Nyambi ya Ngula akane, ami kukupanika mfuba eye ya mikabo ya shinyanca nakonene ku bankaka zami.”

⁴ Ahambu wayile ku musheke na kuvundangila na kukaliha hanebye Namboti wa kayezilelu ambile kukwendi. Walalile ha wulili wendi ku shangula ku limota, kami wabulile kulya byakulya.

⁵ Mukazendi Yezembelo wayile kukwendi kami wamwipwile ngayi, “Shuma ngani unavundangilili? Shuma ngani ukukanina byakulya?”

⁶ Wakumbwile ngayi, “Ndaba yanebye ananyambili Namboti wa kayezilelu. Nashingi kulanda mfuba yendi ya mikabo ya shinyanca hinge ndi kumupana yashenge, ndi washinga. Nantongweze ngayi kuyimpana ufwako!”

⁷ Yezembelo wakumbwile ngayi, “Kati uli mwene ndi kaliha uli mwene? Pinduka ha wulili, likwatishe, ulye. Nikakutambwila mfuba ya shinyanca kuli Namboti wa kayezilelu!”

⁸ Niho Yezembelo atikitile mañwati amo, mu mañwati mwatikitiwile lizina lya Ahambu, washintileho na shikanto shendi, kami wawatumine ku babilolo na bakakutwaminina bamu lukena omu ekalilenga Namboti.

⁹ Mañwati ambile ngayi, “Yakenu mutena wakuzila kulya, kungulenu bantu hamo, panenu Namboti Mwanya wa maleema.

¹⁰ Shimbenu babibenkanyi babili bakeze na kubangila Namboti na kumuyonkanisha ngayi unatukana Nyambi na mwene. Niho mukamututwishile ha munkanda wa lukena na kumuziha na mamanya.”

¹¹ Babilolo na bakakutwaminina bamu lukena lwa Yezelela batendele ebye alayile Yezembelo mu liñwati.

¹² Bayakile mutena wakuzila kulya, kami ba kungwile bantu hamo, niho bapanine Namboti mwanya wa maleema.

¹³ Babibenkanyi babili bamubangilile mwana ncanana mu likunge ngayi unahandulu Nyambi na mwene, pe kami bamutwalile ha munkanda wa munzi na kumuziha na mamanya.

¹⁴ Lizu lyatumiwile kuli Yezembelo ngayi, “Namboti bamuzihakale.”

¹⁵ Yezembelo oho ayuvwileko tuhu, pe wambile kuli Ahambu ngayi, “Namboti wa kayezilelu unafu. Haya yanga ukashimbe mfuba yendi ya shinyanca iya akanishile kulandisha kukwobe.”

¹⁶ Hohobene Ahambu wayile mu kushimba mfuba ya shinyanca.

¹⁷ Niho Nyambi ya Ngula ambile kuli muluwe Eliya waku Tishimbe ngayi,

¹⁸ “Yanga kuli mwene Ahambu wa Ishalela ou wekala mu Shamaliya. Ukamuwana mu mfuba ya Namboti ya shinyanca, eye ali na kushinga kushimba.

¹⁹ Ukamutongweze ngayi, Ami Nyambi ya Ngula, nili na kwamba kukwendi ngayi, ‘Ha kumanisha kuziha muntu, kati ukushimbila kumo na wuheti wendi ndi? Mutongweze nehe, eshe nisho nikwamba ngayi, mu mwanya uyabene batuwa balashilenga mukeza wa Namboti, nimo kami bakalashila mukeza wobe!’”

²⁰ Oho Ahambu amonene Eliya wambile ngayi, “Kati wezakale mu kungwana, obe kamalamo wami?” Eliya wakumbwile ngayi, “Ee, nezakale bene. Unalishangwili obemwine ha kutendanga shibi ku meho a Nyambi ya Ngula.

²¹ Nohobene Nyambi ya Ngula ukwamba kukwobe ngayi, ‘Ami Nyambi ya Ngula nikaleta makando hahobe Ahambu. Nikakutenda shibi na kulobesha balume nimwabo baku ba lupashi lwobe, kanuke na mukulwane nimwabo hamo.

²² Balupashi lwobe bakenga ngo ba lupashi lwa Yelombowami mwana Nembati na ba lupashi lwa mwene Mbaasha mwana Ahiya, ndaba unatumizi wukali wami na kutwaminina Ishalela mu wubi.’

²³ Pe bya Yezembelo, Nyambi ya Ngula ukwamba ngayi batuwa bakalila lutu lwendi mu lukena lwa Yezilelu.

²⁴ Kami bawushinda wobe Ahambu nimwabo bakafwila mu lukena bakaliwa ku batuwa, kami nimwabo bakafwila mu mbuwa bakaliwa ku makubi.”

²⁵ Kowa muntu walishangwilile Kubipisha ku meho a Nyambi ya Ngula ngonehe Ahambu. Wubi nimwawo wengile wakukandikiziwa kwa Yezembelo mukazendi.

²⁶ Watendelenga wubi wa wunyengwe shikuma wakulemesha tunankishi, ngonehe batendelenga Baamoli, aba Nyambi ya Ngula atandile mu litunga oho bantu ba Ishalela bayilenga na kulikaka.

²⁷ Oho Eliya amanishile kwamba, Ahambu watabwile bivwalo byendi, kami wavwalile mincangwe. Wakanine kulya, niho alalile mu mincangwe, pe wekalile na manyengo na kulishoshota.

²⁸ Nyambi ya Ngula wambile kuli muluwe Eliya waku Tishimbe ngayi,

²⁹ “Wamono eshe Ahambu analilimbwilishi kukwami ndi? Aha haya anatende eshe, kukaleta makando ha shikati sha kuyoya kwendi nifwako, shikenga shikati sha kuyoya kwa mwanendi shiya nikaleta makando ha balupashi lwa Ahambu.”