1 Bamyene 20 - Libuka Lya Kuyela

Nzita na Shiliya

¹ Mwene Mbeni Handandi wamu Shiliya walobele bakanzita bendi nimwabo. Bamuyavwile bamyene babashe 32 hamo na bambishi babo na makoloyi abo a nzita. Bendelenga kami bazingulukile Shamaliya, lukena lwamu Ishalela, niho balukatukilile mutakwe na kululwisha.

² Watumine bantumwana mu lukena kuli mwene Ahambu wamu Ishalela.

³ Niho amutongwezele ngayi, “Mwene Mbeni Handandi namba ngayi, ‘Shiliva na ngolinde na bambuyama babawahe hakati kenu na batwanuke kami ba kushuma shikuma banengi bami!’”

⁴ Ahambu mwene wa Ishalela wakumbwile ngayi, “Shimikila hekulyami mwene Mbenihandandi ngayi, netabili, nikwitabila kwikala mu nceto yobe na byuma byami nimwabyo naheta.”

⁵ Bantu babokele kuli Ahambu na byambo byamina byafumine kuli Mbeni Handandi ngayi, “Nakutuminine lizu ngayi umpanike Shiliva na ngolinde na bakazobe na batwanuke.

⁶ Haya ku nzona ha shikati shino, nikatuma babilolo bami mukushinga mu musheke wobe na mu matala a babilolo bobe na kushimba byuma nimwabyo byabilemu ebye ba kulupila shikuma.”

⁷ Ahambu mwene wa Ishalela wehanine bakakutwaminina litunga nimwalyo, kami wambile ngayi, “Mufwako ku mona ngayi ou muntu uli na kushinga kutulobesha. Wantuminine lizu lya kunyangula bakazami na batwanuke na shiliva na ngolinde, pe netabili.”

⁸ Bakakutwaminina na bantu bakumbwile ngayi, “Hinga uyuvwilila kukwendi, hinga umupanikabyo.”

⁹ Nohobene Ahambu wakumbwile bantu ba Mbeni Handandi ngayi, “Tongweza hekulyami mwene ngayi, netabilile ku byambo byendi bya kutatika, ngoboni kutwesha kwitabila sha wubili nifwako.” Bantu bayile, kami niho babokele kuli Ahambu naneze ncango,

¹⁰ “Mbeni Handandi wambile ngayi, ‘Nikaleta bantu mu kunongesha luno lukena lwobe na kushimba bibunku mu maboko wabo. Mwanga banyambi bankame nifwe ndi nikubula kutenda noho.’ ”

¹¹ Ahambu mwene wa Ishalela wakumbwile ngayi, “Tongweza mwene Mbenihandandi ngayi, kanzita washemwa waliyemezanga oho nzita yamanakale kaliha oho shilolo.”

¹² Mbenihandandi watambwile kukumbula kwa Ahambu oho ekalile na kunwa na baya bamyene bakakumuyavwa, mu zintanda zabo. Watongwezele bantu bendi ngayi, “Kwalamenu mu myanya yenu.” Kami bakwalamine mu myanya yabo ngayi balwishe lukena lwa Shamaliya.

¹³ Ha shikati shiya bene, muluwe umo wa Nyambi wayile kuli mwene Ahambu niho ambile ngayi, “Nyambi ya Ngula ukwamba ngayi, ‘Hinga utina boha bakanzita babengi! Ami nika kupanika ngovu za kuyipitakana lelo, niho ukalimuke ngayi Ami Nyambi ya Ngula.’”

¹⁴ Ahambu wepwile ngayi, “Kati yani ou ukatwaminina kulwa?” Muluwe wakumbwile ngayi, “Nyambi ya Ngula ukwamba ngayi bandumbana banzita bali mu nceto ya batulela bamu litunga.” Mwene wepwile ngayi, “Kati yani ukalaya bakanzita?” Muluwe wakumbwile ngayi, “Obe bene.”

¹⁵ Nohobene mwene Ahambu wehanine bandumbana ba bakanzita ba mu nceto ya batulela, nimwabo bengile 232. Niho ehanine bakanzita bamina ba Baishalela, wingi wabo wengile bantu 7,000.

¹⁶ Kulwa kwatatikile mutena hakati ka mutwe, oho bakanzita bendi Mbeni Handandi hamo na baya bamyene babashe makumi ahatu na babili bakolwakale mu zintanda zabo.

¹⁷ Bakanzita ba Ishalela bayilenga mu kuwuluta na banzita ba bandumbana hinga bekala kumbili. Bakakuhokela aba batumiwile kuli Mbeni Handandi mu kushimika kukwendi ngayi, “Likunge lya bakanzita likwiza kufuma mu Shamaliya.”

¹⁸ Walayile ngayi, “Batwalenu babomi, howa shuma hinge kwiza mu kulwa hinge ndi bakwiza na kwipula ku mwena.”

¹⁹ Bakanzita ba bandumbana bakashonkomwene nzita, niho bakanzita ba Baishalela babakonkele munyima,

²⁰ pe muntu na muntu wazihile muntu alwilenga nendi. Baashiliya batinine, kami Baishalela babakonkele na kubatanda, ngoboni Mbeni Handandi watinine hinga akandama ha mbishi.

²¹ Ahambu mwene wa Ishalela wayile ku lifuku lya nzita. Wapukwile bambishi na makoloyi kami wakomene Baashiliya shikuma.

²² Kami uya muluwe wayile kuli mwene Ahambu niho ambile ngayi, “Boka na kuliwahishila bya nzita yamina, ukaliwahishe shiwahe, ndaba mwene wamu Shiliya ukeza kami na kukulwisha mvumbi.”

Kulwa kwa wubili na Baashiliya

²³ Babilolo ba mwene Mbenihandandi bambile kukwendi ngayi, “Banyambi ba Ishalela banengi banyambi baha binkanda, pe ngayi nisho shuma banatukomene Baishalela. Ngoboni tuku fwanina kubakoma ndi tukulwa nabo mu zimbuwa.

²⁴ Haya fumisha baya bamyene babashe makumi ahatu na abili ku kwendesha bakanzita na kuhingishamo bakulwane bamu lifuku lya nzita.

²⁵ Niho wihane nzita yayinene ngonehe iya yatinine na wingi umo wa bambishi na makoloyi. Tukalwisha Baishalela mu zimbuwa, nehi ku shikati shino tukabapitakana.” Mwene Mbenihandandi wetabilile ku kubela kwabo.

²⁶ Ku shikati sha mvumbi Mbeni Handandi walobele bantu bendi kami wayile nabo na kuwuluta ku lukena lwa Afweki mukulwisha Baishalela.

²⁷ Baishalela behaniwileko na bilwisho byabo. Bakatukile kuya na kutula mu makunge abili kuliyahikiza na Baashiliya. Baishalela bamonekele ngo matanga abili amashe a bampongo kufwanikiza ku Baashiliya, aba bapanzaninine mu litunga nimwamo.

²⁸ Niho muntu wa Nyambi ayile kuli Ahambu mwene wa Ishalela na kwamba ngayi, “Nyambi ya Ngula ukwamba eshe ngayi, ‘Ndaba Baashiliya bakwamba ngayi Ami Nyambi waha binkanda kaliha waha zimbuwa. Nikamipana ngovu za kukoma ha nzita yabo yayinene, obe na bantu bobe mukalimuke ngayi Ami Nyambi ya Ngula.’”

²⁹ Ha matena mutanu na abili Baashiliya na Baishalela bekalile mu minkungwa yabo, hinga balitilamina umo na wamina. Ha mutena wa mutanu na abili batatikile kulwa, pe Baishalela bazihile Bakanzita ba Baashiliya 100,000.

³⁰ Bamashaliza batininine mu munzi wa Afweki. Hakati kabo limota lya shipata sha munzi lyawililile bantu 27,000. Mbeni Handandi kami watininine mu lukena, pe waholamine mu kapenci ka mukati ka litala.

³¹ Babilolo bendi bayile kukwendi na kwamba ngayi, “Tunayuvwu ngayi bamyene ba Baishalela bali na nceshe. Tupanike ngovu za kuya kuli mwene wamu Ishalela na mincangwe hinga yazinguluka mu zinkanda zetu na nyimbwa hinga zazinguluka mu zincingo zetu, pe kampe ukashiyaho wumi wobe.”

³² Nohobene balipambililile mincangwe mu zinkanda zabo na nyimbwa mu zincingo zabo kami bayile kuli Ahambu. Niho bambile ngayi, “Mukamulimo wobe Mbeni Handandi ukulambilila ha wumi wendi.” Ahambu wakumbwile ngayi, “Kati ushili kuyoya ndi? Shashiwahe! Niye unengi kawushinda wami!”

³³ Babilolo ba Mbeni Handandi batatililenga shilimukisho shashiwahe, pe oho Ahambu ambile ngayi, “Kawushinda” bashishimbile shosho, pe bambile ngayi, “Nimo Mbeni Handandi unengi kawushinda wobe!” Ahambu walayile ngayi, “Muletenu kuno kukwami.” Oho akumine Mbenihandandi, Ahambu wamwihanine ngayi, engine nendi mu koloyi.

³⁴ Mbenihandandi wambile kukwendi ngayi, “Nikabwesha minzi kukwobe, eye tate ashimbile kuli tatiyobe, pe obe mwanga ukemike mwanya wakulandishila mu Ndamashika, ngonehe shiya atendele tate mu Shamaliya.” Ahambu wakumbwile ngayi, “Hanebye unamba nikukuleha uye.” Baliyuvwashanine hamo, kami wamulehele ngayi aye.

Muluwe wa Nyambi ukuhepa Ahambu

³⁵ Mukufundiziza kwa Nyambi ya Ngula, muntu wamu kanzunga ka bamiluwe walayile minendi muluwe ngayi amukame. Ngoboni wakanine.

³⁶ Nohobene wambile kukwendi ngayi, “Ndaba unabulu kwombatala lizu lya Nyambi ya Ngula, wanciya tuhu, shimbwi ukakuziha.” Pe oho amushiyile tuhu shimbwi wakamuzihile.

³⁷ Niho owo muluwe umo wayile ku muntu wamina na kwamba ngayi, “Nkame” Ou muntu watendele noho, wamukamine nkoni yayikalu niho amulemekele.

³⁸ Muluwe walipambile ku lupala lwendi na kaponda kulifutula niyemwine ngayi babule kumulimuka. Wayile mukwimana kunkumo ya nzila kutatilila mwene wa Ishalela ngayi apite.

³⁹ Oho mwene apitilenga muluwe wamubilikizile, kami wambile kukwendi ngayi, “Obe mwene ya ngoma nalwilenga mu nzita oho mukanzita aletele kukwami kamalamo wakwatiwile mu nzita pe wambile ngayi, ‘Lama ou muntu ndi ukapanza ukayumba na wumi wobe, hinge ukayumba mulandu 3,000 ya shiliva.’

⁴⁰ Ngoboni oho natendelenga byuma byamina, pe muntu niho ashilile.” Mwene wa Ishalela wakumbwile ngayi, “Unaliyata obemwine, wafwanina kuyumba ndando ya mulandu.”

⁴¹ Muluwe watabwile likwiza ku lupala lwendi, mwene niho amulimukile ngayi unengi umo ha bamiluwe ba Nyambi.

⁴² Niho muluwe ambile kuli mwene ngayi, “Nyambi ya Ngula ukwamba elye lizu ngayi, ‘Ndaba watetelelele muntu ou ngayi apanze, ou nashingile kuziha, haya obe ukufwa mu mwanya wendi, pe bakanzita bobe bakanongeshiwa na kuleha likunge lyendi lya bakanzita kupanza.’”

⁴³ Kami Ahambu mwene wa Ishalela wabokele ku lukena ku Shamaliya na kulikekula na kuvundangila.