1 Bamyene 2 - Libuka Lya Kuyela

Kufundiziza kwa Ndavita kuli Sholomoni kwamamanishililo

¹ Oho Ndavita ekalile hahepi na kubembuluka wehanine mwanendi Sholomoni pe wamupanine kufundiziza kwendi kwamamanishililo ngayi,

² “Shikati shami sha kufwa shakuminakale. Inga wakukanca na ku shuma.

³ Tenda eshe Nyambi ya Ngula, Nyambi yobe anakulaya kutenda. Ombatala mazu wendi na ndayano zendi na kufundiziza kwendi, ngonehe shatikitiwile mu ndayano za Moshesha, pe ngayi byuma nimwabyo ukutenda mwanga bitumpuke nimwako oku ukuya.

⁴ Enu na bazukulyenu mu ku fwanina kwombatala Nyambi ya Ngula. Ndi mukatenda noho, pe niye ukalama shikulupisho shiya ankulupishile ngayi umo ku ba lupashi lwetu bikati nimwabyo ukenga mwene.

⁵ “Kushili shuma shashenge kami. Obe hiwulimuka eshe atendele Yowambu mwana Zeluya kukwami ha kuziha bakulwane babili banzita ba Ishalela, Ambina mwana Nela na Amasha mwana Yeta wa mulume. Eshe bazihiwile mu shikati sha kubula nzita, nisho shengile kubweshela lufu olu bazihiwile mu shikati sha nzita. Yowambi wazihile bantu bakubula mulandu, haya nashimbi wulemu kunebye atendele, pe nili na ku monenaho malwa.

⁶ Ukulimuka sha ku fwanina kutenda, kaliha uku fwanina kumuleha ngayi afwe lufu lwa kalili.

⁷ “Ngoboni monesha shishemo kuli bana ba Mbazilayi ba ku Ngiliyande na kubalama, ndaba bekalile na shishemo kukwami oho natinine yayiyobe Ambishalome.

⁸ “Kwali kami Shimeyi mwana Ngela wa mulume, waku munzi wa Mbahulima mu litunga lya Mbenjamani. Wankutile shikuma ha mutena uya nayilenga ku Mahanayima, ngoboni oho angwanine ku mishinzi wa Yondana nalihahile kuli Nyambi ya Ngula ngayi kukamuziha nifwako.

⁹ Wafwanina kumushushula. Niye mukulwane wabo, ngoboni obe uli wakukeya ukulimuka ngayi uku fwanina kumuziha.”

Lufu lwa Ndavita

¹⁰ Niho mwene Ndavita wafwile, pe wafundiwile mu Yelushalema.

¹¹ Walelele mu Ishalela myaka 40, walelele myaka 7 mu Hembuloni na myaka 33 mu Yelushalema.

¹² Sholomoni washwanine tatiyendi Ndavita kwinga mwene na wene washumine shikuma.

Lufu lwa Andoniya

¹³ Niho Andoniya mwana Hangati, wayile kuli Mbatisheba, manda Sholomoni. Mbatisheba wepwile ngayi, “Kati oku kuzingula kwa ku mwena ndi?” Wakumbwile ngayi, “Eyo kwa ku mwena.”

¹⁴ Niho ambile ngayi, “Nili na shuma sha kukwipula.” Wakumbwile ngayi, “Yipula.”

¹⁵ Andoniya wakumbwile ngayi, “Hiulimuka ngayi ami nafwanina kwinga mwene, kami bantu nimwabo mu Ishalela bashingilengasho. Ngoboni shafutukile mwashenge, pe mukonzowami wengakale mwene, ndaba nisho shengile sha mutima wa Nyambi ya Ngula.

¹⁶ Nili na shambo sha kwamba hekulu na kulomba hinga unkanisha.” Mbatisheba wepwile ngayi, “Kati shishini osho?”

¹⁷ Wakumbwile ngayi, “Hekulu, kandombelele kuli mwene Sholomoni ngayi nishimbe Ambishangi kankanga waku Shunema kwinga mukazami. Nikulimuka ngayi kukamukanisha wufwako.”

¹⁸ Mbatisheba wakumbwile ngayi, “Shashiwahe. Nikakwambilako kuli mwene.”

¹⁹ Nohobene Mbatisheba wayile kuli mwene Sholomoni mukwamba kukwendi hakwimanina Andoniya. Mwene wemanine na kushangwisha mandiyendi na kulamba kukwendi. Niho ekalile ha litanda lyendi, niho mandiyendi bamuletelele litanda lyamina, aha ekalile ku shilyo shendi.

²⁰ Wambile ngayi, “Nili na shuma shashishe shakwipula, hinga unkanisha hekulu.” Mwene wepwile ngayi, “Bishini biya mawa? Kukukanisha nifwako.”

²¹ Wakumbwile ngayi, “Leha yayiyobe Andoniya ashimbe Ambishangi kwinga mukazendi.”

²² Mwene Sholomoni wepwile ngayi, “Shumangani akunyepela Ambishangi ngayi nimupane kukwendi? Wafwanina tuhu kunyepa kami ngayi nimupanike litanda. Hanebye nimwabyo, Andoniya nengi yaya, kami mukankombela Ambiyatale na Yowambu mwana Zeluya banemana nendi.”

²³ Niho mwene Sholomoni ahahile luhaho lwa shikulupisho ngayi, “Mwanga Nyambi ankame nifwe ndi nifwako kwinga Andoniya kuyumba wumi wendi ha kwipula eshe.

²⁴ Nyambi ya Ngula unancumishi shikuma ha litanda lya batate ba Ndavita, unalama shikulupisho shendi na kumpanika wene naku bazukulyami. Nikulibeza na Nyambi ya Ngula wakuyoya ngayi Andoniya ukufwa ha mutena uno bene.”

²⁵ Nohobene Mwene Sholomoni walayile Mbenaya mwana Yehoyanda ngayi akazihe Andoniya. Mbenaya mwana Yehoyanda wayile naku muziha.

Kutandiwa kwa Ambiyatale na lufu lwa Yowambi

²⁶ Niho mwene Sholomoni ambile kuli mukankombela Ambiyatale ngayi, “Yanga ku litunga lya ku munzi wobe mu Anatoti. Uku fwanina kufwa, ngoboni kukuziha wangu nifwako, ndaba obe wengile mukulwane wa Likwati lya Kulimama kwa Nyambi ya Ngula oho wekalilenga na Tate Ndavita, kami wekalile hamo nabo mu makando wabo nimwawo.”

²⁷ Niho Sholomoni afumishile Ambiyatale ha mulimo wa mukankombela wa Nyambi ya Ngula. Muntendelo eye shikulupisho shinge sha kupwisha shiya ambile Nyambi ya Ngula ku Shilo, hali mukankombela Eli naha bazukulyendi.

²⁸ Oho Yowambu ayuvwile ebye byaholokele, watinine ku Ntanda yaku meho a Nyambi ya Ngula na kukwata ku zinkomi za kaala, ndaba niye wemaninine Andoniya, ngoboni kaliha Ambishalome.

²⁹ Oho mbuzi ya kumine kuli mwene Sholomoni ngayi Yowambu unatinini ku Ntanda ya Nyambi ya Ngula kami ngayi unekala kunkumo ya kaala, Sholomoni watumine muluwe kuli Yowambi mu kumwipula ngayi, “Kati shumangani boni eshe unetukili ku kaala?” Yowambu wakumbwile ngayi wetukila ku Ntanda ya Nyambi ya Ngula ndaba ukutina Sholomoni. Niho Sholomoni watumine Mbenaya mwana Yehoyanda kuya mu kumuziha.

³⁰ Mbenaya wayile ku Ntanda yaku meho a Nyambi ya Ngula, pe wambile kuli Yowambu ngayi, “Mwene unakulaya ngayi ututikile ha munkanda.” Yowambu wakumbwile ngayi, “Byo nikufwila kwa kuno.” Mbenaya wabokele kuli mwene, pe wamutongwezele ebye ambile Yowambi.

³¹ Mwene Sholomoni wakumbwile ngayi, “Tenda nehe eshe anamba Yowambu. Umuzihe pe umufunde. Niho ami hinge bamina ba lupashi lwa tate kukekala na mulandu kuneshe atendele Yowambu sha kuziha bantu bakubula mulandu tufwako.

³² Nyambi ya Ngula ukashushula Yowambi ha noyo mponde atendele, sha kubula kulimuka batate ba Ndavita. Yowambi wazihile bantu babili bengile bakulunga na babawahe, kumupitakana, Ambina mwana Nela mukulwane wa nzita ya Ishalela na Amasha mukulwane wa nzita ya Yunda.

³³ Kashushwilo ka Yowambu ha mponde kakenga kakulileyekamo niyemwine na bazukulyendi mwaya myaka. Ngoboni Nyambi ya Ngula ukapana kutangama shikati nimwasho ku bazukulya Ndavita aba bakekala ha litanda lyendi.”

³⁴ Nohobene Mbenaya mwana Yehoyanda wayile ku Ntanda yaku meho a Nyambi ya Ngula, pe wazihile Yowambi, kami wafundiwile ku munzi wendi mu libelelengwa.

³⁵ Mwene wafutwile Mbenaya mwana Yehoyanda kwinga mukulwane wa nzita kuhinga mu mwanya wa Yowambi, kami wayakile mukankombela Zandoki kuhinga mumwanya wa Ambiyatale.

Lufu lwa Shimeyi

³⁶ Niho mwene ehanine Shimeyi pe wambile kukwendi ngayi, “Lizikile litala muno mu Yelushalema. Wikalengamo kami hinga ushiya lukena.

³⁷ Ndi ukufuma na kuya mu nciza ya kashinzi ka Kindiloni ukafwa bene pe ukalihepa.”

³⁸ Shimeyi wakumbwile ngayi, “Shashiwahe obe mwene ya ngoma, nikatenda ebye unamba.” Nohobene wekalile mu Yelushalema shikati shashinene.

³⁹ Pe haya, ha kumana kwa myaka yihatu, bandungo babili ba Shimeyi betukilile kuli Akishi mwana Maaka, mwene wamu Ngati. Oho Shimeyi ayuvwile ngayi bali mu Ngati,

⁴⁰ watwikile mbongolo yendi, pe wayile kuli mwene Akishi mu Ngati mukushinga bandungo bendi. Shimeyi wabawanine pe wababweshele ku Yelushalema.

⁴¹ Oho Sholomoni ayuvwile ebye atendele Shimeyi nafumu ku Yelushalema nayi ku Ngati kami naboko,

⁴² wamwihanine pe wambile kukwendi ngayi, “Nakubezelele ngayi hinga ukafuma mu Yelushalema. Kami na kubelele ngayi ndi ukashitenda uku fwanina kufwa bene. Kati obe kaliha wetabilile ku shambo eshe ngayi wafwanina kunyombatala ndi?

⁴³ Shumangani boni unakilukili shikulupisho shobe na kulimbulula ndayano zami?

⁴⁴ Obe ukulimuka byabibi biya watendele kuli tate Ndavita. Haya Nyambi ya Ngula ukakushushwilabyo.

⁴⁵ Ngoboni Nyambi ya Ngula ukantandalisha na kushumisha wene wa Tate Ndavita kami ukekala mwaya myaka.”

⁴⁶ Niho mwene alayile Mbenaya mwana Yehoyanda ngayi akazihe Shimeyi. Mwana Yehoyanda wayile na kumuziha. Nohobene mwene Sholomoni watangamine.