1 Bamyene 19 - Libuka Lya Kuyela

Eliya ha Lipili lya Shinayi

¹ Mwene Ahambu watongwezele mukazendi Yezembelo byuma nimwabyo biya atendele Eliya naneshe azihililemo bamiluwe ba Mbaalu nimwabo.

² Yezembelo watumine lizu kuli Eliya ngayi, “Mwanga banyambi bankame nifwe, ndi ku shikati shino nzona nifwako kukatenda shuma shimo kukwobe shiya watendele ku bamiluwe.”

³ Eliya watinine na ku shilisha wumi wendi, washimbile mukamulimo wendi niho bayile ku Mbelishemba mu Yunda. Kuyo wamushiyile,

⁴ Eliya wendele mutena nimwawo mu libelelengwa. Wemaninenga na kwikala hanci mu mubombola wa mutondo, pe washingile ngayi shinga afwe. Walombelele shikuma ngayi, “Byamvulilakale shikuma, Obe Nyambi ya Ngula. Fumisha wumi wami ngayi mwanga nifwe!”

⁵ Eliya walalile hanci mu nceto ya lipukumuna niho akupukilile mutulo. Ngoboni oho alanganine, lingeloyi lyamukwatile na kumutongweza ngayi, “Pinduka, ulye.”

⁶ Watilaminine noku noku, pe kwakwipi na mutwe wendi kwekalile linkende na ntesho ya mema. Walile kami wanwine, niho kami alalile.

⁷ Lingeloyi lya Nyambi ya Ngula lyabokele kami na kumutonesha shikati sha wubili na kwamba ngayi, “Pinduka kami ulye, ndaba mukala unengi wawutali shikuma kukwobe.”

⁸ Kami Eliya wapindukile niho alile na kunwa, byakulya byamupanikile nyala za kwenda matena makumi anaa, mwaana na wushiku kukuma ku Shinayi lipili lya Nyambi.

⁹ Wakawanine linzolongoma kuyo nimo alanganine wushiku. Ngoboni Nyambi ya Ngula wambile kukwendi ngayi, “Eliya, kati ukutenda bishini kuno?”

¹⁰ Wakumbwile ngayi, “Nyambi wa Makunge, nonzelenga kukutendela milimo na kutukumina, obe tuhu ninkayobe. Ngoboni bantu ba Ishalela banalehe kulimama kwabo na nobe na kunyemuna tuula twobe, kami banazihi bamiluwe bobe nimwabo. Ami tuhu na shalaho ninkayami, kami bali na kushinga kunziha!”

¹¹ Nyambi ya Ngula wambile kukwendi ngayi, “Tutika ha munkanda na kwimana kumbili yami hayilu ya lipili.” Niho Nyambi ya Ngula apitileko, pe watumine mpepo ya ngovu iya yanyenkanishile twina na ku pabozola mamanya. Ngoboni Nyambi ya Ngula kaliha wekalile mu mpepo. Mpepo yalehele kupepoka, niho kami kwekalile kukanka kwa hanci, ngoboni Nyambi ya Ngula kaliha wekalile mu kukanka kwa hanci.

¹² Oho kwamanine kukanka kwa hanci kwekalile mundilo, ngoboni Nyambi ya Ngula kaliha wekalile mu mundilo. Oho wamanine mundilo, kwekalile lizu lya kuyebetela lyaliboto.

¹³ Oho Eliya ayuvwileko wafwikile lupala lwendi na mwayi wendi, watutikile ha munkanda niho emanine ku menginino a linzolongoma. Lizu lyambile kukwendi ngayi, “Eliya, kati ukutenda bishini kuno?”

¹⁴ Wakumbwile ngayi, “Nyambi wa Makunge, nonzelanga kukutendela milimo na kutukumina, obe tuhu ninkayobe. Ngoboni bantu ba Ishalela banalehe kulimama kwabo na nobe na kunyemuna tuula twobe na kuziha bamiluwe bobe nimwabo. Ami tuhu na shalaho ninkayami, kami bali na kushinga kunziha.”

¹⁵ Nyambi ya Ngula wambile ngayi, “Boka na nzila eye weza kupita mu libelelengwa kuya ku Ndamashika. Ukengine mu lukena kami ukawabishe Hazayelu kwinga mwene wamu Shiliya,

¹⁶ kami Yehu mwana Nimushi wa mulume ukamuwabishe kwinga mwene wamu Ishalela. Kami uwabishe Elisha mwana Shafwati waku Abele Mehola ukushwana kwinga muluwe.

¹⁷ Muntu nimwendi ou wakupanza ku liboko lya Hazayelu ukazihiwa kuli Yehu, kami muntu nimwendi wakupanza ku liboko lya Yehu ukazihiwa kuli Elisha.

¹⁸ Ngoboni nika shiyaho bantu babomi 7,000 mu Ishalela, nimwabo aba banabulu ku shungumanina Mbaalu na ku zupeza kanankishi kendi.”

Kwihaniwa kwa Elisha

¹⁹ Eliya oho ayile wakawanine Elisha mwana Shafwati halima na muhoko wa bantatula, kwekalile mihoko likumi na umo kumbili yendi, kami walimishilenga muhoko wamamaninino. Eliya walifwikulwile lyambangubo lyendi pe walifwikile Elisha.

²⁰ Elisha washiyile bantatula bendi, wetukilile munyima ya Eliya kami wambile ngayi, “Leha taha nikashalisheho batate na bamawa, niho niye hamo na nobe.” Eliya wakumbwile ngayi, “Shashiwahe, boka, nikukanishile bishini!”

²¹ Elisha ayile ku muhoko wendi wa bantatula, wabazihile na kuteleka nyama yabo, waliyavwishilenga zimpongoho kwinga nkuni zaha mundilo. Wapanine nyama ku bantu niho bayilile. Kami wayile na Eliya kwinga mukakumuyavwa.