1 Bamyene 18 - Libuka Lya Kuyela

Eliya na Miluwe ba Mbaalu

¹ Matena amengi apitile, mu mwaka wawuhatu wa lyeya, Nyambi ya Ngula wambile kuli Eliya ngayi, “Yanga ukalimonekeshe kuli mwene Ahambu, pe nikatuma mvula.”

² Niho Eliya wayile. Kapande mu litunga lya Shamaliya kanenehele shikuma.

³ Nohobene Ahambu wehanine Ombandiya ou wengile mukulwane ku musheke. Ombandiya wengile mukakulishisha shikuma, mukakutina Nyambi ya Ngula,

⁴ Yezembelo oho azihilenga bamiluwe ba Nyambi ya Ngula, Ombandiya washimbileho mwanda umo niho abaholekele mulinzolongoma mu tunzunga twa makumi mutanu, mu kanzunga na kanzunga, wabapanikilenga byakulya na mema.

⁵ Ahambu wambile kuli Ombandiya ngayi, “Yenunga mukashinge tuheloke nimwato mu litunga, tumone ndi tukutwesha kuwanako mwila wakuyoyesha bambishi na mambema. Mwanga tubule kuziha bimuna byetu.”

⁶ Baliyuvwashanine ngayi mbalila ngani ya litunga eye muntu na muntu akuya na kuhokela, pe bakatukile na kuya ku zimbalila za kulitapulula.

⁷ Oho Ombandiya ayilenga mu nzila yendi, wabazumukile tuhu walihanganakale na Eliya. Wamulimukile, niho anyongamine na kulamba, pe wepwile ngayi, “Kati obe bene hekulyami Eliya ndi?”

⁸ Wakumbwile ngayi, “Ee, amibene Eliya. Yanga na kutongweza hekulyobe mwene ngayi ami wuno.”

⁹ Ombandiya wakumbwile ngayi, “Kati na bipishi bishini aha ukushinga ku nyaka mu malamo akuzihiwa kuli mwene Ahambu?

¹⁰ Nikulibeza na Nyambi ya Ngula wakuyoya, Nyambi yobe ngayi, mwene uli na kukushinga mu litunga nimwalyo lya hanci. Shikati nimwasho kalela wa litunga liti na liti, wakanine ngayi Eliya kumumona tufwako. Ahambu washingile kalela wa litunga liyo kukana na kulibeza ngayi obe kutwesha kuwaniwa ufwako.

¹¹ Kati ukushinga ngayi niye kukwendi na kumutongweza ngayi uli kuno ndi?

¹² Shikenga nahiti ndi aha nikuya moyo wa Nyambi ya Ngula ukakufumishako na kukutwala kumbalila ya kubula kulimuka? Niho oho nikatongweza Ahambu ngayi uli kuno, pe ndi kutwesha kukuwana ufwako, nka pe ukanziha. Anuka ngayi ami nengi mukakulishisha, mukakutina Nyambi ya Ngula ku balika ku wundumbana wami.

¹³ Kati kuyuvwa wufwako ngayi oho Yezembelo azihilenga bamiluwe ba Nyambi ya Ngula naholekeleho mwanda umo mu manzolongoma, mu tunzunga tubili twa makumi mutanu kanzunga na kanzunga? Kami napanine byakulya na mema kukwabo.

¹⁴ Nohobene bishini ukundayila ngayi niye na kutongweza mwene ngayi Eliya uli kuno? Nka pe ukanziha!”

¹⁵ Eliya wakumbwile ngayi, “Nikalibeza na Nyambi wa Makunge, ou natendelanga milimo, nikukukulupisha ngayi nikuliholola kuli mwene lelo.”

¹⁶ Nohobene Ombandiya wayile kuli mwene Ahambu, kami wamutongwezele. Niho Ahambu akatukile na kushimbawila Eliya.

¹⁷ Oho Ahambu amumonene wambile ngayi, “Kati obe wakuluwanganisha bantu ba Ishalela ndi?”

¹⁸ Eliya wakumbwile ngayi, “Kaliha ami nikubaluwanganisha byo, ngoboni obe na lupashi lwobe nimwalo. Obe unabulu kwombatala ndayano za Nyambi ya Ngula na kulemesha tunankishi twa Mbaalu.

¹⁹ Haya laya bantu bamu Ishalela nimwabo ngayi bakangwane ku Lipili lya Kamela. Leta bamiluwe ba Mbaalu 450 na bamiluwe 400 ba nyambi wa mbuyama Ashela, aba emanininenga mwene wa mbuyama Yezembelo.”

²⁰ Nohobene Ahambu wehanine hamo Baishalela nimwabo na bamiluwe ba Mbaalu ku lipili lya Kamela.

²¹ Eliya wayile ku bantu kami wambile ngayi, “Mukashimba shikati sha kukuma hati, hinga mwekala na mitima yibili? Ndi Nyambi ya Ngula nengi Nyambi, mulemeshenu, ngoboni ndi Mbaalu nengi Nyambi mulemeshenu kami!” Ngoboni bantu bamwenene tuhu.

²² Niho Eliya ambile ngayi, “Ami tuhu muluwe wa Nyambi ya Ngula unashalaho, ngoboni kuli bamiluwe 450 ba Mbaalu.

²³ Letenu bankunzi babili, kami lehenu bamiluwe ba Mbaalu bashimbeho umo, bamuzihe kami na kumuketola bituntula, babiyake ha nkuni. Ngoboni hinga bayakaho mundilo. Nikatenda shuma shimo na nkunzi wamina.

²⁴ Bamiluwe ba Mbaalu balombele kuli nyambi yabo, kami ami nikalombela kuli Nyambi ya Ngula. Ou eze akakumbule na kutuma mundilo, niye unengi Nyambi wa kupwisha.” Bantu nimwabo betabilile.

²⁵ Eliya wambile ku bamiluwe ba Mbaalu ngayi, “Ha kuwana ngayi enu munengi babengi shikuma shimbenu nkunzi, mutatike kumuziha na kumuketozola. Lombenu kuli nyambi yenu ngoboni hinga mubangizaho mundilo.”

²⁶ Bashimbile nkunzi uya babaletelele, bamuzihile na kumu ketozola, pe balombelelenga kuli Mbaalu kubalika ku lumenemene hantu mutena hakati ka mutwe. Babilikizile ngayi, “Tukumbule, obe Mbaalu!” Kami bazaminine ku shinda na kukilozoka na kuzinguluka kaala aka bazikile. Ngoboni kaliha kwezile kukumbula.

²⁷ Mutena oho wakumine hakati ka mutwe, Eliya watatikile kubahengamina ngayi, “Lombelenu na kubilikiza! Nengi nyambi! Kampe nengi walyezela, hinge ndi ushili kukatuluka, hamina ndi unayi mukala, hinge ndi unalala, kami ukushinga kumutonesha!”

²⁸ Nohobene bamiluwe ba Mbaalu balombelele shikuma, kami balitabwele nibo bamwine na zimpoko na mikwale ngonehe shiheka shabo, hantu na mukeza hiukushabika.

²⁹ Bazaminine ku tatoka na kubwaya mwana nimwawo hantu naku mwana oho mutena watengulukakale, ngoboni kaliha kwezile kukumbula, hinge lizu kaliha lyayuvwanikileko.

³⁰ Niho Eliya ambile kubantu ngayi, “Henyenenu kuno kukwami,” pe nimwabo bakungulukile kukwendi. Watatikile kuwahisha kaala ka Nyambi ya Ngula eshe banyemwinine hanci.

³¹ Washimbile mamanya likumi na abili akwimanina mushobo na mushobo wa mishobo likumi na yibili ya bazukulya Yakobo, muntu ou apanikile Nyambi ya Ngula lizina lya Ishalela.

³² Na mamanya awa watendeshelewo kaala kakulemeshela Nyambi ya Ngula. Wakabile kankonkolonga kuzingwilishako, aka kakutwesha kwinzalishiwa na malita likumi na anaa a mema.

³³ Niho ayalile nkuni ha kaala, pe waketwezele nkunzi bituntula, niho abiyakile ha nkuni, pe wambile ngayi, “Yinzalishenu zintesho zinaa na mema na kuwayitila ha nkombela naha nkuni.”

³⁴ Oho bamanishile kutenda noho, wambile ngayi, “Bokelenuho kami kawubili.” Bamanishile kami, wambile ngayi, “Bokelenuho kami kawuhatu.” Niho batendele noho.

³⁵ Mema ahumpokelele hanci kuzinguluka kaala, kami enzalishile kankonkolonga.

³⁶ Ku shikati sha nkombela yaku mwana oho mutena watengulukakale, muluwe Eliya wahenyenene ku kaala na kulombela ngayi, “Obe Nyambi ya Ngula, Nyambi wa Abulahama na Ishaki na Yakobo, haya liholole kwinga Nyambi wa Ishalela, kami ami mukamulimo wobe natende ebye nimwabyo mu kulaya kwobe.

³⁷ Nkumbule, Obe Nyambi ya Ngula, nkumbule ngayi bantu aba mwanga balimuke ngayi kati Obe Nyambi ya Ngula, Obe Nyambi, kami ukubabwesha kukwobe obemwine.”

³⁸ Nyambi ya Ngula watumine mundilo, ou wahokeshele nkombela na nkuni na mamanya na kuyumisha limvu nkwaa na kuyumisha na mema mukankonkolonga.

³⁹ Oho bantu bamonene eshe baliyumbilile nibo bamwine hanci, pe bakalokele ngayi, “Nyambi ya Ngula niye Nyambi! Nyambi ya Ngula, ninkayendi niye Nyambi.”

⁴⁰ Eliya walayile ngayi, “Kwatenu bamiluwe ba Mbaalu! Hinga mulehaho bamo ngayi bapanze!” Babakwatile nimwabo, Eliya niho abatwalile ku Mushinzi wa Kishoni pe wakabazihile.

Kumana kwa Lyeya

⁴¹ Niho Eliya ambile kuli mwene Ahambu ngayi, “Haya yanga ukalye. Nayuvwu mvula ukwiza na ku shuma.”

⁴² Oho Ahambu ayile mu kulya, Eliya wakandamine hayilu ya lipili lya Kamela, wanyongamine na kukinka mutwe wendi mukati ka manungo.

⁴³ Wambile kuli mukamulimo wendi ngayi, “Yanga ukamone ku liwate.” Mukamulimo wayile na kupenza pe wabokele na kwamba ngayi, “Kowa shuma ninakamono.” Bikati mutanu na bibili Eliya wamutongwezelenga kuya na ku monangako.

⁴⁴ Shikati sha mutanu na kabili wabokele kami wambile ngayi, “Namono likumbi lyalishe, nilyo kaliha lyalinene shikuma kupitakana liboko lya muntu, likakumuka mu liwate.” Eliya walayile mukamulimo wendi ngayi, “Yanga kuli mwene Ahambu na kumutongweza ngayi akandame mu koloyi yendi na kuboka ku munzi kutina amushintikiza mvula.”

⁴⁵ Ha shikati tuhu shashishe liyilu lyafwikiwile na makumbi akushipa, niho mpepo yatatikile kupepoka, pe mvula wamunene watatikile kuloka. Ahambu wenginine mu koloyi yendi kami wabokele ku Yezilelu.

⁴⁶ Ngovu za Nyambi ya Ngula zezile hali Eliya, wancuncile bivwalo kuzingwilisha mu lukanda lwendi na kwitukila kumbili ya Ahambu, kuya nendi kukakuma naku Yezilelu.