1 Bamyene 17 - Libuka Lya Kuyela

Eliya na lyeya

¹ Haya kwekalile muluwe wa Nyambi watumbiwile Eliya, waku Tishimbe mu litunga lya Ngiliyande, wambile kuli mwene Ahambu ngayi, “Nili na kukutongweza mu lizina lya Nyambi ya Ngula, Nyambi wakuyoya wa Ishalela, Ou natendelanga milimo ngayi, kukaloka mvula kufwako hinge kuwa mume ku myaka yili kumbili, hantu kami nakamba ngayi aloke.”

² Niho Nyambi ya Ngula ambile kuli Eliya ngayi,

³ “Haya fuma ku mwanya uno pe uyenga kumbalila yaku mushamuko, ukaholame kwakwipi na kashinzi ka Keliti, ku mushamuko wa mushinzi wa Yondana.

⁴ Ukawananga mema akunwa mu kashinzi, pe nalaya makwangala ngayi akutwalilenga byakulya.”

⁵ Eliya wombatalile ndayano za Nyambi ya Ngula, kami wayile na kwikala ku kashinzi ka Keliti ku mushamuko wa Yondana.

⁶ Wanwinenga mema amu kashinzi, pe makwangala amutwalililenga mankende na nyama ku lumenemene na lumenemene naku mazolo na mazolo.

⁷ Kwapitile shikati shashishe, ndaba kwabulile mvula, niho kashinzi kayumine.

Eliya na mfwile mu Zelefwati

⁸ Nyambi ya Ngula wambile kuli Eliya ngayi,

⁹ “Haya yanga ku munzi wa Zelefwati, hahepi na Shindoni, pe ukekaleko. Nalaya mfwile ou wekalako ngayi akakulelenga.”

¹⁰ Nohobene Eliya wayile ku Zelefwati, oho akumine hahepi na lipangati lya munzi, wamonene mfwile hacaba nkuni. Wambile kukwendi ngayi, “Hekulu, ndeteleko mema akunwa.”

¹¹ Oho ayilenga mu kuwaleta, wabilikizile ngayi, “Undeteleko kami na kabunku ka linkende.”

¹² Uya mbuyama wakumbwile ngayi, “Nikulibeza muli Nyambi ya Ngula, Nyambi wakuyoya, ngayi nifwao mankende. Nili tuhu na muhunga wawushe wa liboko lya kwinzala uli mu lulonga na lyazi lya olive mu mushashi. Nezi kuno mu kucaba nkuni naboka ku munzi nikavube owe muhunga wawushe washalaho. Twawumanisha ku wulya na mwanami wa mulume pe hitukafwa ku nzala.”

¹³ Eliya wambile kukwendi ngayi, “Hinga ulikekula, yanga tuhu ukawahishe. Ngoboni ha kutatika kantendeleko kamupumpa kani kunebye ulinabyo na kuleta kuno kukwami, nihoboni uwahishe byobe na mwanobe.

¹⁴ Ndaba Nyambi ya Ngula, Nyambi wa Ishalela unamba ngayi, ‘Muhunga kukamana mu lulonga wufwako na mazi kukamana mu mushashi afwako hinge ntesho kukapupuka wufwako hantu ha mutena uyo Nyambi ya Ngula akatuma mvula.’”

¹⁵ Mfwile wayile na kutenda ngonehe amutongwezele Eliya, nimwabo bakonkaninenga byakulya ha mutena ha mutena.

¹⁶ Ngonehe Nyambi ya Ngula a kulupishile muluwe Eliya muhunga mu lulonga kaliha wapupukile na mazi mumushashi kaliha apupukile

¹⁷ Kwapitile shikati, pe mwana mfwile wakolele shikuma bene, kukumininako niho afwile.

¹⁸ Mbuyama wambile kuli Eliya ngayi, “Obe muntu wa Nyambi shumangani unantendele nehe? Kati weza kuno mu ku monesha wubi wami nakuziha mwanami?”

¹⁹ Eliya wambile ngayi, “Mpanike mwanobe.” Wafumishile kanuke mu maboko a mbuyama na kumutwala ku kampenci kakuyilu oku ekalilenga, Niho amulalikile ha wulili wendi.

²⁰ Niho alombelele na kubilikiza ngayi, “Obe Nyambi ya Ngula, Nyambi yami, shumangani unatendele shuma sha kukomokesha nehe kuli ou mfwile? Uli na shishemo shikuma sha kumfulankana, pe haya ukuzihila bishini mwanendi!”

²¹ Eliya walitandubwilile hali kanuke bikati bihatu na kulombela ngayi, “Obe Nyambi ya Ngula, Nyambi yami, bweshamo moyo wendi ou kanuke ayoye!”

²² Nyambi ya Ngula wakumbwile malombelo a Eliya, niho kanuke atatikile kwoya, wayoyele.

²³ Eliya wabweshele kanuke hanci kuli mandiyendi, niho ambile kukwendi ngayi, “Mona mwanobe wamumi!”

²⁴ Mbuyama wakumbwile ngayi, “Haya nikulimuka ngayi obe uli muntu wa Nyambi, kami ngayi mwa shikuma Nyambi ya Ngula wambanga mumwobe bya kupwisha!”