1 Bamyene 16 - Libuka Lya Kuyela

¹ Nyambi ya Ngula wambile kuli muluwe wendi, Yehu mwana Hanani wa mulume ngayi, “Yanga ukatongweze Mbaasha ngayi,

² ‘Nakukatwile mu lukungu, kukwingisha mukakutwaminina bantu bami Ishalela. Haya unabipishi ngonehe Yelombowami na kutwala bantu bami mu wubi. Wubi wabo unampilamishi,

³ pe haya nikatenda nobe Mbaasha na balupashi lwobe ngonehe natendele na Yelombowami.

⁴ Bantu nimwabo baku ba lupashi lwobe, aba bakafwila mu munzi bakaliwa ku batuwa, kami nimwendi wakufwila mu mbuwa ukaliwa ku makubi.”

⁵ Byuma nimwabyo biya atendele Mbaasha na biheka byendi nimwabyo bya kukanca, byatikitiwile mu Likota lya Bamyene bamu Ishalela.

⁶ Mbaasha wafwile pe wafundiwile mu Tilaza, ku bizino bya batizendi pe mwanendi Ela wamulume wamushwanine kwinga mwene.

⁷ Liya lizu lya kulwisha Mbaasha na ba lupashi lwendi ambile Nyambi ya Ngula muli muluwe Yehu mwana Hanani ndaba ya Kubipisha kwa Mbaasha kuli Nyambi ya Ngula. Wapilamishile Nyambi ya Ngula kaliha ngayi ndaba ya Kubipisha tuhu kuya abipishile ngonehe atendele mwene Yelombowami ngoboni ndaba wazihile ba lupashi lwa Yelombowami nimwabo.

Mwene Ela wamu Ishalela

⁸ Mu mwaka wa 26 wakulela kwa mwene Asha wamu Yunda, Ela mwana Mbaasha wa mulume wengile mwene wamu Ishalela, kami walelele mu Tilaza myaka yibili.

⁹ Zimili, umo ha babilolo bendi ou wengile mukulwane wa shitika sha makoloyi a mwene a nzita, wamubebele. Mutena umo mu lukena lwa Tilaza, mwene Ela wakolwele mu litala lya Aliza, ou wengile mukulwane wa musheke.

¹⁰ Zimili wenginine mu litala, pe wazihile Ela, niho amushwanine kwinga mwene. Eshi shamonekele mu mwaka wa 27 wakulela kwa mwene Asha wamu Yunda.

¹¹ Oho Zimili ukushwana tuhu kwinga mwene wazihile ba lupashi lwa Mbaasha nimwabo. Bawushinda wabo na bahoni bazihiwile.

¹² Kuya kunebye ambile Nyambi ya Ngula muli muluwe Yehu kuli Mbaasha, Zimili wazihile ba lupashi lwa Mbaasha nimwabo.

¹³ Ebye byatendiwile ndaba ya Kubipisha kwabo kwa kulemesha tunankishi, pe kami ndaba batwamininine Ishalela ku wubi. Mbaasha na mwanendi Ela wamulume bapilamishile Nyambi ya Ngula, Nyambi wa Ishalela.

¹⁴ Byuma byamina kami biya atendele Ela na biheka byendi nimwabyo, byatikitiwile mu Likota lya Bamyene ba Ishalela.

Mwene Zimili wamu Ishalela

¹⁵ Mu mwaka wa 27 wakulela kwa mwene Asha wamu Yunda, Zimili walele mu Tilaza ha Ishalela ku matena mutanu na abili. Baishalela bekalile na kuzinguluka munzi wa Ngimbetoni mu Fwilishitiya,

¹⁶ pe oho bayuvwile ngayi Zimili wayongwele na kuziha mwene Ela, niho kami bashimikilile mukulwane wabo wa nzita Omili mwene wamu Ishalela.

¹⁷ Omili na likunge lyendi lya nzita bafumine ku Ngimbetoni kami pe bayile mu kuzinguluka Tilaza.

¹⁸ Oho Zimili amonene ngayi lukena lunawu, wenginine mukati ka litala mu musheke, kami wahokeshele litala, wafwile ku milangi ya mundilo.

¹⁹ Eshi shamonekele ndaba ya wubi wendi kuli Nyambi ya Ngula. Ngonehe eshe atendelenga Yelombowami, Zimili wabulile kuwahilisha Nyambi ya Ngula, ndaba ya wubi wendi niyemwine hamo na kutwaminina bantu ba Ishalela mu wubi.

²⁰ Byuma byamina biya atendele Zimili na kufutulukila kwendi, byatikitiwile mu Likota lya Bamyene ba Ishalela.

Mwene Omili wamu Ishalela

²¹ Bantu ba Ishalela balitapile, bamo bashingile Timbani mwana Nginati ngayi enge mwene, kami bamina bemanininenga Omili.

²² Ku mamaninino, obo bemanininenga Omili batweshele. Timbini mwana Nginati wafwile pe Omili wamushwanine.

²³ Nohobene mu mwaka wa makumi ahatu na umo wakulela kwa mwene Asha wamu Yunda, Omili wengile mwene wamu Ishalela pe walele myaka likumi na yibili. Myaka ya kutatika mutanu na umo walelele mu Tilaza,

²⁴ kami niho alandile shinkanda sha Shamaliya 6,000 sha muwayawaya wa shiliva, ku mulume lizina lyendi Shema. Wazikile lukena kuyo na kuzikako shipata, kami walutumbile ngayi Shamaliya, kupindula lizina lya Shema mwine shiya shinkanda wakutatika.

²⁵ Omili wabipishilile Nyambi ya Ngula shikuma kupitakana bamyene aba ashwanine ha litanda nimwabo.

²⁶ Ngonehe abipishile Yelombowami mwana Nembati, Omili wapilamishile Nyambi ya Ngula, Nyambi wa Ishalela na wubi wendi niyemwine na ku shanwisha bantu mu wubi na kulemesha tunankishi.

²⁷ Byuma byamina biya atendele Omili na biheka byendi bya kukanca byatikitiwile mu Likota lya Bamyene ba Ishalela.

²⁸ Omili wafwile kami wafundiwile mu Shamaliya, kami mwanendi Ahambu wa mulume wamushwanine kwinga mwene.

Mwene Ahambu wamu Ishalela

²⁹ Mu mwaka wa 38 wakulela kwa mwene Asha wamu Yunda, Ahambu mwana Omili wengile mwene wamu Ishalela, pe walelele mu Shamaliya myaka 22.

³⁰ Ahambu mwana Omili wabipishilile Nyambi ya Ngula shikuma kupitakana bamyene aba ashwanine ha litanda.

³¹ Kaliha shengile sha kufwanina kukwendi Kubipisha ngonehe mwene Yelombowami mwana Nembati, niye wazaminine na kuyeka Yezembelo, mwana mwene Etambayala wamu Shindoni, kami walemeshelenga Mbaalu.

³² Wazikile litala lya Mbaalu mu Shamaliya, pe wamutendelele kaala na kushiyaka mu litala lya Mbaalu.

³³ Ahambu wemikile mpangwa wa shifwekesha sha kanankishi ka nyambi wa mbuyama Ashela. Watendele byabingi shikuma byapilamishile Nyambi ya Ngula, Nyambi wa Ishalela, kupitakana bamyene nimwabo bamu Ishalela aba ashwanine.

³⁴ Ku shikati sha kulela kwendi, Hiyela waku Mbetele watendulwile Yeliko, ngonehe Nyambi ya Ngula atongwezele Yoshuwa mwana Nune. Hiyela wafwishile mwanendi wa mweli Ambilamu oho akabilenga mwimbi wa lukena lwa Yeliko, pe kami wafwishile mwanendi wa mulume wa kanuke Shenguba oho atendelenga mapangati.