1 Bamyene 15 - Libuka Lya Kuyela

Mwene Ambiya wamu Yunda

¹ Mu mwaka wawulikumi na mutanu na yihatu wakulela kwa mwene Yelombowami mwana Nembati mwene wamu Ishalela, Ambiya wengile mwene wamu Yunda,

² walelele myaka yihatu mu Yelushalema. Mandiyendi wengile Maaka, mwana Ambishalome.

³ Watendele wowo wubi umo atendele tatiyendi pe kaliha wengilenga wakulunga kuli Nyambi ya Ngula, Nyambi yendi, ngonehe eshe ekalilenga tatiyendi Ndavita.

⁴ Ngoboni ndaba ya hali Ndavita, Nyambi ya Ngula, Nyambi yendi, wamupanine lambi ya kumunika mu Yelushalema ha ku shwanishaho mwanendi wamulume kulela kunyima yendi mu kulama shiwahe Yelushalema.

⁵ Ndaba Ndavita watendele ebye byawahilishile Nyambi ya Ngula, kami walamine ndayano zendi mu matena nimwawo akuyoya kwendi, ndele tuhu mu shambo sha Uliya wa Kahita.

⁶ Lehombowami na Yelombowami bekalile na kulilwisha bikati nimwabyo umo na wamina mu shikati sha kulela kwa Ambiya.

⁷ Byuma nimwabyo kami biya atendele Ambiya byatikitiwile mu Likota lya bamyene bamu Yunda. Kwekalile nzita mukati ka Ambiya na Yelombowami.

⁸ Ambiya wafwile kami wafundiwile mu lukena lwa Ndavita pe mwanendi wa mulume Asha wamushwanine kwinga mwene.

Mwene Asha wamu Yunda

⁹ Mu mwaka wa makumi abili wakulela kwa mwene Yelombowami wamu Ishalela, Asha engile mwene wamu Yunda,

¹⁰ kami walelele myaka 41 mu Yelushalema. Nkakayendi wengile Maaka mwana Ambishalome wa mbuyama.

¹¹ Asha watendele ebye byawahilishile Nyambi ya Ngula ngonehe atendelenga nkakayendi Ndavita

¹² Watandile balume na bambuyama nimwabo balwiholwiho mu litunga aba batendelenga kaloombe ku myanya nimwayo ya kulemeshela banyambi bowa, pe wafumishile tunankishi nimwato otu babumbile batatizendi.

¹³ Wafumishile nkakayendi Maaka ha litanda lya kwinga manda mwene, ndaba watendele kanankishi ka wunyengwe ka nyambi wa mbuyama Ashela. Asha wawishile kanankishi ka mandiyendi na kukahokeshela kwakwipi na mukulo wa Kindiloni.

¹⁴ Hinge ndi Asha wabulile kulobesha myanya ya kulemeshela banyambi bowa, niye washumine kwinga wakwoloka kuli Nyambi ya Ngula mu kuyoya kwendi nimwako.

¹⁵ Wayakile bingwalingwali nimwabyo mu Litala lya Nyambi biya afungwilile tatiyendi kuli Nyambi, hamo na bingwalingwali bya ngolinde na shiliva ebye afungwilile niyemwine.

¹⁶ Mwene Asha wamu Yunda na Mwene Mbaasha wamu Ishalela bekalile munzita shikati nimwasho osho bekalile ha wene.

¹⁷ Mbaasha wakatukilile mutakwe Yunda, pe wazikile munzi wa Lama na kuwu shumisha na shipata ngayi mwanga alushinkile na kukanisha bantu mu zinzila za kuya mukati nanaba ba kututika ha munkanda wa Yunda.

¹⁸ Nohobene mwene Asha washimbile shiliva nimwayo na ngolinde mu bikongelo bya mu Litala lya Nyambi namu musheke, pe wawutumine na lizu elye ku Ndamashika na babilolo bendi bamo, kuli mwene Mbeni Handandi waku Shiliya, mwana Tambulimoni wa mulume na muzukulya Heziyoni ngayi,

¹⁹ “Toko, twinge shikonzi ngonehe bengilenga batatizetu. Eye shiliva na ngolinde binengi bishemo kukwobe. Haya manisha shikonzi shobe na mwene Mbaasha wamu Ishalela, ngayi mwanga afumishe makunge a nzita yendi mu litunga lyami.”

²⁰ Mwene Mbenihandandi wetabilile ku shihanganiko sha Asha, pe watumine bakulwane bendi banzita hamo na bakanzita babo mu kulwisha minzi ya Ishalela. Bapukwile Yiyoni na Ndani na Abele Mbeti Maaka, minzi yazingulukile liziba lya Ngalileya, kunkumo ya litunga nimwalyo lya Nafwitali.

²¹ Oho Mwene Mbaasha ayuvwile ebye byamonekele, walehele kushumisha munzi wa Lama pe bayile ku Tilaza.

²² Niho mwene Asha alayelele bantu nimwabo bamu Yunda, kwabulile muntu walikandikile na kuyavwa kufumisha mamanya na maleenge ku Lama biya atendeshelenga Mbaasha bipata. Nanebye byuma Asha atendeshele bipata bya Mizipa na Ngemba eye yengile minzi yamu litunga lya Mbenjamani.

²³ Byuma nimwabyo biya atendele mwene Asha na biheka byendi bya kukanca na minzi eye atendele twimbi, nimwabyo byatikitiwile mu likota lya Bamyene bamu Yunda. Ngoboni ha myaka ya wukulwane wendi wulweli wa mawulu wamupengeshele.

²⁴ Asha wafwile pe wafundiwile ku bizino bya wene mu Lukena lwa Ndavita, pe mwanendi wa mulume Yehoshafwati wamushwanine kwinga mwene.

Mwene Nandambu wamu Ishalela

²⁵ Mu mwaka wawubili wakulela kwa mwene Asha wamu Yunda, Nandambu mwana Yelombowami wengile mwene wamu Ishalela, pe walelele tuhu myaka yibili.

²⁶ Wabipishile kuli Nyambi ya Ngula, watwalile bantu ba Ishalela mu wubi ngonehe tatiyendi.

²⁷ Mbaasha mwana Ahiya, waku mushobo wa Ishaka, wabebele Nandambu na kumuziha oho Nandambi na bakanzita bendi bazingulukile lukena lwa Ngimbetoni mu Fwilishitiya.

²⁸ Eshe shamonekele ha shikati sha mwaka wawuhatu wakulela kwa mwene Asha wamu Yunda. Mbaasha washwanine Nandambu kwinga mwene wamu Ishalela oho amanishile kumuziha.

²⁹ Hashikati oshobene wabalikile kuziha bantu nimwabo ba lupashi lwa Yelombowami, kwabulile hinga wumo wakushalako kwezekesha ngonehe shiya ambile Nyambi ya Ngula kupitila muli mukamulimo wendi muluwe Ahiya waku Shilo.

³⁰ Eshi shamonekele ndaba Yelombowami wapilamishile Nyambi ya Ngula, Nyambi wa Ishalela, ha wubi ou atendelenga kami waleteshele bantu ba Ishalela kutenda wubi.

³¹ Byuma byamina ebye atendele Nandambu byatikitiwile mu Likota lya bamyene bamu Ishalela.

³² Mwene Asha wamu Yunda na mwene Mbaasha wamu Ishalela balilwishile umo na wamina shikati nimwasho aha bekalile ha wene.

Mwene Mbaasha wamu Ishalela

³³ Mu mwaka wawuhatu wakulela kwa mwene Asha wamu Yunda, Mbaasha mwana Ahiya wa mulume wengile mwene wamu Ishalela nimwamo, kami walelele mu Tilaza myaka 24.

³⁴ Wabipishile kuli Nyambi ya Ngula ndaba watwalile Ishalela mu wubi ngonehe mwene Yelombowami ou wekalileho ha kutatika.