1 Bamyene 14 - Libuka Lya Kuyela

Lufu lwa mwana Yelombowami wa mulume

¹ Ku shikati shiyo Ambiya mwana mwene Yelombowami watatikile kukola.

² Yelombowami wambile kuli mukazendi ngayi, “Lifutule ngayi mwanga kubule muntu wakukulimuka, pe uye ku shilo, oku kwekala muluwe Ahiya, ou wambile ngayi nikenga mwene wamu Ishalela.

³ Mutwalile mipumpa ya mankende likumi na mapapi amo amatobe na nkashi ya wushi. Ukamwipule ngayi bishini bikamoneka kuli mwanetu, pe ukakutongweza.”

⁴ Nohobene mukaza Yelombowami wayile ku munzi wa Ahiya mu Shilo. Ha kuwana ngayi Ahiya wengile hikakulukazi, pe kaliha watweshele ku mona.

⁵ Nyambi ya Ngula wamutongwezele ngayi, “Mukaza Yelombowami uli na kwiza mukwipula bya hali mwanendi ou uli na kukola.” Nyambi ya Ngula watongwezele Ahiya sha kwamba. Oho mukaza Yelombowami akumine, walifutwile kwinga ngo muntu washenge.

⁶ Ahiya wamuyuvwile heza mushipana wambile ngayi, “Ingina. Nalimuku ngayi uli mukaza Yelombowami. Shumangani ukulifwekeshela ngo muntu washenge? Nili na mbuzi yayibi kukwobe

⁷ Yanga ukatongweze Yelombowami ngayi, Nyambi ya Ngula, Nyambi wa Ishalela, ukwamba kukwendi ngayi, ‘Nakuhatile hakati ka bantu na kukwinga ntwamina ha bantu bami ba Ishalela.

⁸ Nayangwile wene ku bazukulya Ndavita, pe nawupanine kukwobe. Ngoboni obe kutenda ngonehe mukamulimo wami Ndavita wufwako, ou wengile wakulunga shikuma kukwami, wombatalile ku ndayano zami, kami watendelenga tuhu ebye namutongwezelenga.

⁹ Unatende wubi wawunene shikuma kupitakana aba balelelenga ha kutatika oho obe shilolo. Unankana, kami unampilamishi ha kulitendela banyambi bashenge na bifwekesha bya ngolinde na kubilemesha.

¹⁰ Ndaba ya neshe nikaleta makando ha bana bobe nakuziha bazukulyobe babalume, babakata na ba kukula. Nikamanisha balupashi lwobe, bakakombiwa ngo wutoko wa batuyamana.

¹¹ Bantu nimwabo ba ku lupashi lwobe aba bakafwila mu munzi bakaliwa ku batuwa, kami nimwabo aba bakafwila mu mbuwa bakaliwa ku tuyoni. Osho nisho ninamba Ami Nyambi ya Ngula.’”

¹² Kami Ahiya wambilenga na mukaza Yelombowami ngayi, “Haya boka ku lukena. Oho ukengina tuhu mu lukena pe mwanobe ukafwa.

¹³ Bantu nimwabo ba Ishalela bakamulila na kumufunda. Niye ukenga tuhu mwana ku ba lupashi lwa Yelombowami ukafundiwa shiwahe, ndaba niye tuhu umo ou Nyambi ya Ngula, Nyambi wa Ishalela, anawahilili.

¹⁴ Nyambi ya Ngula ukayaka mwene ha Ishalela ou ukamanisha bazukulya Yelombowami. Haya eshi shilinakutendewa.

¹⁵ Nyambi ya Ngula ukashushula Ishalela, kami ukanyenkana ngonehe litete likunyenkana mu mushinzi. Ukazula bantu ba Ishalela mu litunga lino lyaliwahe elye apanine ku bankakazabo, kami ukabapanzanishila mu nciza ya mushinzi wa Yufuleta, ndaba banamupilamishi ha kubaza tunankishi twa nyambi wa mbuyama Ashela.

¹⁶ Nyambi ya Ngula ukafutamina Ishalela ndaba Yelombowami unatende wubi na kutwaminina bantu ba Ishalela mu wubi.”

¹⁷ Mukaza Yelombowami wabokele ku Tilaza. Ohobene ukwingina mu musheke, pe kanuke wafwile.

¹⁸ Bantu ba Ishalela bamulilile na kumufunda, ngonehe ambile Nyambi ya Ngula muli mukamulimo wendi, muluwe Ahiya.

Lufu lwa Yelombowami

¹⁹ Byuma byamina nimwabyo biya atendele mwene Yelombowami na zinzita ziya alwile naneshe atwaminininenga nimwabyo, ebye byatikitiwile mu likota lya bamyene bamu Ishalela.

²⁰ Yelombowami walelele myaka makumi abili na myaka yibili. Wafwile pe wafundiwile, mwanendi wa mulume Nandambu wamushwanine kwinga mwene.

Mwene Lehombowami wamu Yunda

²¹ Mwana Sholomoni Lehombowami wa mulume wekalile na myaka 41 oho engile mwene wamu Yunda, kami walelele myaka 17 mu Yelushalema, lukena olu ahatile Nyambi ya Ngula, mukati ka litunga lya Ishalela omu ayakile lizina lyendi kwinga mwanya oku akalemeshiwilanga. Manda Lehombowami wengile Naama wa Kaamoni.

²² Bantu bamu Yunda batendele wubi kuli Nyambi ya Ngula kami babipishile na kumupilamisha kupitakana eshe batendele bankakazabo.

²³ Balizikilile myanya yakulemeshela banyambi bowa na kwimika zimpangwa za mamanya na mishubwa ya bifwekesha bya nyambi wa mbuyama Ashela bya kulemeshela hayilu ya binkanda na mu nceto ya mibombola ya mitondo.

²⁴ Shabipileko shikuma, kwekalile balume na bambuyama mu litunga aba balwiholwiho na kutenda kaloombe ku noyo myanya ya kulemeshela banyambi bowa. Bantu bamu litunga lya Yunda bonzelelenga kutenda byuma bya wunyengwe shikuma ebye batendelenga bantu aba atandile Nyambi ya Ngula mu litunga oho Baishalela bayilenga na kulikaka.

²⁵ Mu mwaka wa mutanu wakulela kwa Lehombowami, mwene Shishaki wamu Engepita walwishile Yelushalema.

²⁶ Washimbile wuheti nimwawo wamu Litala lya Nyambi ya Ngula na wamu Mfuma yamu Musheke, kuyakako na makebo a ngolinde awa atendele Sholomoni.

²⁷ Ha kuwahingishamo, mwene Lehombowami wafulile makebo a lubemba na kuwayaka mu ngovu za bakakulama ku mapangati aku musheke.

²⁸ Shikati nimwasho mwene ayilenga ku Litala lya Nyambi bakakulama bashimbilenga makebo, nihoboni bawabweshe mu kampenci kakulamina.

²⁹ Byuma byamina nimwabyo kami biya atendelenga mwene Lehombowami byatikitiwile mu libuka lya likota lya bamyene bamu Yunda.

³⁰ Ha shikati nimwasho eshe Lehombowami na Yelombowami bazamininenga kulwa nzita umo na wamina.

³¹ Lehombowami wafwile, pe wafundiwile mu bizino bya wene mu Lukena lwa Ndavita. Mandiyendi wengile Naama wa Kaamoni. Mwanendi wa mulume Ambiya wamushwanine kwinga mwene.