1 Bamyene 13 - Libuka Lya Kuyela

¹ Mutena wamina, ha kulayelela kwa Nyambi ya Ngula, muluwe wa Nyambi waku Yunda wayile ku Mbetele. Yelombowami hinga emana ku kaala na kushinga kukombelela hohobene muluwe wa Nyambi wakumine.

² Mukukonka lizu lya Nyambi ya Ngula, muluwe wabilikizile ku kaala ngayi, “Obe kaala! Tawee obe kaala! Eshe nisho akwamba Nyambi ya Ngula ngayi, ‘Kukahemuwa kanuke wa mulume ku ba lupashi lwa Ndavita, lizina lyendi ngayi Yoshiya. Ukeza mu kukombelela bakankombela hahobe aba ba kutenda ku myanya ya kuzila yakulemeshela banyambi bowa, pe ukahokeshela bifupa bya bantu hahobe.’ ”

³ Wambile ngayi, “Nyambi ya Ngula unakulupishi kupana shilimukisho eshe. Aka kaala kakanyemuka na mutoko wako wukapanzanishiwa. Niho ukalimuke ngayi Nyambi ya Ngula unambilinga mumwami.”

⁴ Oho Mwene Yelombowami ayuvwile eshe kuli muntu wa Nyambi, wamwinikile na kubatongweza ngayi, “Kwatenu uya muntu!” Hohobene liboko lya mwene lyayumininine, kami kaliha watweshele kulivunga.

⁵ Hohobene kaala katabukile hakati, pe mutoko wafukumukilile hanci, ngonehe muntu wa Nyambi alubulwile mu lizina lya Nyambi ya Ngula.

⁶ Niho mwene Yelombowami ambile kuli muntu wa Nyambi ngayi, “Hekulu, ndombelele kuli Nyambi ya Ngula, Nyambi yobe, kami umunyepe apoleshe liboko lyami!” Nohobene muluwe walombelele kuli Nyambi ya Ngula, pe liboko lya mwene lyapolele.

⁷ Niho mwene ambile kuli muntu wa Nyambi ngayi, “Tuyenga nimwetu ku musheke ukalye byakulya. Nikakupanika ncuungu kunebye unatende.”

⁸ Muntu wa Nyambi wakumbwile mwene ngayi, “Hinge ndi ukampana shitika sha wuheti wobe, kuya na nobe nifwako, hinge kulya byakulya hinge kunwa mema mumwanya uno nifwako.

⁹ Nyambi ya Ngula unandaya ngayi, ‘Hinga ulya hinga kunwa mema, kami hinga uboka ku munzi na nzila eye unezi.’ ”

¹⁰ Nohobene kaliha wabokele mu nzila eye ezile, ngoboni wabokele na nzila yashenge ya ku Mbetele.

Muluwe wa kakulukazi waku Mbetele

¹¹ Ha shikati shiyo kwekalile muluwe wa kakulukazi, wekalilenga ku Mbetele. Bana bendi babalume bezile na kumutongweza hali muntu wa Nyambi waku Yunda nanebye atendele mu Mbetele ha mutena uyo, kami nanebye ambile kuli mwene Yelombowami.

¹² Muluwe wa kakulukazi wabepwile ngayi, “Wapita nzila ngani muntu wa Nyambi oho ayanga?” Niho bamutongwezele nzila,

¹³ pe wabatongwezele kuyaka nyangwa ha mbongolo wendi. Batendele noho, pe wakandamineho na kuya,

¹⁴ na kukonka muntu wa Nyambi waku Yunda. Wamuwanine hinga ekala mu nceto ya mutondo wa Oka. Wamwipwile ngayi, “Obe muntu wa Nyambi waku Yunda ndi?” Muntu wa Nyambi wakumbwile ngayi, “Amibene.”

¹⁵ Muluwe wa kakulukazi wakumbwile ngayi, “Tuyenga ku munzi, tukalye hamo.”

¹⁶ Ngoboni muluwe waku Yunda wakumbwile ngayi, “Ami nifwako kuya nobe hinge kutambula liyumbu lyobe nifwako. Kami nakana kulya hinge kunwa shuma shimo hamo na nobe kuno,

¹⁷ ndaba Nyambi ya Ngula unankanishi ngayi, ‘Hinga nilya hinge kunwa shuma shimo, kami hinga nikaboka ku munzi mu nzila eye nezile nayo.’”

¹⁸ Muluwe wa kakulukazi waku mbetele wambile kukwendi ngayi, “Ami kami nili muluwe nehe obe, Nyambi ya Ngula natumu lizu na lingeloyi unantongweze ngayi niye nobe ku munzi, ukalye byakulya na kunwa mema.” Ngoboni muluwe wa kakulukazi wongezele.

¹⁹ Nohobene muntu wa Nyambi waku Yunda wabokele ku munzi na muluwe wa kakulukazi, pe wakalile nendi byakulya na kunwa.

²⁰ Oho bekalile ku Tebulu lizu lya Nyambi ya Ngula lyezile kuli muluwe wa kakulukazi,

²¹ kami wakalokele kuli muntu wa Nyambi waku Yunda ngayi, “Nyambi ya Ngula ukwamba ngayi, ‘Ndaba wabula kumwombatala kami kaliha watenda ebye akulayile,

²² ngoboni unaboko na kulya na kunwa ku mwanya oku akukanishile ngayi hinga ukalya hinge kunwa, ukazihiwa pe lutu lwobe kukafundiwa mu shinzimbi sha balupashi lwobe lufwako.’”

²³ Oho bamanishile kulya na kunwa, muluwe wa kakulukazi watwikile nyangwa ha mbongolo wa muntu wa Nyambi waku Yunda.

²⁴ Pe wakandamine na kuya. Ha nzila shimbwi wamukwatile, pe wamuzihile. Lutu lwendi lwalalile ha nzila. Mbongolo na shimbwi bemanine kunkumo yalwo.

²⁵ Bantu bamo bapitilengako bamonene mutuntu ha nzila na shimbwi hinga emanina kwakwipi. Niho bayile ku Mbetele oku kwelilenga muluwe mu ku shimika ebye bamonene.

²⁶ Oho muluwe wa kakulukazi ayuvwileko wambile ngayi, “Niye uya muntu wa Nyambi wabulile kwombatala lizu lya Nyambi ya Ngula! Nohobene haya Nyambi ya Ngula watuma shimbwi kumulwisha na kumuziha, ngonehe ambile Nyambi ya Ngula ngayi ukashitenda.”

²⁷ Niho ambile ku bana bendi babalume ngayi, “Nyakilenu nyangwa ha mbongolo wami.” Pe batendele noho,

²⁸ pe wakandamineho na kuya, niho akawanine mutuntu wa mulume hinga ambaluka ha nzila, hamo na mbongolo na shimbwi hinga bemana kwakwipi nawo. Shimbwi kaliha walile mutuntu hinge tuhu kulwisha mbongolo.

²⁹ Muluwe wa kakulukazi wakatwile mutuntu wa muntu wa Nyambi na kuwu yaka ha mbongolo na kuwu bwesha ku Mbetele mu kumulila na kumufunda.

³⁰ Muluwe wa kakulukazi wamufundile ku shinzimbi sha balupashi lwendi, kami niye na bana bendi bamulilile hibamba ngayi, “Mukonzo wami tawee! Mukonzo wami tawee!”

³¹ Ha kumanisha kufunda muntu wa Nyambi waku Yunda, muluwe wa kakulukazi wambile ku bana bendi ngayi, “Oho nikafwa mukamfunde mu shinzimbi shino, mukalangike mutuntu wami kukwendi.

³² Ndaba mazu awa ambile Nyambi ya Ngula akubilikiza ku kaala mu Mbetele naku myanya ya kuzila yakulemeshela banyambi bowa yaku mishinzi yamu Shamaliya mwa shikuma bene akenga akupwisha.”

Yelombowami ushili kutwalaho kutenda wubi

³³ Mwene Yelombowami wamu Ishalela kaliha watengulukile ku zinzila zendi zazibi, ngoboni wazaminine kuhata bakankombela baku ba lupashi bowa ngayi batende ku tuula otu azikile ku myanya ya kuzila. Wemikile muntu nimwendi ou washingile kwinga mukankombela.

³⁴ Owe wubi wa Yelombowami waletele kuloba hahendi naku lupashi lwendi.