1 Bamyene 12 - Libuka Lya Kuyela

Mishobo ya Ishalela yaku ncelele yikulifutulukila na kulitapa

¹ Lehombowami wayile ku Shekemu, oku kwakungulukilile bantu ba mishobo likumi ya Ishalela nimwabo mu kumwinga mwene.

² Yelombowami mwana Nembati, ou wapanzilile ku Engepita kutina mwene Sholomoni, oho atambwile mbuzi ya kufwa kwa Sholomoni wabokele ku munzi.

³ Pe mishobo ya bantu ba ku ncelele bamwihanine, bayile hamo kuli Lehombowami niho bambile kukwendi ngayi,

⁴ “Tatiyobe watutwikile miziho yayilemu. Shinga ndi ukutwikalika shiwahe, tukenga bantu bobe bakulunga.”

⁵ Lehombowami wakumbwile ngayi, “Mukaboke kwapita matena ahatu, pe nika kumbula.” Nohobene bantu bayile.

⁶ Mwene Lehombowami wepwile bakulwane babalume aba bengile bankongo batatiyendi Sholomoni. Wabepwile ngayi, “Mbelenu mwakukumbwila aba bantu. Kati nikaba kumbula nahiti?”

⁷ Bakumbwile ngayi, “Ndi ukushinga kutendela aba bantu shiwahe, pe ukambole nabo mazu amawahe ha kukumbula mayipu abo, pe bakakutendela milimo shikati nimwasho.”

⁸ Ngoboni Lehombowami walimbwilile kubela kwa bakulwane, pe wayile ku bandumbana, aba akulilenga nabo hamo, haya nibo bengile bakakumubela.

⁹ Wabepwile ngayi, “Kati mu kumbela ngayi nitende bishini? Kati nikamba nahiti ku bantu aba ba kunyepa ngayi nibahehukishile ku miziho yabo?”

¹⁰ Bandumbana bakumbwile ngayi, “Ebye nibyo twahanganiki wambe kukwabo ngayi, ‘Kankunte kami kakanene kupitakana lukanda lwa tate.

¹¹ Tate wamitwikilenga miziho yayilemu shikuma, amiboni nikayakilako wulemu shikuma. Bamikaminenga na lunyanzi, amiboni nikamizipola na mpafwa ya mihongela.’ ”

¹² Oho kwapitile matena ahatu, Yelombowami na bantu nimwabo babokele kuli mwene Lehombowami ngonehe abatongwezele.

¹³ Mwene walimbwilile kubela kwa bakulwane, pe wambile na wukali ku bantu,

¹⁴ nehe shiya bamubelele bandumbana. Wambile ngayi, “Tate wamitwikilenga miziho yayilemu shikuma, amiboni nikayakilako wulemu shikuma. Bamikaminenga na lunyanzi, amiboni nikamizipolanga na mpafwa ya mihongela.”

¹⁵ Shengile shifungo sha Nyambi ya Ngula, ha kuholola eshe ambile kuli Yelombowami mwana Nembati muli muluwe Ahiya waku shilo. Eshe nisho shuma shiya mwene abulile kuyuvwilila ku bantu.

¹⁶ Oho bantu bamonene ngayi mwene kubayuvwa ufwako, babilikizile ngayi, “Tulehenu, Ndavita hamo na ba lupashi lwendi! Hinga atanga watutendela bishini? Enu bantu ba Ishalela, tokonoko tuyenunga ku minzi yetu! Tulehenu Lehombowami alimonene niyemwine!” Nohobene bantu ba Ishalela bamufutulukilile,

¹⁷ bashiyile Lehombowami kwinga mwene ha bantu aba bekalilenga mu litunga lya Yunda.

¹⁸ Niho mwene Lehombowami atumine Andonilama, ou wengile mukakwendesha mulimo wa likungubule, ku Baishalela, ngoboni bamuzihile na mamanya. Oho amonene eshe Lehombowami wanyankupile kukandama mu koloyi yendi, pe washililile ku Yelushalema.

¹⁹ Ku balika ha shikati shiyo, bantu ba wene wa Ishalela waku ncelele, bengile bakakufutulukila na kulwisha muhoko wa wene wa Ndavita.

²⁰ Oho bantu ba Ishalela nimwabo bayuvwile ngayi Yelombowami unaboko ku Engepita, bamwihanine ku shikungulukilo sha bantu na kumwinga mwene wa Ishalela. Ndele tuhu ba ku mushobo wa Yunda nibo bashalileho kwinga bakulunga ku bazukulya Ndavita.

Mazu a muluwe wa nyambi Shemaya

²¹ Oho Lehombowami mwana Sholomoni akumine mu Yelushalema, walobele hamo bakanzita 180,000 ba kulwa shiwahe ba ku mishobo ya Yunda na Mbenjamani. Washingile kuya ku nzita mu kubwesha ngovu zendi za kulela ha mishobo ya Ishalela yaku ncelele.

²² Ngoboni Nyambi watongwezele muluwe Shemaya,

²³ ngayi atwale lizu kuli Lehombowami mwana Sholomoni mwene waku Yunda naku bantu nimwabo ba mishobo ya Yunda na Mbenjamani ngayi,

²⁴ “Hinga mukalwisha bawushindawenu, bantu ba Ishalela. Nimwenu bokenu ku minzi yenu. Eshe shinamoneke shinengi shifungo shami.” Nimwabo bombatalile mazu a Nyambi ya Ngula, pe babokele ku minzi yabo.

Yelombowami ukufutulukila Nyambi ya Ngula

²⁵ Mwene Yelombowami wa Ishalela watendulwile lukena lwa Shekemu mu litunga lya binkanda lya Efulemu pe wekalileko kashikati. Niho ayile kami akatendele lukena lwa Penuwele.

²⁶ Walyambishile niyemwine ngayi, “Haya wene wukuboka ku mukoka wa Ndavita,

²⁷ ndi aba bantu bakuya mu kukombelela zinkombela mu Litala lya Nyambi ya Ngula ku Yelushalema, bakanungulukila kuli mwene Lehombowami wamu Yunda na kunziha.”

²⁸ Yelombowami, oho amanishile kuhanganikaho, wabumbile bankunzi babili ba ngolinde, pe wambile ku bantu bendi ngayi, “Enu munayinga ku Yelushalema shikati shashinene mu kulemesha. Enu bantu ba Ishalela, bano haya nibo banyambi benu, aba bamifumishile mu Engepita!”

²⁹ Wayakileho umo ku bankunzi ba ngolinde mu Mbetele na wamina mu Ndani.

³⁰ Pe haya bantu babipishile ha ku yanga na kulemesha ku Mbetele naku Ndani.

³¹ Yelombowami kami watendele myanya ya kuzila ya kulemeshela, pe wahatile bakankombela ba ku lupashi aba babulile kwinga ba mushobo wa Levi.

³² Yelombowami kami wapingile shimbo sha wunyambi ha mutena wa 15 wa ngonda wa mutanu na zihatu, ngonehe shimbo shatendiwanga mu Yunda. Wakombelelele zinkombela ku bankunzi ba ngolinde aba abumbile, ha kaala ku Mbetele. Wemikile bakankombela ku Mbetele bakakutenda ku myanya ya kuzila ya kulemeshela banyambi bowa eye azikile.

³³ Kami ha mutena wawulikumi na mutanu wa ngonda wa mutanu na zihatu, ku mutena uya emikile niyemwine, wayile ku Mbetele na kukombelela nkombela ha kaala. Wawahishilile bantu mayambwayambwa ha shimbo shiya apingilile bantu ba Ishalela.