1 Bamyene 11 - Libuka Lya Kuyela

Sholomoni ukufutulukila Nyambi

¹ Mwene Sholomoni wahakile bambuyama ba mapukwenda. Kuyakako hamo na mwana mwene wa Fwalo wa mbuyama, wayekele bambuyama ba Bahita na bambuyama ba ku Mowambi na Amoni na Endoma na Shindoni.

² Wabayekele hinge ndi Nyambi ya Ngula walayile Baishalela ngayi hinga bakiluka kuliyekela na bantu aba, ndaba bakapukalisha Baishalela na ku haka banyambi bashenge.

³ Sholomoni wayekele bana ba bamyene myanda mutanu na yibili, kami wekalile na bambuyama bakwinginina myanda yihatu, pe bamushanwishile kuli Nyambi.

⁴ Oho Sholomoni engile kakulukazi, bakazendi bamushanwishile na kulemesha banyambi bashenge. Kaliha wengile wakulunga kuli Nyambi ya Ngula, Nyambi yendi, ngonehe ekalilenga tatiyendi Ndavita.

⁵ Walemeshelenga Ashitaloti nyambi wa mbuyama waku Shindoni na nyambi wa wunyengwe Moleki wa Baamoni.

⁶ Mwene Sholomoni wabipishile kuli Nyambi ya Ngula, kami kaliha wengile wakulunga kukwendi ngonehe ekalilenga tatiyendi Ndavita.

⁷ Ha shinkanda ku mushamuko wa Yelushalema watendeleleho mwanya wakulemeshela banyambi ba wunyengwe Kemoshi wa Bamowambi na Moleki wa Baamoni.

⁸ Watendeleleho kami myanya ya kulemeshela, oku bakazendi ba mapukwenda nimwabo batweshele kuhokeshela mitondo ya kutwa ya livumba lyaliwahe na kukombelela zinkombela ku banyambi babo.

⁹ Hinge ndi Nyambi ya Ngula, Nyambi wa Ishalela waliholwele kabili kuli Sholomoni,

¹⁰ na kumulaya ngayi hinga alemeshanga banyambi bashenge, ngoboni Sholomoni kaliha wombatalile Nyambi ya Ngula, washanukile kukwendi. Niho Nyambi ya Ngula apilaminine Sholomoni,

¹¹ pe wambile kukwendi ngayi, “Ndaba unafungusho na kukiluka kulimama kwobe na nami kami walimbwilile ndayano zami, nikulibeza ngayi nikayangula wene kukwobe na kuwu panika ku umo ha babilolo bobe.

¹² Hinge kwingi noho ndaba ya tatiyobe Ndavita kukatenda eshe ha shikati sha wumi wobe nifwako, ngoboni ndele ha shikati sha kulela kwa mwanobe wa mulume.

¹³ Kami kukamuyangula wene nimwawo nifwako, ngoboni nikamushiyila mushobo umo, ndaba ya Ndavita mukamulimo wami naha Yelushalema lukena nalitendelele amimwine.”

Bamalamo ba Sholomoni

¹⁴ Nohobene Nyambi ya Ngula watumizile Handandi waku ba lupashi lwa wene wa Endoma mu kulwisha Sholomoni.

¹⁵ Oho eshe shilolo shitendiwe, oho Ndavita akomene Endoma, Yowambu mukulwane wa bakanzita bendi wayileko mu kufunda mituntu ya bafu.

¹⁶ Yowambu na Baishalela nimwabo bekalile mu Endoma zingonda mutanu na yimo, pe ha shikati eshe bazihile balume nimwabo bamu Endoma,

¹⁷ ndele tuhu Handandi na bakamilimo bamo batatiyendi ba Baendoma, aba bashililile ku Engepita. Ha shikati shiyo Handandi oho ushili tuhu kanuke.

¹⁸ Bafumine mu Mindiyani, bayile ku Palani oku bakaliwanine na bantu bamina. Niho bayile hamo ku Engepita, pe bayile kuli mwene, ou wapanikile Handandi mfuba na litala na kumupana byakulya.

¹⁹ Mwene wawahililile shikuma na Handandi, mwene wamupanikile mulamu wendi, mukonzo wa lihano Tahipeneshi ngayi amuyeke.

²⁰ Wabelekele nendi mwana wa mulume, wamutumbile lizina lya Ngenubati, ou alele lihano mu musheke, oku ekalilenga na bana ba mwene babalume.

²¹ Oho mbuzi yawanine Handandi mu Engepita ngayi Ndavita wakufwa, kami ngayi Yowambu mukulwane wa bakanzita, Handandi wambile kuli mwene ngayi, “Ndehe niboke ku litunga lyami.”

²² Mwene wepwile ngayi, “Kati shumangani? Kati na kwanga kukupanika shuma shimo ndi? Kati nisho shuma shiya ukushingila ku bokela ku munzi ndi?” Handandi wakumbwile kuli mwene ngayi, “Ndehe tuhu niyenga.” Pe wabokele ku litunga lyendi lya Endoma.

²³ Nyambi kami watumizile Lezoni mwana Eliyanda wa mulume kufutulukila Sholomoni. Lezoni washilile kuli hekulyendi Handandeza mwene waku Zomba,

²⁴ ha shikati osho Ndavita wakomakale Handandeza pe wazihile bakakumuyavwa ba Baashiliya. Lezoni wengile mukulwane wa babibenkanyi, Lezoni na bantu bendi bayile mu kuzika mu Ndamashika, oku bakamushwanishile bantu bendi kwinga mwene wamu Shiliya.

²⁵ Wengile kamalamo wa Ishalela ha shikati nimwasho sha kuyoya kwa Sholomoni. Waletele wukalu kuli Sholomoni ngonehe atendele Handandi ndaba ya kufutulukila Ishalela na kulela Shiliya.

Shikulupisho sha Nyambi kuli Yelombowami

²⁶ Muntu wamina ou wafutulukilile mwene Sholomoni wengile umo waha babilolo bendi Yelombowami mwana Nembati wa mulume, waku Zalenda mu Efulemu. Lizina lya mandiyendi Zeluya ou wengile mfwile.

²⁷ Olwe nilwo lushango lwanoko kufutulukila. Mwene Sholomoni wabuwilenga kembi kumbalila yaku mushamuko wa Yelushalema na kutendulula twimbi twa lukena lwa tatiyendi Ndavita.

²⁸ Yelombowami wengile ndumbana wakulikwatisha, pe oho Sholomoni amutoshele ngayi wakukalamana ku mulimo, wamuyakile kwinga mukulwane wa bakamilimo nimwabo ba likungubule bamu litunga lya Manashe na Efulemu.

²⁹ Mutena umo oho Yelombowami afuminenga mu Yelushalema, muluwe wa Nyambi Ahiya waku Shilo wamuhanganine heza mu nzila ninkayendi. Ahiya wavwalile lyambangubo lyalipya oho afuminenga ku Shilo.

³⁰ Ahiya walivulile lyambangubo lyalipya elye avwalilenga, walitabwezele tuponda likumi na tubili,

³¹ pe wambile kuli Yelombowami ngayi, “Obe shimbaho tuponda likumi, ndaba Nyambi ya Ngula, Nyambi wa Ishalela ukwamba kukwobe ngayi, ‘Nili na kuyangula Sholomoni wene, pe nika kupana mishobo likumi.

³² Sholomoni ukalama mushobo umo, ndaba ya mukamulimo wami Ndavita naha Yelushalema, lukena olu nahata kwinga lwami mukati ka litunga nimwalyo lya Ishalela.

³³ Nili na kutenda eshe ndaba Sholomoni unankana na kulemesha Ashitaloti nyambi wa mbuyama wa Shindoni na Kemoshi nyambi wa Mowambi na Moleki nyambi wa Amoni. Sholomoni unakana kunyombatala, unatende shibi, kami kulama mazu wami na ndayano zami ufwako, ngonehe atendele tatiyendi Ndavita.

³⁴ Ngoboni kukayangula Sholomoni wene nimwawo nifwako, kami nikamwitabilisha kulela litunga aha ashili kuyoya. Eshe nikashitenda ndaba ya mukamulimo wami Ndavita, ou nahatile, kami ou wombatalile mazu wami na ndayano zami.

³⁵ Nikayangula wene kuli mwana Sholomoni wa mulume, pe nika kupana mishobo likumi,

³⁶ ngoboni nikaleha mwana Sholomoni wa mulume kulama mushobo umo, ngayi mwanga nikekale na bazukulu kuli mukamulimo wami Ndavita kulela mu Yelushalema, lukena olu nahatile ngayi wingi wa mwanya nikwo oku lizina lyami likalemeshiwilanga.

³⁷ Obe Yelombowami nikakwinga mwene wa mishobo likumi ya Ishalela, ukalela litunga nimwalyo lya Ishalela na kwikala nimwaho aha ukashinga.

³⁸ Ndi ukanyombatala shikuma na kwenda mu zinzila zami na kutenda byakwoloka ha kulama kufundiziza kwami na ndayano zami, ngonehe atendele mukamulimo wami Ndavita, nikekala nobe shikati nimwasho. Nikakwingisha mwene wa Ishalela, kami nikamona ngayi bazukulyobe bakalela litunga lya Ishalela munyima yobe, ngonehe bene natendele kuli Ndavita.

³⁹ Ndaba ya wubi wa Sholomoni nikashushula bazukulya Ndavita, ngoboni kaliha shikati nimwasho.’”

⁴⁰ Pe kami Sholomoni washingile kuziha Yelombowami, ngoboni washililile kuli mwene Shishaki waku Engepita, kami wekalile kuyo hantu ha lufu lwa Sholomoni.

Lufu lwa Sholomoni

⁴¹ Byuma byamina biya atendele Sholomoni nimwabyo na ku shangama kwendi na ngana zendi, byatikitiwa mu likota lya kuyoya kwa Sholomoni.

⁴² Wengile mwene mu Yelushalema ha Ishalela nimwayo myaka makumi anaa.

⁴³ Wafwile pe wafundiwile mu Lukena lwa Ndavita, mwanendi wa mulume Lehombowami wamushwanine kwinga mwene.