1 Bamyene 10 - Libuka Lya KuyelaKuzingula kwa Mwene wa Mbuyama waku Shemba ( 2 Byambo 9:1-12 ) 1 Lihano waku Shemba wayile ku Yelushalema oho ayuvwile mpupo ya Mwene Sholomoni, eye yaletele maleema ku lizina lya Nyambi ya Ngula, pe wakamwezekele na ku mwipula mayipu amakalu na tushau. 2 Wayile ku Yelushalema na likunge lya bantu babengi hamo na makamela, awa ashimbile lukumba na mamanya amawahe shikuma a kulelema na ngolinde yayingi. Oho akumine kuli Sholomoni pe wamwipwile mayipu nimwawo awa ekalile nawo mu mutima wendi. 3 Mwene Sholomoni wakumbwile mayipu nimwawo, kowa shuma akwangile kutontolola. 4 Pe oho mwene wa mbuyama waku Shemba amanishile kuyuvwa ngana za Sholomoni, pe wamonene kami musheke ou atendele. 5 Wamonene na byakulya byatuliwile ku tebulu yendi nanoku balalanga babilolo bendi. Wamonene kami mu shinzanza na ngwahishilo ya byamanga bendi ba ku musheke na bikobelo bya bakamilimo bendi aba bamutwalililenga byakulya ku mayambwayambwa, pe kami na zinkombela eze akombelelenga ku Litala lya Nyambi, pe wayahamine mukanwa na kulikomokela. 6 Mwene wa mbuyama wambile kuli mwene Sholomoni ngayi, “Ebye nayuvwile oho nishili mu litunga lyami bya hahobe na bya ngana zobe binengi bya kupwisha. 7 Kaliha na kulupilile ebye bantongwezelenga bantu hantu aha ninezi na kulimonena amimwine. Ngoboni kaliha nabiyuvwishishile hinge shitika shabyo. Ngana zobe na wuheti binengi byabinene shikuma kupitakana ebye natongweziwile. 8 Bantu bobe eshe batandala! Kami bakamilimo bobe eshe batandala, aba bakwonzelanga ku meho wobe, banatandala kuyuvwa zincimpi za ngana zobe za kukeya. 9 Kuyemeziwe Nyambi ya Ngula, Nyambi yobe. Unamoneshe eshe anakuwahilili ha kukwinga mwene wa Ishalela. Ndaba ya shishemo shendi ha Ishalela shinengi sha mwaya myaka, unakwingishi mwene wabo nohobene ngayi mwanga wulele shiwahe.” 10 Mwene wa mbuyama wapanine mwene Sholomoni zintupu eze ezile nazo, ngolinde wakukuma ha wulemu wa makilongilamu 4,000 na lukumba lwalwingi lwa livumba lyaliwahe na mamanya amawahe shikuma a kulelema. Lukumba lwa lu wahe olu amupanine lwengile lwalwingi shikuma kupitakana olu lwa kwinga hinga atanga kulutambula ku shikati shamina. 11 (Muhoko wa mato amanene a Hilamu ayilenga mu kuleta ngolinde ku Ofwila, aletelenga kami wingi wa bitondo bya yunipa na mamanya amawahe shikuma a kulelema. 12 Sholomoni watendeshele biya bitondo kwinga tukandamisho twa ku Litala lya Nyambi ya Ngula naku musheke wendi, pe kami na kubazaho tumbuli twatushe na tumbuli twatunene twa bakakuwela. Ebye bitondo bya yunipa byengile byabiwahe kupitakana, hinga byatanga shilolo bitwaliwe mu Ishalela.) 13 Mwene Sholomoni wapanikile mwene wa mbuyama waku Shemba byuma nimwabyo ebye anyepele, kubula kuyakako bishemo byamina ebye amupanine nahiya bya kubula kunyepa. Niho mwene wa mbuyama na bakamilimo bendi babokele ku litunga lya Shemba. Wuheti wa mwene Sholomoni ( 2 Byambo 9:13-28 ) 14 Mwene Sholomoni watambwilenga ngolinde wakushinga kulingana makilongilamu 23,000 mwaka ha mwaka. 15 Eshe shengile kufungila ku mutelo batelelenga bakakuheheza na bakamikwebo na nkambiko ya kulandisha na zintupu za bamyene ba ku Alembiya na batulela bamu litunga lya Ishalela. 16 Mwene Sholomoni wafulile makebo amanene myanda yibili, kami likebo limo na limo lyafwikiwile na wulemu wa makilongilamu mutanu na abili a ngolinde. 17 Wafulile kami makebo amashe myanda yihatu nimwawo afwikiwile na wulemu wa makilo ahatu a ngolinde, likebo na likebo. Makebo awa nimwawo ayakiwile mukati ka litala lyamu lishaka lya Lembanoni. 18 Mwene wabazishile kami litanda lyalinene lya mayewe a banzovu lyafwikiwile na ngolinde yayiwahe. 19 Litanda lyekalile na zimbongwelo mutanu na lumo za kukandamina kulumbako, hayilu ya litanda hengile ha nzinguluke, kami ku nkumo na nkumo ya maleenge abili akukambika maboko kwekalile shifwekesha sha shimbwi. 20 Kwekalile kami babimbwi likumi na babili aba bemanine umo na umo ku nkumo na nkumo ya mambongwelo. Hinga kwatanga shilolo kwikale litanda mu wene uti hinge uti wamina lya kufweka ngonehe elye. 21 Zinkomoki nimwazo anwishilenga mwene Sholomoni zabumbiwile ha ngolinde na bya kukwatila nimwabyo bya mu Litala lya mu lishaka lya Lembanoni byengile bya ngolinde ya ku shama. Kaliha batendeshelenga na shiliva, ha kuwana ngayi ha matena a Sholomoni shiliva kaliha wengile shuma sha ndando. 22 Ndaba mwene wekalile na muhoko wa mato amanene avuwiliwilenga hamo na muhoko wa mato a Hilamu. Oho kwapitakale myaka yihatu, muhoko wa mato endi aletelenga ngolinde na shiliva na mayewe a banzovu na bampuya na tumumi. 23 Mwene Sholomoni wengile wakuheta shikuma na kukeya shikuma kupitakana mwene wuti hinge wuti wamina mu kaye, 24 kami ba hano hanci nimwabo bashingilenga kwiza na kuyuvwilila ku ngana ziya amupanikile Nyambi. 25 Bantu nimwabo bezilenga kukwendi, baletelenga zintupu, byuma bya shiliva na bya ngolinde na bivwalo na bilwisho na lukumba na bambishi na mambema. Eshe shatendiwilenga ha mwaka ha mwaka. 26 Mwene Sholomoni wakungwile makoloyi 1,400, kami wekalile na bambishi 12,000. Bamo wabatentekelenga mu Yelushalema, pe wingi wabo wabayakile mu minzi na minzi yamina. 27 Ha shikati sha kulela kwendi shiliva yengile yayingi ngonehe mamanya amu Yelushalema na bitondo bya shinda byengile byabingi shikuma ngonehe mitondo ya mukuyu. 28 Bakazindando za mwene bekalile na ngovu za kulanda bambishi ba ku litunga lya Engepita na Shilishiya, 29 na kulanda makoloyi aku Engepita. Batuminenga ku bamyene ba Bahita naba Baashiliya, bambishi na makoloyi. Balandulwilenga makoloyi na ndando ya 600 ya muwayawaya wa shiliva ha koloyi na koloyi na ndando ya 150 ha mbishi na mbishi. |
Libuka Lya Kuyela © Bible Society of Zambia, 2020.
Bible Society of Zambia