1 Bamyene 1 - Libuka Lya Kuyela

Mwene Ndavita ha wukulukazi wendi

¹ Haya mwene Ndavita engile hikakulukazi shikuma, kaliha watweshele kutukumina, hinge ndi bamufwikilenga miyemba bakamilimo bendi.

² Nohobene babilolo bendi bambile kukwendi ngayi, “Hekulyetu, leha taha tukushingile kanuke wa mbuyama wikale nendi kami akulamenga. Ukalalanga kwakwipi nanobe ngayi akakutukumishenga.”

³ Oku kuvwendoka kwatendiwile mu Ishalela nimwamo ha kankanga wamuwahe, pe mu Shunema bawaninemo kanuke wanahiyo lizina lyendi Ambishangi, pe bamutwalile kuli mwene.

⁴ Wengile wamuwahe shikuma, pe wekalile na kulama mwene na kumufulankana, ngoboni mwene kaliha walalile nendi.

Andoniya ukushinga kuya ha litanda

⁵ Haya Andoniya ou mandiyendi wengile Hangati. Kuyima ya lufu lwa Ambishalome, watakalalile ngayi enge mwene. Walishingilile niyemwine makoloyi na bambishi na bantu makumi mutanu bakuya na kukuwa luwo kumbili yendi.

⁶ Kunyima ya lufu lwa Ambishalome, Andoniya wengile mukulwane ku bana ba kuyoya ba Ndavita. Ndavita kaliha wamwambililile hinge ha shuma shimo ngayi, “Kati bishini wunatendele eshe na shiyo?” Wengile wakulundamina Ambishalome pe kami wengile wamuwahe shikuma.

⁷ Waliyuvwashanine na Yowambu ou mandiyendi wengile Zeluya, hamo na mukankombela Ambiyatale, pe betabilile kwimanina shambo sha Andoniya.

⁸ Ngoboni mukankombela Zandoki na Mbenaya mwana Yehoyanda na Natani muluwe wa Nyambi na Shimeyi na Leyi na bakakulama Ndavita kaliha bemanine kumbalila ya Andoniya.

⁹ Mutena umo Andoniya wakombelele nkombela ya mbelele na bankunzi na bana ba zingombe ba kushuwa ku Limanya lya Liyoka hahepi na lishima lya Enilongela. Wehanine bakonzobendi bana ba mwene Ndavita babalume bamina na babilolo ba mwene ba ku Yunda, ngayi beze ku shimbo eshe sha nkombela.

¹⁰ Ngoboni kaliha wehanine mukonzo wendi Sholomoni wa ku livumo lya ku lipali hinge muluwe Natani hinge Mbenaya hinge bakakulama mwene.

Sholomoni ukwinga mwene

¹¹ Niho Natani ayile kuli Mbatisheba manda Sholomoni na kumwipula ngayi, “Kati kaliha wunayuvuko ngayi Andoniya mwana Hangati walishwanishakale niyemwine ha wene ndi? Kami mwene Ndavita kulimuka shuma shimo haneshe wufwako.

¹² Ndi ukushinga kulamwina wumi wobe na wumi wa mwanobe Sholomoni, eshe nisho nikukubela ngayi ushitende.

¹³ Nyankupisha, yanga kuli mwene Ndavita na kumwipula ngayi, ‘Obe mwene ya ngoma, kati kaliha walibezele na kunkulupisha ngayi mwanami Sholomoni ukakushwana kwinga mwene ndi? Shikwiza nahiti lelo ngayi Andoniya enge hi mwene?’

¹⁴ Niho shikati shiya ushili kwamba na mwene Ndavita, nikengina na kushumisha shambo shobe.”

¹⁵ Nohobene Mbatisheba wayile na ku mona mwene ku kampenci kendi. Ndavita wengile kakulukazi shikuma, kami Ambishangi uya kankanga waku Shunema wamulaminenga.

¹⁶ Mbatisheba walambile kumbili ya mwene. Mwene wamwipwile ngayi, “Ukushinga bishini?”

¹⁷ Wakumbwile ngayi, “Hekulu, wambezele na kunkulupisha mu lizina lya Nyambi ya Ngula, Nyambi yobe, ngayi mwanami Sholomoni ukenga mwene ha litanda lyobe.

¹⁸ Ngoboni Andoniya wengakale mwene, kami obe uli mu mpoza.

¹⁹ Unakombelele nkombela ya bankunzi babengi, bambelele na bana ba zingombe ba kushuwa, pe unehana bana bobe na mukankombela Ambiyatale na Yowambu mukulwane wa nzita yobe ku shimbo, ngoboni kwihanako mwanobe Sholomoni ufwako.

²⁰ Obe mwene ya ngoma, bantu nimwabo bamu Ishalela bali na kutilamina kukwobe ngayi ubatongweze ou ukashwana kwinga mwene.

²¹ Ndi ufwako hekulu, oho wabembulukakale mwanami Sholomoni na nami tukayandishiwa ngo tuli baka Kubipisha.”

²² Oho ushili na kwamba na mwene, muluwe Natani wakumine ku musheke.

²³ Batongwezele mwene ngayi, “Muluwe Natani wezakale.” Natani wenginine na kulamba kumbili ya mwene.

²⁴ Niho Natani ambile ngayi, “Obe mwene ya ngoma, kati obe unakwayanishi ngayi Andoniya wakushwanakale kwinga mwene ndi?

²⁵ Mutena unobene unayi na kukombelela nkombela ya bankunzi babengi na bambelele na bana ba zingombe ba kushuwa. Unehana bana bobe nimwabo kami na bakulwane nimwabo banzita yobe na mukankombela Ambiyatale. Wuluno bene bali na kulya nendi na kukuwa luwo ngayi, ‘Uyoye obe mwene Andoniya.’

²⁶ Ngoboni kaliha wanyihanineko ami mukamulimo wobe hekulu, hinga mukankombela Zandoki, hinga Mbenaya mwana Yehoyanda, hinge mukamulimo wobe Sholomoni.

²⁷ Kati obe mwene ya ngoma, obe wetabila ebye nimwabyo ndi? Shumangani wabulila kutongwezako babilolo bobe ngayi yani ukakushwana kwinga mwene?”

²⁸ Mwene Ndavita wambile ngayi, “Yihana Mbatisheba abokemo.” Pe wezile na kwimana kumbili yendi.

²⁹ Niho ambile kukwendi ngayi, “Nakukulupishi na lizina lya Nyambi ya Ngula wakuyoya ou unandamwini ku makando wami nimwawo.

³⁰ Niho olwele liboko lyendi kuyilu na kulibeza ngayi, ‘Nyambi ya Ngula, Nyambi wa Ishalela, unandamwini mu wukalu wami nimwawo. Nohobene nikulibeza kukwobe ngayi kowa wamina kami ukancwana kwinga mwene ndele mwanobe Sholomoni, pe lelo nikulama shikulupisho eshe.’ ”

³¹ Pe Mbatisheba walambile, niho ambile ngayi, “Hekulyami mwene Ndavita, mwanga uyoyenga mwaya myaka.”

³² Niho mwene Ndavita atumine muntu kuya mukwihana mukankombela Zandoki na muluwe Natani na Mbenaya mwana Yehoyanda. Oho bezile na kwimana ku meho a mwene,

³³ pe mwene wambile kukwabo ngayi, “Yenunga na babilolo bamu shinzanza shami. Muye na mwanami Sholomoni, mukandamishenu ha limbema wami, pe mu mushindikize kukamukumisha ku kaheloke kaku Ngihoni.

³⁴ Kuyo niko bakamuwabishila ba mukankombela Zandoki na muluwe Natani kwinga mwene wa Ishalela. Niho mukashibe mpandula na kukuwa luwo ngayi, ‘Uyoyenga obe mwene Sholomoni.’

³⁵ Mukakenu na kumubwesha kuno, oho akeza mukwikala ha litanda lyami. Ukancwana kwinga mwene, ndaba nahata muntu ou kwinga kalela wa Ishalela na Yunda.”

³⁶ Mbenaya mwana Yehoyanda wakumbwile ngayi, “Shikatendiwa. Mwanga Nyambi ya Ngula, Nyambi yetu ou na kuyavwa, hekulyami mwene ya ngoma ashumishesho.

³⁷ Ngonehe Nyambi ya Ngula, ekalile hamo nobe, obe mwene ya ngoma, mwanga kami ekale na Sholomoni, pe ukatumpula wene wendi shikuma kupitakana wobe hekulyami Ndavita.”

³⁸ Nohobene mukankombela Zandoki na muluwe Natani na Mbenaya mwana Yehoyanda na byamanga bakelete na bapelete, bakandamishile Sholomoni ha limbema wa mwene Ndavita, pe bayile na kumu kaka ku kaheloke ka Ngihoni.

³⁹ Mukankombela Zandoki washimbile mushashi wa mazi a olive awa akaletele ku Ntanda yaku meho a Nyambi ya Ngula, wawabishile Sholomoni. Niho bashibile mpandula, pe bantu nimwabo ba kuwile luwo ngayi, “Uyoye obe mwene Sholomoni.”

⁴⁰ Pe ha kuboka bamukakile, hibawulumwina na ku wahilila na ku shiba tunamitolilo na kutenda miyoyo yayingi kushinga na kulipokola.

⁴¹ Oho Andoniya na bayeni bendi nimwabo bamanishilenga shimbo bayuvwile miyoyo, oho Yowambu ayuvwile zimpandula wambile ngayi, “Kati eye miyoyo nimwayo mu lukena yikutontolola bishini?”

⁴² Oho ushili kwamba, Yonatana mwana mukankombela Ambiyatale wamulume, wakumine. Andoniya wambile ngayi, “Yekanga wingine, uli muntu wamuwahe, nohobene obe uku fwanina kuleta lushango lwa lu wahe.”

⁴³ Yonatana wakumbwile Andoniya ngayi, “Kuleta lushango lwa lu wahe nifwako. Ndavita mwene ya ngoma unayaka Sholomoni ha wene.

⁴⁴ Watumine mukankombela Zandoki, muluwe Natani, Mbenaya mwana Yehoyanda na bakelete na bapelete byamanga ba wene hibaya na kukuwa luwo. Banamukandamishi niha limbema wa mwene,

⁴⁵ Mukankombela Zandoki na muluwe Natani banamuwabishi kwinga mwene ku kaheloke ka Ngihoni. Niho banayi mu lukena, hibawulumwina na ku wahilila, pe bantu hano bali na kutangala shikuma. Yiya niyo miyoyo munayuvunga.

⁴⁶ Sholomoni haya wengakale mwene.

⁴⁷ Haya kami babilolo bamu shinzanza banengininga na kulamba kuli mwene Ndavita hibamba ngayi, ‘Nyambi yobe mwanga atumpule Sholomoni na mpupo ya kupitakana yobe na kulela kwendi kupitakana kwobe.’ Niho mwene Ndavita anyongaminine ha wulili wendi na kulemesha,

⁴⁸ pe walombelele ngayi, ‘Tokonoko tuyemeze Nyambi ya Ngula, Nyambi wa Ishalela, ou lelo unengishi umo ha bana bami ku ncwana kwinga mwene nanyoyeshe ngayi nimoneko.’”

⁴⁹ Niho bayeni ba Andoniya batinine, pe nimwabo bapanzanine na kuya muntu na muntu kukwabo.

⁵⁰ Andoniya, ha kutina shikuma Sholomoni, wayile ku Ntanda yaku meho a Nyambi ya Ngula pe wakwatilenga ku zinkomi za kaala.

⁵¹ Mwene Sholomoni bamutongwezele ngayi, “Andoniya namutini, pe kami nakwatilili ku zinkomi za kaala, Andoniya namba ngayi, ‘Ha kutatika nikushinga mwene Sholomoni kulibeza kukwami ngayi kukanziha wufwako.’ ”

⁵² Sholomoni wakumbwile ngayi, “Shinga nengi waku fwanina shinga kowa hinge luhuki lwaku mutwe wendi lukakwatiwa, ngoboni ndi wakuluwa, pe ukafwa.”

⁵³ Niho Mwene Sholomoni ehanine Andoniya, pe bamufumishile ku kaala. Andoniya wayile kuli mwene, wanyongamine hanci na kulamba kumbili yendi, pe mwene wambile kukwendi ngayi, “Yanga ku munzi.”