Yohanna 9 - Lala NT

Yeso yǝ roɓ yaa ɓaa haasǝsǝ ntaara ya

¹ Yeso yaa siko, pa yǝ pam ma yaa ɓaa haasǝsǝ ntaara ya.

² Pa emfǝɗkaa ɓǝsa ɓaa taa me, “Malǝm, ǝn tenatenato yamni wa kwasǝ aa haa eɗ ɗa taarau? Ən tenatenato usu ko tenatenato u wiina ɓisa wau?”

³ Yeso yǝɓǝ kak me, “Sem Sase hana wiina ɓisa ɓǝ tomsǝ tenatenato wa ra, pa mbusa tom maaso me aa weɗɗa tinima Kaa ma a ɗuura ira.

⁴ Tommon ɗat ndǝ se wiyo ma tinima yaa yǝ timinǝsǝ ya. Pǝrtǝra ǝn wowo, u yaake yǝ nkaa yaa tom tinima ra wa.

⁵ Pa nǝsǝ nding a put ntaadi wa ɓa, nǝn han ɗekɗekto put ntaadi wa ɓa.”

⁶ Ndiira yǝ nkeesǝ maaso wa, pa yǝ nem mesa a putu, yǝ rotǝ, yǝ haatǝ eɗ kaya a nuuwa isa.

⁷ Yaa nkee me, “Ngo, ko ngǝ soɓ a npoo mbraa Siluwam wa.” Mara sǝra ǝn sen me, yaa ɓaa timisǝsǝ ya. Pa eɗ kaya yǝ ko yǝ soɓɓo, yǝ kang ɗur yǝn wǝrǝ.

⁸ Pa ɓan ndǝnsaatǝra ma ɓaa ɓǝ solsǝ ɓǝn wǝrsǝsǝ nfee yǝn tomsǝ kǝnara ya, ɓǝ taa ɓaatǝ me, “Eɗ ɗa, sem sase yǝn kaɗsǝ yǝ tom kǝnara ya rau?”

⁹ Ɓaata ɓǝ nkee me, ǝn sase. Ɓaata ɓǝ nkee me, “Awo, sem sase ra, ɓǝ kon ɓaatǝ kono.” Eɗ sisi ma nkweera ira, pa yǝ nkee me, “Ən niina.”

¹⁰ Pa ɓaa taa me, “Yaa tomtomni ngǝn wǝrsǝu?”

¹¹ Pa yǝɓǝ kak me, “Eɗ ǝn yarsǝsǝ me Yeso ya, yǝ rotǝ putu ma mesa isa yǝnǝ puk a nuuwa sǝna, yǝ nkee nǝ me, konǝ soɓ a npoo mbraa Siluwam wa. Pa nǝ ko konǝ soɓɓo, pa nǝ taa wǝr handa wa.”

¹² Pa ɓaa taa me, “Eɗ se yǝ nau?” Yǝɓǝ kak me, “Nǝ maa ra.”

Wiina Farisiyawa ɓa, ɓǝ taa ɗǝɗa ɓaa tomsǝ aa roɓ ntaara ya

¹³ Pa ɓaa wo ma yaa ɓaa haasǝsǝ ntaara siya a ɓaa Farisiyawa ɓa ni.

¹⁴ Ən kaa nwiiya Yahudawa ɓa, Yeso yǝ rotǝsǝ putu yaa wil nuuwa ntaara sǝra ya.

¹⁵ Pa ɓaa Farisiyawa ɓa, ɓaa taa ɗǝɗa tomsǝ yǝ taa wǝr handa wa. Eɗ kaya yǝɓǝ kak me, “Yǝ rotǝ putu ma mesa yǝnǝ haatǝ a nuuwa sǝna, nǝ soɓɓo, waso nǝn wǝr handa.”

¹⁶ Ɓaata ɓaa Farisiyawa ɓa, ɓǝ nkee me, “Eɗ ɗa yǝ fiɗa Kaa ni ra, me yǝn naa mbarta kaa nwiiya Yahudawa ɓa ra.” Pa ɓaata ɓǝ taa me, “Pa kǝ tomtomni yaa yǝsǝ ma tenatenato ya, kiya tom mbu nhiinyanhiinya ɓa maasou?” Pa ɓǝ ɓaa handa raɓ.

¹⁷ A feɗefeɗe ɓǝ kǝrtǝ a ntaara sǝra ni, ɓaa nkee me, “Ngǝ nkee me miniu a ɗuura eɗ sisi rau? Me ǝn nuuwa sǝnga yǝ wilsǝ wa.” Pa eɗ kaya yǝɓǝ kak me, “Yǝ an nawanto ya.”

¹⁸ Pa ɓaa Yahudawa ɓa ɓosa, ɓǝ na ɓongtǝra me ka yǝn ntaara ra, ɗǝm waso yǝ taa wǝr handa wan. Pa me maaso, ɓǝ timi me aa yar wiina ɓisa ɓǝ wo.

¹⁹ Pa ɓǝ taa wiina ɓisa me, “U nwa ǝn au waaseu? Ən sase sǝ haasǝsǝ ntaara yau? Yaa tomtomni waso yǝn wǝrsǝ handa wau?”

²⁰ Wiina sǝɓa ɓǝ kak me, “Tǝ maan ǝn auwate, ɗǝm tǝ maan me tǝ haasǝ ntaara.

²¹ Pa mbu kwasǝ yǝn wǝrsǝ handa ɓa, hana yaa wilsǝsǝ nuuwa ya, tǝ maa ra. Saa taa, yǝ auwe ra, kiya nkaa yǝ kan mara ma nkweera ira.”

²² Wiina ɓisa ɓǝ nkee mbusǝsa maaso, me ɓǝn kura kokto ɓaa Yahudawa ɓa, me ɓaa Yahudawa ɓa, ɓǝ wee nkeen me nsaad yaa yǝ nkeesǝ me Yeso ndǝ Krisiti ya, ɓaa ka pǝǝ a hit kwau Yahudawa ɓa.

²³ Ən siso mbu kwaasǝ wiina ɓisa ɓǝ nkeesǝ me, “Yǝ auwe ra ya, saa taa.”

²⁴ Pa ɓǝ ɓaarǝ, ɓǝ yar yaa ɓaa haasǝsǝ ntaara siya, ɓaa nkee me, “Aa nkee ɓongtǝra, me ngǝ too ɗǝnda Kaa ra. Waato tǝ maan me yaa yǝ roɓngǝsǝ siya, ǝn yaa ma tenatenato ya.”

²⁵ Yǝɓǝ kak yǝ nkee me, “Hana yǝ yaa ma tenatenato ya, hana yǝ sem ma tenatenato ra, nǝ maa ra. Mbuka fin nǝ maasǝ wa. Kanǝ ntaara, pa waso nǝn wǝr handa!”

²⁶ Pa ɓaa taa me, “Yǝ tom ngǝ mbiu? Yǝ wil ngǝ nuuwa miniminiu?”

²⁷ Yǝɓǝ kak yǝ nkee me, “Nǝ nkeesǝn kaka sǝ kura ra. Yaa sǝn taa me sǝ kura mbi ɗǝmǝu? Sǝn taa me sǝ kang emfǝɗkaa ɓisa kǝnǝu?”

²⁸ Pa ɓǝ sǝr eɗ kaya, ɓaa nkee me, “Ən ngase aufǝɗke isi, waato tǝ emfǝɗkaa Musa ɓa!

²⁹ Tǝ maan me Kaa yǝ kan ma Musan, pa usu wa, tǝ maa han yǝ fiɗsǝ ɓa ra.”

³⁰ Pa eɗ kaya yǝɓǝ kak yǝ nkee me, “Nwa ǝn mbu nhiinyanhiinya ɓa, sǝ maa han yǝ fiɗsǝ ɓa ra, pa yǝ wilnǝ nuuwan.

³¹ Ndǝ maan me Kaa yǝ kura ɓaa ma tenatenato ɓa ra. Yǝn kura yaa yǝn kurasǝ kokto Kaa ɓa ya, ɓaa ɓǝn tomsǝ mbu yǝn taasǝ ɓa.

³² Yaake sem kǝn yǝ kurasǝ me yaake wil nuuwa yaa ɓaa haasǝ ntaara ya ra.

³³ Me ka eɗ ɗa yǝ fiɗ a Kaa ni ra, yǝ nkaa yǝ tom mbusǝsa ra.”

³⁴ Ɓaa kak ɓǝ nkee me, “Ngase ɓaa haangǝsǝ a tenatenato ya, ngǝn taa me ngǝtǝ nkee mbiu!” Pa ɓaa pǝǝ yǝ faɗɗa.

Ntaato a ɗuura mbu aa Wiso ɓa

³⁵ Yeso yǝ kura me ɓǝ pǝǝsǝn wa, yǝ wǝrsǝsǝ wa, yaa nkee me, “Ngǝ na ɓongtǝra ma Au Ete ya nǝu?”

³⁶ Eɗ ka yaa, yaa taa me, “Yaa kwang ya, ǝn yamni saseu? Ənǝ nkee me nǝ na ɓongtǝra ma sase.”

³⁷ Yeso yaa nkee me, “Ngǝ wǝrsǝn, a ɓongtǝrato, ǝn sase sǝn kansǝnkan ma sase waso ya.”

³⁸ Pa yǝ nkee me, “Ankundi, nǝ na ɓongtǝran.” Pa yaa nyoo.

³⁹ Pa Yeso yǝ nkee me, “Nǝ wo a put ntaadi nwa me kankiita wa, me ntaata ɓǝ wǝrǝ, ɓaa ɓǝn wǝrsǝ ɓa ɗǝm ɓǝ kang ntaata.”

⁴⁰ Ɓaata ɓaa Farisiyawa ɓǝsǝ kǝnso ɓa, ɓǝ kurasǝ mbusǝsa maaso wa, ɓǝ taa me, “Waso ngǝn nkee me taase kǝn, tǝn ntaata kǝnǝu?”

⁴¹ Yeso yǝ nkee me, “Me kasǝ ntaata, kama sǝ sem ma tenatenato ra, to, pa waso sǝn nkeesǝ me sǝn wǝr wa, tenatenato waaso ke ma saase.