Yohanna 8 - Lala NT

¹ Pa Yeso yǝ ko a yol Zaitun wa.

² Handa nweesǝ wa, Yeso yǝ ɓaarǝ yǝ kang a taanda hit ɓǝɗ Kaa Urshalima wa, a han ɓeta ɓǝ kwausǝ a sani ɓa, pa yǝ kaɗ yǝɓǝ tom fǝɗkǝra.

³ Malǝmma fǝɗkǝra Musa sa ma ɓaa Farisiyawa ɓa, ɓaa wo ma toone ke, u ɓǝ masǝsǝ yǝn tom pepeto ma kere wa. Ɓaa ti toone kaya yǝ nǝɗ a wiiyo a ɓoni,

⁴ ɓǝ nkee Yeso me, “Malǝm, toone nya tǝ masǝ a ɗuura pepeto ra ma kere.

⁵ A Masaka, Musa yǝ nkeetǝ me, tǝ muɗkǝ nkaamǝra toona ra ma ɗungate. Pa nwaango kau, ngǝ nkee miniu?”

⁶ Ɓǝn taa mbusǝsa me ɓaa taa mbu kǝɓǝsa ma ɓa. Pa Yeso yǝ ntiima yǝn nyor mbuka a putu ma wate.

⁷ Ɓǝn rǝkasǝsǝ ma taama wa, yǝ nik duura ira, yǝɓǝ nkee me, “Me yaake kǝn a ɗaaso waaso, yaa yǝ sem ma tenatenato ra ya, aa lee yǝ ntii yǝ too ɗungara wa, yaa muɗkǝ toona sisi.”

⁸ Pa yǝ ɓaarǝ yǝ ntiima ɗǝm yǝ faɗ wiyo ma nyorma a putu.

⁹ Ɓǝ kurasǝ maaso wa, ɓǝ ntii faɗɗo, ntii ma wiina ɓosa, pa ɓaata ɓǝ ɓǝɗ fin fin ma ndiira, pa aa lee Yeso fin mbusa ma toone kaya kǝnso.

¹⁰ Yeso yǝ nik ɗuura, yaa taa me, “Toone, ɓǝ nau? Yaake yǝ nǝng ngǝ kiita rau?”

¹¹ Yǝ kak me, “Awo, Ankundi.” Yeso yaa nkee me, “Hana niina kǝn, nǝ nǝng ngǝ kiita ra. Ngo waso, ngǝn ɓaarǝ ngǝ tom tenatenato ɗǝm ra.”

Yeso yǝ ɗekɗekto put ntaadi wa ɓa

¹² Pa Yeso yǝ ɓaarǝ yǝ nkee ɓeta me, “Nǝn ɗekɗekto put ntaadi wa ɓa, yaa yǝ ɓǝɗ nǝsǝ ya, yǝ siki a han teptepto ɓa ra, pa kiyǝ tom ma ɗekɗekto huurtu wa.”

¹³ Pa ɓaa Farisiyawa ɓa, ɓǝ nkee Yeso me, “Ngase, ngǝn kan mara a ɗuura nga ra, ma nkweerange fin manga, me maaso, mara ngǝ nkeesǝ ra, aa tom ɓongtǝra ra.”

¹⁴ Yeso yǝ kak yǝ nkee me, “Hana nǝ kan mara a ɗuura na ra ma nkweerane fin mana, mara nǝ nkeesǝ ra, ǝn ɓongtǝra, me nǝ maa han nǝ fiɗsǝ ɓan, ɗǝm ma han nǝ kosǝ ɓa. Pa waaso sǝ maa han nǝ fiɗsǝ ɓa ra, ɗǝm ma han nǝ kosǝ ɓa ra.

¹⁵ Waaso sǝn nǝng kiita nga ɓeta ɓǝn tomsǝ wa, pa waano nǝ nǝnggaa kiita yaake ra.

¹⁶ Pa hana kama kanǝ nǝng kiita, nǝngkiita waano ǝn u ɓongtǝra wa, me nǝ sem fin mana ra, tǝ ke ma Papa, yaa yǝ timinǝsǝ ya.

¹⁷ A masaka waaso ɓaa nyor me, me ɓeta raɓ ɓǝ nkee mbu fina, mbusǝsa ǝn ɓongtǝra.

¹⁸ Niina nǝn yaa yǝn kansǝ mara a ɗuura na ra, ma nkweerane ya. Paane yaa yǝ timinǝsǝ ya ɗǝm, yǝn kan mara a ɗuura na.”

¹⁹ Pa ɓaa taa me, “Paa nge se yǝ nau?” Yeso yǝɓǝ kak me, “Sǝ maanǝ ra hana Paane. Me kasǝ maa nǝn kama kǝsǝ ma Paane kǝn.”

²⁰ Yǝ nkee mbusǝsa a fer yǝn fǝɗkǝsǝ kang a taanda hit ɓǝɗ Kaa Urshalima wa han ɓan nhiisǝ baiko ɓa. Yaake yǝ sun yaa ma ra, me fer usu kan sundura.

²¹ Pa Yeso yǝ ɓaarǝ yǝɓǝ nkee ɗǝm me, “Kǝnǝ faɗɗa, sǝ kǝnǝ kǝrǝ, kǝsǝ woɗɗo a tenatenato waaso. Han kǝna ko ɓa, sǝ nkaa sǝ wo ra.”

²² Mbusa kwa wiina ɓaa Yahudawa ɓa, ɓǝ taa me, “Kiyǝ toɗ ee usu? Ən siso yǝn nkeesǝ me, ‘Han nǝ kosǝ ɓa, sǝ nkaa sǝ wo ra wau’?”

²³ Pa Yeso yǝ faɗ wiiyo yǝ nkee me, “Waaso sǝ fiɗ a put nwa, waano nǝ fiɗ ɓoti. Waaso sǝ ɓaa put ntaadi ɓa, waano nǝ sem yaa put ntaadi wa ɓa ra.

²⁴ Ən siso nǝ nkeesǝsǝ me, kǝsǝ woɗ a tenatenato waaso wa. Me sǝ na ɓongtǝra me, niina nǝn sase ra, kǝsǝ woɗ a tenatenato waaso.”

²⁵ Pa ɓǝ taa Yeso me, “Ngǝn yamniu?” Yeso yǝɓǝ kak, yǝ nkee me, “Niina nǝn sase, yaa nǝ nkeesǝsǝ tǝng a ntiiri ya.

²⁶ Nǝ ma mbusa dem u kǝnǝ nkee a ɗuura sa wa, u kǝnǝ nkaa nǝsǝ nǝng kiita asi wa. Pa yaa yǝ timinǝsǝ ya, yǝ ma ɓongtǝra, mbu nǝn kurasǝ a sani ɓa, nǝn nkee put ntaadi wa.”

²⁷ Pa ɓǝ sem ma maa me yǝn kan mara a ɗuura Papisi ya ra.

²⁸ Pa Yeso yǝɓǝ nkee me, “Me sǝ nik Au Eteyan, a fer siso kǝsaa maa me, niina nǝn sase wa, nǝ tomaa mbuka fin mana ra, ndub me Papa, yǝ fǝɗkǝ nǝn, maaso nǝn nkeesǝ wa.

²⁹ Yaa yǝ timinǝsǝ ya ɗǝm, yǝ ke ma niina, yǝ leenǝ fin mana ra, me hana kamni, nǝn tom mbu yǝn taasǝ ɓa.”

³⁰ A fer Yeso yǝn nkeesǝ mbusǝsa maaso wa, ɓeta dem ɓǝ na ɓongtǝra ma sase.

Em Ibrahim ɓa

³¹ Pa Yeso yǝ nkee ɓaa Yahudawa ɓa, u ɓǝ nasǝ ɓongtǝra ma sase ɓa me, “Me sǝ ma fǝɗkǝra na nǝn, ɓongtǝra sǝ emfǝɗkaa ɓǝna.

³² Sǝkǝ maa ɓongtǝra, ɗǝm ɓongtǝra sǝra kiyǝsǝ hiki.”

³³ Pa ɓaa kak me, “Waato tǝ tuwa Ibrahim wa, tǝ fǝta tom hoota yaake wa ra. Tomtomniu ngǝn nkeesǝ me kǝtǝ hikkiu?”

³⁴ Pa Yeso yǝɓǝ kak, yǝ nkee me, “Ɓongtǝra nǝn nkeesǝ, nsaad yaa yǝn tomsǝ tenatenato ya, yǝn hoora tentenato ra.

³⁵ Hoora yǝ kaɗaa a ɗuur farat ɗa, pa auwe yǝ kaɗ pakarese.

³⁶ Pa me Au sisi yǝ hik sǝn, ɓaa hik sǝn farat hun.

³⁷ Nǝ maan sǝ tuwa Ibrahim wa, pa sǝn taa me kǝsǝ nǝ toɗɗo, me sǝ kon fǝɗkǝra naa ra.

³⁸ Nǝn nkee mbu nǝ wǝrsǝ a Papa ni ɓa, saase kǝn sǝn tom mbu sǝ kurasǝ a paase ni ɓa.”

³⁹ Pa ɓaa kak, ɓǝ nkee me, “Yaa Ibrahim ǝn paate.” Pa Yeso yǝɓǝ nkee me, “Me kasǝ em Ibrahim ɓa, kama kǝsǝ tom mbu Ibrahim tomsǝ ɓa.

⁴⁰ Sǝ sengge, waaso sǝn kǝr me sǝnǝ toɗɗo, nase eɗ yǝ nkeesǝsǝ ɓongtǝra u nǝ kurasǝ a Kaa ni ɓa ya. Ibrahim yǝ tom maaso ra.

⁴¹ Sǝn tom tinima u paase yǝn tomsǝ ma.” Pa ɓaa nkee me, “Ɓaa haatǝ a tulato ra, paate fin, ǝn sase Kaa.”

Em Shaitan ɓa

⁴² Yeso yǝɓǝ nkee me, “Me ka Kaa ǝn Paase, kama sǝ yau ma niinan, me nǝ fiɗ a Kaa ni, ɗǝm waso na hamɓa sa. Nǝ wo men nkweerane ra, pa yǝ timini sase.

⁴³ Tomtomni sǝn maa ra kanmǝra naa rau? Mbu kwasǝ ɓa, sǝ nkaa sǝ kura fǝɗkǝra naa ra.

⁴⁴ Saase, sǝn u paase Shaitan wa, sǝn taa me sǝ tom tinima yǝn taasǝ ɓa. Yǝn eɗ toɗ ɓeta ya tǝng a ntiiri wa, yǝ nǝɗɗa a ɓongtǝra ra, ɗǝm mbuka nteesǝ ma ɓongtǝra ra, me usu ɓongtǝra sem a sani ra. A fer yǝn nkeesǝ para wa, yǝn weɗa kaɗɗo usu, me usu yǝn eɗ para ya, ɗǝm yǝ pap para ya.

⁴⁵ Pa nding siso, me nǝn nkee ɓongtǝra, pa sǝ yauwaa ma niina me, nǝn nkee ɓongtǝra ra.

⁴⁶ A ɗaaso waaso, yaake kǝn kiyaa nkaa yǝ nkee me nǝ pǝta tom tenatenato wa nǝu? Yaa pa me nǝn nkee ɓongtǝra, tomtomni sǝ yauwaa ma niina me, nǝn nkee ɓongtǝra rau?

⁴⁷ Yaa yǝsǝ u Kaa wa ya, yǝn kura mbu Kaa yǝn nkeesǝ ɓa. pa Mbu kwasǝ sǝ kura ra wa, saase sǝn u Kaa wa ra.”

Yeso yǝ faɗ Ibrahim nǝn

⁴⁸ Pa ɓaa Yahudawa ɓa, ɓaa kak me, “Ən ɓongtǝra tǝ nkeesǝ me ngǝn eɗ Samariya ya, ɗǝm ngǝ ma nsaamse.”

⁴⁹ Yeso yǝɓǝ kak me, “Niina nǝ sem ma nsaamse ra. Nǝn na mbarta Paane, pa waaso sǝ nanaa mbarta ra.

⁵⁰ Niina nǝ kǝraa nkweerane mbarta ra, pa yaa yǝn kǝrnǝsǝ ya, yǝ kǝn, ǝn sase an kankiita ya.

⁵¹ Nǝn nkeesǝ ɓongtǝra, hana yamni yaa yǝ maasǝ mara naya, yǝ pǝta wǝr woɗɗa wara.”

⁵² Pa ɓaa Yahudawa ɓa, ɓaa nkee me, “Waso tǝ maan me ngǝ ma nsaamse. Ibrahim yǝ woɗɗon, maaso ɗǝm ma ɓan nawanto ɓa, pa ngǝn nkee me, hana yamni yaa yǝ ɓǝɗsǝ mara nga ya, yǝ pǝta woɗɗo ra.

⁵³ Ngase, ngǝ faɗ paate Ibrahim nǝu? Sase kǝn yǝ woɗɗon, ɗǝm ma ɓan nawanto ɓa, ɓǝ woɗɗon. Ngǝn sen me ngǝn yamniu?”

⁵⁴ Yeso yǝ kak me, “Me nǝ too ɗuura na, too ɗuura nwaano aa tom mbuka ra. Yaa yǝn too nǝsǝ ya, ǝn Paane, yaa sǝn nkeesǝ me ǝn Kaa ɓǝsa ya.

⁵⁵ Saase sǝ maasǝ ra, pa waano, nǝ maasǝn. Me kanǝ nkeesǝ me, nǝ maasǝ ra, kama kǝnǝ tom an para ya nga saase. Pa nǝ maasǝn, ɗǝm nǝn tom mbu yǝn taasǝ me aa tom ɓa.

⁵⁶ Paase Ibrahim yǝ huur kuɗan dem, me ɓaa aa lee yǝ wǝr wo tǝro waano wa. Pa yǝ wǝrǝn, ɗǝm yǝ huur kuɗa.”

⁵⁷ Pa ɓaa Yahudawa ɓa ɓǝ nkee me, “Nding waaso ngǝ kan meeta pwa wonon ra, pa ngǝn nkee me ngǝ wǝr Ibrahim nǝn!”

⁵⁸ Pa Yeso yǝɓǝ nkee me, “Ɓongtǝra nǝn nkeesǝ, si ɓaa haa Ibrahim ra, ǝn niina.”

⁵⁹ Me maaso ɓǝ haa ɗungate ɓaa sa munkǝ. Pa Yeso yǝ nfaa, yǝ fiɗ a hit ɓǝɗ Kaa Urshalima wa.