Yohanna 7 - Lala NT

Yeso yǝ ko a hiira mbukamsa Yahudawa ɓa

¹ Ndiira maaso wa, Yeso yǝ ko a ɗaaso ɓaa Yahudiya ɓa, yǝ yau yǝ siki a ɗaaso ɓaa Yahudawa ɓa ra, me ɓaa Yahudawa ɓa, ɓǝn taa me ɓaa toɗɗo.

² Pa hiira mbukamsa ɓaa Yahudawa ɓa, kansǝ kwang nwa,

³ ɓaata Yeso ɓa ɓaa nkee me, “Paman ngǝ ko Yahudiya me emfǝɗkaa ɓǝnga, ɓǝ wǝr mbu nhiinyanhiinya ngǝ tomsǝ ɓa.

⁴ Me yaake sem kǝn, yaa yǝn taasǝ me ɓaa maa kwang a ɓeta ya, pa yǝ tom mbuka a nhuukǝra ra. Pa me ngǝn nkaa ngǝ tom mbu nhiinyanhiinya ɓa maaso, yaa aa weɗɗa eenwango me put ntaadi wa, ngǝ maa.”

⁵ Me hanan ɓaata ɓisa, ɓǝ na ɓongtǝra ma sase ra.

⁶ Me maaso Yeso yǝɓǝ nkee me, “Fer nwaano kan sundu ra, pa waaso, hanan fer naawa, tomon keke a sanii.

⁷ Ɓet put ntaadi wa ɓa, ɓǝ nkaa ɓǝsǝ ɓisi ra, pa ɓǝn ɓisi nǝ, me nǝ nkee me, mbu ɓǝn tomsǝ ɓa, sem keke ra.

⁸ Saase, so a hiira mbukamsa ra. Niina nǝ ko a hiira mbukamsa ɓa waso ra, me fer u tomsǝ keke a nanii wa, kan sundu ra.”

⁹ Ndiira yǝ nkeesǝ maaso wa, pa yǝ kaɗ ngeek a Galili.

¹⁰ Hana maaso, a ndiira ɓaata ɓǝsa ɓǝ faɗsǝ a han hiira mbukamsa kara wa, pa Yeso yǝ ko kǝn a nhuukǝra, sem a talte ra.

¹¹ Pa a han hiira mbukamsa sisa, ɓaa Yahudawa ɓa, ɓǝn kǝrsǝ ɓǝn taataa, ɓǝn nkee me, “Eɗ siya yǝ nau?”

¹² A ɓaa kwausǝ dem sǝɓa, ɓǝn kan mara a ɗuura Yeso ra a nhuukǝra. Ɓaata ɓǝn nkee me, “Yǝ eɗ yaɓ ya.” Ɓaata ɓǝn kak me, “Sem ra, yǝn nlaa ɓeta.”

¹³ Pa yaake yǝ yauwa me yǝ nkee a talte a ɗuura ira ra, me ɓǝn kura kokto wiina ɓaa Yahudawa ɓa.

Yeso yǝ tom fǝɗkǝra a han hiira mbukamsa sǝsa

¹⁴ Pa ndub a fer hiira mbukamsa kansǝ a ɗaaso wa nhe, ǝn fer siso Yeso yǝ kansǝ a tanda a hit ɓǝɗ Kaa Urshalima wa, yǝ ntii fǝɗkǝra wa.

¹⁵ Pa ɓaa Yahudawa ɓa ɓǝ kura nhiinyanhiinyato, ɓǝ taa me, “Tomtomni eɗ ɗa, yǝ taasǝ nkaamǝra maa mbuka ra maasou, si yǝ ko a han kaukau ɓa rau?”

¹⁶ Yeso yǝɓǝ kak ya nkee me, “Fǝɗkǝra nǝn tom sǝra, sem waano ra, ǝn siso fiɗsǝ a yaa yǝ timinǝsǝ ya wa.

¹⁷ Hana yamni yaa yǝ taasǝ me kiya tom mbu Kaa yǝn taasǝ ɓa ya, kiyaa maa me ko fǝɗkǝra naa fiɗ a Kaa niu, ko nǝn kan ma nkweera neu.

¹⁸ Yaa yǝn fǝɗkǝsǝ mbuka men nkweera ira ya, yǝn taa me ɓaa na mbarta. Pa yaa yǝn tomsǝ tinima me aa na mbarta yaa yǝ timisǝsǝ ya wa, ǝn sase eɗ ɓongtǝra ya, para kǝra sem a ɗuura ira ra.

¹⁹ Sem Musa yǝ nasǝsǝ masaka wa rau? Nding siso yaake sem kǝn hana fin a ɗaaso waaso, yǝ ɓǝɗsǝ masaka siso wa ra. Yaa tomtomni sǝn yausǝ me kǝsǝnǝ toɗɗo?”

²⁰ Ɓaa kwausǝ dem ɓa, ɓaa nkee me, “Ngǝ ma nsaamse, yaa nkee me kiyǝ ngǝ toɗ niu?”

²¹ Yeso yǝɓǝ nkee me, “Nǝ tom mbu nhiinyanhiinya ɓa fin maɗ, pa nsaad waaso ǝsǝ tom mbu weɗara ɓa.

²² Musa yǝ nkeesǝ me sǝ fir emɓǝsa, hana sem sase kayǝ ntiisǝ wa ra, pa sirta ɓǝsa ntii ɓosa. Hana maaso sǝn fir emɓǝsa a kaa wiiya Yahudawa ɓa.

²³ Yaa me kǝsǝ nkaa sǝ fir auwe a kaa nwiinya ɓa, me a na mbarta masaka Musa wa, yaa tomtomni sǝn nfiisǝ ma niina me nǝ roɓ ete a kaa nwiinya ɓau?

²⁴ Sǝ lee kankiita a mbu sǝn wǝrsǝ ma nuuwa ɓa, pa sǝ kan kiita u yǝsǝ keke wa.”

Yeso yǝn Almasehou?

²⁵ Pa a fer siso, ɓaata ɓaa Urshalima ɓa, ɓǝ ntii taa wa me, “Eɗ ɗa, ǝn yaa ɓǝn kǝrsǝsǝ me ɓǝka toɗ ya rau?

²⁶ Pa yǝ nwa, yǝn kan a talte, ɓǝ ɗǝm nkaa ɓa nkee mbuka ra. Nwa wiina ɓǝ wee yauwon me yǝn Almaseho nǝu?

²⁷ Pa si ndǝ maa han eɗ ɗa yǝ fiɗsǝ ɓan, pa me Almaseho yǝ won, yaake yǝ maa han yǝ fiɗsǝ ɓa ra.”

²⁸ Yeso yaa fǝɗkǝra a taanda hit ɓǝɗ Kaa Urshalima wa, pa yǝ nik kwaro yaa nkee me, “Ee nwa, sǝ maa nǝn, ɗǝm sǝ maa han nǝ fiɗsǝ ɓan. Nǝ sema ham ɓa me nkweera na ra, yaa yǝ timinǝsǝ ya, ǝn yaa ma ɓongtǝra ya. Sǝ maasǝ ra,

²⁹ pa nwaano nǝ maasǝn me yǝ timinǝ sase.”

³⁰ Pa Yeso yǝ nkeesǝ mbusa maaso wa, ɓǝn taa me ɓǝka ma, pa ɓǝ nkaa ra, me fer usu kan sundu ra.

³¹ Hana maaso ɓaata dem a ɗaaso ɓoso ɓǝ na ɓongtǝra ma sasen. Ɓǝ nkee me, “Me Almaseho yǝ wo nǝ, kiya nkaa yǝ tom mbu nhiinyanhiinya ɓa, a faɗ u nwau?”

³² Ɓaa Farisiyawa ɓa, ɓǝ kura ɓeta ɓǝn kan a ɗaaso ɓoso a ɗuura Yeso ra wa. Pa kuɓ kwang nek mbusa ya ma ɓaa Farisiyawa ɓa, ɓǝ timi ɓan war hit Kaa wa ɓa ya, me ɓǝ ma Yeso.

³³ Yeso yǝɓǝ nkee me, “Fer kǝna kaɗ ma sase wa pee ngeek, pa kǝnǝ ko a yaa yǝ timinǝsǝ yaa ni.

³⁴ Kǝsǝnǝ kǝrǝ, pa sǝnǝ wǝr ra,’ ɗǝm ‘Han nǝsǝ ɓa, sǝ nkaa sǝ wo ra.”

³⁵ Pa ɓaa Yahudawa ɓa, ɓǝ taa ɓaatǝ me, “Eɗ ɗa yǝn taa me yǝ ko nau, yǝn nkeesǝ me ndǝ wǝr ra wau? Kiyǝ ko a han ɓet ɓǝnda Yahudawa ɓaa ɓǝ yaasǝsǝ ɓǝ kaɗ a ɗaaso ɓaa Helenawa ɓa, me yǝ fǝɗkǝ ɓaa Helenawa ɓa kǝnsou?

³⁶ Pa yǝn sen mbiu, yǝ nkeesǝ me, ‘Kǝsǝnǝ kǝrǝ, pa sǝnǝ wǝr ra,’ ɗǝm ‘Han nǝsǝ ɓa, sǝ nkaa sǝ wo ra’?”

³⁷ A kaa feɗefeɗe hiira mbukamsa kara wa, u yǝsǝn kaa kwang a mbukamsa siso wa, Yeso yǝ nii kǝɗ, yǝ nik kwaro, yǝ nkee me, “Hana yamni yaa yǝn kurasǝ mbraa sima ya, yǝ wo a nani yǝ wee.

³⁸ Hana yamni yaa yǝ nasǝ ɓongtǝra ma niina ya, nga ɓaa nyorsǝ a likarkar Kaa wa ra me, serserta mbraa wa u ǝn nasǝ huurtu wa, kǝ fiɗ a kuɗa a sanii.”

³⁹ U nwa, yǝn nkee a ɗuura Wis Kaa wa ra, u ɓaa ɓǝ nasǝ ɓongtǝra ɓa, ɓǝ kaa kon nwa, me nding a fer siso, ɓaa na Wiso ra, me ɓaa too Yeso kweɗ ɗa.

⁴⁰ Ɓǝ kurasǝ mbusa maaso wa, ɓaata ɓeta ɓǝ nkee me, “Ɓongtǝra eɗ ɗa ǝn an nawanto ya.”

⁴¹ Ɓaata ɓǝ nkee me, “U nwa ǝn Almaseho.” Pa ɓaata ɓǝ taa me, “Kǝ tomtomni Almaseho kiyaa fiɗ Galili?”

⁴² Ɓaa nyor a likarkar Kaa wa me, Almaseho kiyaa fiɗ a tuwa Dauda wa ɗǝm kiyǝ fiɗ a Baitalami, aa ur Dauda yǝ kaɗsǝ wa rau?

⁴³ Pa ɓeta ɓǝ ɓaa raɓ a ɗuura Yeso ra.

⁴⁴ Ɓaata ɓǝn kǝr me ɓaa ma, pa yaake yǝ sun yaa ntee ra.

Ɓaa Yahudawa ɓa, ɓǝ yau ma Yeso ra

⁴⁵ Pa ɓan war hit Kaa Urshalima ɓa, ɓǝ kang a kuɓsa nek mbusa sa ma ɓaa Farisiyawa ɓa, ɓǝɓǝ nkee me, “Tomtomni sǝ wosǝsǝ rau?”

⁴⁶ Pa ɓan wara sǝɓa, ɓǝ kak me, “Yaake yǝ pǝta kan mara nga sase ra!”

⁴⁷ Pa ɓaa Farisiyawa ɓa, ɓǝɓǝ nkee me, “Nwa, saase kǝn, eɗ isi yǝ nlaasǝ nǝu?

⁴⁸ Ko kǝ taa yaake hana fin a ɗaaso wiina, hana a ɗaaso ɓaa Farisiyawa ɓa, u yǝ nasǝ ɓongtǝra ma sase wau?

⁴⁹ Awo. Pa me nga ɓet ɓǝ kwausǝ dem ɓa, ɓosa ɓǝ maa mbuka a ɗuura fǝɗkǝra Musa ra ra, ɓǝ ma meeto a ɗuura ɓora.”

⁵⁰ Nikodimu yaa yǝ kosǝ a Yeso ni a ntiiri ya, yǝ fin a ɗaaso ɓaa Farisiyawa ɓa, yǝɓǝ nkee me,

⁵¹ “Masaka yau saa me aa nǝng kiita ete si kura a ee isi nhe ra rau?”

⁵² Pa ɓaa kak me, “Ngase ngǝn yaa Galili ya kǝnǝu? Aa sengge ɗau a likarkar Kaa wa, ngǝ wǝr an nawanto ke pǝtasǝ fiɗɗo a put Galili wa ra.”

Toone ɓaa masǝsǝ a pepeto ya

⁵³ Pa hana yamni, yǝ faɗ ɗuuru usu.