Yohanna 6 - Lala NT

Yeso yǝ nkwee ɓeta pusa pu pu wonon

¹ Ndiira maaso wa, Yeso yǝ tal yǝ ko aulaara Galili ya, u ǝn yarsǝ me aulaara Tibariya wa,

² ɓeta ɓǝ kwau dem me ɓǝn wǝr mbu nhiinyanhiinya yǝn tomsǝ ma ɓaa sem kwakwa ra ɓa.

³ Pa Yeso yǝ taa yolo yǝ kaɗ ma emfǝɗkaa ɓǝsa.

⁴ A fer siso, mbukamsa tadko u ɓaa Yahudawa ɓa tomon kwang.

⁵ Pa Yeso yǝ niksǝ ɗuura yǝ wǝr ɓeta dem ɓǝn wowo a sanii wa, yǝ nkee Filibus me, “Kǝ ndǝ ko ndǝ tiri nkaadǝng nau, kǝ nda na ɓet ɓa, ɓǝ kǝweu?”

⁶ Yǝ taa mbusa maaso me yaa pǝta, me a senda ira yǝ wee maa mbu kiya tom ɓan.

⁷ Filibus yǝ kak me, “Hana koɓaa u ka puu antinima ya u ofe kurkurun wa, aa maa tiri nkaadǝng u hana yamni kiyaa taa ngeek wa ra!”

⁸ Fin a ɗaaso emfǝɗkaa ɓisa wa, Andarawus, ate Siman Bitrus ya, yǝ nkee Yeso me,

⁹ “Au ke nwa, yǝ ma nkaadǝng ngeek ngeek wonon ma nsenya ngeek ngeek raɓ. Yaa pa kǝ tomtom ni aa nkwee maa ɓeta dem ɓau?”

¹⁰ Pa Yeso yǝ nkee me, “Sǝ ti ɓeta ɓǝ kaɗ ɗa.” A hansǝsǝ ka pitira kiyo ra dem, pa parata ɓǝ kaɗa, ɓeta kansǝ pusa pu puu woonon.

¹¹ Pa Yeso yǝ too nkaadǝng suwa, yǝ na himara Kaa, pa yǝ ɓaa ɓaa ɓǝ kaɗsǝ sǝɓa, hana yamni nga yǝn taasǝ wa. Yǝ tom maaso ɗǝm ma nseeya kasa.

¹² Pa ɓǝ kǝusǝ ɓǝ nkwee wa, Yeso yǝ nkee emfǝɗkaa ɓǝsa me, “Sǝ kwau mbu fesǝ ɓa. Sǝ lee mbuka aa tǝblǝ ra.”

¹³ Pa ɓǝ kwau mbu fesǝ ɓa, ɓǝ kung hote pu nhaa raɓ.

¹⁴ Pa ɓeta ɓǝ wǝrsǝ mbu nhiinyanhiinya Yeso yǝ tomsǝ ɓa wa, ɓǝ ntii ɓǝ nkee me, “Ɓongtǝra eɗ ɗa, ǝn sase annawanto ndǝn warsǝ me kiyaa wo a put ntaadi wa ya.”

¹⁵ Pa waso Yeso yǝ maan me ɓǝn taa me ɓaa ti me yǝɓǝ tom kuɓu ɓoso ɗaɗ, pa yǝ nii yǝ taa a yolo ma nkweera ira.

Yeso yǝ siki a ɗuura mbraa ra

¹⁶ Ɗikira kansǝ wa, emfǝɗkaa ɓisa ɓǝ ham ɓǝ ko a aulaara,

¹⁷ a han ɓǝ kansǝ a kurnyaamo ɓa, me ɓǝ tal ɓǝ ko Kafarnahum. A fersiso ɗikira tommon, Yeso yǝ wo sundu yǝɓǝ ntee ra.

¹⁸ Pa wiine yoro ke aa nyaa ma kokrokto.

¹⁹ Ndiira ɓǝ sikisǝ kilometa woonon wa, pa ɓǝ wǝr Yeso yǝn wowo ma lau kurnyaamo wa, yǝn sikinsiki a ɗuura mbraa ra wa, pa kokto ɓǝ ma, ɓǝ maɗki.

²⁰ Pa yǝɓǝ nkee me, “Ən niina, sǝ kura kokto ra.”

²¹ Pa ɓǝ yau me ɓaa too a kurnyaamo kawa, pa nok kǝnso kurnyaamo kawa yǝ kana kira a ham kama ɓǝ kosǝ ɓa.

²² Pa handa nweesǝ wa, ɓaa kaɓǝsǝ a kira aulaara sǝɓa, ɓǝ ɗim me ura kurnyaamo ka wo fin, ɗǝm Yeso yǝ ɓǝɗ emfǝɗkaa ɓǝsa ra, ɓǝ ko seɗe ɓoɓɓǝsa.

²³ Pa ɓǝ wǝr kurnyaamo u fiɗsǝ Tibariya wa, ɓǝ wo ɓǝ nǝɗ kwang ma ham ɓeta kaɓǝ kǝusǝ nkaadǝng a ndiira Ankundi yǝ nasǝ himara asi wa.

²⁴ Pa ɓet kaɓa ɓǝ wǝrsǝ Yeso ma emfǝɗkaa ɓǝsa ɓǝ sem kǝnso ra wa, pa ɓǝ kana kurnyaamo ɓǝ faɗ Kafarnahum me ko ɓaa kǝrǝ.

Yeso yǝn nkaadǝng huurtu wa

²⁵ Pa ɓǝ wǝrsǝsǝ aa tale aulaara ya wa, pa ɓaa taa me, “Mallǝm, ngǝ wo kauni a ham ɓau?”

²⁶ Yeso yǝɓǝ kak yǝ nkee me, “Ɓongtǝra nǝn nkeesǝ, sǝn kǝrnǝ sem me mbu nhiinyanhiinya nǝn tomsǝ ɓa ra, pa me sǝn kǝrnǝ me nkaadǝng sǝ kǝusǝ sǝ nkwee wa.

²⁷ Sǝ kǝr mbuseya ka tǝblǝ ɓa ra, pa sǝ kǝr mbuseya kǝsa taa huurtu pakarese wa, u Au Ete ya kiyǝ sǝn na wa. Me ǝn sase u Kaa Papa weesǝ weɗɗa me yǝ yau ma sasen ya wa.”

²⁸ Pa ɓaa taa me, “Kǝtǝ tom tinima mbi u Kaa yǝn taasǝ wau?”

²⁹ Yeso yǝ kak me, “Tinima Kaa ma, ǝn siso nwa, aa yau ma yaa yǝ timisǝsǝ ya.”

³⁰ Pa ɓaa taa me, “Ən mbi nhiinyanhiinya naɓa kǝnga tom me tǝ na ɓongtǝra ma ngaseu? Kǝngǝ tom mbiu?

³¹ Sirta ɓǝta ɓǝ kǝu manna ɗaan a sanglo, nga ɓaa nyorsǝ a likarkar wa me, ‘Yǝ na ɓǝ nkaadǝng u fiɗsǝ a liura wa, ɓǝ kǝuwǝ.’ ”

³² Yeso yǝɓǝ nkee me, “Nǝn nkeesǝ ɓongtǝra, sem Musa yǝ nasǝsǝ nkaadǝng fiɗsǝ a liura siso wa ra, pa ǝn paane, sase yǝ nasǝsǝ nkaadǝng u ɓongtǝra fiɗsǝ a liura wa.

³³ Me nkaadǝng u Kaa wa, ǝn sase yaa yǝ fiɗsǝ a liura yǝ ham ya, pa me yǝ na huurtu ɓet put ntaadi wa ɓa.”

³⁴ Ɓǝ nkee me, “Yaa kwang ya, ngaa waso ǝtǝ na nkaadǝng siso.”

³⁵ Pa Yeso yǝɓǝ nkee me, “Nǝn nkaadǝng ǝn nasǝ huurtu wa. Yaa yǝ wosǝ a nani ya, ɗoora aa si ɗǝm ra, ɗǝm yaa yǝ nasǝ ɓongtǝra ma niina ya, mbraa aa si ɗǝm ra.

³⁶ Pa nga nǝ weesǝsǝ nkee wa, sǝ wǝr nǝn, pa nding waso sǝ na ɓongtǝra ra.

³⁷ Ɓaa nsaad paane yǝ nanǝsǝ ɓa, ɓǝkǝ wo a nani, ɗǝm nsaad yaa yǝ wosǝ a nani ya, naa pǝta pǝǝ wo ra.

³⁸ Nǝ fiɗ a liura me nǝ wo, sem me nǝ tom mbu nǝn yausǝ ɓa ra, pa me nǝ tom mbu yaa yǝ timinǝsǝ ya, yǝn taasǝ ɓa.

³⁹ Pa nwa ǝn mbu yaa yǝ timinǝsǝ ya, yǝn taasǝ ɓa, me nǝ lee yaake fin aa ɗaaso nsaad ɓaa yǝ nanǝsǝ ɓa, yǝ leetǝ ra, pa me nǝɓǝ niki a kaa feɗefeɗe ɓa.

⁴⁰ Me paane yǝn taa me, nsaad yaa yǝ sengesǝ Auwesi ya, yǝ ɗǝm na ɓongtǝra ma sase ya, kiya taa huurtu pakarese wa, ɗǝm ka niki a kaa feɗefeɗe ɓa.”

⁴¹ Pa ɓaa Yahudawa ɓa ɓǝ ntii nhurunhuru a ɗuura ira, me yǝ nkeesǝ me, “Niina nǝ nkaadǝng u fiɗsǝ a liura wa.”

⁴² Pa ɓǝ nkee me, “U nwa sem Yeso au Yusufu ya, u ndǝ maasǝ papisi ma maasi wa rau? Pa tomtomni yǝn nkeesǝ me, ‘Nǝ fiɗ a liurau’?”

⁴³ Pa Yeso yǝɓǝ kak me, “Sǝ lee nhurunhuru aa ɗaaso waaso.”

⁴⁴ “Yaake sem kǝn kiya wo a nani wa ra, me sem yaa Kaa yǝ tungsǝsǝ ya ra, ǝn sase kǝnǝ sa nik a kaa peɗepeɗe ɓa.

⁴⁵ Me ɓaa nyorsǝ a likarkaraa ɓan nawanto ɓa me, ‘Nsaad ɓosa, Kaa kiyǝ ɓǝ fǝɗkǝ.’ Hanan yamni yaa yǝ kurasǝ Paane ya, yǝ ɗǝm fǝɗkǝ a sani ya, yǝ kǝ wo a nani.

⁴⁶ Yaake sem kǝn yǝ pǝtasǝ wǝr Papa kaya wa ra, men sem sase yaa yǝ fiɗsǝ a Kaa ni ya ra, ǝn sase fin mbusa yǝ wǝrsǝ Papa ya.

⁴⁷ Nǝn nkeesǝ ɓongtǝra, yaa yǝ nasǝ ɓongtǝra ya, yǝ ma huurtu pakarese wa.

⁴⁸ Nǝn nkaadǝng ǝn nasǝ huurtu wa.

⁴⁹ Sirta ɓǝsaa ɓǝ se manna ɗaan a sanglo, pa nding siso ɓǝ woɗɗon.

⁵⁰ Pa nwa sǝ sengge nkaadǝng u fiɗsǝ a liura wa, u ete kiyaa kǝu yǝ woɗ ɗa wa.

⁵¹ Nǝn nkaadǝng ǝn nasǝ huurtu u fiɗsǝ a liura wa. Me yaake yǝ kǝu nkaadǝng siso, kiyǝ taa huurtu pakarese wa. Nkaadǝng kawa ǝn maabiri yaane, u kǝna na wa, me ɓet put ntaadi wa ɓa, ɓǝ taa huurtu.”

⁵² Pa ɓaa Yahudawa ɓa ɓǝ ntii rǝnǝta aa ɗaaso ɓosa me, “Kǝ tomtomni eɗ ɗa kiyǝ ndǝ na maabiri isi, ndǝ kǝuwǝu?”

⁵³ Pa Yeso yǝɓǝ nkee me, “Nǝn nkeesǝ ɓongtǝra, ndub me sǝ kǝu maabiri Au Ete ya wan, ɗǝm sǝ wee monma iman, me sem maaso ra, sǝ sem ma huurtu ra.

⁵⁴ Hana yamni yaa yǝ kǝusǝ maabiri yaane ya, ɗǝm yǝ wee monma na ya, yǝ ma huurtu pakarese wa, ɗǝm kǝnǝ nik a kaa peɗepeɗe ɓa.

⁵⁵ Me maabiri yaane ǝn mbuse ɓong ɓa, monma na ɗǝm ǝn mbu wee ɓong ɓa

⁵⁶ Hana yamni yaa yǝ kǝusǝ maabiri yaane ya, ɗǝm yǝ wee monma na ya, yǝ ke ma niina, ɗǝm niina kǝn, nǝ ke ma sase.

⁵⁷ Nga papa yaa ma huurtu yǝ timinǝsǝ ya, nǝn ɗanyǝ men sase, maaso ɗǝm yaa nǝ kangsǝ mbuseya ɓisa ya, kiyǝ ɗanyǝ men niina.

⁵⁸ Ndǝ niina nkaadǝng fiɗsǝ a liura wa. Sirta ɓǝsaa ɓǝ kǝu manna fiɗsǝ a liura ya, pa nding siso, ɓǝ woɗɗon, pa yaa nǝ kangsǝ mbuseya ɓisa ya, kiyǝ ɗanyǝ pakarese wa.”

⁵⁹ Yǝ nkee mbusǝsa a fer yǝn tomsǝ fǝɗkǝra Kafarnahum wa, a hit kwau ɓaa Yahudawa ɓa.

Emfǝɗkaa dem ɓǝ moon ɓǝ lee Yeso

⁶⁰ Ɓǝ kurasǝ maaso wa, emfǝɗkaa ɓǝsa dem ɓǝ nkee me, “Fǝɗkǝra ra lǝklǝk. Yaa kiyǝ kura niu?”

⁶¹ Yeso yǝ wee maan me emfǝɗkaa ɓǝsa ɓaa nhurunhuru a fǝɗkǝra ra, pa yǝɓǝ nkee me, “Fǝɗkǝra sǝsa kwaasǝ sǝ kang ma nɗiira a naɓongtǝra waaso niu?

⁶² Yaa kǝ tomtomni me sǝ wǝr Au Ete ya, yǝn taataa, yǝn koko a han yǝ fiɗsǝ ɓau?

⁶³ Wis nwa, ǝn sase yǝn nasǝ huurtu ya, maabiri ya, yǝ sem mbuka ra, yǝ sal. Matamse nǝ nkeesǝsǝ ta, ǝn Wiso ma ɗǝm huurtu.

⁶⁴ Nɗing siso ɓaata a ɗaaso waso ɓǝ na ɓongtǝra ra.” Me Yeso tǝng a ntiiri wa, yǝ wee maan ma yaa yǝ na ɓongtǝra ra ya, ɗǝm ma yaa kiyaa sa fang ya.

⁶⁵ Yǝ faɗ wiyo yaa nkee me, “Ən siso nǝ nkeesǝsǝ me, yaake yǝ nkaa yǝ wo a nani ra, men yaa Papa yǝ yausǝsǝ ya ra.”

⁶⁶ Ndiira mbusǝsǝ wa, ɓaata a ɗaaso emfǝɗkaa ɓisa ɓa dem, ɓǝ kǝrtǝ ndiira, ɓǝ yau me ɓaa ɓǝɗ ɗǝm ra.

⁶⁷ Pa Yeso yǝ taa ɓaa puu a nhaa raɓ sǝɓa me, “Sǝn taa me sǝ faɗ kǝnǝu?”

⁶⁸ Pa Siman Bitrus yaa kak, yǝ nkee me, “Ankundi, tǝ ko a yamni niu? Ngǝ ma matamse huurtu pakarese wa.

⁶⁹ Tǝ na ɓongtǝran ɗǝm tǝ maan me, ngǝn Yaa Ɗekɗek ya, u Kaa wa.”

⁷⁰ Pa Yeso yǝɓǝ kak me, “Nǝ tausǝ niina puu a haa raɓ, pa fin a ɗaaso waaso yǝn kuɓ nsaamese wa!”

⁷¹ U nwa yǝn kan a ɗuura Yahuda au Siman Iskariyoti ya, sase hana ka yǝsǝ ɗaan a ɗaaso ɓaa pu nhaa raɓ sǝsa wa, pa ǝn sase kiyaa sa fang a wiiyo ya.