Yohanna 5 - Lala NT

Yeso yǝ roɓ puura a npoo mbraa wa Betasda

¹ Ndiira maaso wa, Yeso yǝ ko a mbukamsa ɓaa Yahudawa ɓa, kǝra Urshalima.

² A Urshalima kǝnso npoo mbraa kǝraa kǝn u ɓa leurǝsǝ ma pillanga woonon wa. Ma ee Yahudawa ya, ɓan yar me Betasda. Npoo mbraa kawa yǝ kwang ma Inntii Tǝmnkaa ya.

^3-4 A pillanga woonon sǝsa, ɓet sem kwakwa ra ɓa dem, ma ntaata ma puuta ma ɓaa neme portǝsǝ ɓa, ɓǝ solon ɓǝn tǝrkǝnso nfee.

⁵ A ham sǝsa, yaake kǝn u yǝ meesǝ pwataatǝn nhaa kurkurun ma siyo wa.

⁶ Pa Yeso wǝrsǝsǝ ɗuk wa, ɗǝm yǝ maan me eɗ sisi yǝ tǝrǝn kwang ma siyo sison, yǝ taa eɗ sisi me, “Ngǝn taa me ngǝ roɓɓou?”

⁷ Eɗ ma siyo siya, yaa kak yaa nkee me, “Yaa kwang ya, nǝ sem ma yaa ki yǝ nǝn kwasi nǝ kana mbraa sǝma a fer ɓaa nyaasǝ mbraa wa ra. Me nǝ kweetǝ me nǝ kana, pa yaake yǝnǝ nkaa kano.”

⁸ Pa Yeso yaa nkee me, “Aa nii! Aa too ɗikra nga, ngǝ siki.”

⁹ Nok kǝnso, eɗ kaya yǝ roɓɓo, yǝ too ɗikra ira, yǝ siki. Mbusǝsa ǝn tom a kaa nwiiya Yahudawa ɓa,

¹⁰ pa ɓaa Yahudawa ɓa, ɓǝ nkee yaa ɓaa roɓsǝsǝ siya me, “Naso ǝn kaa nwiiya, masaka saangǝn me ngǝ too ɗikra ra.”

¹¹ Pa eɗ kaya yǝɓǝ kak me, “Yaa yǝ roɓnǝsǝ ya, ǝn sase yǝ nkeenǝsǝ me nǝ too ɗikra na siki.”

¹² Pa ɓaa taa me, “Ən yamni yǝ nkee ngǝsǝ me ngǝ too ɗikra nga, nga sikiu?”

¹³ Yaa ɓaa roɓsǝsǝ siya, yǝ maa yaa yǝ roɓsǝsǝ ya ra, me Yeso yǝ wee kano a ɗaaso ɓeta kwausǝ dem kǝnso wan.

¹⁴ Ndiira usu, Yeso ɓǝ pam ma eɗ kaya a hit ɓǝɗ Kaa Urshalima wa, pa ya nkee me, “Ngǝ wǝrǝn waso ngǝ roɓɓon. Yaa aa lee tom tentento wa, me sem maaso ra, mbu faɗsǝ u nwa ɓa, kǝngǝ ma ɗǝm.”

¹⁵ Pa eɗ kaya, yǝ nii, yǝ ko yǝ nkee wiina ɓaa Yahudawa ɓa me, yaa yǝ roɓnǝsǝ ya, ǝn Yeso.

Kwangto Yeso Au Kaa ya wa

¹⁶ Mbusa tomsǝ maaso wa, pa ɓaa Yahudawa ɓa, ɓǝ ntii na Yeso wa kongsa, me yǝn tom mbusǝsa a kaa nwiiya Yahudawa ɓa.

¹⁷ Pa Yeso yǝɓǝ nkee me, “Paane yaa tinima nɗing waso, nase kǝn naa tinima.”

¹⁸ Mara yǝ nkeesǝ sǝra kwa ɓaa Yahudawa ɓa, ɓǝn kǝr me ɓaa toɗɗo. Ɓǝ nkee me, sem me yǝ kau masaka kaa nwiiya ɓa maɗɗa, pa yǝn nkee me, Kaa ǝn papasi, me maaso, yǝn weɗɗa me yǝ keke ma Kaa.

¹⁹ Pa Yeso yǝɓǝ kak me, “Nǝn nkeesǝ ɓongtǝra, Auwe yǝ nkaa yǝ tom mbuka ma nkweera ira ra, yǝn tom mbu yǝ wǝrsǝ Papsi yǝn tomsǝ ɓa, me nsaad mbu Papa yǝn tomsǝ ɓa, maaso Auwe yǝn tomsǝ wa kǝn.

²⁰ Me Papa yǝn yau Auwesi, ɗǝm yǝn weɗasǝ nsaad mbu ma nkweera ira yǝn tomsǝ ɓa, ɗǝm kiyaa weɗɗa tinimsa faɗsǝ u nwa ma, me ǝsǝ tom mbu weɗara ɓa.

²¹ Nga Papa yǝ niksǝ wote yǝɓǝ na huurtu wa, maaso kǝn Auwe kiya nkaa yǝ na huurtu yaa yǝ tǝǝsǝsǝ ya.

²² Maaso ɗǝm Papa yǝ kanaa kiita yaake ra, pa yǝ na kwangto siso nsaad Auwesi,

²³ me hana yamni yǝ na mbarta Auwesi nga ɓǝn nasǝ mbarta Papa wa. Nsaad yaa yǝ na mbarta Au sisi ra ya, yǝ na mbarta Papa yaa yǝ timisǝsǝ ya ra.

²⁴ “Nǝn nkeesǝ ɓongtǝra, yaa yǝ kurasǝ mara na ya, yǝ ɗǝm na ɓongtǝra ma yaa yǝ timinǝsǝ ya, yǝ ma huurtu pakarese wa, ɗǝm ɓaa aa kan kiita ra, yǝ wee tal woɗɗa wan, yǝ taa huurtun.

²⁵ Nǝn nkeesǝ ɓongtǝra, ferko kǝ wo, hana waso wee won, fer wote ka kura kwar Au Kaa ya wa, ɓaa ɓǝ kurasǝ ɓa ɗǝm, kǝɓǝ taa huurtu.

²⁶ Nga Papa ma nkweeresi yǝsǝn ntiiri huurtu ya wa, maaso ɗǝm yǝ na Auwesi yǝ tom ntiiri taa huurtu wa ya.

²⁷ Ɗǝm yǝ nasǝ kwangto yǝ kan kiita, me sase yǝn Au Ete ya.

²⁸ “Mbusǝsa ǝsǝ tom mbu weɗara ɓa ra, me fer ko kǝ wo, u ɓaa ɓǝsǝ ɗaan a tina ɓa nsaad, ɓǝkǝ kura kwar usu,

²⁹ ɗǝm ɓǝ fiɗ taandi, ɓaa ɓǝ tomsǝ mbu yaɓ ɓa wa, ɓǝkǝ nii ɓǝ taa huurtu, pa ɓaa ɓǝ tomsǝ mbu yaɓ ɓa ra wa, ɓǝkǝ nii, ɓaa kǝɓǝ kan kiita.

³⁰ Niina ma nkweerane, nǝ nkaa nǝ tom mbuka ra, nǝn kan kiita nga Kaa yǝ nkeenǝsǝ nǝ tom ɓa. Siso mbu kwasǝ kankiita nwaano ǝn u ɓongtǝra wa, me nǝn tomaa me nǝ hur kuɗa nkweera na ra, pa me nǝ hur kuɗa yaa yǝ timinǝsǝ ya.”

Nkee mbuka a ɗuura Yeso ra

³¹ “Me nǝ kan mara a ɗuura na, mara sǝra aa tom ɓongtǝra ra.

³² Pa yaake kǝn yaa yǝn kansǝ mara a ɗuura na ya, ɗǝm nǝ maan me mara yǝn kansǝ a ɗuura na ra, ǝn ndǝ ɓongtǝra.

³³ “Sǝ timi ɓeta a Yohanna ni, sase ɗǝm yǝ nkeesǝ ɓongtǝran.

³⁴ Sem me nǝ nǝɗ ɗaa a ɗuura mara ɓeta ra ra. Nǝ nkee maaso me sǝ taa kon nkweera wa.

³⁵ Yohanna yǝ arkumta ǝn masǝnma wa, u ǝn nasǝ ɗekɗekto wa, ɗǝm sǝ yauwan me sǝ hur kuɗa ma ɗekɗekto usu, u tǝro ngeek wa.

³⁶ “Nǝma mara kǝnaa nkee a ɗuura naa u faɗsǝ u Yohanna nkeesǝ a ɗuura na wan. Me tinimsa pane yǝ nanǝsǝ me nǝ tom ɓa, u nǝn tomsǝntom waso wa, ndǝ ɓosa ɓǝn nkeesǝ mara a ɗuura na ra me Papa yǝ tiniminǝ sase ya.

³⁷ Papa yaa yǝ timinǝsǝ ya, sase ma nkweera ira yǝ nkee mara a ɗuura na nǝn. Sǝ pǝta kura kwar usu ra, ɗǝm sǝ pǝtasǝ wǝro ko yǝ miniu ra.

³⁸ Mara ira kaɗ a kuti saa ra, me sǝ na ɓongtǝra ma yaa papa yǝ timisǝ ya ra.

³⁹ Sǝn kau likarkar mara Kaa ra wa nfee, me sǝn sen ko kǝsǝ taa huurtu pakarese wa ɗaan asi. Likarkara sisa, ndǝ ɓosa ɓǝn nkeesǝ mara a ɗuura na wa.

⁴⁰ Pa nsaad siso, sǝ yau sǝ wo a nani me sǝ taa huurtu ra.

⁴¹ “Nǝ konaa nyoota a ɓetani ra.

⁴² Pa nǝ maasǝn, nǝ maan me sǝ sem ma yauta Kaa ta a kuti yaase ra.

⁴³ Nǝ wo a ɗǝnda paane ra, sǝ yau sǝnǝ konɗa, pa me yaake ɓol yǝ wo ma ɗǝnda nkweera ira ra, kǝsaa kono.

⁴⁴ Yaa kǝsǝ tomtom ni sǝ na ɓongtǝra, me sǝn kon nyoota a ɓaatǝ ni, pa sǝ kweetǝ me sǝ taa nyoota u fiɗsǝ a Kaa ni, yaa yǝsǝ fin mbusa ya rau?

⁴⁵ “Pa sǝ sen me ko kǝnǝsǝ ti kaura a papa ni ra. Yaa kiyǝsǝn ti kaura ya ǝn Musa, ǝn sase yaa sǝ tisǝ kanggo a sanii ya.

⁴⁶ Me kasǝ na ɓongtǝra a Musa nin, kama sǝ na ɓongtǝra a nanin, me Musa yǝ nyor a ɗuura nan.

⁴⁷ Pa me sǝ yau ma mbu yǝ nyorsǝ a likarkar ɓa ra, pa kǝ tomtomni kǝsaa yau ma mara naau?”