Yohanna 4 - Lala NT

Yeso ma toone Samariya ke

¹ Ɓaa Farisiyawa ɓa, ɓǝn kura me, Yeso yǝn taa emfǝɗkaa dem a faɗ u Yohanna wa, ɗǝm yǝn tom ɓǝ baptisma,

² pa a ɓongtǝrato sem Yeso ma nkweera ira yǝn tomsǝ baptisma wa ra, ǝn emfǝɗkaa ɓǝsa.

³ Pa Ankundi kurasǝ mara sǝra wa, yǝ lee put Yahudiya wa, yǝ kang Galili.

⁴ Waso tomon ɗaɗ Yeso yǝ ɓǝɗ ma lau Samariya wa.

⁵ Pa yǝ wo a ur ko ɗaan Samariya un yarsǝ me Saikar wa. Ur kawa yǝ kwang ma put Yakubu yǝ nasǝ auwesi Yusufu wa.

⁶ A hansǝsa bundu Yakubu wa kǝnso. Yeso yǝ kongsǝ a siko wa, pa yǝ kaɗ a ee bundu sisi. Mbusa ǝn tom si kaa ɗa.

⁷ Pa toone Samariya ke yǝ wo bundu me yǝ nkwee mbraa. Pa Yeso yaa nkee me, “Ənǝ paa mbraa nǝ wee.”

⁸ A fer siso emfǝɗkaa ɓǝsa ɓǝ wee kano a ɗaaso ɗuurun, me ko ɓǝ kǝr mbuseya.

⁹ Pa toone eɗ Samariya ya, yǝ nkee Yeso me, “Tomtomni ngase yaa Yahuda ya, kǝ ngǝ kǝna mbraa wewe ma a nani, sinǝ yaa Samariya yau?” Yǝ nkee maaso, me ɓaa Yahudawa ɓa, ɓǝ pǝra ma ɓaa Samariyawa ɓa ra.

¹⁰ Yeso yaa kak yaa nkee me, “Me kangǝ maa saltǝra Kaa ran, ɗǝm me ngǝ maa yaa yǝn kǝna ngǝsǝ mbraa ya, kama kǝ nga kǝna, sase kǝn, kiyǝ ngǝ na mbraa huurtu ma.”

¹¹ Pa toone kaya yǝ nkee me, “Yaa kwang ya, nwa ngǝ sem ma mbu wiin mbraa ɓa ra, bundu kawa ɗǝm kututuɓ. Pa kǝ ngǝ taa mbraa huurtu so wa nau?

¹² Ngǝ faɗ paate Yakubu yaa yǝ leetǝsǝ ɓundu wa ya, sase ma nkweera ira ma em ɓǝsa ma naa isa, ɓǝ weesǝ mbraa ima wa nǝu?”

¹³ Yeso yǝ kak yaa nkee me, “Nsaad yaa yǝ weesǝ mbraa ma ya, mbraa kǝ ɓaarǝ a si ɗǝm.

¹⁴ Pa yaa yǝ weesǝ mbraa kǝnǝsa na ɓa, mbraa a ɓaarǝ a si ɗǝm ra. Mbraa kǝnǝsa na ɓa kǝ tom nuu mbraa wa a sanii, u ǝn nfeesǝ aa na huurtu pakarese wa.”

¹⁵ Pa toone kaya yaa nkee me, “Yaa kwang ya, ǝnǝ na mbraa sǝma, me nǝ ɓaarǝ nǝ kura mbraa sima ɗǝm ra, ɗǝm nǝ ɓaarǝ nǝ wo a hamɓa me nǝ nkwee mbraa ra.”

¹⁶ Pa Yeso yaa nkee me, “Ngo ko ngǝ yar kerange, sǝ wo.”

¹⁷ Pa yǝ kak yaa nkee me, “Nase nǝ sem ma kere ra.” Yeso yaa nkee me, “Ngǝ nkee ɓongtǝran, ngǝ nkeesǝ me ngǝ sem ma kere ra wa,

¹⁸ me a ɓongtǝrato, ngǝ nsaa kera wonon, yaa sǝsǝ ke waso ya, sem kerange ra.”

¹⁹ Pa toone kaya yǝ nkee Yeso me, “Yaa kwang ya, waso nǝ maan me ngǝ an nawanto ya.

²⁰ Sirta ɓǝta ɓǝ nyoo Kaa a yol wa, pa waaso Yahudawa sǝ nkee me, tomon ɗaɗ tǝ nyoo Kaa a Urshalima.”

²¹ Pa Yeso yaa kak yaa nkee me, “Toone, aa na ɓongtǝra ma mbu nǝn nkee ngǝsǝ ɓa, me ferko kǝn kǝ wo, u ɓeta ɓaa nkaa ɓǝ nyoo Kaa a yolo wa ra, hana Urshalima ra.

²² Saa ɓaa Samariya ɓa, sǝ maa mbu sǝn nyoosǝn nyoo ɓa ra. Pa waato ɓaa Yahudawa ɓa, tǝ maa mbu tǝn nyoosǝ ɓan, me konkweera wa fiɗ a Yahudawa ni.

²³ Pa ferko kǝn ǝn wowo, nga waso ma yǝ wee won, u ɓaa ɓǝn nyoosǝ Kaa ma ɓongtǝrato ɓa, kǝɓǝ nyoo Paapa a Wiso ma ɗǝm ɓongtǝrato, me paapa yǝn kǝr nkaamǝra ɓeta sǝra ɓaa nyoo.

²⁴ Kaa yǝ wiso, ɓaa ɓǝn nyoo sǝsǝ ɓa ɗǝm, tomon ɗaɗ ɓaa nyoo a wiso ma ɓongtǝrato ɗǝm.”

²⁵ Pa toone kaya yǝ nkee Yeso me, “Nǝ maan me Almaseho yǝn wowo ya ǝn yarsǝsǝ me Krisiti ya. Me yǝ won, kiyǝ tǝ weɗa mbusa nsaad.”

²⁶ Yeso yaa nkee me, “Nase nǝn kansǝ ma ngase ya, ǝn niina sase.”

²⁷ Ɓǝn feɗ kanmǝran feɗe, pa emfǝɗkaa ɓǝsa ɓǝ wosǝ ɓǝ wǝr yǝn kankan ma toone wa, pa ɓǝ tom mbu nhiinyanhiinya ɓa. Pa yaake sem kǝn yǝ taasǝ toone siya me, “Ngǝn taa mbiu ra,” hana ɓǝ taa Yeso me, “Ngǝn kan ma toone ya men mbiu ra?”

²⁸ Pa toone kaya yǝ lee hun usu kǝnso, yǝ faɗ a ɗaaso uru wa, yǝ nkee ɓeta,

²⁹ “Saawo, Sǝ wǝr eɗ yǝ nkee nǝsǝ mbu nǝ pǝtasǝ tomo ɓa nsaad, yaa minda ǝn sase Almaseho?”

³⁰ Pa ɓeta ɓǝ toma fiɗo a ɗaaso uru wa, ɓǝ wo a Yeso ni.

³¹ Ɓaa tomo maaso wa, pa emfǝɗkaa Yeso ɓa, ɓaa kǝna me, “Malǝm, aa se mbuseya.”

³² Pa Yeso yǝɓǝ nkee me, “Nǝ ma mbuseya ka, u sǝ maa mbuka a si ra wa.”

³³ Pa emfǝɗkaa ɓǝsa ɓǝ taa ɓaatǝ me, “Ko yaake yǝ wosǝsǝ ma mbuseya nǝu?”

³⁴ Pa Yeso yǝ nkee me, “Mbuseya ɓǝna, ǝn siso nǝ tom mbu yaa yǝ timinǝsǝ ya, yǝn taasǝ ɓa, na ɗǝm feɗ tinima ima.

³⁵ Sǝ nkeenyaa me, ‘Pee ofe kurun a ɗaɗ koma rau’? Pa nǝn nkeesǝ, sǝ sengge nyaanyaa yaɓ, ɓǝ ween, ɓǝ kana ɗaɗɗon.

³⁶ Hana waso, an ɗaɗɗe ya, yǝn taa nsaa usu, ɗǝm yǝn kwau mbuseya u ǝn nasǝ huurtu pakarese wa ya, pa me maso, an rǝke ya ma an ɗaɗɗe ya, ɓǝkǝ tom hur kuɗa wa ke.

³⁷ A hamɓa wa, mǝɗkǝra mara ra ǝn ɓongtǝra, u nkeesǝ me, ‘Ate yǝ rǝkǝ, ate ɗǝm yǝ ɗaɗɗa.’

³⁸ Nǝ timisǝ me sǝ ɗaɗ mbu sǝ kong a si ɓa ra. Ɓaata ɓǝ wee kongsan, pa saase sǝ kura nepto kongsa ɓoson.”

³⁹ Ɓaa Samariya ɓa dem a ur siso, ɓǝ na ɓongtǝra ma Yeso, a ɗuura mara toone sisi nkeesǝ ɓa me, “Eɗ ɗa, yǝ nkeenǝ mbu nǝ pǝtasǝ tomo ɓa nsaad.”

⁴⁰ Pa ɓaa Samariya sǝɓa wosǝ a Yeso ni wa, ɓaa kǝna me, yǝ kaɗ ke ma ɓosa, pa yǝ yauwa ɓǝ kaɗ tǝro raɓ.

⁴¹ Pa ɓeta dem u faɗsǝ ɓaa ntiiri ɓa wa, ɓǝ na ɓongtǝra ma Yeso, me a mara yǝn nkeesǝ ra.

⁴² Pa ɓaa Samariya ɓa, ɓǝ nkee toone kaya me, “Waso tǝ na ɓongtǝran, pa sem me a mbu ngǝ nkeetǝsǝ ɓa ra, me taase kǝn tǝ kuran ma ngweeme yaaten, ɗǝm tǝ yauwan me, ndǝ ɓongtǝra eɗ ɗa, ǝn an kon nkweera put ntaadi wa ya.”

Yeso yǝ roɓ au an tinima a taanda kuɓu ya

⁴³ Ndiira tǝro raɓ kawa, Yeso yǝ lee put Samariya wa, yǝ ko Galili

⁴⁴ Me ka Yeso ma nkweera ira, yǝ pǝta nkeen me, an nawanto ya, yǝ sem ma mbarta a ur usu ra.

⁴⁵ Pa yǝ kansǝ Galili wa, ɓaa Galili ɓa, ɓaa kon nema raɓ, me ɓosa ma ɓǝ wǝr nsaad mbu yǝ tomsǝ a Urshalima ɓan, a fer mbukamsa tadko wa.

⁴⁶ Pa Yeso yǝ ɓaarǝ yǝ kang a ur Kana u Galili wa, a han yǝ kǝrtǝsǝ mbraa aa kang mbraa inabi ma wa. A Kafarnahum, yaake kǝn yǝn tom tinima a taanda kuɓu ra, u auwesi yǝ sem kwakwa ra ya.

⁴⁷ Pa eɗ sisi yǝ kurasǝ me Yeso lee put Yahudiya wa, yǝ won Galili nǝn, pa yǝ ko a sanii, yaa kǝna me koyǝ roɓ auwesi u yǝsǝ a ee woɗɗa ya wa.

⁴⁸ Yeso yaa kak yaa nkee me, “Me ka sem me sǝ wǝr mbu nhiinyanhiinya ɓa ma mbu weɗara ɓa nhe ra, sǝ fǝta na ɓongtǝra wa ra.”

⁴⁹ Pa yaa yǝn tomsǝ tinima a taanda kuɓu ni siya, yǝ nkee Yeso me, “Yaa kwang ya, ngau ndǝ ko, tom ɓa auwane siya, yǝ woɗ ɗa.”

⁵⁰ Yeso yaa kak me, “Ngoo, auwange kiyǝ roɓɓo.” Pa eɗ kaya yǝ na ɓongtǝra ma mbu Yeso yǝ nkeesǝsǝ ɓa, yǝ faɗ mbusa.

⁵¹ Pa yǝsǝ a ɗǝɗa koko ɗur wa, ɓǝ pam ma hoota ita, ɓaa nkee me, “Auwange yǝ roɓɓon.”

⁵² Pa yǝɓǝ taa a fer na wa yǝ roɓsǝ, pa ɓaa nkee me, “Ura ma kaa ɗa, songra kara leesǝsǝ wa.”

⁵³ Pa pap au siya ya, yǝ maa me mbusa tom keke a fer Yeso yǝ nkeesǝsǝ me, “Auwange kiyǝ roɓɓo.” Pa eɗ kaya ma ɓet taanda ɓisa nsaad, ɓǝ na ɓongtǝra ma Yeso.

⁵⁴ U nwa, ǝn mbu nhiinyanhiinya raɓte Yeso yǝ tomsǝ wa, tǝng yǝ leesǝ Yahudiya yǝ ko Galili wa.