Yohanna 3 - Lala NT

Yeso ma Nikodimu

¹ Yaa Farisiyawa ke ǝn yarsǝ me Nikodimu, yǝ fin a ɗaaso wiina ɓaa Yahudawa ɓa.

² Yǝ wo a Yeso nǝ a pǝrtǝra, yaa nkee me, “Malǝm, tǝ maan me ngǝ mallǝm u Kaa yǝ timisǝ ya, me yaake sem kǝn kiyaa nkaa yǝ tom mbu nhiinyanhiinya ngǝn tomsǝ ɓa ra, men yaa Kaa yǝsǝ ke ma sase ya ra.”

³ Pa Yeso yaa kak me, “Nǝn nkeesǝ ɓongtǝra me, me ɓaa ɓaarǝ aa haa ete ɗǝm ra, yǝ wǝr kuɓsutu Kaa wa ra.”

⁴ Nikodimu yǝ taa me, “Kǝ tomtomni ka ɓaarǝ aa haa ete ɗǝm si yǝ nkoon niu? Ki yǝ nkaa yǝ ɓaarǝ yǝ kana kuɗa maasi ra aa haa ɗǝmǝu?”

⁵ Yeso yaa kak me, “Nǝn nkeesǝ ɓongtǝra me, yaake yǝ kana kuɓsutu Kaa wa ra, ndub me ɓaa haasǝn ma lau mbraa ma Wiso wan.

⁶ Mbu monma ma maabiri haasǝ ɓa, ǝn monma ma maabiri, pa mbu Wiso haasǝ ɓa, ǝn wiso.

⁷ Ə ngǝn tom mbu nhiinyanhiinya ɓa ra, a ɗaaso nǝ nkee ngǝsǝ me, ‘Tomon ɗaɗ, ɓaasǝ ɓaarǝ sǝ haa ɗǝm’.

⁸ Yoro yǝn nyaa ma lau yǝn yausǝ wa. Ngǝn kura nyaa usu, pa ngǝ maa me ko yǝ fiɗ nau ra, ɗǝm ngǝ maa lau yǝ kosǝ wa ra. Kǝ tom maaso ma hana yamni, yaa Wiso haasǝsǝ ya.”

⁹ Nikodimu yǝ taa me, “Kǝ tomtomni mbusa ka tomou?”

¹⁰ Pa Yeso yaa kak me, “Ngase ngǝ malǝm Isra'ila wa,” Pa nding waso ngǝ maa mbusǝsa rau?

¹¹ Ɓongtǝra nǝn nkee ngǝ, tǝn kan mbu tǝ masǝ ɓa, tǝn ɗǝm nkeesǝ mbu tǝ wǝrsǝ ɓa, nsaad siso sǝ yau sǝ kon mbu tǝ nkeesǝsǝ ɓa ra.

¹² Nǝn nkeesǝ mara a ɗuura mbu a put ntaadi wa ɓa, pa sǝ na ɓongtǝra ra, kǝ tomtomni kǝsaa na ɓongtǝra me nǝ nkeesǝ mbu a liura ɓau?

¹³ Yaake sem kǝn yǝ pǝtasǝ taa a liura wa ra, men Au Ete ya fin mbusa ra, yaa yǝ hamsǝ a liura ya.

¹⁴ Nga Musa yǝ niksǝ nsaa a sanglo wa, maaso ɗǝm, tomon ɗaɗ a nik Au Ete ya,

¹⁵ me nsaad yaa yǝ nasǝ ɓongtǝra a sani ya, kiyǝ taa huurtu pakarese wa.

¹⁶ “Me Kaa yǝ yau put ntaadi wa kwang, ǝn siso mbu kwasǝ yǝ nasǝ Auwesi fin ya, me nsaad yaa yǝ nasǝ ɓongtǝra a sani ya, yǝ woɗ ɗa, pa yǝ taa huurtu pakarese wa.

¹⁷ Me Kaa yǝ timi Auwesi a put ntaandi wa, me wo yǝ kan kiita put ntaandi wa ra, pa me put ntaadi wa ɓǝ taa kon nkweera wa lau usu.

¹⁸ Nsaad yaa yǝ nasǝ ɓongtǝra a Au Kaa ya ni ya, ɓaa a kan kiita ra. Pa nsaad yaa yǝ na ɓongtǝra a sani ra ya, ɓaa weesǝ kan kiita wan, me yǝ yau yǝ na ɓongtǝra a ɗǝnda Au fin Kaa ya ra.

¹⁹ Kan kiita kawa yǝ maa, ɗekɗekto kana put ntaadi wa, pa ɓeta ɓǝ yau tebtebto a faɗ ɗekɗekto, me tinima ɓoma ǝn mbu kwalakwala ɓa.

²⁰ Nsaad yaa yǝn tomsǝ mbu kwalakwala ɓa ya, yǝ yau ma ɗekɗekto ra, yǝ fǝta wo a han ɗekɗek sǝsa ra, me yǝn kura kokto tom tinima ima aa nwanyǝ ra.

²¹ Pa yaa yǝn tomsǝ mbu ɓongtǝra ɓa ya, yǝn wo a ham ɗekɗekto ɓa, me ɓaa wǝr a talte mbu yǝn tomsǝ ɓa, yǝn tom ma kwasǝra Kaa ra.”

Yeso ma Yohanna an tom baptisma ya

²² Ndiira maaso wa, Yeso ma emfǝɗkaa ɓǝsa ɓǝ ko a put Yahudiya wa. Kǝnso yǝ kaɗ singǝ ma ɓosa, yǝn tom ɓeta baptisma.

²³ Yohanna ɗǝm yǝn tom baptisma a Ainon nkwang ma Salim, me mbraa kǝnso dem. Ɓeta ɓǝn wo dem me ɓǝ tom baptisma.

²⁴ Mbusa tom nhe, pa a neu Yohanna a han neu ɓeta wa.

²⁵ Pa emfǝɗkaa Yohanna ɓa, ɓǝ kana renǝta ma yaa Bayahude ke a ɗuura mara soɓɓo me ete yǝ tom ɗekɗek ra.

²⁶ Pa emfǝɗkaa ɓǝ ko a Yohanna ni ɓaa nkee me, “Malǝm, eɗ kasǝsǝ ke tangtang a kira sen Urdun wa siya, yaa ngase ma nkweerange ngǝ nkeesǝ mara a ɗuura ira ya, yǝ war, yǝn tom Baptisma ɓeta, ɗǝm hana yamni yǝn ko a sani.”

²⁷ Pa Yohanna yaa kak yaa nkee me, “Yaa ke sem kǝn kiya taa mbuka wa ra me ɓaa nasǝ a liura ra.

²⁸ Saase ma nkweerasa sǝ maan me nǝ nkeesǝ me, ‘Sem niina Almaseho ra, ɓaa timini me naa nkaa wo.

²⁹ A hiira kon toone ra, ker nkwaara ya, ǝn yaa ma nkwaara ya. Sik ker nkwaara usu yǝn ko yǝ war me yǝ kura kwar ker nkwaara ya maɗ, yǝn kura nepto dem me yǝ kura ker nkwaara siya yǝ kanan. Me maaso hur kuɗa nwaano kunggun.’ ”

³⁰ Tom ɗaɗ usu yǝ tomma sooko, nase ɗǝm nǝ toma kanggo ma ndiira.

Yaa yǝ fiɗsǝ a liura ya

³¹ “Pa Yohanna yǝ nkee me, Yaa yǝ fiɗsǝ a liura yǝ faɗ hana yamnin. Nsaad yaa yǝ fiɗsǝ a put ntaadiwa ya ǝn yaa a put ntaadi wa ya, ɗǝm yǝn kan mara nga yaa yǝsǝ a put ntaandi wa ya. Yaa ɗǝm yǝ fiɗsǝ a liura ya, yǝ faɗ hanan yamnin nsaad.

³² Me yǝn nkee mbu yǝ kurasǝ ɓa, ma mbu yǝ wǝrsǝ ɓa, hana maaso ɗǝm yaake yǝ yau ma mbu yǝn nkeesǝ ɓa ra.

³³ Pa nsaad yaa yǝ konsǝ mara sǝra ya, yǝ yauwan me, ɓong, Kaa yǝ yaa ma ɓongtǝra ya.

³⁴ Me yaa Kaa yǝ timisǝ ya, yǝn kan mara Kaa ra, me Kaa yǝn nasǝ Wis usu tǝngre sem ra.

³⁵ Paapa yǝn yau Auwe, ɗǝm yǝ tisǝ mbusa nsaad a nem isi.

³⁶ Nsaad yaa yǝn nasǝ ɓongtǝra a ɗuura Au kaya ra, yǝma huurtu pakarese wa. Pa nsaad yaa yǝ yau Au sisi ra ya, yǝ taa huurtu ra, pa nfiima Kaa ma kiyǝ kaɗ a ɗuura ira.”