Yohanna 2 - Lala NT

Mbukamsa kon toone wa, a put Galili wa

¹ A tǝrma taatǝn ma, ɓaa tom mbukamsa kon toone wa, a ur Kana a put Galili wa. Maa Yeso ya kǝnso,

² ɓaa kǝna Yeso ma emfǝɗkaa ɓisa ɓǝ wo a han mbukamsa kon toone kaɓa.

³ Pa mbraa emngwate inabi ma feɗsǝ wa, maa Yeso ya, yaa nkee me, “Mbraa emngwate inabi ɓosa feɗen.”

⁴ Yeso yaa kak me, “Maane, mbu kwaa mbi ngǝ wosǝ a naniu, fer nwaano kan sundu ra.”

⁵ Pa maa Yeso ya, yǝ nkee hoota sǝɓa me, “Nsaad mbu yǝ nkeesǝsǝ me sǝ tom ɓa, sǝ tomo.”

⁶ A hansǝsǝ wiina huna kǝsa kǝn kǝnso mindike u wǝrkǝsǝ ma dungate wa, huna sǝsa, hana nawa yǝn se kumta mbraa ta mindike mindike. Ɓaa Yahudawa ɓa, ɓǝn tom tinima ma huna sǝsa ɓaa tom soɓɓo ɗekɗek u alˈada ɓoso wa.

⁷ Pa Yeso yǝ nkee ɓan tinima sǝ ɓa me, “Sǝ kung huna sǝsa ma mbraa.” Pa ɓǝ kung kwak kwak nsaad.

⁸ Pa yǝɓǝ nkee me, “Nwa sǝ paa saa ko pap mbukamsa ya.” Pa ɓǝ tom maaso,

⁹ pa pap mbukamsa siya, yǝ pǝtasǝ mbraa u kǝrtǝsǝ a kang mbraa emngwate inabi ma wa, pa yǝ maa han fiɗsǝ ɓa ra, pa hoota ɓǝ nkweesǝ mbraa ɓa, ɓoso ɓǝ maan. Payǝ yar ker kaya a kalla,

¹⁰ yaa nkee me, “Hana yamni yǝn ntii yǝ na mbraa emngwate inabi u yaɓ wa, a ntiiri nhe, ndiira ɓeta weesǝ ɓǝ maa wa, pa ya fiɗ ma u kan u kaka wa ra wa. Pa nwaango ngǝ nhuukǝ mbraa emngwate inabi u yaɓ wa, ngǝn fiɗsǝ fiɗ waso.”

¹¹ U nwa ǝn ntiiri mbu nhiinyanhiinya Yeso yǝ tomsǝ wa, yǝ tom mbusǝsa a ur Kana a put Galili wa, yǝ nwanyǝ too usu, emfǝɗkaa ɓǝsa ɗǝm ɓǝ na ɓongtǝra ma sase.

¹² Ndiira maaso wa, pa Yeso yǝ ham yǝ ko Kafarnahum, ma maasi ma ɓaata ɓisa ma ɗǝm emfǝɗkaa ɓǝsa. Ɓǝ tom kaɗɗo tǝro ngeek kǝnso.

Yeso a hit Kaa Urshalima wa

¹³ A fer mbukamsa taɗko u ɓaa Yahudawa ɓa tomsǝ kǝk wa, pa Yeso yǝ ko Urshalima.

¹⁴ A taanda Hit ɓǝɗ Kaa Urshalima wa, yǝ taa ɓeta ɓǝn fang naa ma tǝmnkaa ma mukta ma ɓan paaki koɓa ɓa, ɓǝ kaɗsǝ a mbu kaɗ ɓosa.

¹⁵ Pa Yeso yǝ saɗ lǝɓra kura ra, yǝɓǝ pǝǝ nsaad a taanda Hit ɓǝɗ Kaa Urshalima wa, nsaad ma tǝmnkaa ma naa, ɗǝm yǝ yaasǝ ɓan paaki koɓaa sǝɓa, yǝ nwee han ɓǝn nhiisǝ koɓa ɓosa ɓa.

¹⁶ Pa Yeso yǝ nkee ɓaa ɓǝn fangsǝ mukta sǝɓǝ me, “Sǝ fiɗ ma mbusǝsa a ham ɓa! Sǝ kang ɗuur paane wa a tom lumu ra.”

¹⁷ Pa emfǝɗkaa ɓǝsa ɓǝ ɗim me ɓaa wee nyoron me, “Yauma nǝsǝ ma siso a ɗuur nwaango wa, ǝn kǝɗ nǝ nga ara.”

¹⁸ Pa ɓaa Yahudawa ɓa, ɓǝ taa Yeso me, “Yaa ǝn mbu nhiinyanhiinya mbiu kǝ ngǝtǝn weɗɗa me ngǝma kwangto ngǝ tom nsaad mbu ɓau?”

¹⁹ Yeso yǝɓǝ kak me, “Sǝ ookǝ hit Kaa wa, nase kǝn kǝna mar a tǝro taatǝn.”

²⁰ Pa ɓaa Yahudawa ɓa, ɓaa taa me, “Too meeta pu kuru haa mindike pa a mar hit Kaa wa, pa ngase ngǝ nkee me, kǝ ngǝ mar a tǝro taatǝn nǝu?”

²¹ Pa hit Kaa u Yeso yǝn kansǝ a si wa, ǝn maabiri isi.

²² Ndiira ɓaa niksǝ Yeso a woɗɗa wa, emfǝɗkaa ɓǝsa ɓǝ ɗim ma mbu Yeso yǝ nkeesǝ ɓa, pa ɓǝ na ɓongtǝra ma likarkar ɗǝm ma mara Yeso yǝ nkeesǝ ra.

Yeso yǝ maa kuti ɓeta yan nsaad

²³ A fer Yeso yǝsǝ Urshalima me hiira mbukamsa tadko ra wa, ɓeta dem ɓǝ wǝr mbu nhiinyanhiinya yǝ tomsǝ ɓan, pa ɓǝ na ɓongtǝra ma ɗǝnda ira.

²⁴ Pa Yeso yǝ yau ma ɓosa ra, me yǝ maa kuti ɓosen nsaad.

²⁵ Yǝn taa yaake me yaa nkee mbuka a ɗuura ete ra ra, me yǝ maa mbu yǝsǝ a kuɗa ete ran.