Yohanna 19 - Lala NT

Ɓaa nǝng kiita me a toɗ Yeso

¹ Pa Bilatus yǝ ti ɓaa hoɓ Yeso.

² Pa nsosamseɓǝ sǝk kukǝra u tǝute wa, ɓaa tung a ɗuura, ɓaa tung luktu welwel u kuɓsutu wa.

³ Pa ɓǝ wo a sanii, ɓǝn ɓaarǝ ɓaarǝ, ɓǝn hoɓsǝ, ɓǝn nkee me, Kuɓ ɓaa Yahudawa ɓa wa, “Huurtu nwaango yǝ tǝr falang.”

⁴ Pa Bilatus yǝ ɓaarǝ yǝ fiɗ ntaadi, yǝ nkee ɓaa Yahudawa ɓa me, “Sǝ sengge, kǝnǝsǝ hik Yeso ntaadi, me sǝ maa me nǝ taasǝ ma mbuka ra.”

⁵ Pa Yeso yǝ fiɗ ntaandi ma kukǝra kuɓsutu tǝute ra a ɗuura ira, ma luktu welwel wa, Bilatus yǝɓǝ nkee me, “Yaa eɗ sisi yǝ nwa.”

⁶ Pa nok kǝnso, kuɓsa nek mbusasa ma ɓan war hit ɓǝɗ Kaa Urshalima wa, ɓǝ wǝrsǝ Yeso wa, ɓǝ yauli ɓǝn nkee me, “Sa kwaakǝ! Sa kwaakǝ!” Pa Bilatus yǝ kak me, “Sǝ too kosaa kwaakǝ saase ma nkweerase, me niina nǝ taasǝ ma mbuka ra.”

⁷ Ɓaa Yahudawa ɓa, ɓǝ kak me, “Tǝma masaka, ɗǝm fǝɗkǝra masaka sǝra weɗɗa me, tomon keke me aa toɗɗo, me yǝ too ɗuura ira nga yǝn Au Kaa ya.”

⁸ Pa Bilatus yǝ kurasǝ mara sǝra maaso wa, yǝ sookǝ kura kokto wa.

⁹ Pa yǝ ɓaarǝ yaa kang ɗaan a taanda kuɓsutu ra, yǝ taa Yeso me, “Ngǝ fiɗ nau?” pa Yeso yǝ kaksǝ mbuka ra.

¹⁰ Bilatus ya nkee me, “Ngǝnǝ kak rau? Ngǝ maa me nǝma kwangto nǝngǝ lee hana nǝngǝ kwaakǝ rau?”

¹¹ Yeso yaa kak me, “Ngǝ sem ma kwangto a ɗuura naa ra, me ɓaa na ngǝ a liura ra. Me maso, yaa yǝ fang nasǝ a ngani ya, yǝ faɗ ngǝ tenatenaton.”

¹² Tǝng siso, Bilatus yǝ kweetǝ me yǝ lee Yeso yǝ faɗ mbusa, pa ɓaa Yahudawa ɓa, ɓǝ tomaa yaulira, ɓǝn nkee me, “Me ngǝ lee eɗ sisi yaa faɗan, ngǝ sik Kaisar ya ra. Ai hana yamni yaa yǝ kangsǝ ɗuura ira yǝn kuɓu ya, yǝn tom ɗuura kwakwa ra Kaisar.”

¹³ Pa Bilatus yǝ kurasǝ mbusǝsa maso wa, yǝ fiɗ ma Yeso ntaandi, pa sase Bilatus yǝ kaɗ a han kankiita ɓa, a han ǝn yarsǝ me, Daɓe u ɗungate wa. Ma ee Ibraniyawa ya, ǝn yarme Gabbata.

¹⁴ A kaa sǝsa ǝn kaa werkǝ mbukamsa tadko ɓa, a fer siso, si kaa ɗa. Pa Bilatus yǝ nkee ɓaa Yahudawa ɓa me, “Kuɓ waaso nwa!”

¹⁵ Pa ɓǝ nik kwaro, ɓǝn yauli me, “Saa toɗɗo! Saa toɗɗo! Saa kwaakǝ!” Pa Bilatus yǝɓǝ taa me, “Sǝn taa me nǝsǝ kwaakǝ kuɓ wa sou?” Pa wiine kuɓ nek mbusa ɓa, ɓǝ kak me, “Waato tǝ sem ma kuɓu ra, me sem Kaisar ra.”

¹⁶ Pa Bilatus yǝ too Yeso yǝɓǝ na me aa kwaakǝ.

Ɓaa kwaakǝ Yeso

¹⁷ Pa nsosamse ɓǝ faɗ ma Yeso. Yeso ma nkweeresi, yǝ toosǝ kwaakǝra ira yaa ko a han ɓan yarsǝ me, Fero ɗuura wa, ma ee ɓaa Ibraniyawa ɓa ɗǝm, ǝn yar me Golgota.

¹⁸ A hansǝsa ɓaa kwaakǝsǝ Yeso wa, ma ɓaataka raɓ, fin a nem seya isi, fin ɗǝm a nem kwasa isi, pa Yeso yaa ɗaaso.

¹⁹ Bilatus yǝ nyor na ee ko, u ɓaa kwaakǝsǝ a ɗuura kwaakǝra kara ra. Mbu ɓaa nyorsǝ ɓa ǝn nkee me, “YESO EƊ NAZARAT YA, KUƁ Ɓaa YAHUDAWA ƁA WA.”

²⁰ Ɓaa Yahudawa ɓa dem, ɓǝ kau nyorma sǝman, me han ɓa kwaakǝsǝ Yeso ɓa, yǝ kwang ma uru. Nyorma kama, nyor ma ee Yahudawa ya ma ee Roma ya ma ee Heleniyawa ya.

²¹ Pa kuɓsa nek mbusasa ma ɓaa Farisiyawa ɓa, ɓǝ nkee Bilatus me, “Ngǝ nyor me, ‘Kuɓ ɓaa Yahudawa ɓa wa ra’, pa a nyor me, Eɗ ɗa, yǝn nkee me, yǝn kuɓ Yahudawa wa.”

²² Bilatus yǝ kak me, “Mbu nǝ weesǝ nyoro ɓa, nǝ nyoron.”

²³ Ndiira nsosamse ɓǝ kwaakǝsǝ Yeso wa, ɓǝ haa luktaa isa ɓǝ ɓaa handa kurun, hana nsosa nawa yǝ too handa fin. Pa ɓǝ too luktu usu u falang wa, ɓaa raa ma nema ntii ɓoti a ham a kunda.

²⁴ Pa ɓǝ nkee ɓaatǝ me, “Ndǝ nsaatǝ ra, aa lee ndǝ tom tauwo a si, ndǝ wǝr yaa kiyaa taa ya.” Mbusa tom maaso me aa kung mbu ɓaa nyorsǝ a likarkar Kaa wa ɓa me, “Ɓǝ ɓaa luktaa sǝna a ɗaaso ɓoso, ɗǝm ɓǝ tom tauwo a luktu nwaano.”

²⁵ Pa ɓaa ɓǝ nǝɗsǝ kwang ma han ɓaa kwaakǝsǝ Yeso ɓa wa, ǝn maasi maa ate isi, ma Maryamu toone Kilobas ya, ma ɗǝm Maryamu Magadaliya.

²⁶ Pa Yeso yǝ wǝrsǝ maasi, ma aufǝɗke yǝn yausǝsǝ kwang ya, ɓǝ kǝɗ kǝɗ kwang kǝnso wa, yǝ nkee maasi me, “Maane au wange nwa.”

²⁷ Pa yǝ nkee aufǝɗke siya me, “U nwa yǝ tom maange”. Tǝng siso aufǝɗke siya, yaa ko ma maa Yeso ya ɗuur usu.

Woɗɗa Yeso ra

²⁸ Ndiira maaso wa, Yeso maasǝ me mbusa nsaad feɗɗen wa, me aa kung mbu ɓaa nyorsǝ a likarkar Kaa wa ɓa, yǝ nkee me, “Mbraa ǝn sinǝ.”

²⁹ Pa kǝnda kǝra kǝn kǝnso kungsǝ ma mbraa sǝusǝu ma. Pa ɓǝ nrii soso ma mbraa sǝma, ɓǝ tung a kwalang falang wa, ɓaa tung a ee isi.

³⁰ Pa Yeso yǝ npoosǝ mbraa sǝusǝu sǝma wa, yǝ nkee me, “Peɗen!” Payǝ siu ɗuura ira a putu yǝ lee huurtu usu.

³¹ Pa me kaasǝsǝ ǝn kaa werkǝ mbusa hiira ɓa wa, ɗǝm me handa nween, kǝ tom kaa kwang u nwiinya ɓaa Yahudawa ɓa. Me ɓaa Yahudawa ɓa, ɓǝ yawa me aa lee maabiri ɓeta ya a kwaakǝra a kaa nwiinya ra, pa ɓaa Yahudawa ɓa, ɓǝ kǝna Bilatus me yǝ yau a kau natsa ɓaa ɓaa kwaakǝɓǝsǝ sǝɓa, ɗǝm aa ham ma maabiri ɓose.

³² Pa nsosamse ɓǝ wo, ɓǝ kau natsa yaa ntiiri ɓaa kwaakǝsǝsǝ ke ma Yeso wa, pa ɓǝ kau natsa yaa raɓte ya kǝn.

³³ Pa ɓǝ wosǝ a Yeso ni wa, ɓǝ wo ɓǝ wǝr yǝ wee woɗɗon, ɓǝ kau natsa isa ra.

³⁴ Pa usu, fin a ɗaaso nsosamse siya, yǝ sep Yeso ma kǝɗa a kal mɓǝre, nok kǝnso monma ma mbraa aa fiɗi.

³⁵ Yaa yǝ wǝrsǝ ma nuuwa usu ya, yǝ nkee mara sǝsa sase, mara yǝ nkee sǝsa ɗǝm, ǝn ndǝ ɓongtǝra. Yǝ maan me yǝn nkee ɓongtǝra, ɗǝm yǝ nkee me saase kǝn, sǝ na ɓongtǝra.

³⁶ Mbusǝsa tom maaso me a kung mbu ɓaa nyorsǝ a likarkar wa me, “Hana fin a ɗaaso tǝute usu a kaura,”

³⁷ ɗǝm nga likarkar ko ɓol nkeesǝ wa me, “Ɓǝkǝ sengǝ yaa ɓǝ sepsǝsǝ ya.”

Hok Yeso wa

³⁸ Ndiira maaso wa, Yusufu eɗ Arimatiya ya. Sase Yusufu yǝn aufǝɗke Yeso ya, pa a nhuukǝra me yǝn kura kokto ɓaa Yahudawa ɓa, yǝ kǝna Bilatus me yǝ na maabiri Yeso wa, Bilatus ɗǝm yǝ yau me yǝ too. Pa yǝ too maabiri Yeso ya.

³⁹ Ɓǝ ko ke ma Nikodimu, yaa kayǝ pǝtasǝ ko a Yeso ni a pǝrta wa. Nikodimu ko ma yar nseera yaɓ wa, u lǝklǝkto usu kansǝ pusa pu.

⁴⁰ Pa ɓǝ too maabiri Yeso wa, ɓǝ mɓǝrkǝ ma luktu hok woɗa wa, ɓaa puk yar nseera yaɓ suwa, ɓǝ tom maso nga ɓan tomsǝ a al‘ada hok woɗa u ɓaa Yahudawa ɓa.

⁴¹ A han ɓaa kwaakǝsǝ Yeso ɓa, ɓabra kǝra kǝn kǝnso, a ɓabra kara ɗaan, tiina nfii nfii ko kǝn, u ɓaa pǝta hok yaake a si wa ra.

⁴² Pa me ǝn kaa werkǝ hiira mbukamsa ɓaa Yahudawa ɓa wa, ɗǝm tina kawa yǝ ngwang wa, pa ɓǝ hok Yeso kǝnso.