Yohanna 17 - Lala NT

Yeso yǝ tom kǝnara me nkweera ira

¹ Ndiira Yeso yǝ nkeesǝ mbusǝsa maaso wa, pa yǝ nik ɗuura ira yǝ sengge liura, yǝ tom kǝnara yǝ nkee me, “Paapa, fer usu kanan. A too Auwange me Auwange kǝn yǝngǝ too.

² Me ngǝ na Auwange kwangton a ɗuura ɓeta ra nsaad, me yǝ na huurtu pakarese wa a ɓaa nsaad ngǝ nasǝsǝ ɓa.

³ Huurtu pakarese wa ǝn siso, ɓeta ɓǝ ngǝ maa, ngase fin maa nga ngǝ sǝ Kaa ɓongtǝra ya, ɓǝ ɗǝm maa Yeso Almaseho yaa ngǝ timisǝsǝ ya.

⁴ Nǝ too ngǝ a put ntaandi wa ma lau tom mbu nsaad ngǝ nanǝsǝ me nǝ tom ɓa.

⁵ Pa waso, Paapa, ǝnǝ too ma too u nǝsǝ ma siso a wii nwaango wa tǝng ɓaa ntiisǝ put ntaadiwa wa.”

Yeso yǝ tom kǝnara me emfǝɗkaa ɓisa

⁶ “Nǝ wee nkee ɓeta a put ntaadi wa mbusa nsaad a ɗuura nga, me ka nwaango, pa ngǝ nǝ na, ɓosa ɗǝm ɓǝ na mbarta ma mara nga.

⁷ Nwa ɓǝ maan me mbusa nsaad ngǝ na nǝsǝ ɓa, fiɗ a ngani.

⁸ Me maso mara ngǝ nkee nǝsǝ ra, nǝ nkee ɓǝn, ɗǝm ɓǝ konon. Ɓǝ maan me ɓongtǝra nǝ fiɗ aa ngani, ɓǝ ɗǝm na ɓongtǝran me ngǝ timinǝ ngiinga.

⁹ Nǝ tom kǝnara me ɓosa. Nǝ tomma kǝnara me put ntaadi wa ra, pa me ɓaa ngǝ nanǝsǝ ɓa, me ɓǝn nwaango.

¹⁰ Nsaad mbu nǝsǝ ɓa ǝn nwaango, ɗǝm mbu nsaad ngǝsǝ ɓa ǝn nwaano. Ɓaa ɗǝm weɗɗa too usu ma lau usu.

¹¹ Waso nǝn wowo, nǝ kaɗ a put ntaadi wa ɗǝm ra, pa ɓet ɓa ɓaa put ntaadi wa kweɗ, pa nwaano nǝn wowo a ngani. Paapa yaa ɗekɗek ya, ǝɓǝ sengge ma kwangto nwaango ɗǝnda nga wa, wato ɗǝnda ngǝ nanǝsǝ ra, me ɓǝ tom fin nga nǝsǝ ma ngase fin nwa.

¹² Fer nǝsǝ ke ma ɓosa wa nǝ sengge ɓǝ ma kwangto ɗǝnda nga wa, ɗǝnda ngǝ nanǝsǝ ra. Nǝ sengǝ ɓǝn yaake yǝ leetǝ ra, me sem yaa fin yǝsǝ au ara siya ra. Yǝ leetǝ me a kung mbu ɓaa nyorsǝ a likarkar mara Kaa ra ɓa.

¹³ “Nǝn wowo waso a ngani, pa nǝn kǝna mbu sǝsa na nǝ nding a put ntaadi wa, me ɓan ɓǝɗ ɓǝna ɓǝ taa hur kuɗa wa.

¹⁴ Nǝ nkee ɓǝ mara ngaan. Ɓet a put ntaadi wa ɓa, ɓǝ mbisi ɓǝn, me ɓǝ sem ɓet put ntaadi wa ɓa ra, nga nase kǝn nǝsǝ sem yaa put ntaadi wa ra ya.

¹⁵ Kǝnara na sem me ngǝ ɓǝ too a put ntaadi wa ra, pa ngǝ ɓǝ naa a yaa kwalakwala ya.

¹⁶ Ɓosa ɓǝ ɓaa a put ntaadi wa ɓa ra, nga nase kǝn nǝsǝ sem yaa put ntaadi wa ra ya.

¹⁷ Əɓǝ sob ma lau ɓongtǝra wa, me mara ngaa ǝn ɓongtǝra.

¹⁸ Nga ngǝ timi nǝsǝ a put ntaadi wa wa, nasǝ kǝn nǝn timiɓǝ a put ntaadi wa.

¹⁹ Me a ɓora nǝn nasǝ ɗuura nawa me ɓosa kǝn ǝɓǝ sob ma ɓongtǝra.

Yeso yǝ tom kǝnara a ɗuura ɓan ɓǝɗ ɓisa nsaad

²⁰ “Nǝ ɗǝm kǝna a ɗuura ɓet ɓa ra. Pa nǝn kǝna a ɗuura nsaad ɓaa ka na ɓongtǝra ma mara ɓora ɓa,

²¹ a ɗuura me ɓǝ nsaad ɓǝ tom fin, Paapa, nga ngǝsǝ a nani nase ɗǝm a ngani wa. Aa lee ɓǝ kaɗ ke ma ndaase me ɓet aput ntaadi wa ɓa, ɓǝ na ɓongtǝra me ngǝ timi nǝn.

²² Nǝ naɓǝ too u ngǝ nasǝ wan, me ɓǝ tom fin nga ndǝsǝ fin wa.

²³ Naasǝ na ɓoni, ngase kǝn nga nani me ɓǝ kaɗ fin ɓong, ɓet put ntaadi wa ɓǝ maa me ngǝ timi nǝ ngiinga, ɓǝ ɗǝm maa me ngǝ yau ɓǝn nga ngǝ yaunǝsǝ wan.

²⁴ “Paapa, nǝn yau me ɓaa ngǝ nasǝ ɓa, ɓǝ kaɗ ke ma niina a han nǝsǝ ɓa. Nǝn taa me ɓǝ wǝr too yau, u ngǝ nasǝ wa me ngǝn wa yaunǝ si ɓaa werkǝ put ntaadi wa ra

²⁵ “Paapa, yaa ma ɓongtǝra ya, Ɓet put ntaadi wa ɓa, ɓǝ maa ngǝ ra, pa nwaano nǝ maa ngǝn, ɗǝm ɓet ɓaa ɓǝ maa me ngǝ timi nǝ ngase.

²⁶ Nǝ nkee ɓǝ ɗǝnda ngaan, kǝnǝ faɗ wiiyo ma nkee usu, me ɓosa kǝn ɓǝ taa yauta ngǝ weɗa nǝsǝ ta, nase kǝn nǝ kaɗ a ɓoni.”