Yohanna 15 - Lala NT

Yeso ǝn sase ɓot Inabi yaɓ ma

¹ “Niina nǝ ɓot inabi u ɓongtǝra wa, Paane ɗǝm ǝn sase an waa nyaanyo siso ya.

² Nsaad para yǝsǝ a nani ya, pa yǝ nsee emba ra ya, kiyaa ɗaɗɗa. Para ɗǝm yǝn nseesǝ emba ya, yǝn senggesǝ yaɓ, me yǝ sookǝ nsee emba wa.

³ Hana waso ɓaa weesǝ soɓɓon, me a mara nǝ nkeesǝsǝ ra.

⁴ Sǝ kaɗ ɗaan a nani, nase kǝn ɗaan a saani. Nga para ɓot inabi ma yǝ nkaa yǝ nsee emba fin mbusa ra wa, ndub me yǝ kak a ɓot inabi man, maaso saase kǝn, sǝ nkaa nsee emba ra, ndub me sǝ kaɗ ɗaan a nanin.

⁵ “Niina nǝ ɓot inabi ma, saase ɗǝm sǝ para. Yaa yǝ kaɗsǝ ɗaan a nani ya, niina kǝn ɗaan a sanii ya, ǝn sase yǝn nseesǝ emba dem ya. Me sem ke ma niina ra, sǝ nkaa sǝ tom mbuka ra.

⁶ Hana yamni yaa yǝ kaɗ ɗaan a nani ra ya, yǝ nga para ɓota u ɓaa fangsǝ aa ee wa. Ɓaa kǝ kwau kamǝra ira a muɗkǝ a ara, aa kǝɗǝ.

⁷ Me sǝ kaɗ ɗaan a nani, mara na ɗǝm yǝ kaɗ a kuɗa saan, kǝ sǝ kǝna nsaad mbu sǝn taasǝ ɓa, ɓaa kǝsǝ tomo.

⁸ U nwa ǝn ɗǝɗa ɓaa ka too Paane ra, me sǝn nsee emba dem, tommo maaso wa, kǝ weɗɗa me sǝn emfǝɗkaa ɓǝna wa.

⁹ “Nga Paapa yǝ yaunǝsǝ wa, maaso ɗǝm nase kǝn nǝ yausǝsǝ wa. To, saase sǝ kaɗ ɗaan a yauta na.

¹⁰ Me sǝ ɓǝɗ mbu nǝ nkeesǝsǝ ɓan, kǝsǝ kaɗ ɗaan a yauta na, nga keke niina nǝ ɓǝɗsǝ mbu Paane nkeesǝ ɓa wa, ɗǝm nǝ kaɗ ɗaan a yauta ita.

¹¹ Nǝ nkeesǝ maaso me hur kuɗa nwaano yǝ kaɗ ke ma saase, hur kuɗa waaso ɗǝm yǝ tom kungsǝ kungsǝ.

¹² U nwa ǝn siso mara na me, sǝ yau ɓaatǝ nga nǝ yausǝsǝ wa.

¹³ Yauta kǝtaa sem kǝn kwang faɗsǝ u nwa wa ra, me ete yǝ na huurtu usu me sikisi.

¹⁴ Sǝ sik ɓǝna me sǝ tom mbu nǝ nkeesǝsǝ ɓan.

¹⁵ Nǝ ɓaarǝ nǝsǝ yar me hoota ɗǝm ra, me hoora yǝ maa mbu an taanda isi yǝn tomsǝ ɓa ra. Pa nǝn yarsǝ me sik ɓǝna me nǝ nkeesǝ nsaad mbu nǝ kurasǝ a Paane ni ɓan.

¹⁶ Sǝ taunǝ saase ra, pa nǝ tausǝ niina, nǝ tisǝ me kosǝ nsee emba, em ɓǝsa ɗǝm ɓǝ tom ɓaa kǝɓaa kaɗ pakarese wa. Pa paapa kiyǝsǝ na nsaad mbu sǝ kǝnasǝ a ɗǝnda na ɓa.

¹⁷ U nwa ǝn siso mara na me, sǝ yau ɓaatǝ.”

Put taandi wa mbisǝ emfǝɗkaa

¹⁸ Pa Yeso yǝ faɗ wiyo yǝ nkee me, “Me ɓet put taandi wa ɓa mbisǝsǝ, sǝ maa me ka ɓǝ ntii ɓǝnǝ mbisǝ nhe.

¹⁹ Me kasǝ ɓet put taandi wa ɓa, ɓet put taandi wa kama ɓǝ kǝsǝ yau nga u ɓoso. Pa me sǝ sem ɓet put taandi wa ɓa ra, nǝ ɗǝm tausǝ a put ntaadi wa, ǝn siso put ntaadi wa ɓǝ mbisǝsǝ wa.

²⁰ Sǝ ɗim ma mara nǝ nkeesǝsǝ ra me, ‘Hoora yǝ faɗɗaa an taanda isi ra.’ Me ɓǝ nanǝ kongsan, saase kǝn ɓǝkǝsǝ na kongsa. Me kaɓǝ ɓǝɗ mbu nǝ nkeesǝ ɓan, kama kǝɓǝ ɓǝɗ mbu sǝ nkeesǝ ɓa.

²¹ Pa ɓǝkǝsǝ na kongsa maaso me ɗǝnda na, me ɓǝ maa Yaa yǝ timinǝsǝ ya ra.

²² Me kanǝ wo nǝɓǝ nkee mara ra, kama ɓǝ tom ma tenatenato ra. Pa waso ɓǝ sem ma mbu kǝɓa noo a tentenato ɓoso wa ra.

²³ Yaa yǝ mbisǝ nǝsǝ ya, yǝ mbisǝ Paane.

²⁴ Me kanǝ tom tinimsa a ɗaaso ɓoso u yaake pǝta tomo wa ra, kama ɓǝ tom ma tenatenato ra. Pa waso ɓǝ wǝr mbu nhiinyanhiinya nǝ tomsǝ ɓan, pa nding siso ɓǝ mbisǝ nǝn, ɗǝm ɓǝ mbisǝ Paanen.

²⁵ Pa mbusa tom maaso me aa kung mbu nyorsǝ a Masaka ɓa me, ‘Ɓǝ mbisǝ nǝ, nǝ maa mbu kwasǝ ɓa ra.

²⁶ “Pa me Ankwasira ya yǝ won, u kǝnasǝn tung wa, ǝn Wis ɓongtǝra wa, u ǝn fiɗsǝ a Paapa ni wa, ǝn sase kiyǝsǝn nkee mara a ɗuura naa ya.

²⁷ Saase kǝn, sǝkǝ nkee mara a ɗuura na, me ka ndǝ ke ma saase tǝng a ntiiri wa.